“ວັນທີ 23–29 ເດືອນມິຖຸນາ: ‘ມີຄ່າ … ເກີນກວ່າຄວາມຮັ່ງມີໃດໆຢູ່ໃນໂລກນີ້’: ຄຳສອນ ແລະ ພັນທະສັນຍາ 67–70,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 67–70,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 23–29 ເດືອນມິຖຸນາ: “ມີຄ່າ … ເກີນກວ່າຄວາມຮັ່ງມີໃດໆຢູ່ໃນໂລກນີ້”

ຄຳສອນ ແລະ ພັນທະສັນຍາ 67–70

ຈາກປີ 1828 ເຖິງປີ 1831, ສາດສະດາ ໂຈເຊັບ ສະມິດ ໄດ້ຮັບການເປີດເຜີຍຫລາຍຢ່າງຈາກພຣະຜູ້ເປັນເຈົ້າ, ລວມທັງຄຳແນະນຳຈາກສະຫວັນສຳລັບສ່ວນບຸກຄົນ, ຄຳແນະນຳເລື່ອງການປົກຄອງສາດສະໜາຈັກ, ພາບນິມິດຂອງຍຸກສຸດທ້າຍ, ແລະ ຄວາມຈິງເລື່ອງນິລັນດອນທີ່ດົນໃຈຫລາຍຢ່າງ. ແຕ່ໄພ່ພົນຫລາຍຄົນຍັງບໍ່ໄດ້ອ່ານມັນເທື່ອ. ການເປີດເຜີຍຍັງບໍ່ໄດ້ຖືກຈັດພິມເທື່ອ, ແລະ ປຶ້ມຈຳນວນໜ້ອຍໜຶ່ງທີ່ມີໃຫ້ໃຊ້ກໍຂຽນເອົາ ໄວ້ໃນເຈ້ຍເປັນແຜ່ນໆ ທີ່ສະມາຊິກສົ່ງຕໍ່ໃຫ້ກັນອ່ານ ແລະ ຜູ້ສອນສາດສະໜາໄດ້ເອົາໄປນຳ.

ແລ້ວ, ໃນເດືອນພະຈິກ ປີ 1831, ໂຈເຊັບໄດ້ເອີ້ນໃຫ້ມີການປະຊຸມສະພາຜູ້ນຳຂອງສາດສະໜາຈັກ ເພື່ອສົນທະນາເລື່ອງການຈັດພິມການເປີດເຜີຍ. ຫລັງຈາກໄດ້ສະແຫວງຫາພຣະປະສົງຂອງພຣະຜູ້ເປັນເຈົ້າແລ້ວ, ຜູ້ນຳເຫລົ່ານີ້ໄດ້ວາງແຜນທີ່ຈະຈັດພິມປຶ້ມພຣະບັນຍັດ—ກ່ອນຄຳສອນ ແລະ ພັນທະສັນຍາ ໃນປະຈຸບັນນີ້. ບໍ່ດົນທຸກຄົນຈະສາມາດອ່ານພຣະຄຳຂອງພຣະເຈົ້າທີ່ໄດ້ເປີດເຜີຍຜ່ານທາງສາດສະດາທີ່ມີຊີວິດຢູ່ດ້ວຍຕົວເອງ, ຊຶ່ງເປັນຫລັກຖານທີ່ແຈ້ງຊັດວ່າ “ຂໍກະແຈແຫ່ງຄວາມລຶກລັບຂອງອານາຈັກຂອງພຣະຜູ້ຊ່ວຍໃຫ້ລອດຂອງເຮົາໄດ້ຖືກຝາກຝັງໄວ້ກັບມະນຸດອີກເທື່ອໜຶ່ງ.” ເພາະດ້ວຍເຫດຜົນເຫລົ່ານີ້ ແລະ ຫລາຍໆເຫດຜົນອື່ນອີກ, ໄພ່ພົນໃນເວລານັ້ນ ແລະ ໃນເວລານີ້ ຈຶ່ງຄິດວ່າການເປີດເຜີຍເຫລົ່ານີ້ “ມີຄ່າ … ເກີນກວ່າຄວາມຮັ່ງມີໃດໆຢູ່ໃນໂລກນີ້” (ຄຳສອນ ແລະ ພັນທະສັນຍາ 70, ຫົວຂໍ້ພາກ).

ເບິ່ງ Saints, 1:140–43.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 67:1–9; 68:3–6

ຜູ້ຮັບໃຊ້ຂອງພຣະຜູ້ເປັນເຈົ້າກ່າວຕາມພຣະປະສົງຂອງພຣະອົງເມື່ອໄດ້ຮັບການດົນໃຈໂດຍພຣະວິນຍານບໍລິສຸດ.

ການຕັດສິນໃຈທີ່ຈະພິມການເປີດເຜີຍ ທີ່ໄດ້ຮັບໂດຍໂຈເຊັບ ສະມິດ ເບິ່ງຄືວ່າເປັນເລື່ອງງ່າຍ, ແຕ່ຜູ້ນຳຂອງສາດສະໜາຈັກລຸ້ນທຳອິດ ບໍ່ແນ່ໃຈວ່າມັນເປັນແນວຄິດທີ່ດີ. ຄວາມເປັນຫ່ວງຢ່າງໜຶ່ງແມ່ນກ່ຽວກັບຄວາມບົກຜ່ອງໃນພາສາທີ່ໂຈເຊັບ ສະມິດ ໄດ້ໃຊ້ເພື່ອຂຽນການເປີດເຜີຍ. ການເປີດເຜີຍທີ່ໄດ້ຮັບຢູ່ໃນ ພາກທີ 67 ເປັນຄຳຕອບຕໍ່ຄວາມເປັນຫ່ວງນັ້ນ. ທ່ານຮຽນຮູ້ຫຍັງແດ່ກ່ຽວກັບສາດສະດາຂອງພຣະຜູ້ເປັນເຈົ້າ ແລະ ການເປີດເຜີຍ ຈາກ ຂໍ້ທີ 1–9? ມີຄວາມຮູ້ເພີ່ມເຕີມໃດແດ່ທີ່ທ່ານໄດ້ຮັບຈາກ 68:3–6?

ທ່ານໄດ້ມາຮູ້ຈັກດ້ວຍຕົວເອງແນວໃດວ່າ ການເປີດເຜີຍທີ່ພຣະເຈົ້າມອບໃຫ້ຜູ້ຮັບໃຊ້ຂອງພຣະອົງນັ້ນເປັນຄວາມຈິງ? ທ່ານອາດໄຕ່ຕອງປະສົບການເມື່ອທ່ານໄດ້ຮູ້ສຶກວ່າພຣະຜູ້ເປັນເຈົ້າໄດ້ກ່າວກັບທ່ານ ຜ່ານທາງຜູ້ຮັບໃຊ້ຄົນໜຶ່ງຂອງພຣະອົງນຳອີກ (ເບິ່ງ ຄຳສອນ ແລະ ພັນທະສັນຍາ 68:4). ເມື່ອໃດແດ່ທີ່ທ່ານໄດ້ຮູ້ສຶກວ່າ “ໄດ້ຮັບການດົນໃຈໂດຍພຣະວິນຍານບໍລິສຸດ” (ຂໍ້ທີ 3) ທີ່ຈະກ່າວບາງສິ່ງບາງຢ່າງ? ພຣະຜູ້ເປັນເຈົ້າໄດ້ “ຢືນຢູ່ກັບພວກເຈົ້າ” ແນວໃດ? (ຂໍ້ທີ 6).

ກ່ອນປຶ້ມພຣະບັນຍັດໄດ້ຖືກຈັດພິມ, ຜູ້ນຳຂອງສາດສະໜາຈັກຫລາຍຄົນໄດ້ເຊັນປະຈັກພະຍານທີ່ເປັນລາຍລັກອັກສອນ ວ່າການເປີດເຜີຍຢູ່ໃນປຶ້ມນັ້ນເປັນຄວາມຈິງ. ເພື່ອຈະເບິ່ງສຳເນົາຂອງປະຈັກພະຍານຂອງພວກເພິ່ນ, ໃຫ້ເບິ່ງ “Testimony, circa 2 November 1831,” Revelation Book 1, 121, josephsmithpapers.org.

ຄຳສອນ ແລະ ພັນທະສັນຍາ 67:10–14

“ດຳເນີນຕໍ່ໄປດ້ວຍຄວາມອົດທົນ.”

ຄວາມອິດສາບັງບຽດ, ຄວາມຢ້ານກົວ, ແລະ ຄວາມທະນົງຕົວ ກີດກັນເຮົາຈາກການເຂົ້າໃກ້ຊິດພຣະຜູ້ເປັນເຈົ້າໃຫ້ຫລາຍກວ່າເກົ່າແນວໃດ? ເຮົາຈະເອົາຊະນະ “ມະນຸດທີ່ມີຈິດໃຈທຳມະດາ” ຫລື “ຈິດໃຈແຫ່ງກາມມະລົມ” ເພື່ອວ່າເຮົາຈະສາມາດໄດ້ “ເຫັນ [ພຣະອົງ] ແລະ ຮູ້ວ່າ [ພຣະອົງເປັນຢູ່] ແນວໃດ”? (ຂໍ້ທີ 12; ເບິ່ງ ໂມໄຊຢາ 3:19) ນຳອີກ. ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ດົນໃຈທ່ານໃຫ້ “ດຳເນີນຕໍ່ໄປດ້ວຍຄວາມອົດທົນຈົນກວ່າພວກເຈົ້າ ຈະຖືກເຮັດໃຫ້ດີພ້ອມ”? (ຂໍ້ທີ 13).

ຄຳສອນ ແລະ ພັນທະສັນຍາ 68:25–31

ເຮົາສາມາດຊ່ວຍເຮັດໃຫ້ພຣະເຢຊູຄຣິດເປັນສູນກາງໃນບ້ານຂອງເຮົາ.

ພຣະຄຳຂອງພຣະຜູ້ເປັນເຈົ້າຢູ່ໃນ ຄຳສອນ ແລະ ພັນທະສັນຍາ 68:25–31 ອ້າງເຖິງຜູ້ເປັນພໍ່ແມ່ໂດຍສະເພາະ, ແຕ່ເຖິງແມ່ນວ່າທ່ານຈະບໍ່ເປັນພໍ່ແມ່ກໍຕາມ, ທ່ານສາມາດໃຊ້ຄຳແນະນຳຂອງພຣະອົງເພື່ອເຮັດພາກສ່ວນຂອງທ່ານ ທີ່ຈະເຮັດໃຫ້ຄຳສອນຂອງພຣະເຢຊູຄຣິດເປັນສູນກາງໃນບ້ານຂອງທ່ານ. ຢູ່ຂ້າງລຸ່ມນີ້ຄືຫລັກທຳບາງຂໍ້ທີ່ພຣະຜູ້ເປັນເຈົ້າກ່າວວ່າຄວນຖືກສິດສອນຢູ່ໃນບ້ານ. ໃຫ້ພິຈາລະນາວ່າທ່ານຈະສາມາດເຮັດໃຫ້ແຕ່ລະພາກສ່ວນເຫລົ່ານີ້ເປັນຮາກຖານຂອງບ້ານທີ່ມີພຣະຄຣິດເປັນສູນກາງແນວໃດ—ບ້ານທີ່ທ່ານອາໄສຢູ່ໃນເວລານີ້ ຫລື ບ້ານໃນອະນາຄົດຂອງທ່ານ. ແຫລ່ງຊ່ວຍເຫລືອ ແລະ ຄຳຖາມທີ່ມີໃຫ້ສາມາດຊ່ວຍໄດ້.

ການກັບໃຈ: ການສຶກສາ ແອວມາ 36:17–20, ແລະ ສັງເກດເຫັນວ່າແອວມາໄດ້ຮັບພອນແນວໃດ ໃນເວລາທີ່ຂັບຂັນ ເພາະບິດາຂອງເພິ່ນໄດ້ສິດສອນເພິ່ນກ່ຽວກັບພາລະກິດແຫ່ງການຊົດໃຊ້ຂອງພຣະຜູ້ຊ່ວຍໃຫ້ລອດ. ທ່ານຈະສາມາດດົນໃຈຄອບຄົວຂອງທ່ານໃຫ້ຫັນໄປຫາພຣະເຢຊູຄຣິດ ແລະ ກັບໃຈໄດ້ແນວໃດ? (ເບິ່ງ 2 ນີໄຟ 25:26 ນຳອີກ).
ສັດທາໃນພຣະຄຣິດ: ອ່ານຄຳແນະນຳຫ້າຂໍ້ຂອງປະທານຣະໂຊ ເອັມ ແນວສັນ ສຳລັບການພັດທະນາສັດທາໃນ “Christ Is Risen; Faith in Him Will Move Mountains” (Liahona, May 2021, 103). ໄຕ່ຕອງວ່າຄຳແນະນຳເຫລົ່ານີ້ສາມາດສ້າງວັດທະນະທຳແຫ່ງສັດທາໃນຄອບຄົວຂອງທ່ານໄດ້ແນວໃດ.
ການບັບຕິສະມາ: ທົບທວນພັນທະສັນຍາຂອງການບັບຕິສະມາ ດັ່ງທີ່ບັນຍາຍຢູ່ໃນ ໂມໄຊຢາ 18:8–10, 13. ຄວາມພະຍາຍາມຂອງທ່ານທີ່ຈະຮັກສາພັນທະສັນຍາ ສາມາດເພີ່ມຄວາມເຂັ້ມແຂງໃຫ້ແກ່ຄອບຄົວຂອງທ່ານໄດ້ແນວໃດ?
ຂອງປະທານແຫ່ງພຣະວິນຍານບໍລິສຸດ: ສຶກສາຄຳເຊື້ອເຊີນຢູ່ໃນ ໜ້າ 17–19 ຈາກ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອຈະເຊື້ອເຊີນອິດທິພົນຂອງພຣະວິນຍານບໍລິສຸດໃຫ້ຢູ່ໃນບ້ານຂອງທ່ານ?
ການອະທິຖານ: ທ່ານຮຽນຮູ້ຫຍັງແດ່ກ່ຽວກັບອຳນາດຂອງການອະທິຖານຢູ່ທີ່ບ້ານຢູ່ໃນ “ອະທິຖານຄອບຄົວ”? (ເພງສວດ ແລະ ເພງຂອງເດັກນ້ອຍ, 73). ພຣະຜູ້ຊ່ວຍໃຫ້ລອດສັນຍາພອນໃດແດ່ຢູ່ໃນ 3 ນີໄຟ 18:15–21?
ຫລັກທຳຢ່າງອື່ນທີ່ທ່ານພົບເຫັນຢູ່ໃນ ຄຳສອນ ແລະ ພັນທະສັນຍາ 68:25–31:

ທ່ານຈະໃຫ້ຄຳແນະນຳໃດແດ່ແກ່ຄົນໃດຄົນໜຶ່ງ ຜູ້ທີ່ຄອບຄົວຂອງເຂົາບໍ່ສະໜັບສະໜູນຄວາມພະຍາຍາມຂອງເຂົາທີ່ຈະສ້າງສັດທາໃນພຣະຄຣິດ?

ເບິ່ງ “ຄອບຄົວ: ການປະກາດຕໍ່ໂລກ,” ຫ້ອງສະໝຸດພຣະກິດຕິຄຸນ; Topics and Questions, “Parenting,” ຫ້ອງສະໝຸດພຣະກິດຕິຄຸນ; Dieter F. Uchtdorf, “Jesus Christ Is the Strength of Parents,” Liahona, May 2023, 55–59 ນຳອີກ.

ຄຳສອນ ແລະ ພັນທະສັນຍາ 69:1

ເພື່ອນທີ່ “ຈິງຈັງ ແລະ ຊື່ສັດ” ຊ່ວຍເຮົາໃຫ້ຕິດຕາມພຣະເຢຊູຄຣິດ.

ທ່ານຄິດວ່າເປັນຫຍັງມັນຈຶ່ງເປັນ “ຄວາມສະຫລຽວສະຫລາດໃນ [ພຣະຜູ້ເປັນເຈົ້າ]” ທີ່ບາງຄົນຜູ້ທີ່ “ຈິງຈັງ ແລະ ຊື່ສັດ” ໄປເປັນເພື່ອນຂອງອໍລີເວີ ຄາວເດີຣີ ໃນໜ້າທີ່ມອບໝາຍ ທີ່ຖືກບັນຍາຍຢູ່ໃນຂໍ້ນີ້? ຫລັກທຳຂໍ້ນີ້ກ່ຽວຂ້ອງກັບທ່ານແນວໃດ?

ຊ່ວຍຜູ້ຮຽນໃຫ້ຍົກກັນແລະກັນຂຶ້ນ. ແຕ່ລະບຸກຄົນໃນຫ້ອງຮຽນ ຫລື ຄອບຄົວຂອງທ່ານເປັນແຫລ່ງຂອງປະຈັກພະຍານ, ຄວາມຮູ້ແຈ້ງ, ແລະ ປະສົບການທີ່ອຸດົມສົມບູນ ໃນການດຳລົງຊີວິດຕາມພຣະກິດຕິຄຸນ. ເຊື້ອເຊີນເຂົາເຈົ້າໃຫ້ແບ່ງປັນນຳກັນ ແລະ ຍົກກັນແລະກັນຂຶ້ນ.

ຄຳສອນ ແລະ ພັນທະສັນຍາ 70:1–4

ເຮົາຕ້ອງຮັບຜິດຊອບຕໍ່ການເປີດເຜີຍທີ່ພຣະຜູ້ເປັນເຈົ້າໄດ້ມອບໃຫ້.

ພຣະຜູ້ເປັນເຈົ້າໄດ້ມອບໜ້າທີ່ຮັບຜິດຊອບໃຫ້ພວກແອວເດີບາງຄົນ ເພື່ອດູແລການຈັດພິມການເປີດເຜີຍ. ເຖິງແມ່ນວ່າທ່ານບໍ່ໄດ້ຮັບໜ້າທີ່ຮັບຜິດຊອບນັ້ນໂດຍສະເພາະ, ແຕ່ແມ່ນຫຍັງຄືການພິທັກຮັກສາ ຫລື ໜ້າທີ່ຮັບຜິດຊອບຂອງທ່ານທີ່ຈະ “ພິທັກຮັກສາການເປີດເຜີຍ ແລະ ບັນຍັດທັງຫລາຍ”? (ຂໍ້ທີ 3).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 67

ຄຳສອນ ແລະ ພັນທະສັນຍາສິດສອນເຮົາກ່ຽວກັບພຣະເຢຊູຄຣິດ.

ບອກລູກໆຂອງທ່ານກ່ຽວກັບວ່າ ການເປີດເຜີຍຂອງໂຈເຊັບ ສະມິດ ໄດ້ຖືກຈັດພິມເປັນປຶ້ມແນວໃດ (ເບິ່ງ “ບົດທີ 23: ຄຳສອນ ແລະ ພັນທະສັນຍາ,” ຢູ່ໃນ ເລື່ອງຄຳສອນ ແລະ ພັນທະສັນຍາ, 90–92, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ). ຊ່ວຍພວກເຂົາໃຫ້ຈື່ຈຳບາງສິ່ງທີ່ພວກທ່ານໄດ້ຮຽນຮູ້ກ່ຽວກັບພຣະເຢຊູຄຣິດຈາກ ຄຳສອນ ແລະ ພັນທະສັນຍາ ຈົນເຖິງເວລານີ້ຂອງປີນີ້. ພວກທ່ານຍັງສາມາດແບ່ງປັນຂໍ້ພຣະຄຳພີທີ່ໂປດປານຂອງພວກທ່ານນຳກັນຈາກ ຄຳສອນ ແລະ ພັນທະສັນຍາ ນຳອີກ.

2:2
Chapter 23: The Doctrine and Covenants: August–November 1831
ທ່ານຍັງສາມາດສະແດງພຣະຄຣິສຕະທຳຄຳພີ, ພຣະຄຳພີມໍມອນ, ຄຳສອນ ແລະ ພັນທະສັນຍາ, ແລະ ໄຂ່ມຸກອັນລ້ຳຄ່າ ໃຫ້ລູກໆຂອງທ່ານເບິ່ງ ແລະ ເວົ້າລົມກັບພວກເຂົາກ່ຽວກັບວ່າ ມັນແຕກຕ່າງກັນແນວໃດ ແລະ ວ່າມັນຄ້າຍຄືກັນແນວໃດ (ເບິ່ງຄຳບັນຍາຍຂອງໜັງສືເຫລົ່ານີ້ຢູ່ໃນ ຄູ່ມືພຣະຄຳພີ). ເຮົາຈະຮູ້ໄດ້ແນວໃດວ່າ ພຣະຄຳພີເຫລົ່ານີ້ເປັນຄວາມຈິງ? ເຮົາຮຽນຮູ້ຫຍັງແດ່ຈາກ ຄຳສອນ ແລະ ພັນທະສັນຍາ 67:4, 9 ກ່ຽວກັບການເປີດເຜີຍທີ່ພຣະຜູ້ເປັນເຈົ້າໄດ້ມອບໃຫ້ແກ່ໂຈເຊັບ ສະມິດ?

ຄຳສອນ ແລະ ພັນທະສັນຍາ 68:25–31

ເຮົາສາມາດຮັບບັບຕິສະມາເມື່ອເຮົາມີອາຍຸແປດປີ.

ໃນ ຄຳສອນ ແລະ ພັນທະສັນຍາ 68:27, ພຣະຜູ້ເປັນເຈົ້າໄດ້ລະບຸວ່າບຸກຄົນຕ້ອງມີອາຍຸເທົ່າໃດເພື່ອຈະຮັບບັບຕິສະມາໄດ້. ຊ່ວຍລູກໆຂອງທ່ານໃຫ້ຄົ້ນພົບສິ່ງທີ່ພຣະອົງໄດ້ກ່າວ. ເປັນຫຍັງພຣະເຢຊູຈຶ່ງຢາກໃຫ້ເຮົາຮັບບັບຕິສະມາ? ເພງເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດຊ່ວຍໄດ້. ໃຊ້ຮູບພາບ ຫລື ຂໍ້ທີ 25–31 (ຫລື ທັງສອງ), ເພື່ອຊ່ວຍລູກໆຂອງທ່ານໃຫ້ຄົ້ນພົບສິ່ງທີ່ພຣະຜູ້ເປັນເຈົ້າຢາກໃຫ້ເດັກນ້ອຍຮຽນຮູ້.

ອ່ານກັບລູກໆຂອງທ່ານກ່ຽວກັບໜ້າທີ່ມອບໝາຍທີ່ພຣະຜູ້ເປັນເຈົ້າໄດ້ມອບໃຫ້ແກ່ ອໍລີເວີ ຄາວເດີຣີ ຢູ່ໃນຫົວຂໍ້ພາກສຳລັບ ຄຳສອນ ແລະ ພັນທະສັນຍາ 69. ພຣະຜູ້ເປັນເຈົ້າມອບຄຳແນະນຳໃດແດ່ ຢູ່ໃນ ຂໍ້ທີ 1? ເປັນຫຍັງມັນຈຶ່ງສຳຄັນທີ່ຈະຢູ່ກັບຜູ້ຄົນທີ່ “ຈິງຈັງ ແລະ ຊື່ສັດ”? ບາງທີລູກໆຂອງທ່ານສາມາດບອກເລົ່າກ່ຽວກັບບາງຄົນທີ່ພວກເຂົາຮູ້ຈັກ ຜູ້ທີ່ເປັນຄົນ “ຈິງຈັງ ແລະ ຊື່ສັດ.” ຮ້ອງເພງໜຶ່ງນຳກັນ ເພງທີ່ໃຫ້ກຳລັງໃຈເດັກນ້ອຍທີ່ຈະເປັນຄົນທີ່ຈິງຈັງ ແລະ ຊື່ສັດເໝືອນດັ່ງພຣະຜູ້ຊ່ວຍໃຫ້ລອດ, ເຊັ່ນ “ເຮັດແຕ່ຄວາມດີ” (ເພງສວດ ແລະ ເພງຂອງເດັກນ້ອຍ, 38). ເຮົາຈະສາມາດເຮັດໃຫ້ແນ່ໃຈໄດ້ແນວໃດວ່າ ເຮົາເປັນຄົນທີ່ຈິງຈັງ ແລະ ຊື່ສັດຕໍ່ພຣະຜູ້ເປັນເຈົ້າ? ພຣະອົງຈະສາມາດໃຊ້ເຮົາເພື່ອເປັນພອນໃຫ້ແກ່ຄົນອື່ນໄດ້ແນວໃດ ເມື່ອເຮົາເປັນຄົນທີ່ຈິງຈັງ ແລະ ຊື່ສັດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ເຄື່ອງຈັກພິມ — ປຶ້ມພຣະບັນຍັດ, ກ່ອນພຣະຄຳພີຄຳສອນ ແລະ ພັນທະສັນຍາ, ໄດ້ຖືກພິມດ້ວຍເຄື່ອງຈັກທີ່ຄືກັນນີ້.