ພຣະເຢຊູຄຣິດເປັນຄວາມເຂັ້ມແຂງຂອງພໍ່ແມ່
ຊ່ວຍລູກໆຂອງທ່ານສ້າງສັດທາໃນພຣະເຢຊູຄຣິດ, ຮັກພຣະກິດຕິຄຸນຂອງພຣະອົງ ແລະ ສາດສະໜາຈັກຂອງພຣະອົງ, ແລະ ກະກຽມສຳລັບທາງເລືອກທີ່ຊອບທຳຕະຫລອດຊີວິດ.
ແຕ່ກີ້ແຕ່ກ່ອນ, ມີພໍ່ຄົນໜຶ່ງທີ່ກຳລັງຈະອອກເຮືອນໄປຮ່ວມການປະຊຸມຂອງຝ່າຍອະທິການໃນຄ່ຳຄືນໜຶ່ງ. ລູກສາວນ້ອຍຂອງລາວ ອາຍຸສີ່ປີໄດ້ກ້າວໄປຢືນຢູ່ຕໍ່ໜ້າລາວ, ນຸ່ງຊຸດນອນ ແລະ ຖືປຶ້ມ ເລື່ອງພຣະຄຳພີມໍມອນ.
“ເປັນຫຍັງພໍ່ຕ້ອງໄປປະຊຸມ?” ນາງໄດ້ຖາມ.
“ເພາະວ່າພໍ່ເປັນທີ່ປຶກສາໃນຝ່າຍອະທິການ,” ລາວໄດ້ຕອບໄປ.
“ແຕ່ພໍ່ເປັນພໍ່ຂອງລູກ!” ລູກສາວຂອງລາວໄດ້ຕໍ່ຕ້ານ.
ລາວໄດ້ຄຸເຂົ່າລົງຢູ່ຕໍ່ໜ້ານາງ. “ລູກທີ່ຮັກເອີຍ,” ລາວເວົ້າ, “ພໍ່ຮູ້ວ່າລູກຢາກໃຫ້ພໍ່ອ່ານໃຫ້ລູກຟັງ ແລະ ຊ່ວຍໃຫ້ລູກນອນຫລັບ, ແຕ່ຄືນນີ້ພໍ່ຕ້ອງຊ່ວຍອະທິການ.”
ລູກສາວຂອງລາວໄດ້ຕອບກັບວ່າ, “ອະທິການບໍ່ມີພໍ່ທີ່ຈະຊ່ວຍໃຫ້ເພິ່ນນອນຫລັບບໍລະ?”
ພວກເຮົາກະຕັນຍູຊົ່ວນິລັນດອນສຳລັບສະມາຊິກທີ່ນັບບໍ່ຖ້ວນ ຜູ້ທີ່ໄດ້ຮັບໃຊ້ຢ່າງພາກພຽນໃນສາດສະໜາຈັກຂອງພຣະເຢຊູຄຣິດທຸກໆມື້. ການເສຍສະລະຂອງທ່ານແມ່ນສັກສິດແທ້ໆ.
ແຕ່ດັ່ງທີ່ນາງນ້ອຍຄົນນີ້ເບິ່ງຄືວ່າຈະເຂົ້າໃຈໄດ້, ຍັງມີບາງສິ່ງທີ່ສັກສິດເທົ່າໆກັນ—ສິ່ງທີ່ບໍ່ມີຫຍັງມາແທນໄດ້—ກ່ຽວກັບການທີ່ພໍ່ແມ່ບຳລຸງລ້ຽງລູກ. ມັນສະທ້ອນເຖິງແບບແຜນຂອງສະຫວັນ.1 ແນ່ນອນວ່າ ພຣະບິດາຜູ້ສະຖິດຢູ່ໃນສະຫວັນ, ພຣະບິດາຜູ້ສູງສົ່ງຂອງເຮົາ, ປິຕິຍິນດີເມື່ອລູກໆຂອງພຣະອົງຖືກສິດສອນ ແລະ ບຳລຸງລ້ຽງໂດຍພໍ່ແມ່ຂອງພວກເຂົາຢູ່ເທິງໂລກ.2
ພໍ່ແມ່ທັງຫລາຍ, ຂໍຂອບໃຈສຳລັບທຸກສິ່ງທີ່ທ່ານກຳລັງເຮັດຢູ່ເພື່ອລ້ຽງດູລູກໆຂອງທ່ານ. ແລະ ລູກໆທັງຫລາຍ, ຂໍຂອບໃຈສຳລັບທຸກສິ່ງທີ່ພວກເຈົ້າກຳລັງເຮັດຢູ່ເພື່ອລ້ຽງດູພໍ່ແມ່ຂອງພວກເຈົ້າ, ເພາະວ່າດັ່ງທີ່ພໍ່ແມ່ທຸກຄົນກໍຮູ້, ສ່ວນຫລາຍແລ້ວເຮົາຈະຮຽນຮູ້ຈາກລູກໆຂອງເຮົາຫລາຍຢ່າງກ່ຽວກັບສັດທາ, ຄວາມຫວັງ, ແລະ ຄວາມໃຈບຸນເທົ່າທີ່ພວກເຂົາຮຽນຮູ້ຈາກເຮົາ!3
ພໍ່ແມ່ມີໜ້າທີ່ອັນສັກສິດ
ທ່ານເຄີຍໄດ້ຄິດບໍກ່ຽວກັບຄວາມສ່ຽງສູງທີ່ພຣະບິດາຜູ້ສະຖິດຢູ່ໃນສະຫວັນຂອງເຮົາມີ ແຕ່ລະເທື່ອທີ່ພຣະອົງສົ່ງລູກຄົນໜຶ່ງຂອງພຣະອົງມາຍັງໂລກ? ພວກເຂົາເປັນບຸດ ແລະ ທິດາທາງວິນຍານຂອງພຣະອົງ. ພວກເຂົາມີສັກກະຍະພາບທີ່ບໍ່ມີເຂດຈຳກັດ. ພວກເຂົາຖືກກຳນົດໄວ້ເພື່ອກາຍເປັນບຸກຄົນທີ່ຮຸ່ງໂລດຂອງຄວາມດີງາມ, ພຣະຄຸນ, ແລະ ຄວາມຈິງ. ແຕ່ພວກເຂົາລົງມາສູ່ໂລກຢ່າງຊ່ວຍຕົວເອງບໍ່ໄດ້ເລີຍ, ເກືອບເຮັດຫຍັງບໍ່ໄດ້ນອກຈາກຮ້ອງໄຫ້ ຂໍຄວາມຊ່ວຍເຫລືອ. ຄວາມຊົງຈຳຂອງພວກເຂົາຕອນໄດ້ຢູ່ກັບພຣະເຈົ້າ, ພ້ອມທັງຄວາມຮູ້ທີ່ວ່າພວກເຂົາເປັນໃຜແທ້ໆ ແລະ ຜູ້ທີ່ພວກເຂົາສາມາດກາຍເປັນ ກໍຖືກປິດບັງ. ພວກເຂົາປະກອບຄວາມເຂົ້າໃຈຂອງພວກເຂົາເຖິງຊີວິດ, ຄວາມຮັກ, ພຣະເຈົ້າ, ແລະ ແຜນຂອງພຣະອົງ ອີງຕາມສິ່ງທີ່ພວກເຂົາໄດ້ສັງເກດເຫັນຈາກຜູ້ຄົນທີ່ຢູ່ອ້ອມຮອບພວກເຂົາ—ໂດຍສະເພາະພໍ່ແມ່ຂອງພວກເຂົາ, ຜູ້ທີ່, ແທ້ຈິງແລ້ວ, ກໍຍັງພະຍາຍາມທີ່ຈະຮຽນຮູ້ຢູ່ຄືກັນ.
ພຣະເຈົ້າໄດ້ມອບໃຫ້ “ພໍ່ແມ່ມີໜ້າທີ່ອັນສັກສິດທີ່ຈະລ້ຽງດູລູກໆຂອງຕົນດ້ວຍຄວາມຮັກ ແລະ ດ້ວຍຄວາມຊອບທຳ, ທີ່ຈະຈັດຫາສິ່ງຈຳເປັນທາງກາຍ ແລະ ທາງວິນຍານໃຫ້ເຂົາ, ແລະ ທີ່ຈະສອນເຂົາໃຫ້ … ເຊື່ອຟັງພຣະບັນຍັດຂອງພຣະເຈົ້າ.”4
ສິ່ງນີ້ກໍຫລາຍພໍແລ້ວທີ່ຈະເຮັດໃຫ້ແມ່ນແຕ່ພໍ່ແມ່ທີ່ດີທີ່ສຸດນອນບໍ່ຫລັບ.
ຂ່າວສານຂອງຂ້າພະເຈົ້າຕໍ່ພໍ່ແມ່ທຸກຄົນ ແມ່ນວ່າ:
ພຣະຜູ້ເປັນເຈົ້າຮັກທ່ານ.
ພຣະອົງສະຖິດຢູ່ກັບທ່ານ.
ພຣະອົງສະຖິດຢູ່ຄຽງຂ້າງທ່ານ.
ພຣະອົງເປັນຄວາມເຂັ້ມແຂງຂອງທ່ານໃນການຊີ້ນຳລູກໆຂອງທ່ານໃຫ້ເລືອກສິ່ງທີ່ຊອບທຳ.
ຈົ່ງຮັບເອົາສິດທິພິເສດ ແລະ ໜ້າທີ່ຮັບຜິດຊອບນີ້ຢ່າງກ້າຫານ ແລະ ຢ່າງຊື່ນຊົມ. ຢ່າມອບໝາຍແຫລ່ງຂອງພອນຈາກສະຫວັນນີ້ໃຫ້ກັບຄົນອື່ນ. ພາຍໃນໂຄງຮ່າງຂອງຄຸນຄ່າຂອງພຣະກິດຕິຄຸນ ແລະ ຫລັກທຳ, ທ່ານເປັນຜູ້ທີ່ຈະນຳພາລູກຂອງທ່ານໃນລາຍລະອຽດຂອງການຕັດສິນໃຈປະຈຳວັນ. ຊ່ວຍລູກໆຂອງທ່ານໃຫ້ສ້າງສັດທາໃນພຣະເຢຊູຄຣິດ, ທີ່ຈະຮັກພຣະກິດຕິຄຸນຂອງພຣະອົງ ແລະ ສາດສະໜາຈັກຂອງພຣະອົງ, ແລະ ກະກຽມສຳລັບທາງເລືອກທີ່ຊອບທຳຕະຫລອດຊີວິດ. ແທ້ຈິງແລ້ວ, ນັ້ນຄືແຜນຂອງພຣະເຈົ້າສຳລັບພໍ່ແມ່.
ຊາຕານຈະຄັດຄ້ານທ່ານ, ລົບກວນທ່ານ, ພະຍາຍາມຈະເຮັດໃຫ້ທ່ານທໍ້ຖອຍໃຈ.
ເດັກນ້ອຍທຸກຄົນໄດ້ຮັບຄວາມສະຫວ່າງຂອງພຣະຄຣິດ ທີ່ເປັນສາຍຕໍ່ໂດຍກົງເຖິງສະຫວັນ. ແລະ ພຣະຜູ້ຊ່ວຍໃຫ້ລອດຈະຊ່ວຍທ່ານ, ຊີ້ນຳທ່ານ, ແລະ ໃຫ້ກຳລັງໃຈທ່ານ. ຈົ່ງສະແຫວງຫາຄວາມຊ່ວຍເຫລືອຈາກພຣະອົງ. ຈົ່ງທູນຖາມພຣະຜູ້ເປັນເຈົ້າ!
ດັ່ງທີ່ພຣະເຢຊູຄຣິດເປັນຄວາມເຂັ້ມແຂງຂອງຊາວໜຸ່ມ, ພຣະເຢຊູຄຣິດກໍເປັນຄວາມເຂັ້ມແຂງຂອງພໍ່ແມ່ເຊັ່ນກັນ.
ພຣະອົງຂະຫຍາຍຄວາມຮັກ
ບາງເທື່ອເຮົາອາດສົງໄສຖ້າຫາກວ່າຄົນອື່ນຈະເໝາະສົມຫລາຍກວ່າ ທີ່ຈະນຳພາ ແລະ ສິດສອນລູກໆຂອງເຮົາ. ບໍ່ວ່າທ່ານຈະຮູ້ສຶກບໍ່ດີພໍພຽງໃດກໍຕາມ, ທ່ານຍັງມີບາງສິ່ງທີ່ເຮັດໃຫ້ທ່ານເໝາະສົມເປັນພິເສດ: ຄວາມຮັກຂອງທ່ານທີ່ມີໃຫ້ແກ່ລູກຂອງທ່ານ.
ຄວາມຮັກຂອງພໍ່ແມ່ທີ່ມີໃຫ້ແກ່ລູກເປັນພະລັງທີ່ແຂງແກ່ນທີ່ສຸດໃນຈັກກະວານ. ມັນເປັນໜຶ່ງໃນສອງສາມຢ່າງຢູ່ເທິງແຜ່ນດິນໂລກທີ່ສາມາດເປັນໄປໄດ້ຊົ່ວນິລັນດອນແທ້ໆ.
ບັດນີ້, ບາງທີທ່ານຮູ້ສຶກວ່າ ຄວາມສຳພັນຂອງທ່ານກັບລູກຂອງທ່ານແມ່ນບໍ່ດີເທົ່າທີ່ຄວນເປັນໃນອຸດົມຄະຕິ. ໃນທີ່ນັ້ນແຫລະທີ່ອຳນາດຂອງພຣະຜູ້ຊ່ວຍໃຫ້ລອດຈະເຂົ້າມາຊ່ວຍ. ພຣະອົງປິ່ນປົວຄົນເຈັບປ່ວຍ, ແລະ ພຣະອົງສາມາດປິ່ນປົວຄວາມສຳພັນໄດ້. ພຣະອົງເພີ່ມພູນເຂົ້າຈີ່ ແລະ ປາ, ແລະ ພຣະອົງສາມາດເພີ່ມພູນຄວາມຮັກ ແລະ ຄວາມຊື່ນຊົມໃນບ້ານເຮືອນຂອງທ່ານໄດ້.
ຄວາມຮັກຂອງທ່ານທີ່ມີໃຫ້ແກ່ລູກໆຂອງທ່ານຈະສ້າງສະພາບແວດລ້ອມທີ່ອຸດົມສົມບູນສຳລັບການສິດສອນຄວາມຈິງ ແລະ ສ້າງສັດທາ. ຈົ່ງເຮັດໃຫ້ບ້ານເຮືອນຂອງທ່ານເປັນບ້ານແຫ່ງການອະທິຖານ, ການຮຽນຮູ້, ແລະ ສັດທາ; ບ້ານແຫ່ງປະສົບການທີ່ຊື່ນຊົມ; ສະຖານທີ່ຂອງການເປັນພາກສ່ວນ; ບ້ານຂອງພຣະເຈົ້າ.5 ແລະ “ຈົ່ງອະທິຖານຫາພຣະບິດາດ້ວຍສຸດພະລັງແຫ່ງໃຈ, ເພື່ອທ່ານຈະເຕັມໄປດ້ວຍຄວາມຮັກ [ຂອງພຣະອົງ], ຊຶ່ງພຣະອົງປະທານໃຫ້ … ຜູ້ຕິດຕາມທີ່ແທ້ຈິງຂອງພຣະເຢຊູຄຣິດ, ພຣະບຸດຂອງພຣະອົງ.”6
ພຣະອົງຂະຫຍາຍຄວາມພະຍາຍາມເລັກນ້ອຍ ແລະ ງ່າຍໆ
ຄວາມເຂັ້ມແຂງອີກຢ່າງໜຶ່ງທີ່ທ່ານມີ, ໃນຖານະພໍ່ແມ່, ແມ່ນໂອກາດສຳລັບອິດທິພົນປະຈຳວັນທີ່ຕໍ່ເນື່ອງ. ໝູ່ເພື່ອນ, ຄູສອນ, ແລະ ຜູ້ມີອິດທິພົນໃນສື່ມວນຊົນຈະໄປໆມາໆ. ແຕ່ທ່ານສາມາດເປັນອິດທິພົນທີ່ໝັ້ນຄົງ, ສະໝ່ຳສະເໝີທີ່ສຸດໃນຊີວິດຂອງລູກທ່ານ.
ຄວາມພະຍາຍາມຂອງທ່ານອາດເບິ່ງຄືວ່າເລັກນ້ອຍເມື່ອທຽບໃສ່ກັບສຽງດັງສະໜັ່ນທີ່ລູກໆຂອງທ່ານໄດ້ຍິນຢູ່ໃນໂລກ. ບາງເທື່ອມັນອາດຈະຮູ້ສຶກຄືວ່າ ທ່ານບໍ່ໄດ້ສຳເລັດຫຍັງຫລາຍ. ແຕ່ຂໍໃຫ້ຈື່ຈຳໄວ້ວ່າ, “ດ້ວຍວິທີນ້ອຍໆ ແລະ ງ່າຍໆນີ້ ພຣະຜູ້ເປັນເຈົ້ານຳເລື່ອງອັນໃຫຍ່ຍິ່ງມາໃຫ້.”7 ການສັງສັນໃນຕອນແລງໜຶ່ງເທື່ອ, ການສົນທະນາເລື່ອງພຣະກິດຕິຄຸນໜຶ່ງເທື່ອ, ຫລື ການເປັນຕົວຢ່າງທີ່ດີໜຶ່ງເທື່ອ ອາດບໍ່ປ່ຽນແປງຊີວິດຂອງລູກທ່ານໃນຊ່ວງເວລາດຽວ, ນ້ຳຝົນໜຶ່ງຢົດກໍຈະບໍ່ເຮັດໃຫ້ຕົ້ນໄມ້ຕົ້ນໜຶ່ງໃຫຍ່ຂຶ້ນໃນທັນທີທັນໃດເຊັ່ນກັນ. ແຕ່ເລື່ອງເລັກນ້ອຍ ແລະ ງ່າຍໆຢ່າງສະໝ່ຳສະເໝີ, ມື້ແລ້ວມື້ເລົ່າ, ຈະບຳລຸງລ້ຽງລູກໆຂອງທ່ານໄດ້ດີກວ່າການທຸ້ມເທອິດທິພົນທາງວິນຍານຢ່າງຫລວງຫລາຍເປັນບາງຄັ້ງບາງຄາວ.8
ນັ້ນຄືວິທີຂອງພຣະຜູ້ເປັນເຈົ້າ. ພຣະອົງກ່າວກັບທ່ານ ແລະ ລູກຂອງທ່ານດ້ວຍສຽງແຜ່ວເບົາ, ບໍ່ແມ່ນດ້ວຍສຽງຟ້າຮ້ອງ.9 ພຣະອົງໄດ້ປິ່ນປົວ ນາອາມານ ບໍ່ແມ່ນຜ່ານ “ສິ່ງທີ່ຍາກ” ແຕ່ຜ່ານການກະທຳງ່າຍໆ, ຊ້ຳແລ້ວຊ້ຳອີກຂອງການອາບນ້ຳຊຳລະຕົວ.10 ຊາວອິດສະຣາເອນໄດ້ກິນນົກຂຸ້ມຢູ່ໃນຖິ່ນແຫ້ງແລ້ງກັນດານ, ແຕ່ສິ່ງທີ່ໄດ້ຊ່ວຍໃຫ້ເຂົາເຈົ້າມີຊີວິດຢູ່ໄດ້ແມ່ນສິ່ງມະຫັດສະຈັນເລັກນ້ອຍ ແລະ ງ່າຍໆຂອງມານາ—ເຂົ້າຈີ່ປະຈຳວັນຂອງເຂົາເຈົ້າ.11
ອ້າຍເອື້ອຍນ້ອງທັງຫລາຍ, ເຂົ້າຈີ່ປະຈຳວັນແມ່ນແຊບທີ່ສຸດເມື່ອຈັດຕຽມ ແລະ ມີໃຫ້ກິນຢູ່ທີ່ບ້ານ. ສັດທາ ແລະ ປະຈັກພະຍານຖືກສະໜັບສະໜູນໄດ້ດີທີ່ສຸດໃນວິທີແບບທຳມະດາ ແລະ ທຳມະຊາດ, ເທື່ອລະຂັ້ນຕອນ, ໃນຊ່ວງເວລາເລັກໆນ້ອຍໆ, ລະຫວ່າງການດຳລົງຊີວິດປະຈຳວັນ.12
ທຸກໆຊ່ວງເວລາແມ່ນຊ່ວງເວລາແຫ່ງການສິດສອນ. ທຸກໆຖ້ອຍຄຳ ແລະ ທຸກໆການກະທຳສາມາດເປັນສິ່ງນຳພາໃນການເລືອກ.13
ທ່ານອາດບໍ່ເຫັນຜົນກະທົບຂອງຄວາມພະຍາຍາມຂອງທ່ານໂດຍທັນທີ. ແຕ່ຢ່າຍອມແພ້. “ທຸກສິ່ງຕ້ອງເກີດຂຶ້ນໃນເວລາຂອງມັນ,” ພຣະຜູ້ເປັນເຈົ້າໄດ້ກ່າວ. “ດັ່ງນັ້ນ, ຢ່າເມື່ອຍລ້າໃນການເຮັດວຽກງານດີ, ເພາະ [ທ່ານ] ພວມວາງຮາກຖານຂອງວຽກງານອັນຍິ່ງໃຫຍ່.”14 ຈະມີວຽກງານຫຍັງແດ່ທີ່ຍິ່ງໃຫຍ່ໄປກວ່າການຊ່ວຍໃຫ້ລູກໆຜູ້ລ້ຳຄ່າຂອງພຣະເຈົ້າຮຽນຮູ້ວ່າເຂົາເຈົ້າເປັນໃຜແທ້ໆ ແລະ ສ້າງສັດທາໃນພຣະເຢຊູຄຣິດ, ໃນພຣະກິດຕິຄຸນຂອງພຣະອົງ, ແລະ ໃນສາດສະໜາຈັກຂອງພຣະອົງ? ພຣະເຢຊູຄຣິດຈະອວຍພອນທ່ານ ແລະ ຂະຫຍາຍຄວາມພະຍາຍາມທີ່ສະໝ່ຳສະເໝີຂອງທ່ານ.
ພຣະອົງປະທານການເປີດເຜີຍ
ອີກທາງໜຶ່ງທີ່ມີພະລັງທີ່ພຣະຜູ້ເປັນເຈົ້າສະໜັບສະໜູນພໍ່ແມ່ແມ່ນຜ່ານທາງຂອງປະທານແຫ່ງການເປີດເຜີຍສ່ວນຕົວ. ພຣະເຈົ້າຕື່ນເຕັ້ນທີ່ຈະຖອກເທພຣະວິນຍານຂອງພຣະອົງລົງມານຳພາພໍ່ແມ່.
ຂະນະທີ່ທ່ານອະທິຖານ ແລະ ຮູ້ສຶກໄວຕໍ່ພຣະວິນຍານ, ພຣະອົງຈະເຕືອນທ່ານເຖິງອັນຕະລາຍທີ່ຊ້ອນຢູ່.15 ພຣະອົງຈະເປີດເຜີຍພອນສະຫວັນ, ຄວາມເຂັ້ມແຂງ, ແລະ ຄວາມຫ່ວງໃຍທີ່ບໍ່ໄດ້ກ່າວອອກມາ ຂອງລູກໆຂອງທ່ານ.16 ພຣະເຈົ້າຈະຊ່ວຍໃຫ້ທ່ານເຫັນລູກໆຂອງທ່ານດັ່ງທີ່ພຣະອົງເຫັນພວກເຂົາ—ກວ້າງໄກໄປກວ່າພາບລັກສະນະພາຍນອກຂອງພວກເຂົາ ແລະ ເຂົ້າໄປພາຍໃນຈິດໃຈຂອງພວກເຂົາ.17
ດ້ວຍຄວາມຊ່ວຍເຫລືອຂອງພຣະເຈົ້າ, ທ່ານສາມາດຮຽນຮູ້ເພື່ອຈະຮູ້ຈັກລູກໆຂອງທ່ານໃນວິທີທີ່ບໍລິສຸດ ແລະ ດັ່ງທີ່ພຣະເຈົ້າຮູ້ຈັກພວກເຂົາ. ຂ້າພະເຈົ້າຂໍເຊື້ອເຊີນທ່ານໃຫ້ຮັບເອົາຂໍ້ສະເໜີຂອງພຣະເຈົ້າ ເພື່ອນຳພາຄອບຄົວຂອງທ່ານໂດຍການເປີດເຜີຍສ່ວນຕົວ. ສະແຫວງຫາການນຳພາຂອງພຣະອົງໃນການອະທິຖານຂອງທ່ານ.18
ການປ່ຽນແປງອັນໃຫຍ່ຫລວງ
ບາງທີຄວາມຊ່ວຍເຫລືອທີ່ສຳຄັນທີ່ສຸດທີ່ພຣະເຢຊູຄຣິດສະເໜີມອບໃຫ້ພໍ່ແມ່ຄື “ການປ່ຽນແປງອັນຍິ່ງໃຫຍ່” ຂອງໃຈ.19 ມັນເປັນສິ່ງມະຫັດສະຈັນທີ່ເຮົາທຸກຄົນຕ້ອງການ.
ໃຫ້ວາດພາບເຫັນສະພາບການນີ້ບຶດໜຶ່ງວ່າ: ທ່ານຢູ່ທີ່ໂບດ, ກຳລັງຮັບຟັງຄຳປາໄສກ່ຽວກັບຄອບຄົວຢູ່. ຜູ້ກ່າວປາໄສບັນຍາຍບ້ານເຮືອນທີ່ສົມບູນແບບ ແລະ ແມ່ນແຕ່ຄອບຄົວທີ່ສົມບູນແບບຫລາຍກວ່າ. ສາມີ ແລະ ພັນລະຍາບໍ່ເຄີຍຜິດຖຽງກັນ. ລູກໆກໍຢຸດອ່ານພຣະຄຳພີພຽງແຕ່ເມື່ອເຖິງເວລາທີ່ຈະເຮັດວຽກບ້ານເທົ່ານັ້ນ. ແລະ ສຽງເພງ “ຮັກທີ່ບ້ານ”20 ກໍກຳລັງບັນເລງຢູ່ເບື້ອງຫລັງ. ກ່ອນຜູ້ກ່າວປາໄສກ່າວເຖິງຕອນທີ່ທຸກຄົນຊ່ວຍກັນລ້າງຫ້ອງນ້ຳຢ່າງເບີກບານມ່ວນຊື່ນ, ທ່ານກໍໄດ້ຄິດຢູ່ໃນໃຈວ່າ, “ຄອບຄົວຂອງເຮົາແມ່ນບໍ່ມີຫວັງເລີຍ.”
ອ້າຍເອື້ອຍນ້ອງທີ່ຮັກແພງ, ຢ່າກັງວົນເລີຍ! ທຸກຄົນຢູ່ໃນບ່ອນຊຸມນຸມກໍກຳລັງຄິດແບບດຽວກັນ! ຄວາມຈິງກໍຄື, ພໍ່ແມ່ທຸກຄົນກໍເປັນຫ່ວງວ່າບໍ່ດີພໍ.
ເປັນຈັ່ງບຸນ, ຍັງມີແຫລ່ງຊ່ວຍເຫລືອທີ່ສູງສົ່ງສຳລັບພໍ່ແມ່: ນັ້ນຄືພຣະເຢຊູຄຣິດ. ພຣະອົງເປັນແຫລ່ງແຫ່ງການປ່ຽນແປງອັນຍິ່ງໃຫຍ່ຂອງໃຈເຮົາ.
ເມື່ອທ່ານເປີດໃຈຕໍ່ພຣະຜູ້ຊ່ວຍໃຫ້ລອດ ແລະ ຄຳສອນຂອງພຣະອົງຫລາຍຂຶ້ນ, ພຣະອົງຈະສະແດງໃຫ້ທ່ານເຫັນຄວາມອ່ອນແອຂອງທ່ານ. ຖ້າວ່າທ່ານໄວ້ວາງໃຈພຣະເຢຊູຄຣິດດ້ວຍຫົວໃຈທີ່ຖ່ອມ, ພຣະອົງຈະເຮັດໃຫ້ສິ່ງທີ່ອ່ອນແອກາຍເປັນສິ່ງທີ່ເຂັ້ມແຂງ. ພຣະອົງເປັນພຣະເຈົ້າແຫ່ງການມະຫັດສະຈັນ.
ນີ້ໝາຍຄວາມວ່າທ່ານ ແລະ ຄອບຄົວຂອງທ່ານຈະສົມບູນແບບທຸກຢ່າງບໍ? ບໍ່ເລີຍ. ແຕ່ທ່ານຈະເຮັດໄດ້ດີກວ່າເກົ່າ. ຜ່ານທາງພຣະຄຸນຂອງພຣະຜູ້ຊ່ວຍໃຫ້ລອດ, ເທື່ອລະເລັກເທື່ອລະນ້ອຍ, ທ່ານຈະພັດທະນາຄຸນລັກສະນະທີ່ບັນດາພໍ່ແມ່ຕ້ອງການ: ຄວາມຮັກທີ່ມີໃຫ້ພຣະເຈົ້າ ແລະ ລູກໆຂອງພຣະອົງ, ຄວາມອົດທົນ, ຄວາມບໍ່ເຫັນແກ່ຕົວ, ສັດທາໃນພຣະຄຣິດ, ແລະ ຄວາມກ້າຫານທີ່ຈະເຮັດການເລືອກທີ່ຊອບທຳ.
ພຣະເຢຊູຄຣິດສະເໜີມອບຄວາມຊ່ວຍເຫລືອຜ່ານທາງສາດສະໜາຈັກຂອງພຣະອົງ
ຄວາມພະຍາຍາມຂອງເຮົາທີ່ຈະສ້າງສັດທາໃນພຣະເຢຊູຄຣິດແມ່ນສູນກາງຢູ່ທີ່ບ້ານ, ສຸມໃສ່ສ່ວນບຸກຄົນ. ແລະ ສາດສະໜາຈັກສະໜັບສະໜູນ. ນອກເໜືອໄປຈາກການຈັດຫາພຣະຄຳພີສັກສິດ ແລະ ຖ້ອຍຄຳຂອງສາດສະດາໃຫ້ແລ້ວ, ສາດສະໜາຈັກຂອງພຣະຜູ້ຊ່ວຍໃຫ້ລອດສະເໜີມອບແຫລ່ງຊ່ວຍເຫລືອຫລາຍຢ່າງເພື່ອຊ່ວຍໃຫ້ພໍ່ແມ່ ແລະ ລູກໆເຮັດການເລືອກທີ່ຊອບທຳ.
-
ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ ບໍ່ໄດ້ໃຫ້ລາຍການສິ່ງທີ່ຄວນເຮັດ ຫລື ບໍ່ຄວນເຮັດແກ່ທ່ານ. ມັນສິດສອນຄວາມຈິງນິລັນດອນເພື່ອຊ່ວຍເຮັດໃຫ້ການເລືອກມີສູນກາງຢູ່ທີ່ພຣະຊົນຊີບ ແລະ ຄຳສອນຂອງພຣະເຢຊູຄຣິດ. ໃຫ້ອ່ານມັນກັບລູກໆຂອງທ່ານ. ປ່ອຍໃຫ້ພວກເຂົາເວົ້າລົມກ່ຽວກັບສິ່ງນັ້ນ. ຊ່ວຍໃຫ້ພວກເຂົາມີຄວາມຈິງນິລັນດອນ ແລະ ສູງສົ່ງເຫລົ່ານີ້ນຳພາການເລືອກຂອງພວກເຂົາ.22
-
ກອງປະຊຸມ FSY (ສຳລັບຄວາມເຂັ້ມແຂງຂອງຊາວໜຸ່ມ) ກໍເປັນແຫລ່ງຊ່ວຍເຫລືອທີ່ດີອີກຢ່າງໜຶ່ງ. ຂ້າພະເຈົ້າຫວັງວ່າຊາວໜຸ່ມທຸກຄົນຈະໄປຮ່ວມ. ຂ້າພະເຈົ້າຂໍເຊື້ອເຊີນຜູ້ໃຫຍ່ໜຸ່ມໂສດໃຫ້ໄປຮ່ວມກອງປະຊຸມເຫລົ່ານີ້ໃນຖານະຜູ້ໃຫ້ຄຳປຶກສາ ແລະ ທີ່ປຶກສາ. ຂ້າພະເຈົ້າຂໍເຊື້ອເຊີນພໍ່ແມ່ໃຫ້ສານຕໍ່ແຮງຜັກດັນທາງວິນຍານທີ່ຊາວໜຸ່ມນຳກັບມາບ້ານ ຈາກກອງປະຊຸມ FSY.
-
ເດັກນ້ອຍ ແລະ ຊາວໜຸ່ມໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ມີຄູສອນ, ຜູ້ແນະນຳ, ແລະ ຜູ້ໃຫ້ຄຳປຶກສາ. ສ່ວນຫລາຍແລ້ວທ່ານເຂົ້າໄປໃນຊີວິດຂອງຄົນໜຸ່ມໃນຊ່ວງເວລາທີ່ສຳຄັນເພື່ອສ້າງສາ ແລະ ສະໜັບສະໜູນສັດທາ ແລະ ປະຈັກພະຍານ. ພວກທ່ານບາງຄົນກໍເປັນຜູ້ໃຫຍ່ໂສດ. ພວກທ່ານບາງຄົນບໍ່ເຄີຍມີລູກຂອງຕົວເອງ. ການຮັບໃຊ້ທີ່ເຕັມໄປດ້ວຍຄວາມຊື່ນຊົມຂອງທ່ານຕໍ່ລູກໆຂອງພຣະເຈົ້າ ແມ່ນສັກສິດໃນສາຍພຣະເນດຂອງພຣະເຈົ້າ.23
ຢ່າໝົດຫວັງໃນສິ່ງມະຫັດສະຈັນເລີຍ
ເພື່ອນທີ່ຮັກແພງຂອງຂ້າພະເຈົ້າ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ການສ້າງສັດທາໃນຕົວເດັກນ້ອຍກໍຄ້າຍຄືກັນກັບການຊ່ວຍໃຫ້ດອກໄມ້ຈະເລີນເຕີບໂຕ. ທ່ານບໍ່ສາມາດດຶງກ້ານມັນເພື່ອເຮັດໃຫ້ມັນສູງຂຶ້ນກວ່າເກົ່າ. ທ່ານບໍ່ສາມາດແງະເປີດດອກຈູມເພື່ອເຮັດໃຫ້ມັນບານໄວກ່ອນກຳນົດ. ແລະ ທ່ານບໍ່ສາມາດ ລະເລີຍ ດອກໄມ້ນັ້ນ ແລະ ຄາດຫວັງໃຫ້ມັນເຕີບໂຕ ຫລື ບານເອງໄດ້.
ສິ່ງທີ່ທ່ານສາມາດເຮັດໄດ້ ແລະ ຕ້ອງເຮັດເພື່ອຄົນລຸ້ນໃໝ່ແມ່ນຈັດຫາສະພາບແວດລ້ອມທີ່ດີ, ມີດິນດີ, ດ້ວຍການເຂົ້າເຖິງນ້ຳແຫ່ງສະຫວັນທີ່ໄຫລລ່ອງ. ເສຍຫຍ້າ ແລະ ກຳຈັດທຸກສິ່ງທີ່ຈະບັງແດດ. ສ້າງສະພາບການທີ່ດີທີ່ສຸດເທົ່າທີ່ເປັນໄປໄດ້ເພື່ອການເຕີບໂຕ. ດ້ວຍຄວາມອົດທົນ ອະນຸຍາດໃຫ້ຄົນລຸ້ນໃໝ່ເຮັດການເລືອກທີ່ດົນໃຈ, ແລະ ປ່ອຍໃຫ້ພຣະເຈົ້າເຮັດສິ່ງມະຫັດສະຈັນຂອງພຣະອົງ. ຜົນທີ່ໄດ້ຮັບຈະສວຍງາມ ແລະ ໜ້າອັດສະຈັນ ແລະ ໜ້າຊື່ນຊົມຫລາຍກວ່າສິ່ງໃດໆທີ່ທ່ານສາມາດເຮັດສຳເລັດໄດ້ດ້ວຍຕົວທ່ານເອງ.
ໃນແຜນຂອງພຣະບິດາເທິງສະຫວັນ, ຄວາມສຳພັນຂອງຄອບຄົວແມ່ນຊົ່ວນິລັນດອນ. ນີ້ຄືເຫດຜົນ, ໃນຖານະພໍ່ແມ່, ທີ່ທ່ານບໍ່ເຄີຍຍອມແພ້, ເຖິງແມ່ນວ່າທ່ານບໍ່ພູມໃຈກັບບາງສິ່ງທີ່ເປັນໄປໃນອະດີດກໍຕາມ.
ກັບພຣະເຢຊູຄຣິດ, ພຣະອາຈານທີ່ປິ່ນປົວ, ຍັງສາມາດມີການເລີ່ມຕົ້ນໃໝ່ໄດ້ສະເໝີ; ຍັງມີຄວາມຫວັງສະເໝີ.
ພຣະເຢຊູຄຣິດເປັນຄວາມເຂັ້ມແຂງຂອງຄອບຄົວ.
ພຣະເຢຊູຄຣິດເປັນຄວາມເຂັ້ມແຂງຂອງຊາວໜຸ່ມ.
ພຣະເຢຊູຄຣິດເປັນຄວາມເຂັ້ມແຂງຂອງພໍ່ແມ່.
ຂ້າພະເຈົ້າເປັນພະຍານເຖິງສິ່ງເຫລົ່ານີ້ ໃນພຣະນາມຂອງພຣະເຢຊູຄຣິດ, ອາແມນ.