ສຸມໃສ່ພຣະເຢຊູຄຣິດ

ໂດຍ ບຣາເດີ ມຽວທັນ ຄາມາໂກ

ທີ່ປຶກສາທີໜຶ່ງໃນຝ່າຍປະທານໂຮງຮຽນວັນອາທິດສາມັນ

ອົງພຣະເຢຊູຄຣິດເຈົ້າຄືທາງແກ້ໄຂຕໍ່ບັນຫາຂອງເຮົາ, ແຕ່ເຮົາຕ້ອງເງີຍໜ້າຂຶ້ນ ແລະ ສຸມຄວາມຕັ້ງໃຈຂອງເຮົາໃສ່ພຣະອົງ.

ພໍ່ຂອງຂ້າພະເຈົ້າເຄີຍບອກຂ້າພະເຈົ້າວ່າ, “ຢ່າເມົາແຕ່ສຸມໃສ່ບັນຫາຂອງລູກຈົນວ່າລູກຫລຽວບໍ່ເຫັນທາງແກ້ໄຂເລີຍ.”

ຂ້າພະເຈົ້າເປັນພະຍານວ່າ ອົງພຣະເຢຊູຄຣິດເຈົ້າ ເປັນທາງແກ້ໄຂແມ່ນແຕ່ສຳລັບບັນຫາທີ່ຍາກທີ່ສຸດຂອງເຮົາ. ໂດຍສະເພາະ, ພຣະອົງໄດ້ເອົາຊະນະບັນຫາສີ່ຢ່າງທີ່ເຮົາທຸກຄົນປະເຊີນ ແລະ ບໍ່ມີຜູ້ໃດໃນພວກເຮົາທີ່ສາມາດແກ້ໄຂມັນໄດ້ດ້ວຍຕົວເຮົາເອງ.

ບັນຫາທີໜຶ່ງຄືຄວາມຕາຍທາງຮ່າງກາຍ. ເຮົາສາມາດພະຍາຍາມຊັກຊ້າມັນ ຫລື ບໍ່ຫົວຊາກັບມັນໄດ້, ແຕ່ເຮົາບໍ່ສາມາດເອົາຊະນະມັນໄດ້ດ້ວຍຕົວເຮົາເອງ. ເຖິງຢ່າງໃດກໍຕາມ, ພຣະເຢຊູຄຣິດໄດ້ເອົາຊະນະຄວາມຕາຍເພື່ອເຮົາ, ແລະ ຜົນທີ່ຕາມມາກໍຄື, ເຮົາທຸກຄົນຈະຟື້ນຄືນຊີວິດໃນມື້ໃດມື້ໜຶ່ງ.¹
ບັນຫາທີສອງແມ່ນລວມທັງຄວາມຍາກລຳບາກ, ປະສົບການທີ່ຫຍຸ້ງຍາກ, ຄວາມໂສກເສົ້າ, ຄວາມເຈັບປວດ, ແລະ ຄວາມບໍ່ຍຸດຕິທຳຂອງໂລກນີ້. ພຣະເຢຊູຄຣິດໄດ້ເອົາຊະນະທຸກສິ່ງທັງໝົດນີ້. ສຳລັບຜູ້ທີ່ພະຍາຍາມຕິດຕາມພຣະອົງ, ໃນມື້ໃດມື້ໜຶ່ງພຣະອົງ “ຈະຊົງເຊັດນ້ຳຕາທຸກຢົດ” ເຮັດໃຫ້ທຸກສິ່ງຖືກຕ້ອງອີກຄັ້ງ.² ໃນຂະນະນີ້, ພຣະອົງສາມາດເພີ່ມຄວາມເຂັ້ມແຂງໃຫ້ແກ່ເຮົາ ເພື່ອຜ່ານຜ່າການທົດລອງຂອງເຮົາດ້ວຍຄວາມໝັ້ນໃຈ, ຄວາມເບີກບານ, ແລະ ສັນຕິສຸກ.³
ບັນຫາທີສາມຄືຄວາມຕາຍທາງວິນຍານທີ່ເກີດມາຈາກບາບ. ພຣະເຢຊູຄຣິດໄດ້ເອົາຊະນະບັນຫານີ້ໂດຍການຮັບເອົາ “ການຕີສອນເພື່ອສັນຕິສຸກຂອງພວກເຮົາ” ໄວ້ກັບພຣະອົງ.⁴ ເປັນເພາະການເສຍສະລະຊົດໃຊ້ຂອງພຣະອົງ, ເຮົາສາມາດເປັນອິດສະລະຈາກຜົນສະທ້ອນຂອງບາບຂອງເຮົາ ຖ້າຫາກເຮົາມີສັດທາໃນພຣະຜູ້ຊ່ວຍໃຫ້ລອດ, ກັບໃຈດ້ວຍຄວາມຈິງໃຈ, ຮັບເອົາພັນທະສັນຍາທີ່ພຣະບິດາສະເໜີມອບໃຫ້ເຮົາຜ່ານທາງພິທີການທີ່ຈຳເປັນ ດັ່ງເຊັ່ນການບັບຕິສະມາ, ແລະ ອົດທົນຈົນເຖິງທີ່ສຸດ.⁵
ບັນຫາທີສີ່ຄືທຳມະຊາດບໍ່ດີພ້ອມ, ທີ່ຈຳກັດຂອງເຮົາ. ພຣະເຢຊູຄຣິດມີທາງແກ້ໄຂຕໍ່ບັນຫານີ້ດ້ວຍ. ພຣະອົງບໍ່ພຽງແຕ່ຈະລຶບຄວາມຜິດພາດຂອງເຮົາ ແລະ ເຮັດໃຫ້ເຮົາບໍລິສຸດຄືນອີກເທົ່ານັ້ນ. ພຣະອົງສາມາດກໍ່ໃຫ້ເກີດ “ການປ່ຽນແປງອັນໃຫຍ່ຫລວງ … ໃນໃຈຂອງພວກເຂົາ, ຈົນວ່າພວກເຮົາບໍ່ມີໃຈທີ່ຈະກະທຳຄວາມຊົ່ວອີກຕໍ່ໄປ, ແຕ່ປາດຖະໜາຈະເຮັດແຕ່ຄວາມດີໂດຍຕະຫລອດ.”⁶ ເຮົາສາມາດຖືກເຮັດໃຫ້ດີພ້ອມໂດຍພຣະຄຸນຂອງພຣະຄຣິດ ແລະ ໃນມື້ໜຶ່ງຈະກາຍເປັນເໝືອນດັ່ງພຣະອົງ.⁷

ໜ້າເສຍດາຍ, ສ່ວນຫລາຍແລ້ວເຮົາມັກຈະເອົາໃຈໃສ່ແຕ່ບັນຫາຂອງເຮົາເອງຈົນວ່າເຮົາສູນເສຍການສຸມໃສ່ການແກ້ໄຂ, ຊຶ່ງເປັນພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ເຮົາຈະຫລີກລ້ຽງຄວາມຜິດພາດນັ້ນໄດ້ແນວໃດ? ຂ້າພະເຈົ້າເຊື່ອວ່າຈະພົບເຫັນຄຳຕອບນັ້ນຢູ່ໃນພັນທະສັນຍາທີ່ເຮົາຖືກເຊື້ອເຊີນໃຫ້ເຮັດກັບພຣະອົງ ແລະ ພຣະບິດາຜູ້ສະຖິດຢູ່ໃນສະຫວັນຂອງເຮົາ.

ສຸມໃສ່ພຣະເຢຊູຄຣິດຜ່ານທາງພັນທະສັນຍາ

ພັນທະສັນຍາຂອງເຮົາຊ່ວຍເຮົາໃຫ້ສຸມຄວາມຕັ້ງໃຈຂອງເຮົາ, ຄວາມນຶກຄິດ, ແລະ ການກະທຳຂອງເຮົາໃສ່ທີ່ພຣະຄຣິດ. ເມື່ອເຮົາ “ແນບສະໜິດຢູ່ກັບພັນທະສັນຍາ [ຊຶ່ງເຮົາໄດ້] ເຮັດ,” ເຮົາສາມາດເຫັນ “ສິ່ງທີ່ເປັນຂອງໂລກນີ້” ທີ່ເຮົາຄວນ “ປ່ອຍວາງ” ແລະ “ສິ່ງທີ່ດີກວ່າ [ທາງໂລກ]” ທີ່ເຮົາຄວນສະແຫວງຫາຢ່າງພາກພຽນ.⁸

ນັ້ນຄືສິ່ງທີ່ຜູ້ຄົນຂອງອຳໂມນໄດ້ສະແຫວງຫາຢູ່ໃນພຣະຄຳພີມໍມອນ. ເມື່ອເຂົາເຈົ້າໄດ້ຮຽນຮູ້ເຖິງພຣະເຢຊູຄຣິດ ແລະ ໄດ້ເລີ່ມສຸມຊີວິດຂອງເຂົາເຈົ້າໃສ່ພຣະອົງ, ເຂົາເຈົ້າໄດ້ຮັບຮູ້ວ່າເຂົາເຈົ້າຄວນຝັງອາວຸດແຫ່ງສົງຄາມຂອງເຂົາເຈົ້າ ແລະ ໄດ້ກາຍເປັນຄົນຊື່ຕົງຢ່າງສົມບູນ ແລະ “ດີເດັ່ນຂຶ້ນ ຍ້ອນວ່າຄວາມກະຕືລືລົ້ນຂອງພວກເຂົາທີ່ມີຕໍ່ພຣະເຈົ້າ.”⁹

ການຮັກສາພັນທະສັນຍານຳເຮົາໄປສະແຫວງຫາສິ່ງໃດກໍຕາມທີ່ເຊື້ອເຊີນອິດທິພົນຂອງພຣະວິນຍານ ແລະ ປະຕິເສດສິ່ງໃດກໍຕາມທີ່ຂັບໄລ່ອິດທິພົນນັ້ນ—“ເພາະເຮົາຮູ້ວ່າ ຖ້າຫາກເຮົາສາມາດມີຄ່າຄວນສຳລັບການສະຖິດຢູ່ຂອງພຣະວິນຍານບໍລິສຸດ, ແລ້ວເຮົາກໍສາມາດມີຄ່າຄວນທີ່ຈະດຳລົງຊີວິດຢູ່ໃນທີ່ປະທັບຂອງພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ.”¹⁰ ນີ້ກໍອາດຈະໝາຍຄວາມວ່າ ເຮົາຕ້ອງປ່ຽນຄຳສັບຂອງເຮົາ, ນຳໃຊ້ຖ້ອຍຄຳທີ່ດີມີເມດຕາຫລາຍກວ່າ. ມັນກໍສາມາດໝາຍຄວາມວ່າ ການເອົານິໄສທີ່ເສີມສ້າງຄວາມເຂັ້ມແຂງໃຫ້ແກ່ຄວາມສຳພັນຂອງເຮົາກັບພຣະຜູ້ເປັນເຈົ້າເຂົ້າມາແທນນິໄສທີ່ບໍ່ສົມບູນທາງຝ່າຍວິນຍານ, ດັງເຊັ່ນການອະທິຖານ ແລະ ການສຶກສາພຣະຄຳພີທຸກໆວັນ, ທັງເປັນສ່ວນຕົວ ແລະ ກັບຄອບຄົວ.

ປະທານຣະໂຊ ເອັມ ແນວສັນ ໄດ້ກ່າວວ່າ “ທຸກຄົນທີ່ເຮັດພັນທະສັນຍາຢູ່ທີ່ອ່າງບັບຕິສະມາ ແລະ ໃນພຣະວິຫານ—ແລະ ຮັກສາມັນ—ສາມາດເຂົ້າເຖິງອຳນາດຂອງພຣະເຢຊູຄຣິດຫລາຍຂຶ້ນ. …

“ລາງວັນສຳລັບການຮັກສາພັນທະສັນຍາກັບພຣະເຈົ້າ ຄືພະລັງຈາກສະຫວັນ—ພະລັງທີ່ເສີມກຳລັງໃຫ້ເຮົາ ເພື່ອຕ້ານທານກັບການທົດລອງ, ການລໍ້ລວງ, ແລະ ຄວາມເຈັບປວດໃຈ ໄດ້ດີກວ່າເກົ່າ.”¹¹

ການຕໍ່ພັນທະສັນຍາຂອງເຮົາລະຫວ່າງກອງປະຊຸມສິນລະລຶກທຸກໆວັນອາທິດເປັນໂອກາດທີ່ດີທີ່ຈະສຳຫລວດຕົວເຮົາເອງ¹² ແລະ ກັບມາສຸມຊີວິດຂອງເຮົາໃສ່ພຣະເຢຊູຄຣິດຄືນອີກ. ໂດຍການຮັບສ່ວນສິນລະລຶກ, ເຮົາປະກາດວ່າເຮົາ “ລະນຶກເຖິງພຣະອົງຕະຫລອດເວລາ.”¹³ ຄຳທີ່ວ່າ ຕະຫລອດເວລາ ແມ່ນສຳຄັນຫລາຍ. ມັນຂະຫຍາຍອິດທິພົນຂອງພຣະຜູ້ຊ່ວຍໃຫ້ລອດໄປເຖິງທຸກໆພາກສ່ວນຂອງຊີວິດເຮົາ. ເຮົາລະນຶກເຖິງພຣະອົງບໍ່ພຽງແຕ່ຢູ່ທີ່ໂບດ ຫລື ລະຫວ່າງການອະທິຖານຕອນເຊົ້າຂອງເຮົາ ຫລື ເມື່ອເຮົາມີບັນຫາ ແລະ ຕ້ອງການບາງສິ່ງບາງຢ່າງເທົ່ານັ້ນ.

ແມ່ນແລ້ວ, ບາງເທື່ອເຮົາກໍຖືກລົບກວນ. ເຮົາລືມໄປ. ເຮົາສູນເສຍຈຸດສຸມຂອງເຮົາ. ແຕ່ການຕໍ່ພັນທະສັນຍາຂອງເຮົາໝາຍຄວາມວ່າເຮົາ ຢາກ ລະນຶກເຖິງພຣະຜູ້ຊ່ວຍໃຫ້ລອດຕະຫລອດເວລາ, ວ່າເຮົາຈະພະຍາຍາມລະນຶກເຖິງຕະຫລອດທັງອາທິດ, ແລະ ວ່າເຮົາຈະເຮັດຄຳໝັ້ນສັນຍາ ແລະ ສຸມໃສ່ພຣະອົງຄືນອີກຄັ້ງຢູ່ທີ່ໂຕະສິນລະລຶກໃນອາທິດຕໍ່ໄປ.

ສຸມໃສ່ພຣະເຢຊູຄຣິດຢູ່ທີ່ບ້ານເຮືອນຂອງເຮົາ

ແທ້ໆແລ້ວ, ການສຸມໃສ່ພຣະເຢຊູຄຣິດ ຕ້ອງມີຄວາມໝາຍຫລາຍກວ່າແຕ່ໃນວັນອາທິດ, ຢູ່ທີ່ກິດຈະກຳໂບດ. ເມື່ອປະທານແນວສັນໄດ້ນຳສະເໜີ ຈົ່ງຕາມເຮົາມາ ໃນປີ 2018, ເພິ່ນໄດ້ກ່າວວ່າ, “ມັນເຖິງເວລາແລ້ວ ທີ່ຈະເປັນສາດສະໜາຈັກທີ່ໃຫ້ບ້ານເຮືອນເປັນສູນກາງ.”¹⁴ ເພິ່ນໄດ້ກ່າວວ່າເຮົາຄວນ “ປ່ຽນບ້ານເຮືອນ [ຂອງເຮົາ] ໃຫ້ເປັນສະຖານທີ່ສັກສິດແຫ່ງສັດທາ” ແລະ ເພື່ອ “ເປັນສູນກາງການຮຽນຮູ້ພຣະກິດຕິຄຸນ.” ແລະ ເພິ່ນໄດ້ໃຫ້ຄຳສັນຍາທີ່ດີເລີດສີ່ຢ່າງກັບເຮົາຖ້າຫາກເຮົາເຮັດດັ່ງນັ້ນ.¹⁵

ຄຳສັນຍາຢ່າງທີໜຶ່ງ: “ວັນຊະບາໂຕ ຂອງທ່ານ ຈະເປັນມື້ທີ່ມີຄວາມສຸກຫລາຍແທ້ໆ.” ມັນຈະເປັນວັນທີ່ທ່ານເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນ. ດັ່ງທີ່ຍິງໜຸ່ມຄົນໜຶ່ງຈາກປະເທດເປຣູ ໄດ້ກ່າວວ່າ, “ວັນຂອງພຣະຜູ້ເປັນເຈົ້າເປັນວັນທີ່ຂ້ານ້ອຍໄດ້ຮັບຄຳຕອບຫລາຍທີ່ສຸດຈາກພຣະຜູ້ເປັນເຈົ້າ.”

ຄຳສັນຍາຢ່າງທີສອງ: “ລູກໆ ຂອງທ່ານ ຈະຕື່ນເຕັ້ນທີ່ຈະຮຽນຮູ້ ແລະ ດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດ. ນັ້ນຈຶ່ງເປັນເຫດຜົນທີ່ “ພວກເຮົາເວົ້າເຖິງພຣະຄຣິດ, ພວກເຮົາປິຕິຍິນດີໃນພຣະຄຣິດ, ພວກເຮົາສັ່ງສອນເລື່ອງພຣະຄຣິດ, … ເພື່ອລູກຫລານຂອງພວກເຮົາ ຈະໄດ້ຮູ້ວ່າ ພວກເຂົາຈະຫລຽວຫາແຫລ່ງໃດເພື່ອການປົດບາບ.”¹⁶

ເຮົາເຮັດສິ່ງນີ້ເພື່ອວ່າໃນມື້ໜຶ່ງ, ເມື່ອລູກຊາຍຂອງເຮົາອອກໄປທຳງານ ຫລື ໄປເດີນປ່າຢູ່ທີ່ພູເຂົາ ຫລື ໄປລ່າສັດຢູ່ໃນປ່າ, ດັ່ງທີ່ເອໂນດໄດ້ເຮັດ, ລາວຈະຈື່ຈຳສິ່ງທີ່ເຮົາໄດ້ສິດສອນລາວກ່ຽວກັບພຣະຄຣິດ ແລະ ກ່ຽວກັບຄວາມຊື່ນຊົມຂອງການດຳລົງຊີວິດຕາມພຣະກິດຕິຄຸນ. ແລະ ໃຜຈະຮູ້ໄດ້? ບາງທີມື້ນີ້ຈະເປັນມື້ນັ້ນ ເມື່ອໃນທີ່ສຸດລາວໄດ້ຮູ້ສຶກເຖິງຄວາມຫິວໂຫຍທາງວິນຍານທີ່ເຮັດໃຫ້ລາວຫັນໄປຫາພຣະເຢຊູຄຣິດ ເພື່ອວ່າລາວຈະໄດ້ຍິນສຸລະສຽງຂອງພຣະຜູ້ເປັນເຈົ້າກ່າວຕໍ່ລາວວ່າ “ບາບຂອງເຈົ້າໄດ້ຮັບການອະໄພໃຫ້ແລ້ວ, ແລະ ເຈົ້າຈະໄດ້ຮັບພອນ.”¹⁷

ຄຳສັນຍາຢ່າງທີສາມ: “ອິດທິພົນຂອງຜູ້ປໍລະປັກໃນຊີວິດ ຂອງທ່ານ ແລະ ໃນບ້ານເຮືອນ ຂອງທ່ານ ຈະລົດນ້ອຍຖອຍລົງ.” ເພາະເຫດໃດ? ເພາະວ່າເມື່ອເຮົາສຸມໃສ່ພຣະເຢຊູຄຣິດຫລາຍເທົ່າໃດ, ບາບຍິ່ງຈະສູນເສຍແຮງດຶງດູດຂອງມັນ.¹⁸ ເມື່ອບ້ານເຮືອນຂອງເຮົາເຕັມໄປດ້ວຍຄວາມສະຫວ່າງຂອງພຣະຜູ້ຊ່ວຍໃຫ້ລອດ, ຈະມີຊ່ອງວ່າງໜ້ອຍລົງສຳລັບຄວາມມືດຂອງຜູ້ປໍລະປັກ.

ຄຳສັນຍາຢ່າງທີສີ່: “ການປ່ຽນແປງໃນຄອບຄົວຂອງທ່ານ ຈະເປັນສິ່ງທີ່ໜ້າຕື່ນເຕັ້ນ ແລະ ຄ້ຳຈູນ.” ເພາະເຫດໃດ? ເພາະວ່າການປ່ຽນແປງທີ່ພຣະເຢຊູຄຣິດນຳມາເປັນ “ການປ່ຽນແປງອັນຍິ່ງໃຫຍ່.”¹⁹ ພຣະອົງປ່ຽນທຳມະຊາດແທ້ໆຂອງເຮົາ; ເຮົາ “ກາຍມາເປັນຄົນໃໝ່.”²⁰ ເຮົາຈະຄ່ອຍໆກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍຂຶ້ນ, ເຕັມໄປດ້ວຍຄວາມຮັກອັນບໍລິສຸດຂອງພຣະອົງ ສຳລັບລູກໆທຸກຄົນຂອງພຣະເຈົ້າ.

ໃຜຈະບໍ່ຢາກໃຫ້ຄຳສັນຍາເຫລົ່ານີ້ເກີດເປັນຈິງໃນຊີວິດຂອງເຂົາ ແລະ ຄອບຄົວຂອງເຂົາ? ເຮົາຕ້ອງເຮັດຫຍັງແດ່ ເພື່ອຈະໄດ້ມັນມາ? ຄຳຕອບຄືທີ່ຈະປ່ຽນບ້ານເຮືອນຂອງເຮົາ ໃຫ້ເປັນສະຖານທີ່ສັກສິດແຫ່ງສັດທາ ແລະ ເປັນສູນກາງການຮຽນຮູ້ພຣະກິດຕິຄຸນ. ແລະ ເຮົາຈະເຮັດແນວນັ້ນໄດ້ແນວໃດ? ໂດຍການສຸມໃສ່ພຣະບິດາເທິງສະຫວັນ ແລະ ພຣະເຢຊູຄຣິດ, ການເຮັດໃຫ້ພວກພຣະອົງເປັນສູນກາງໃນຊີວິດຄອບຄົວຂອງເຮົາ, ເປັນອິດທິພົນທີ່ສຳຄັນທີ່ສຸດໃນບ້ານເຮືອນຂອງເຮົາ.

ຂ້າພະເຈົ້າຂໍແນະນຳວ່າ ໃຫ້ທ່ານເລີ່ມຕົ້ນໂດຍການເຮັດໃຫ້ພຣະຄຳຂອງພຣະຄຣິດ, ທີ່ພົບເຫັນຢູ່ໃນພຣະຄຳພີ, ເປັນພາກສ່ວນປະຈຳວັນໃນຊີວິດຂອງທ່ານໄດ້ບໍ? ບໍ່ມີສູດການກຳນົດສຳລັບການສຶກສາພຣະຄຳພີທີ່ສົມບູນແບບ. ອາດຈະໃຊ້ເວລາ 5 ຫລື 10 ນາທີແຕ່ລະວັນ—ຫລື ນານກວ່ານັ້ນຖ້າທ່ານສາມາດເຮັດໄດ້. ອາດຈະອ່ານໜຶ່ງບົດ ຫລື ສາມສີ່ຂໍ້ແຕ່ລະວັນກໍໄດ້. ບາງຄອບຄົວເລືອກທີ່ຈະສຶກສາໃນຕອນເຊົ້າກ່ອນເຂົາເຈົ້າອອກໄປໂຮງຮຽນ ຫລື ໄປທຳງານ. ຄອບຄົວອື່ນເລືອກທີ່ຈະອ່ານຕອນກາງຄືນກ່ອນເຂົ້ານອນ. ຄູ່ສາມີພັນລະຍາໜຸ່ມບາງຄູ່ໄດ້ບອກຂ້າພະເຈົ້າວ່າ ເຂົາເຈົ້າສຶກສາເປັນສ່ວນຕົວລະຫວ່າງການເດີນທາງໄປທຳງານ ແລະ ແລ້ວແບ່ງປັນຄວາມຮູ້ແຈ້ງກັບກັນແລະກັນ ຜ່ານທາງຂໍ້ຄວາມ ເພື່ອວ່າຄວາມຄິດເຫັນ ແລະ ການສົນທະນາຂອງເຂົາເຈົ້າຈະຖືກບັນທຶກໄວ້.

ປຶ້ມ ຈົ່ງຕາມເຮົາມາ ໃຫ້ຄຳແນະນຳເຖິງກິດຈະກຳ ແລະ ແຫລ່ງຊ່ວຍເຫລືອຫລາຍຢ່າງ ທີ່ສາມາດຊ່ວຍໃຫ້ບຸກຄົນ ແລະ ຄອບຄົວຮຽນຮູ້ຫລັກທຳພຣະກິດຕິຄຸນຈາກພຣະຄຳພີ. ວິດີໂອພຣະຄຣິສຕະທຳຄຳພີ ແລະ ວິດີໂອພຣະຄຳພີມໍມອນ ກໍເປັນເຄື່ອງມືທີ່ມີຄ່ານຳອີກ ເພື່ອເຮັດໃຫ້ຄອບຄົວຂອງທ່ານເຂົ້າເຖິງພຣະຄຳພີໄດ້. ຊາວໜຸ່ມ ແລະ ເດັກນ້ອຍມັກຈະໄດ້ຮັບການດົນໃຈໂດຍເລື່ອງລາວທີ່ໜ້າຊົງຈຳໃນພຣະຄຳພີ. ເລື່ອງລາວເຫລົ່ານີ້ ແລະ ຫລັກທຳພຣະກິດຕິຄຸນທີ່ມັນສິດສອນຈະຄົງຢູ່ກັບລູກໆຂອງທ່ານ, ຄືກັນກັບໝູ່ເພື່ອນທີ່ໄວ້ໃຈໄດ້, ເມື່ອພວກເຂົາຕ້ອງການຕົວຢ່າງຂອງການຮັບໃຊ້ທີ່ດີ, ຄຸນນະທຳ, ການເຊື່ອຟັງ, ຄວາມອົດທົນ, ຄວາມບາກບັ່ນ, ການເປີດເຜີຍສ່ວນຕົວ, ຄວາມໃຈບຸນ, ຄວາມຖ່ອມຕົວ, ແລະ ສັດທາໃນພຣະເຢຊູຄຣິດ. ເມື່ອເວລາຜ່ານໄປ, ຄວາມສະໝ່ຳສະເໝີຂອງທ່ານໃນການຊື່ນຊົມດ້ວຍພຣະຄຳຂອງພຣະເຈົ້າຈະຊ່ວຍລູກໆຂອງທ່ານເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນເລື້ອຍໆ. ພວກເຂົາຈະມາຮູ້ຈັກພຣະອົງຫລາຍກວ່າແຕ່ກ່ອນ.

ອົງພຣະເຢຊູຄຣິດເຈົ້າຊົງພຣະຊົນຢູ່ໃນວັນເວລານີ້. ພຣະອົງສາມາດປະທັບຢູ່ຢ່າງແຂງຂັນໃນຊີວິດປະຈຳວັນຂອງເຮົາ. ພຣະອົງຄືທາງແກ້ໄຂຕໍ່ບັນຫາຂອງເຮົາ, ແຕ່ເຮົາຕ້ອງເງີຍໜ້າຂຶ້ນ ແລະ ສຸມຄວາມຕັ້ງໃຈຂອງເຮົາໃສ່ພຣະອົງ. ພຣະອົງໄດ້ກ່າວວ່າ, “ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ; ຢ່າສົງໄສ, ຢ່າສູ່ຢ້ານ.”²¹ ເມື່ອເຮົາສຸມໃສ່ພຣະອົງ ແລະ ພຣະບິດາຜູ້ສະຖິດຢູ່ໃນສະຫວັນຂອງເຮົາ, ເຮັດ ແລະ ຮັກສາພັນທະສັນຍາກັບພວກພຣະອົງ, ແລະ ເຮັດໃຫ້ພວກພຣະອົງເປັນອິດທິພົນທີ່ສຳຄັນທີ່ສຸດໃນບ້ານເຮືອນ ແລະ ຄອບຄົວຂອງເຮົາ, ແລ້ວເຮົາຈະກາຍເປັນຜູ້ຄົນທີ່ປະທານແນວສັນໄດ້ວາດພາບເຫັນວ່າເປັນ: “ຜູ້ຄົນທີ່ສາມາດ, ພ້ອມແລ້ວ, ແລະ ມີຄ່າຄວນທີ່ຈະຮັບເອົາພຣະຜູ້ເປັນເຈົ້າ ເມື່ອພຣະອົງສະເດັດມາອີກ, ຜູ້ຄົນທີ່ເລືອກເອົາພຣະເຢຊູຄຣິດເໜືອໂລກທີ່ຕົກຕ່ຳ, ຜູ້ຄົນທີ່ປິຕິຍິນດີກັບອຳເພີໃຈຂອງເຂົາເຈົ້າ ທີ່ຈະດຳລົງຊີວິດຕາມກົດທີ່ສູງກວ່າ, ສັກສິດກວ່າຂອງພຣະເຢຊູຄຣິດ.”²² ໃນພຣະນາມຂອງພຣະເຢຊູຄຣິດ, ອາແມນ.