ການພົບສັນຕິສຸກສ່ວນຕົວ

ໂດຍ ປະທານເຮັນຣີ ບີ ໄອຣິງ

ທີ່ປຶກສາທີສອງໃນຝ່າຍປະທານສູງສຸດ

ຂ້າພະເຈົ້າອະທິຖານວ່າທ່ານຈະພົບສັນຕິສຸກ, ຊ່ວຍຄົນອື່ນຫລາຍຄົນໃຫ້ພົບມັນ, ແລະ ສົ່ງຕໍ່ມັນໄປ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເຮົາໄດ້ຮັບພອນໂດຍຄຳສອນທີ່ດົນໃຈ ແລະ ສຽງເພງທີ່ມ່ວນອອນຊອນທີ່ເຮົາໄດ້ສຳຜັດຢູ່ທີ່ພາກເປີດກອງປະຊຸມໃຫຍ່ສາມັນນີ້. ພວກເຮົາຂໍຂອບໃຈສຳລັບການມີສ່ວນຮ່ວມຂອງທ່ານ ແລະ ສຳລັບສັດທາຂອງທ່ານ.

ມື້ນີ້ຂ້າພະເຈົ້າຈະກ່າວກ່ຽວກັບສິ່ງທີ່ຂ້າພະເຈົ້າໄດ້ຮຽນຮູ້ ກ່ຽວກັບການມະຫັດສະຈັນຂອງການພົບສັນຕິສຸກສ່ວນຕົວ, ບໍ່ວ່າສະຖານະການຂອງເຮົາຈະເປັນແບບໃດກໍຕາມ. ພຣະຜູ້ຊ່ວຍໃຫ້ລອດຮູ້ວ່າລູກໆຂອງພຣະບິດາເທິງສະຫວັນທຸກຄົນປາດຖະໜາຢາກມີສັນຕິສຸກ, ແລະ ພຣະອົງກໍໄດ້ກ່າວວ່າພຣະອົງສາມາດປະທານມັນໃຫ້ເຮົາ. ທ່ານຄົງຈື່ຈຳພຣະຄຳຂອງພຣະເຢຊູຄຣິດ ທີ່ມີບັນທຶກໄວ້ຢູ່ໃນພຣະທຳໂຢຮັນ ທີ່ວ່າ “ເຮົາມອບສັນຕິສຸກໄວ້ກັບພວກເຈົ້າ, ເປັນສັນຕິສຸກຂອງເຮົາ, ທີ່ເຮົາມອບໃຫ້ພວກເຈົ້າ: ສັນຕິສຸກທີ່ເຮົາໃຫ້ນັ້ນ, ບໍ່ເໝືອນສັນຕິສຸກທີ່ໂລກໃຫ້. ຢ່າວຸ້ນວາຍເປັນທຸກໃຈ, ແລະ ຢ່າສູ່ຢ້ານ.”¹

ສິ່ງທີ່ພຣະອົງໝາຍເຖິງກ່ຽວກັບສັນຕິສຸກ ແລະ ວ່າພຣະອົງສາມາດມອບມັນໃຫ້ແນວໃດ ແມ່ນຖືກເປີດເຜີຍໂດຍສະຖານະການຂອງຜູ້ທີ່ໄດ້ຍິນພຣະອົງກ່າວຄຳເຫລົ່ານັ້ນ. ຂໍໃຫ້ຟັງເລື່ອງລາວຢູ່ໃນພຣະທຳໂຢຮັນ ເຖິງຈຸດສູງສຸດຂອງການປະຕິບັດສາດສະໜາກິດຂອງພຣະຄຣິດ. ກອງກຳລັງທີ່ໂຫດຮ້າຍຂອງຄວາມຊົ່ວກຳລັງພະຍາຍາມກີດກັນພຣະອົງ ແລະ ອີກບໍ່ດົນກໍຈະກີດກັນສານຸສິດຂອງພຣະອົງ.

ນີ້ຄືພຣະຄຳຂອງພຣະຜູ້ຊ່ວຍໃຫ້ລອດວ່າ:

“ຖ້າພວກເຈົ້າຮັກເຮົາ, ພວກເຈົ້າກໍຈະເຊື່ອຟັງກົດບັນຍັດຂອງເຮົາ.

“ຝ່າຍເຮົາຈະທູນຂໍພຣະບິດາ, ແລະ ພຣະອົງຈະປະທານຜູ້ຊ່ວຍອີກອົງໜຶ່ງແກ່ພວກເຈົ້າ ເພື່ອຈະຢູ່ກັບພວກເຈົ້າຕະຫລອດໄປເປັນນິດ;

“ຄືພຣະວິນຍານແຫ່ງຄວາມຈິງ; ຊຶ່ງໂລກບໍ່ອາດຈະຮັບພຣະອົງໄດ້, ເພາະໂລກບໍ່ເຫັນ ແລະ ບໍ່ຮູ້ຈັກພຣະອົງ: ແຕ່ພວກເຈົ້າຮູ້ຈັກພຣະອົງ, ເພາະພຣະອົງສະຖິດຢູ່ກັບພວກເຈົ້າ, ແລະ ຢູ່ໃນພວກເຈົ້າ.

“ເຮົາຈະບໍ່ປະຖິ້ມເຈົ້າທັງຫລາຍໄວ້ໃຫ້ເປັນກຳພ້າ: ເຮົາຈະມາຫາພວກເຈົ້າ.

“ອີກໜ້ອຍໜຶ່ງໂລກຈະບໍ່ເຫັນເຮົາ, ແຕ່ພວກເຈົ້າຈະເຫັນເຮົາ: ເພາະເຮົາມີຊີວິດຢູ່, ພວກເຈົ້າກໍຈະມີຊີວິດຢູ່ເໝືອນກັນ.

“ເມື່ອວັນນັ້ນມາເຖິງ ພວກເຈົ້າຈະຮູ້ວ່າ ເຮົາຢູ່ໃນພຣະບິດາຂອງເຮົາ, ພວກເຈົ້າຢູ່ໃນເຮົາ, ແລະ ເຮົາກໍຢູ່ໃນພວກເຈົ້າ.

“ຜູ້ທີ່ມີກົດບັນຍັດຂອງເຮົາ ແລະ ເຊື່ອຟັງກົດບັນຍັດນັ້ນ, ແມ່ນຜູ້ນັ້ນແຫລະ ທີ່ຮັກເຮົາ: ພຣະບິດາຂອງເຮົາ ຈະຮັກຜູ້ທີ່ເຮົາຮັກ, ແລະ ເຮົາຈະຮັກເຂົາເໝືອນກັນ, ທັງຈະປະກົດຕົວໃຫ້ແກ່ເຂົາ.

“ຢູດາຜູ້ທີ່ບໍ່ແມ່ນຢູດາອິດສະກາຣີອົດ ຖາມພຣະອົງວ່າ, ພຣະອົງເຈົ້າເອີຍ ເປັນຫຍັງພຣະອົງຈຶ່ງສຳແດງຕົວແກ່ພວກຂ້ານ້ອຍ ແຕ່ບໍ່ສຳແດງຕົວແກ່ໂລກ?

“ພຣະເຢຊູຕອບເພິ່ນວ່າ, ຖ້າຜູ້ໃດຮັກເຮົາ ກໍຈະປະຕິບັດຕາມຖ້ອຍຄຳຂອງເຮົາ, ແລະ ພຣະບິດາຂອງເຮົາຈະຮັກຜູ້ນັ້ນ, ແລະ ເຮົາທັງສອງຈະມາຫາຜູ້ນັ້ນ, ແລະ ເຮົາຈະຕັ້ງຢູ່ກັບຜູ້ນັ້ນ.

“ຜູ້ໃດທີ່ບໍ່ຮັກເຮົາ ກໍບໍ່ປະຕິບັດຕາມຖ້ອຍຄຳຂອງເຮົາ: ຖ້ອຍຄຳທີ່ພວກເຈົ້າໄດ້ຍິນນັ້ນບໍ່ແມ່ນຂອງເຮົາ, ແຕ່ມາຈາກພຣະບິດາຜູ້ທີ່ໃຊ້ເຮົາມາ.

“ເຮົາບອກຖ້ອຍຄຳເຫລົ່ານີ້ແກ່ພວກເຈົ້າ, ເມື່ອເຮົາຍັງຢູ່ກັບພວກເຈົ້າ.

“ແຕ່ພຣະຜູ້ຊ່ວຍຄືພຣະວິນຍານບໍລິສຸດ, ຜູ້ທີ່ພຣະບິດາຈະໃຊ້ມາໃນນາມຂອງເຮົາ, ອົງນັ້ນແຫລະ ຈະສັ່ງສອນພວກເຈົ້າທຸກສິ່ງ, ແລະ ຈະເຕືອນໃຫ້ພວກເຈົ້າລະນຶກເຖິງທຸກສິ່ງ, ຊຶ່ງເຮົາໄດ້ບອກພວກເຈົ້າແລ້ວນັ້ນ.

“ເຮົາມອບສັນຕິສຸກໄວ້ກັບພວກເຈົ້າ, ເປັນສັນຕິສຸກຂອງເຮົາ, ທີ່ເຮົາມອບໃຫ້ພວກເຈົ້າ: ສັນຕິສຸກທີ່ເຮົາໃຫ້ນັ້ນ, ບໍ່ເໝືອນສັນຕິສຸກທີ່ໂລກໃຫ້. ຢ່າວຸ້ນວາຍເປັນທຸກໃຈ, ແລະ ຢ່າສູ່ຢ້ານ.”²

ຂ້າພະເຈົ້າໄດ້ຮຽນຮູ້ຄວາມຈິງ ຢ່າງໜ້ອຍຫ້າຢ່າງ ຈາກຄຳສອນນັ້ນຂອງພຣະຜູ້ຊ່ວຍໃຫ້ລອດ.

ໜຶ່ງ, ຂອງປະທານແຫ່ງສັນຕິສຸກນັ້ນແມ່ນຖືກມອບໃຫ້ ຫລັງຈາກ ເຮົາມີສັດທາທີ່ຈະຮັກສາພຣະບັນຍັດຂອງພຣະອົງ. ສຳລັບຜູ້ທີ່ເປັນສະມາຊິກຂອງສາດສະໜາຈັກຂອງພຣະຜູ້ເປັນເຈົ້າທີ່ເຮັດພັນທະສັນຍາ, ການເຊື່ອຟັງເປັນສິ່ງທີ່ເຮົາໄດ້ສັນຍາວ່າຈະເຮັດ.

ສອງ, ພຣະວິນຍານບໍລິສຸດຈະມາຫາເຮົາ ແລະ ສະຖິດຢູ່ກັບເຮົາ. ພຣະຜູ້ເປັນເຈົ້າກ່າວວ່າ ຂະນະທີ່ເຮົາຊື່ສັດຕໍ່ໄປ, ພຣະວິນຍານບໍລິສຸດຈະສະຖິດຢູ່ໃນເຮົາ. ນັ້ນຄືຄຳສັນຍາຢູ່ໃນຄຳອະທິຖານສຳລັບສິນລະລຶກ ວ່າພຣະວິນຍານຈະເປັນເພື່ອນຂອງເຮົາ ແລະ ວ່າເຮົາຈະຮູ້ສຶກການປອບໂຍນຂອງພຣະອົງ, ຢູ່ໃນຫົວໃຈ ແລະ ຄວາມນຶກຄິດຂອງເຮົາ.

ສາມ, ພຣະຜູ້ຊ່ວຍໃຫ້ລອດສັນຍາວ່າ ຂະນະທີ່ເຮົາຮັກສາພັນທະສັນຍາຂອງເຮົາ, ເຮົາຈະສາມາດຮູ້ສຶກເຖິງຄວາມຮັກຂອງພຣະບິດາ ແລະ ພຣະບຸດທີ່ມີໃຫ້ກັນແລະກັນ ແລະ ໃຫ້ແກ່ເຮົາ. ເຮົາສາມາດຮູ້ສຶກເຖິງຄວາມໃກ້ຊິດຂອງພຣະອົງຢູ່ໃນຊີວິດມະຕະຂອງເຮົາ, ດັ່ງທີ່ເຮົາຈະຮູ້ສຶກເມື່ອເຮົາໄດ້ຮັບພອນທີ່ຈະໄດ້ຢູ່ກັບພວກພຣະອົງຕະຫລອດໄປ.

ສີ່, ການຮັກສາພຣະບັນຍັດຂອງພຣະຜູ້ເປັນເຈົ້າຮຽກຮ້ອງຫລາຍກວ່າການເຊື່ອຟັງ. ເຮົາຕ້ອງຮັກພຣະເຈົ້າດ້ວຍສຸດຫົວໃຈ, ດ້ວຍສຸດພະລັງ, ຄວາມນຶກຄິດ, ແລະ ຈິດວິນຍານຂອງເຮົາ.³

ຜູ້ທີ່ບໍ່ຮັກພຣະອົງຈະບໍ່ຮັກສາພຣະບັນຍັດຂອງພຣະອົງ. ແລະ ສະນັ້ນ ເຂົາເຈົ້າຈະບໍ່ມີຂອງປະທານແຫ່ງສັນຕິສຸກໃນຊີວິດນີ້ ແລະ ໃນໂລກທີ່ຈະມາເຖິງ.

ຫ້າ, ມັນກໍແຈ່ມແຈ້ງດີວ່າພຣະຜູ້ເປັນເຈົ້າໄດ້ຮັກເຮົາຫລາຍພໍ ທີ່ຈະຈ່າຍຄ່າບາບຂອງເຮົາ ເພື່ອວ່າເຮົາຈະສາມາດ—ຜ່ານທາງສັດທາຂອງເຮົາໃນພຣະອົງ ແລະ ການກັບໃຈຂອງເຮົາ, ຜ່ານທາງຜົນກະທົບຂອງການຊົດໃຊ້ຂອງພຣະອົງ—ມີຂອງປະທານແຫ່ງສັນຕິສຸກທີ່ “ເກີນຄວາມເຂົ້າໃຈ,”⁴ ໃນຊີວິດນີ້ ແລະ ກັບພຣະອົງຊົ່ວນິລັນດອນ.

ທ່ານບາງຄົນ, ບາງທີຫລາຍຄົນ, ບໍ່ຮູ້ສຶກເຖິງສັນຕິສຸກທີ່ພຣະຜູ້ເປັນເຈົ້າໄດ້ສັນຍາໄວ້. ທ່ານອາດໄດ້ອະທິຖານຂໍສັນຕິສຸກສ່ວນຕົວ ແລະ ການປອບໂຍນທາງວິນຍານ. ແຕ່ທ່ານອາດຮູ້ສຶກວ່າຟ້າສະຫວັນມິດງຽບໄປ ຕໍ່ການອ້ອນວອນຂໍສັນຕິສຸກຂອງທ່ານ.

ມີສັດຕູຂອງຈິດວິນຍານຂອງທ່ານ ທີ່ບໍ່ຕ້ອງການໃຫ້ທ່ານ ແລະ ຜູ້ຄົນທີ່ທ່ານຮັກໄດ້ພົບສັນຕິສຸກ. ສັດຕູບໍ່ສາມາດມີມັນໄດ້. ມັນເຮັດວຽກເພື່ອກີດກັນທ່ານ ແມ່ນແຕ່ຈາກການຢາກພົບສັນຕິສຸກທີ່ພຣະຜູ້ຊ່ວຍໃຫ້ລອດ ແລະ ພຣະບິດາເທິງສະຫວັນຂອງເຮົາປາດຖະໜາໃຫ້ທ່ານມີ.

ຄວາມພະຍາຍາມຂອງຊາຕານທີ່ຈະກໍ່ໃຫ້ເກີດຄວາມກຽດຊັງ ແລະ ການຂັດແຍ້ງທີ່ຢູ່ອ້ອມຮອບເຮົາກໍເບິ່ງຄືວ່ານັບມື້ນັບມີຫລາຍຂຶ້ນ. ເຮົາເຫັນຫລັກຖານຂອງມັນກຳລັງເກີດຂຶ້ນຢູ່ລະຫວ່າງປະເທດຊາດ ແລະ ເມືອງ, ໃນໝູ່ບ້ານ, ໃນສື່ສານອີເລັກໂທຣນິກ, ແລະ ຕະຫລອດທົ່ວໂລກ.

ແຕ່ຍັງມີເຫດຜົນສຳລັບການມອງໂລກໃນແງ່ດີ: ນັ້ນກໍຄືວ່າ ເດັກນ້ອຍທີ່ເກີດໃໝ່ທຸກຄົນເກີດມາພ້ອມດ້ວຍຄວາມສະຫວ່າງຂອງພຣະຄຣິດ. ດ້ວຍຂອງປະທານທີ່ມີໃຫ້ທຸກຄົນນັ້ນ ຄວາມຮູ້ສຶກເຖິງສິ່ງທີ່ຖືກຕ້ອງກໍມີມາ, ຄວາມປາດຖະໜາທີ່ຈະຮັກ ແລະ ເປັນທີ່ຮັກ. ຍັງມີຄວາມຮູ້ສຶກທີ່ເກີດມາພ້ອມ ເຖິງຄວາມຍຸດຕິທຳ ແລະ ຄວາມຈິງຢູ່ໃນຕົວຂອງລູກໆຂອງພຣະເຈົ້າທຸກຄົນ ຂະນະທີ່ເຂົາລົງມາສູ່ຊີວິດມະຕະ.

ການມອງໂລກໃນແງ່ດີຂອງເຮົາສຳລັບສັນຕິສຸກສ່ວນຕົວທີ່ມີໃຫ້ແກ່ເດັກນ້ອຍເຫລົ່ານັ້ນແມ່ນຂຶ້ນຢູ່ກັບຜູ້ຄົນທີ່ດູແລພວກເຂົາ. ຖ້າຫາກຜູ້ຄົນທີ່ລ້ຽງດູພວກເຂົາ ແລະ ຮັບໃຊ້ພວກເຂົາໄດ້ພະຍາຍາມເພື່ອຈະໄດ້ຮັບຂອງປະທານແຫ່ງສັນຕິສຸກຈາກພຣະຜູ້ຊ່ວຍໃຫ້ລອດ, ໂດຍຕົວຢ່າງສ່ວນຕົວ ແລະ ຄວາມພະຍາຍາມ, ເຂົາເຈົ້າຈະຊຸກຍູ້ສັດທາຂອງເດັກຄົນນັ້ນໃຫ້ເໝາະສົມສຳລັບຂອງປະທານແຫ່ງສັນຕິສຸກທີ່ສູງສົ່ງ.

ນັ້ນຄືສິ່ງທີ່ພຣະຄຳພີສັນຍາ: “ຈົ່ງອົບຮົມເດັກນ້ອຍໃນທາງທີ່ຖືກຕ້ອງ: ແລະ ເມື່ອເຂົາເປັນຜູ້ໃຫຍ່ແລ້ວເຂົາຈະບໍ່ໜີຈາກທາງນັ້ນ.”⁵ ມັນຈະຮຽກຮ້ອງໃຫ້ຜູ້ທີ່ມີໜ້າທີ່ຮັບຜິດຊອບໃນການດູແລ ແລະ ບຳລຸງລ້ຽງພວກເຂົາມີຄຸນຄ່າສຳລັບຂອງປະທານແຫ່ງສັນຕິສຸກ.

ໜ້າໂສກເສົ້າທີ່, ເຮົາທຸກຄົນໄດ້ຮູ້ສຶກເຖິງຄວາມເຈັບປວດເມື່ອເດັກນ້ອຍທີ່ຖືກລ້ຽງດູໂດຍພໍ່ແມ່ທີ່ຖືກດົນໃຈ—ບາງເທື່ອໂດຍພໍ່ແມ່ລ້ຽງດ່ຽວ—ຫລັງຈາກໄດ້ມີສັດທາ ແລະ ສັນຕິສຸກຕະຫລອດຊີວິດ, ແລ້ວເລືອກເສັ້ນທາງທີ່ນຳໄປສູ່ຄວາມໂສກເສົ້າ.

ແມ່ນແຕ່ເມື່ອຄວາມໂສກເສົ້ານັ້ນເກີດຂຶ້ນ, ຂ້າພະເຈົ້າຍັງມອງໂລກໃນແງ່ດີ ເພາະຂອງປະທານອີກຢ່າງໜຶ່ງຈາກພຣະຜູ້ເປັນເຈົ້າ. ນີ້ກໍແມ່ນວ່າ: ພຣະອົງຈັດຫາຜູ້ສ້າງສັນຕິສຸກໃຫ້ໃນບັນດາສານຸສິດທີ່ໄວ້ວາງໃຈໄດ້ຂອງພຣະອົງ. ເຂົາເຈົ້າໄດ້ຮູ້ສຶກສັນຕິສຸກ ແລະ ຄວາມຮັກຂອງພຣະເຈົ້າ. ເຂົາເຈົ້າມີພຣະວິນຍານບໍລິສຸດຢູ່ໃນໃຈ, ແລະ ພຣະຜູ້ເປັນເຈົ້າສາມາດຊີ້ນຳເຂົາເຈົ້າໃຫ້ເອື້ອມອອກໄປຫາແກະທີ່ກຳລັງຫລົງທາງຢູ່.

ຂ້າພະເຈົ້າໄດ້ເຫັນສິ່ງນີ້ຕະຫລອດຊີວິດຂອງຂ້າພະເຈົ້າ ແລະ ຕະຫລອດທົ່ວໂລກ. ທ່ານກໍເຄີຍໄດ້ເຫັນມັນຄືກັນ. ບາງເທື່ອ, ເມື່ອທ່ານຖືກນຳພາໄປຊ່ວຍຄົນໃດຄົນໜຶ່ງ, ມັນອາດເບິ່ງຄືວ່າເປັນເລື່ອງບັງເອີນ.

ເທື່ອໜື່ງ, ຂ້າພະເຈົ້າພຽງແຕ່ຖາມຄົນໜຶ່ງທີ່ຂ້າພະເຈົ້າໄດ້ພົບຕອນເດີນທາງວ່າ, “ເຈົ້າເລົ່າເລື່ອງເລັກນ້ອຍໃຫ້ຂ້ອຍຟັງກ່ຽວກັບຄອບຄົວຂອງເຈົ້າໄດ້ບໍ?” ການສົນທະນາໄດ້ນຳພາຂ້າພະເຈົ້າໃຫ້ຂໍເບິ່ງຮູບຂອງລູກສາວຜູ້ໃຫຍ່ຂອງນາງ, ທີ່ນາງໄດ້ເວົ້າວ່າກຳລັງດີ້ນລົນຢູ່. ຂ້າພະເຈົ້າປະທັບໃຈກັບຄວາມດີງາມຢູ່ໃນໃບໜ້າ ຂອງຍິງສາວຢູ່ໃນຮູບນັ້ນ. ຂ້າພະເຈົ້າຮູ້ສຶກປະທັບໃຈໃຫ້ຂໍທີ່ຢູ່ອີເມວຂອງນາງ. ໃນເວລານັ້ນລູກສາວຄົນນັ້ນກຳລັງຫລົງທາງ ແລະ ສົງໄສຖ້າຫາກວ່າພຣະເຈົ້າໄດ້ມີຂ່າວສານສຳລັບນາງ. ພຣະອົງມີ. ຂ່າວສານນັ້ນແມ່ນ: “ພຣະຜູ້ເປັນເຈົ້າຮັກເຈົ້າ. ພຣະອົງຮັກເຈົ້າມາຕະຫລອດ. ພຣະຜູ້ເປັນເຈົ້າຢາກໃຫ້ເຈົ້າກັບມາ. ພອນຂອງເຈົ້າທີ່ຖືກສັນຍາໄວ້ກໍຍັງມີຢູ່.”

ສະມາຊິກຕະຫລອດທົ່ວສາດສະໜາຈັກໄດ້ຮູ້ສຶກເຖິງຂອງປະທານແຫ່ງສັນຕິສຸກສ່ວນຕົວຂອງພຣະຜູ້ເປັນເຈົ້າ. ພຣະອົງກຳລັງຊຸກຍູ້ທຸກຄົນໃຫ້ຊ່ວຍຄົນອື່ນມີໂອກາດທີ່ຈະມາຫາພຣະອົງ ແລະ ເໝາະສົມສຳລັບສັນຕິສຸກອັນດຽວກັນນັ້ນ. ແລ້ວເຂົາເຈົ້າຈະເລືອກທີ່ຈະສະແຫວງຫາການດົນໃຈ ເພື່ອຈະຮູ້ວ່າເຂົາເຈົ້າຈະສາມາດສົ່ງຕໍ່ຂອງປະທານນັ້ນໃຫ້ຄົນອື່ນໄດ້ແນວໃດ.

ຄົນລຸ້ນໃໝ່ຈະກາຍເປັນຜູ້ບຳລຸງລ້ຽງຄົນລຸ້ນທີ່ຈະຕາມມາ. ຜົນກະທົບນັ້ນຈະເພີ່ມທະວີຂຶ້ນໃນທາງທີ່ໜ້າອັດສະຈັນໃຈ. ມັນຈະແຜ່ອອກໄປ ແລະ ເຕີບຂະຫຍາຍເມື່ອເວລາຜ່ານໄປ, ແລະ ອານາຈັກຂອງພຣະຜູ້ເປັນເຈົ້າຢູ່ເທິງແຜ່ນດິນໂລກກໍຈະຖືກກະກຽມ ແລະ ພ້ອມທີ່ຈະທັກທາຍພຣະອົງດ້ວຍສຽງໂຮຮ້ອງໂຮຊັນນາ. ຈະມີສັນຕິສຸກຢູ່ເທິງແຜ່ນດິນໂລກ.

ຂ້າພະເຈົ້າເປັນພະຍານທີ່ແນ່ນອນເຖິງພຣະເຢຊູຄຣິດ ແລະ ວ່າພຣະອົງນຳພາສາດສະໜາຈັກຂອງພຣະອົງ. ຂ້າພະເຈົ້າໄດ້ຮູ້ສຶກເຖິງຄວາມຮັກຂອງພຣະອົງໃນຊີວິດຂອງຂ້າພະເຈົ້າ ແລະ ຄວາມຮັກ ແລະ ຄວາມຫ່ວງໃຍຂອງພຣະອົງທີ່ມີຕໍ່ລູກໆຂອງພຣະບິດາເທິງສະຫວັນທຸກໆຄົນ. ຄຳເຊື້ອເຊີນຂອງພຣະອົງທີ່ໃຫ້ມາຫາພຣະອົງເປັນການສະເໜີມອບສັນຕິສຸກ.

ປະທານຣະໂຊ ເອັມ ແນວສັນ ເປັນສາດສະດາທີ່ມີຊີວິດຢູ່ຂອງພຣະເຈົ້າ ຕະຫລອດແຜ່ນດິນໂລກ. ເພິ່ນໄດ້ກ່າວວ່າ, “ຂ້າພະເຈົ້າໃຫ້ຄຳຮັບຮອງຂອງຂ້າພະເຈົ້າວ່າ ບໍ່ວ່າສະພາບການຂອງໂລກ ແລະ ສະຖານະການສ່ວນຕົວຂອງທ່ານຈະເປັນແບບໃດກໍຕາມ, ທ່ານສາມາດປະເຊີນໜ້າກັບອະນາຄົດດ້ວຍການມອງໂລກໃນແງ່ດີ ແລະ ດ້ວຍຄວາມຊື່ນຊົມ.”⁶

ຂ້າພະເຈົ້າຂໍສະແດງຄວາມຮັກຂອງຂ້າພະເຈົ້າຕໍ່ທ່ານ. ສັດທາ ແລະ ຄວາມຮັກອັນຍິ່ງໃຫຍ່ຂອງທ່ານກຳລັງເອື້ອມອອກໄປຫາຜູ້ຄົນ ແລະ ອະນຸຍາດໃຫ້ພຣະຜູ້ເປັນເຈົ້າປ່ຽນແປງຫົວໃຈ ແລະ ຕໍ່ມາຈະມີຄວາມປາດຖະໜາທີ່ຈະສະເໜີມອບຂອງປະທານແຫ່ງສັນຕິສຸກທີ່ເກີນຄວາມເຂົ້າໃຈໃຫ້ແກ່ຄົນອື່ນ.

ຂ້າພະເຈົ້າອະທິຖານວ່າທ່ານຈະພົບສັນຕິສຸກ, ຊ່ວຍຄົນອື່ນຫລາຍຄົນໃຫ້ພົບມັນ, ແລະ ສົ່ງຕໍ່ມັນໄປ. ຈະມີຊ່ວງເວລາໜຶ່ງພັນປີແຫ່ງສັນຕິສຸກທີ່ປະເສີດ ເມື່ອພຣະຜູ້ເປັນເຈົ້າຈະສະເດັດກັບມາອີກ. ຂ້າພະເຈົ້າເປັນພະຍານໃນຄວາມຊື່ນຊົມ ແລະ ໃນພຣະນາມຂອງພຣະເຢຊູຄຣິດ, ອາແມນ.