ເມື່ອໃດຄວນໄດ້ຮັບປິຕຸພອນຂອງທ່ານ
ເມື່ອທ່ານໄດ້ຮັບພອນຂອງທ່ານ, ທ່ານຈະສັງເກດ ແລະ ຮູ້ສຶກໄດ້ວ່າ ພຣະບິດາເທິງສະຫວັນ ແລະ ພຣະເຢຊູຄຣິດຮັກທ່ານ ແລະ ພວກພຣະອົງເອົາໃຈໃສ່ຕໍ່ທ່ານຢ່າງເປັນສ່ວນຕົວ.
ມື້ວານນີ້ເພື່ອນທີ່ຮັກຂອງຂ້າພະເຈົ້າ ແອວເດີ ແຣນໂດ ເຄ ເບັນເນັດ ໄດ້ກ່າວກ່ຽວກັບເລື່ອງປິຕູພອນ. ຊຶ່ງເປັນຂ່າວສານທີ່ດີເລີດ ແລະ ເປັນແຮງບັນດານໃຈໃຫ້ກັບເຮົາທຸກຄົນ. ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍກ່າວກ່ຽວກັບປິຕຸພອນເຊັ່ນກັນໄດ້ບໍ? ປິຕຸທັງຫລາຍ, ເນື່ອງຈາກວ່າການຂໍຮັບປິຕຸພອນອາດຈະເພີ່ມຂຶ້ນ, ຂ້າພະເຈົ້າອະທິຖານວ່າພຣະຜູ້ເປັນເຈົ້າຈະໃຫ້ພອນແກ່ທ່ານຂະນະທີ່ທ່ານຂະຫຍາຍການເອີ້ນຂອງທ່ານຕໍ່ໄປ.
ຂະນະທີ່ຂ້າພະເຈົ້າໄປຮ່ວມກອງປະຊຸມສະເຕກຕ່າງໆ, ຂ້າພະເຈົ້າມັກຈະຢ້ຽມຢາມຖາມຂ່າວກັບປິຕູຂອງສະເຕກ ແລະ ພັນລະຍາຂອງເພິ່ນ. ປິຕຸຄືຜູ້ທີ່ອ່ອນໂຍນ, ເຊື່ອຟັງ, ແລະ ເປັນຜູ້ນຳທີ່ໜ້າອັດສະຈັນທີ່ຖືກເອີ້ນຈາກພຣະເຈົ້າ. ພວກເພິ່ນໄດ້ເລົ່າຫລາຍເລື່ອງໃຫ້ຂ້າພະເຈົ້າຟັງກ່ຽວກັບປະສົບການທາງວິນຍານທີ່ດີເລີດ. ຂ້າພະເຈົ້າໄດ້ຖາມເຖິງອາຍຸຂອງຜູ້ຮັບພອນທີ່ນ້ອຍທີ່ສຸດ ແລະ ທີ່ຫລາຍທີ່ສຸດທີ່ເຄີຍໄດ້ຮັບຜ່ານມາ. ປະກົດວ່າໃນປະຈຸບັນ ອາຍຸທີ່ນ້ອຍທີ່ສຸດແມ່ນ 11 ປີ, ແລະ ຫລາຍທີ່ສຸດແມ່ນ 93 ປີ.
ຂ້າພະເຈົ້າໄດ້ຮັບປິຕຸພອນຂອງຕົນເອງໃນຊ່ວງການເປັນສະມາຊິກໃໝ່ຂອງສາດສະໜາຈັກ, ຕອນອາຍຸ19 ປີ, ສອງປີຫລັງຈາກທີ່ຂ້າພະເຈົ້າໄດ້ຮັບບັບຕິສະມາ. ປິຕຸຂອງຂ້າພະເຈົ້າເປັນຄົນສູງອາຍຸຫລາຍ. ເພິ່ນເຂົ້າຮ່ວມສາດສະໜາຈັກໃນປີ 1916 ແລະ ກໍເປັນຜູ້ບຸກເບີກຂອງສາດສະໜາຈັກທີ່ປະເທດຍີ່ປຸ່ນ. ຂ້າພະເຈົ້າຮູ້ສຶກເປັນກຽດຢ່າງຍິ່ງທີ່ໄດ້ຮັບປິຕຸພອນຈາກສາວົກທີ່ດີເລີດຂອງພຣະຜູ້ເປັນເຈົ້າ. ພາສາຍີ່ປຸ່ນຂອງເພິ່ນຂ້ອນຂ້າງຈະຍາກສຳລັບຂ້າພະເຈົ້າທີ່ຈະເຂົ້າໃຈ, ແຕ່ມີພະລັງຫລາຍ.
ປິຕຸຫລາຍທ່ານທີ່ຂ້າພະເຈົ້າໄດ້ພົບເລົ່າສູ່ຂ້າພະເຈົ້າຟັງວ່າ ມີຫລາຍຄົນທີ່ຮັບປິຕຸພອນຂອງເຂົາເຈົ້າກ່ອນການເຂົ້າຮັບໃຊ້ເຜີຍແຜ່. ຊາຍໜຸ່ມ, ຍິງໜຸ່ມ, ພໍ່ແມ່, ແລະ ອະທິການທີ່ຮັກແພງທັງຫລາຍ, ປິຕຸພອນບໍ່ແມ່ນມີໄວ້ເພື່ອການກຽມພ້ອມຮັບໃຊ້ເຜີຍແຜ່ເທົ່ານັ້ນ. ສະມາຊິກທີ່ຮັບບັບຕິສະມາທີ່ມີຄ່າຄວນ ສາມາດຮັບປິຕຸພອນເມື່ອເຖິງເວລາອັນເໝາະສົມສຳລັບເຂົາເຈົ້າ.1
ເຖິງສະມາຊິກຜູ້ໃຫຍ່ທັງຫລາຍ, ບາງຄົນໃນພວກທ່ານອາດຍັງບໍ່ທັນໄດ້ຮັບປິຕຸພອນຂອງຕົນ. ໃຫ້ຈື່ຈຳໄວ້ວ່າ, ບໍ່ມີການຈຳກັດອາຍຸ.
ແມ່ເຖົ້າຂອງຂ້າພະເຈົ້າເປັນສະມາຊິກຂອງສາດສະໜາຈັກທີ່ເຂັ້ມແຂງຄົນໜຶ່ງ, ໄດ້ຮັບໃຊ້ເປັນຄູສອນຫ້ອງຮຽນສະມາຄົມສະຕີສົງເຄາະຈົນເພິ່ນໄດ້ເສຍຊີວິດຕອນອາຍຸ 91 ປີ. ຂ້າພະເຈົ້າເສຍໃຈທີ່ໄດ້ຮູ້ວ່າເພິ່ນບໍ່ໄດ້ເຄີຍຮັບປິຕຸພອນ. ເພິ່ນໄດ້ປະສົບກັບຄວາມຫຍຸ້ງຍາກຫລາຍຢ່າງໃນຊີວິດຂອງເພິ່ນ, ແລະ ຍ້ອນວ່າເພິ່ນບໍ່ມີຜູ້ດຳລົງຖານະປະໂລຫິດຢູ່ທີ່ບ້ານ, ເພິ່ນກໍເລີຍບໍ່ໄດ້ຮັບພອນຖານະປະໂລຫິດຫລາຍຢ່າງ. ປິຕຸພອນອາດຊ່ວຍປອບໂຍນເພິ່ນໃນເວລາທີ່ເພິ່ນຕ້ອງການຄວາມປອບໂຍນຫລາຍທີ່ສຸດ.
ຜູ້ໃຫຍ່ທັງຫລາຍ, ຖ້າວ່າທ່ານຍັງບໍ່ທັນໄດ້ຮັບປິຕຸພອນເທື່ອ, ກໍຢ່າໄດ້ກັງວົນ! ເສັ້ນເວລາທາງວິນຍານຂອງທຸກຄົນແມ່ນແຕກຕ່າງກັນ. ຖ້າວ່າທ່ານມີອາຍຸ 35 ປີ ຫລື 85 ປີກໍຕາມ ແລະ ທ່ານມີຄວາມປາດຖະໜາ, ໃຫ້ເວົ້າລົມກັບອະທິການຂອງທ່ານກ່ຽວກັບການຮັບພອນຂອງທ່ານ.
ສະມາຊິກໃໝ່ຂອງສາດສະໜາຈັກ, ທ່ານເຄີຍໄດ້ຍິນກ່ຽວກັບປິຕຸພອນບໍ? ຂ້າພະເຈົ້າບໍ່ເຄີຍຮູ້ມາກ່ອນວ່າຈະມີໂອກາດໄດ້ຮັບໃນຕອນທີ່ຂ້າພະເຈົ້າເຂົ້າຮ່ວມສາດສະໜາຈັກ, ແຕ່ອະທິການທີ່ຮັກຂອງຂ້າພະເຈົ້າໄດ້ບອກກັບຂ້າພະເຈົ້າກ່ຽວກັບປິຕຸພອນ ແລະ ສະໜັບສະໜູນໃຫ້ຂ້າພະເຈົ້າກຽມພ້ອມທີ່ຈະຮັບຂອງຕົນເອງຫລັງຈາກທີ່ຂ້າພະເຈົ້າໄດ້ຮັບບັບຕິສະມາ. ສະມາຊິກໃໝ່ທີ່ຮັກແພງ, ທ່ານສາມາດຮັບເອົາປິຕຸພອນໄດ້ເຊັ່ນກັນ. ພຣະຜູ້ເປັນເຈົ້າຈະຊ່ວຍທ່ານໃນການກຽມພ້ອມສຳລັບໂອກາດອັນສັກສິດນີ້.
ໃຫ້ເຮົາພິຈາລະນາຈຸດປະສົງສອງຢ່າງສຳລັບປິຕຸພອນ:
-
ປິຕຸພອນປະກອບດ້ວຍຄຳແນະນຳສ່ວນຕົວຈາກພຣະຜູ້ເປັນເຈົ້າເຖິງທ່ານ.2
-
ປິຕຸພອນປະກາດເຊື້ອສາຍຂອງທ່ານ ຢູ່ໃນເຊື້ອສາຍອິດສະຣາເອນ.
ປິຕຸພອນຂອງທ່ານຍັງເປັນຂ່າວສານຈາກພຣະບິດາເທິງສະຫວັນຂອງທ່ານ ແລະ ອາດຈະລວມທັງຄຳສັນຍາຕ່າງໆ ແລະ ຄຳແນະນຳທີ່ໄດ້ຮັບການດົນໃຈເພື່ອນຳທາງຕະຫລອດຊີວິດຂອງທ່ານ. ປິຕຸພອນຈະບໍ່ກຳນົດຊີວິດຂອງທ່ານ ຫລື ຕອບທຸກຄຳຖາມຂອງທ່ານໄດ້. ຖ້າວ່າມັນບໍ່ໄດ້ກ່າວເຖິງເຫດການໃດໜຶ່ງທີ່ສຳຄັນໃນຊີວິດ, ຢ່າໄດ້ຖືວ່າ ມັນໝາຍຄວາມວ່າວ່າ ທ່ານຈະບໍ່ມີໂອກາດນັ້ນ. ໃນທຳນອງດຽວກັນນີ້, ບໍ່ມີການຮັບປະກັນວ່າທຸກສິ່ງໃນພອນຂອງທ່ານຈະເປັນຈິງໃນຊີວິດນີ້. ປິຕຸພອນເປັນສິ່ງນິລັນດອນ, ແລະ ຖ້າວ່າທ່ານດຳລົງຊີວິດຢ່າງມີຄ່າຄວນ, ຄຳສັນຍາຕ່າງໆທີ່ຍັງບໍ່ບັນລຸຜົນໃນຊີວິດນີ້ຈະໄດ້ຮັບໃນຊີວິດຕໍ່ໄປ.3
ເມື່ອທ່ານໄດ້ຮັບການປະກາດເຊື້ອສາຍ, ທ່ານຈະໄດ້ມາຮູ້ວ່າທ່ານເປັນຂອງເຊື້ອສາຍອິດສະຣາເອນ ແລະ ເປັນລູກຫລານຂອງອັບຣາຮາມ.4 ເພື່ອໃຫ້ເຂົ້າໃຈຄວາມສຳຄັນຂອງເລື່ອງນີ້, ໃຫ້ເນັ້ນໃສ່ຄຳສັນຍາທີ່ພຣະຜູ້ເປັນເຈົ້າໄດ້ເຮັດໄວ້ກັບເຊື້ອສາຍອິດສະຣາເອນຜ່ານອັບຣາຮາມ.
ຄຳສັນຍາເຫລົ່ານັ້ນແມ່ນລວມທັງ:
-
“ລູກຫລານຂອງເພິ່ນຈະຂະຫຍາຍອອກໄປ (ເບິ່ງ ປະຖົມມະການ 17:5–6; ອັບຣາຮາມ 2:9; 3:14).
-
“ລູກຫລານ, ຫລື ຜູ້ສືບທອດຂອງເພິ່ນ, ຈະໄດ້ຮັບພຣະກິດຕິຄຸນ ແລະ ນຳການປະຕິບັດຖານະປະໂລຫິດ (ເບິ່ງ ອັບຣາຮາມ 2:9).
-
“ໂດຍການປະຕິບັດສາດສະໜາກິດຂອງລູກຫລານຂອງເພິ່ນ, ‘ຄອບຄົວທັງໝົດຂອງແຜ່ນດິນໂລກ [ຈະ] ໄດ້ຮັບພອນ, ແມ່ນແຕ່ດ້ວຍພອນແຫ່ງພຣະກິດຕິຄຸນ, ຊຶ່ງເປັນພອນແຫ່ງຄວາມລອດ, ແມ່ນແຕ່ແຫ່ງຊີວິດນິລັນດອນ’ (ອັບຣາຮາມ 2:11).”5
ໃນຖານະສະມາຊິກຂອງສາດສະໜາຈັກ, ເຮົາຄືລູກຫລານແຫ່ງພັນທະສັນຍາ.6 ເຮົາໄດ້ຮັບພອນຂອງລູກຫລານແຫ່ງພັນທະສັນຍາຂອງອັບຣາຮາມ ເມື່ອເຮົາເຊື່ອຟັງກົດ ແລະ ພິທີການຂອງພຣະກິດຕິຄຸນ.
ການກຽມພ້ອມສຳລັບປິຕຸພອນຂອງທ່ານຈະຊ່ວຍທ່ານເພີ່ມພູນສັດທາຂອງທ່ານໃນພຣະບິດາເທິງສະຫວັນ ແລະ ພຣະເຢຊູຄຣິດ. ແລະ ເມື່ອທ່ານໄດ້ຮັບປິຕຸພອນຂອງທ່ານ ແລະ ອ່ານ ແລະ ໄຕ່ຕອງ, ທ່ານສາມາດເອົາໃຈໃສ່ໃນພວກພຣະອົງຫລາຍຂຶ້ນ.
ປະທານທອມມັສ ແອັສ ມອນສັນ ໄດ້ອະທິບາຍວ່າ, “ພຣະຜູ້ເປັນເຈົ້າອົງດຽວກັນທີ່ຈັດຕຽມເລຍໂຮນາໃຫ້ລີໄຮ ກໍຈັດຕຽມໄວ້ສຳລັບທ່ານ ແລະ ຂ້າພະເຈົ້າໃນມື້ນີ້ ເປັນຂອງປະທານທີ່ຫາຍາກ ແລະ ມີຄຸນຄ່າໃນການໃຫ້ທິດທາງແກ່ຊີວິດຂອງເຮົາ, ເພື່ອເຮັດເຄື່ອງໝາຍເຕືອນອັນຕະລາຍເພື່ອຄວາມປອດໄພຂອງເຮົາ, ແລະ ເພື່ອກຳນົດເສັ້ນທາງ, ແມ່ນແຕ່ທາງທີ່ປອດໄພ—ບໍ່ແມ່ນໄປຫາແຜ່ນດິນແຫ່ງຄຳສັນຍາ, ແຕ່ໄປຫາບ້ານໃນສະຫວັນຂອງເຮົາ.”7
ອະທິການ, ພໍ່ແມ່, ປະທານກຸ່ມແອວເດີ ແລະ ປະທານສະມາຄົມສະຕີສົງເຄາະ, ຜູ້ນຳເຜີຍແຜ່ປະຈຳຫວອດ, ອ້າຍນ້ອງ ແລະ ເອື້ອຍນ້ອງຜູ້ປະຕິບັດສາດສະໜາກິດ ທີ່ຮັກແພງທັງຫລາຍ, ກະລຸນາຊ່ວຍໃນການຊຸກຍູ້ຊາຍໜຸ່ມ ແລະ ຍິງໜຸ່ມເຫລົ່ານັ້ນຜູ້ທີ່ຍັງບໍ່ທັນໄດ້ຮັບປີຕຸພອນຂອງເຂົາເຈົ້າເທື່ອ ໃຫ້ສະແຫວງຫາການຊີ້ນຳຂອງພຣະຜູ້ເປັນເຈົ້າ ແລະ ຊ່ວຍເຂົາເຈົ້າໃນການກຽມຕົວທີ່ຈະປະຕິບັດຕາມນັ້ນ.
ຂ້າພະເຈົ້າອ່ານປິຕຸພອນຂອງຂ້າພະເຈົ້າໂດຍການອະທິຖານຢູ່ເລື້ອຍໆ, ມັນຊ່ວຍເປັນກຳລັງໃຈໃຫ້ຂ້າພະເຈົ້າຢູ່ສະເໝີ. ຂ້າພະເຈົ້າຮັບຮູ້ໄດ້ວ່າພຣະຜູ້ເປັນເຈົ້າຄາດຫວັງຫຍັງຈາກຂ້າພະເຈົ້າ, ແລະ ມັນຊ່ວຍໃຫ້ຂ້າພະເຈົ້າກັບໃຈ ແລະ ຖ່ອມຕົວ. ເມື່ອຂ້າພະເຈົ້າອ່ານ ແລະ ໄຕ່ຕອງມັນ, ຂ້າພະເຈົ້າປາດຖະໜາທີ່ຈະດຳລົງຊີວິດຢ່າງມີຄ່າຄວນໃນການຮັບເອົາພອນທີ່ມັນສັນຍາໄວ້.
ເຊັ່ນດຽວກັນກັບພຣະຄຳພີທີ່ເຮົາໄດ້ອ່ານຫລາຍຄັ້ງແລ້ວມີຄວາມໝາຍໃໝ່ກັບເຮົາພາຍຫລັງ, ປິຕຸພອນຂອງເຮົາກໍຈະມີຄວາມໝາຍທີ່ແຕກຕ່າງອອກໄປສຳລັບເຮົາໃນແຕ່ລະຊ່ວງເວລາທີ່ແຕກຕ່າງກັນ. ສ່ວນຂອງຂ້າພະເຈົ້າເອງມີຄວາມໝາຍທີ່ແຕກຕ່າງໃນຕອນນີ້ຈາກຕອນທີ່ຂ້າພະເຈົ້າອາຍຸ 30 ປີ ແລະ ຕອນທີ່ຂ້າພະເຈົ້າອາຍຸ 50 ປີ. ມັນບໍ່ແມ່ນຄຳສັບທີ່ປ່ຽນໄປ, ແຕ່ວ່າເຮົາເຫັນມັນໃນທິດທາງທີ່ແຕກຕ່າງ.
ປະທານດາລິນ ເອັຈ ໂອກສ໌ ໄດ້ປະກາດວ່າ ປິຕຸພອນ “ໄດ້ຮັບພາຍໃຕ້ການດົນໃຈຂອງພຣະວິນຍານບໍລິສຸດ ແລະ ຄວນທີ່ຈະຖືກອ່ານ ແລະ ແປຄວາມໝາຍພາຍໃຕ້ອິດທິພົນຂອງພຣະວິນຍານອັນດຽວກັນ. ຄວາມໝາຍ ແລະ ຄວາມສຳຄັນຂອງປິຕຸພອນຈະໄດ້ຮັບການສິດສອນເປັນທີລະບັນທັດໃນຊ່ວງແຫ່ງການເວລາໂດຍອຳນາດຂອງພຣະວິນຍານອັນດຽວກັນທີ່ໄດ້ຖືກດົນໃຈໃຫ້ຂຽນ [ມັນ].”8
ອ້າຍເອື້ອຍນ້ອງທັງຫລາຍ, ຂ້າພະເຈົ້າເປັນພະຍານວ່າພຣະບິດາເທິງສະຫວັນ ແລະ ພຣະບຸດທີ່ຮັກອົງດຽວທີ່ຖືກຳເນີດຂອງພຣະອົງ, ອົງພຣະເຢຊູຄຣິດເຈົ້າ, ຊົງພຣະຊົນຢູ່. ພວກພຣະອົງຮັກເຮົາ. ປິຕຸພອນຄືຂອງປະທານສັກສິດຈາກພວກພຣະອົງ. ເມື່ອທ່ານໄດ້ຮັບພອນຂອງທ່ານ, ທ່ານຈະຮັບຮູ້ ແລະ ຮູ້ສຶກໄດ້ວ່າພວກພຣະອົງຮັກທ່ານ ແລະ ພວກພຣະອົງເອົາໃຈໃສ່ຕໍ່ຄວາມສູງສົ່ງສ່ວນຕົວຂອງທ່ານແນວໃດ.
ພຣະຄຳພີມໍມອນເປັນປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ ແລະ ຂ້າພະເຈົ້າກະຕັນຍູສຳລັບການນຳພາໂດຍສາດສະດາທີ່ມີຊີວິດຢູ່, ປະທານຣະໂຊ ເອັມ ແນວສັນ.
ຂ້າພະເຈົ້າກະຕັນຍູສຳລັບພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ໃນເຊົ້າຂອງວັນອີດສະເຕີນີ້ ຂ້າພະເຈົ້າຈະເອົາໃຈໃສ່ຕໍ່ພຣະອົງ ແລະ ການຟື້ນຄືນພຣະຊົນຂອງພຣະອົງ ແລະ ນະມັດສະການພຣະອົງ ແລະ ຂອບພຣະໄທສຳລັບການເສຍສະລະຂອງພຣະອົງ. ຂ້າພະເຈົ້າຮູ້ວ່າພຣະອົງໄດ້ຮັບທຸກທໍລະມານຫລາຍເພາະວ່າພຣະອົງຮັກເຮົາຫລາຍແທ້ໆ. ຂ້າພະເຈົ້າຮູ້ວ່າພຣະອົງໄດ້ຟື້ນຄືນພຣະຊົນເພາະວ່າພຣະອົງຮັກເຮົາ. ພຣະອົງມີຈິງ. ຂ້າພະເຈົ້າເປັນພະຍານໃນພຣະນາມຂອງພຣະເຢຊູຄຣິດ, ອາແມນ.