ການໄວ້ວາງໃຈໃນຄຳສອນຂອງພຣະຄຣິດ

ໂດຍ ແອວເດີ ເອເວັນ ເອ ສະມູສ໌

ແຫ່ງສາວົກເຈັດສິບ

ເມື່ອເຮົາໄດ້ສ້າງບ້ານຂອງເຮົາເທິງຮາກຖານຂອງຄວາມສຳພັນຕາມພັນທະສັນຍາກັບພຣະຄຣິດ, ເຮົາກຳລັງໄວ້ວາງໃຈໃນຄຳສອນຂອງພຣະຄຣິດ.

ໃນສາຍຕາຂອງຂ້າພະເຈົ້າ, ຂ້າພະເຈົ້າເຫັນສາດສະດານີໄຟຢູ່ທີ່ໂຕະທຳງານຂອງເພິ່ນ, ແຜ່ນຈາລຶກຄຳວາງຢາຍຢູ່ຕໍ່ໜ້າເພິ່ນ, ມີປາກກາແກະສະຫລັກຢູ່ໃນມື.

ນີໄຟກຳລັງທຳການແກະສະຫລັກບັນທຶກສຸດທ້າຍໃຫ້ສຳເລັດ. ເພິ່ນໄດ້ຂຽນວ່າ, “ແລະ ບັດນີ້, ພີ່ນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍຈົບຂໍ້ຄວາມຂອງຂ້າພະເຈົ້າໄວ້ເທົ່ານີ້.”¹ ແຕ່ບໍ່ດົນຈາກນັ້ນ, ພຣະວິນຍານໄດ້ກະຕຸ້ນໃຫ້ນີໄຟກັບໄປຫາບັນທຶກຂອງເພິ່ນ ແລະ ຂຽນຂໍ້ຄວາມສົ່ງທ້າຍ. ພາຍໃຕ້ອິດທິພົນອັນມີພະລັງຂອງພຣະວິນຍານບໍລິສຸດ, ສາດສະດາທີ່ຍິ່ງໃຫຍ່ຜູ້ນັ້ນໄດ້ຈັບເອົາປາກກາແກະສະຫລັກ ແລະ ຂຽນອີກຄັ້ງວ່າ, “ດັ່ງນັ້ນ, ເລື່ອງທີ່ຂ້າພະເຈົ້າໄດ້ບັນທຶກໄວ້ກໍພຽງພໍສຳລັບຂ້າພະເຈົ້າ, ນອກຈາກຈະເປັນຄຳເວົ້າສອງສາມຄຳ … ຂ້າພະເຈົ້າ ຕ້ອງ ເວົ້າກ່ຽວກັບຄຳສອນຂອງພຣະຄຣິດ.”²

ເຮົາຮູ້ສຶກຂອບຄຸນຊົ່ວນິລັນດອນຫລາຍພຽງໃດສຳລັບ “ສອງສາມຄຳ”³ ເຫລົ່ານັ້ນ ແລະ ສຳລັບພຣະວິນຍານທີ່ບັງຄັບໃຫ້ນີໄຟຂຽນຄຳເຫລົ່ານັ້ນ. ບົດຄວາມຂອງນີໄຟກ່ຽວກັບຄຳສອນຂອງພຣະຄຣິດ ເປັນສົມບັດອັນລ້ຳຄ່າຕໍ່ຜູ້ທີ່ຊື່ນຊົມກັບຄຳເຫລົ່ານັ້ນ. ມັນບັນຈຸພາບນິມິດກ່ຽວກັບການບັບຕິສະມາຂອງພຣະຜູ້ຊ່ວຍໃຫ້ລອດ⁴ ແລະ ສຸລະສຽງຂອງພຣະບຸດ ເຊື້ອເຊີນໃຫ້ທຸກຄົນຕິດຕາມພຣະອົງ⁵ ແລະ “ເຮັດສິ່ງທີ່ [ເຮົາ] ເຫັນ [ພຣະອົງ] ເຮັດ.”⁶ ມັນບັນຈຸຄຳພະຍານຂອງນີໄຟວ່າ ຜູ້ທີ່ກັບໃຈຈາກບາບຢ່າງຈິງໃຈດ້ວຍສັດທາໃນພຣະຄຣິດ ແລະ ຕິດຕາມພຣະຜູ້ຊ່ວຍໃຫ້ລອດ ເຂົ້າໄປໃນນ້ຳແຫ່ງບັບຕິສະມາ ຈະ “ໄດ້ຮັບພຣະວິນຍານບໍລິສຸດ; ແທ້ຈິງແລ້ວ, ເມື່ອນັ້ນການບັບຕິສະມາດ້ວຍໄຟ ແລະ ດ້ວຍພຣະວິນຍານບໍລິສຸດຈະມາເຖິງ.”⁷ ເຮົາກໍໄດ້ຍິນສຸລະສຽງຂອງພຣະບິດາເປັນພະຍານນຳອີກວ່າ: “ແທ້ຈິງແລ້ວ, ຄຳຂອງຜູ້ເປັນທີ່ຮັກຂອງເຮົາຈິງ ແລະ ຊື່ສັດ. ຜູ້ໃດອົດທົນຈົນເຖິງທີ່ສຸດ, ຜູ້ນັ້ນຈະລອດ.”⁸

ປະທານຣະໂຊ ເອັມ ແນວສັນ ເຄີຍເນັ້ນເຖິງຄວາມສຳຄັນຂອງຄຳສອນຂອງພຣະຄຣິດ ໃນລະຫວ່າງການກ່າວກັບຜູ້ນຳເຜີຍແຜ່: “ເໜືອກວ່າສິ່ງອື່ນໃດ ພວກເຮົາຕ້ອງການໃຫ້ຜູ້ສອນສາດສະໜາຂອງພວກເຮົາ … ມີຄຳສອນຂອງພຣະຄຣິດຈາລຶກໄວ້ຢູ່ໃນໃຈຂອງເຂົາເຈົ້າ—ຝັງຮາກ … ຢູ່ໃນໄຂກະດູກຂອງເຂົາເຈົ້າ.”⁹

ຈົ່ງສອນພຣະກິດຕິຄຸນຂອງເຮົາ ສະຫລຸບອົງປະກອບຫ້າຢ່າງຂອງຄຳສອນຂອງພຣະຄຣິດ. ມັນກ່າວວ່າ, “[ພວກເຮົາ] ເຊື້ອເຊີນຜູ້ອື່ນໃຫ້ເຂົ້າມາຫາພຣະຄຣິດ ໂດຍການຊ່ວຍໃຫ້ເຂົາເຈົ້າຮັບເອົາພຣະກິດຕິຄຸນທີ່ຖືກຟື້ນຟູ ຜ່ານທາງສັດທາໃນພຣະເຢຊູຄຣິດ ແລະ ການຊົດໃຊ້ຂອງພຣະອົງ, ການກັບໃຈ, ການຮັບບັບຕິສະມາ, ການຮັບເອົາຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ.”¹⁰

ແຕ່ຄວາມສຳຄັນຂອງຄຳສອນຂອງພຣະຄຣິດ ບໍ່ໄດ້ມີໄວ້ສຳລັບຜູ້ສອນສາດສະໜາເທົ່ານັ້ນ! ແລະ ມັນມີຄວາມເລິກເຊິ່ງຫລາຍກວ່າການສະຫລຸບອົງປະກອບຫ້າຢ່າງຊ້ຳຄືນເທົ່ານັ້ນ. ມັນຄຸມກວມກົດຂອງພຣະກິດຕິຄຸນ. ມັນແມ່ນແຜນທີ່ຍິ່ງໃຫຍ່ສຳລັບຊີວິດນິລັນດອນ.

ອ້າຍເອື້ອຍນ້ອງທັງຫລາຍ, ຖ້າຫາກເຮົາຕ້ອງຍອມຮັບເອົາຄຳເຊື້ອເຊີນຂອງປະທານແນວສັນ ເພື່ອໃຫ້ຄຳສອນຂອງພຣະຄຣິດ ຝັງຮາກຢູ່ໃນໄຂກະດູກ ຂອງເຮົາ, ເຮົາຕ້ອງປ່ຽນໃຈເຫລື້ອມໃສໃນພຣະຜູ້ເປັນເຈົ້າຫລາຍຂຶ້ນ ໂດຍການສຶກສາ, ການອະທິຖານ, ການດຳລົງຊີວິດຢ່າງຊື່ສັດ, ແລະ ການກັບໃຈຢ່າງຕໍ່ເນື່ອງ. ເຮົາຕ້ອງເຊື້ອເຊີນພຣະວິນຍານບໍລິສຸດ ເພື່ອຈາລຶກຄຳສອນຂອງພຣະຄຣິດໃສ່ໃນ “ຫົວໃຈ [ຂອງເຮົາ]”¹¹ ໃຫ້ເລິກ ແລະ ຖາວອນ ເໝືອນດັ່ງທີ່ນີໄຟໄດ້ແກະສະຫລັກໄວ້ຢູ່ເທິງແຜ່ນຈາລຶກຄຳ.

ເດືອນຕຸລາແລ້ວນີ້, ປະທານແນວສັນໄດ້ຖາມວ່າ, “ການເອົາຊະນະໂລກໝາຍຄວາມວ່າແນວໃດ?” ໃນບັນດາສິ່ງອື່ນໆ, ເພິ່ນໄດ້ກ່າວວ່າ, “ໝາຍເຖິງ ການໄວ້ວາງໃຈ ໃນຄຳສອນຂອງພຣະຄຣິດຫລາຍກວ່າປັດຊະຍາຂອງມະນຸດ.”¹²

ຄຳວ່າ ໄວ້ວາງໃຈ ຖືກນິຍາມວ່າເປັນ “ການເພິ່ງອາໄສລັກສະນະ, ຄວາມສາມາດ, ຄວາມເຂັ້ມແຂງ, ຫລື ຄວາມຈິງຂອງຄົນໃດຄົນໜຶ່ງ ຫລື ສິ່ງໃດສິ່ງໜຶ່ງ.”¹³ ຄົນໃດຄົນໜຶ່ງນັ້ນແມ່ນພຣະເຢຊູຄຣິດ, ແລະ ສິ່ງໃດສິ່ງໜຶ່ງນັ້ນແມ່ນຄຳສອນຂອງພຣະອົງ.

ສະນັ້ນ ການໄວ້ວາງໃຈ ໃນຄຳສອນຂອງພຣະຄຣິດໂດຍເຈດຕະນາ ຈະປ່ຽນວິທີທີ່ເຮົາດຳລົງຊີວິດຂອງເຮົາແນວໃດ?

ຖ້າຫາກເຮົາ ໄວ້ວາງໃຈ ໃນຄຳສອນຂອງພຣະຄຣິດ, ແລ້ວເຮົາຈະໄວ້ວາງໃຈໃນພຣະຄຣິດຫລາຍພໍທີ່ຈະດຳລົງຊີວິດຕາມທຸກຄຳ.¹⁴ ເຮົາຈະສຶກສາຕະຫລອດຊີວິດກ່ຽວກັບພຣະເຢຊູຄຣິດ,¹⁵ ການປະຕິບັດສາດສະໜາກິດຂອງພຣະອົງ, ຄຳສອນຂອງພຣະອົງ, ແລະ ການຊົດໃຊ້ອັນບໍ່ມີຂອບເຂດຂອງພຣະອົງ, ລວມທັງການຟື້ນຄືນພຣະຊົນທີ່ສະຫງ່າລາສີຂອງພຣະອົງ. ເຮົາຈະສຶກສາຄຳສັນຍາຂອງພຣະອົງ ແລະ ເງື່ອນໄຂ ຊຶ່ງໂດຍສິ່ງເຫລົ່ານັ້ນທີ່ຄຳສັນຍາຖືກມອບໃຫ້.¹⁶ ຂະນະທີ່ເຮົາສຶກສາ, ເຮົາຈະຮູ້ສຶກມີຄວາມຮັກຫລາຍຂຶ້ນຕໍ່ພຣະຜູ້ເປັນເຈົ້າ.

ຖ້າຫາກເຮົາ ໄວ້ວາງໃຈ ໃນຄຳສອນຂອງພຣະຄຣິດ, ເຮົາຈະເຂົ້າເຖິງພຣະບິດາເທິງສະຫວັນຂອງເຮົາທຸກວັນດ້ວຍຄຳອະທິຖານທີ່ຖ່ອມຕົວ ແລະ ໃນບ່ອນລັບຕາ, ແລ້ວເຮົາຈະສາມາດສະແດງຄວາມກະຕັນຍູສຳລັບຂອງປະທານທີ່ເປັນພຣະບຸດຂອງພຣະອົງ ແລະ ສຳລັບພອນທັງໝົດຂອງເຮົາ.¹⁷ ເຮົາສາມາດອະທິຖານສຳລັບຄວາມເປັນເພື່ອນທີ່ໃຫ້ການເປີດເຜີຍຂອງພຣະວິນຍານບໍລິສຸດ¹⁸ ອະທິຖານເພື່ອເຮັດໃຫ້ຄວາມປະສົງຂອງເຮົາສອດຄ່ອງກັບຂອງພຣະອົງ,¹⁹ ອະທິຖານເພື່ອສະທ້ອນເຖິງພັນທະສັນຍາຂອງເຮົາ ແລະ ຕໍ່ຄຳໝັ້ນສັນຍາຂອງເຮົາທີ່ຈະຮັກສາມັນ.²⁰ ເຮົາສາມາດອະທິຖານເພື່ອສະໜັບສະໜູນ ແລະ ສະແດງຄວາມຮັກຂອງເຮົາຕໍ່ສາດສະດາ, ຜູ້ພະຍາກອນ, ແລະ ຜູ້ເປີດເຜີຍ;²¹ ອະທິຖານສຳລັບອຳນາດແຫ່ງການຊຳລະລ້າງຂອງການໃຫ້ອະໄພ;²² ແລະ ອະທິຖານເພື່ອຄວາມເຂັ້ມແຂງທີ່ຈະຕ້ານທານກັບການລໍ້ລວງ.²³ ຂ້າພະເຈົ້າເຊື້ອເຊີນທ່ານເຮັດໃຫ້ການອະທິຖານມີຄວາມສຳຄັນໃນຊີວິດຂອງທ່ານ, ສະແຫວງຫາໃນທຸກວັນເພື່ອພັດທະນາການສື່ສານຂອງທ່ານກັບພຣະເຈົ້າ.

ຖ້າຫາກເຮົາ ໄວ້ວາງໃຈ ໃນຄຳສອນຂອງພຣະຄຣິດ, ແລ້ວເຮົາຈະປະຖິ້ມສິ່ງທີ່ເຫລືອງເຫລື້ອມຂອງໂລກ ເພື່ອວ່າເຮົາຈະໄດ້ສຸມໃຈໃສ່ພຣະຜູ້ໄຖ່ຂອງໂລກ.²⁴ ເຮົາຈະຈຳກັດ ຫລື ກຳຈັດເວລາທີ່ໃຊ້ໃນສື່ສັງຄົມ; ເກມດິຈິຕັນ; ສິ່ງບັນເທີງທີ່ສິ້ນເປືອງ, ຫລາຍເກີນໄປ, ຫລື ບໍ່ເໝາະສົມ; ຄວາມລໍ້ລວງຂອງຊັບສົມບັດ ແລະ ຄວາມໂອ້ອວດຂອງໂລກ; ແລະ ກິດຈະກຳອື່ນໆທີ່ກໍ່ໃຫ້ເກີດປະເພນີທີ່ບໍ່ຖືກຕ້ອງ ແລະ ປັດຊະຍາທີ່ເຂົ້າໃຈຜິດຂອງມະນຸດ. ພຽງແຕ່ໃນພຣະຄຣິດເທົ່ານັ້ນທີ່ເຮົາຈະພົບຄວາມຈິງ ແລະ ຄວາມເພິ່ງພໍໃຈອັນຍືນຍົງ.

ການກັບໃຈຢ່າງຈິງໃຈ²⁵ ເປັນສ່ວນໜຶ່ງທີ່ຊື່ນຊົມ²⁶ ໃນຊີວິດຂອງເຮົາ—ທັງໄດ້ຮັບການໃຫ້ອະໄພຈາກບາບ ແລະ ປ່ຽນແປງໃນຮູບລັກສະນະຂອງພຣະຄຣິດ.²⁷ ການກັບໃຈດ້ວຍສັດທາໃນພຣະຄຣິດຈະຊ່ວຍໃຫ້ເຮົາເຂົ້າເຖິງການຊົດໃຊ້ຂອງພຣະຄຣິດ. ປະທານດາລິນ ເອັຈ ໂອກສ໌ ໄດ້ສິດສອນວ່າ ເມື່ອພຣະຜູ້ຊ່ວຍໃຫ້ລອດໃຫ້ອະໄພ, ພຣະອົງ “ໄດ້ກະທຳຫລາຍກວ່າພຽງແຕ່ຊຳລະ [ເຮົາ] ໃຫ້ສະອາດຈາກບາບເທົ່ານັ້ນ. ພຣະອົງຍັງໃຫ້ຄວາມເຂັ້ມແຂງໃໝ່ແກ່ [ເຮົາ] ນຳອີກ.”²⁸ ເຮົາແຕ່ລະຄົນຕ້ອງການຄວາມເຂັ້ມແຂງນີ້ເພື່ອທີ່ຈະຮັກສາພັນທະສັນຍາຂອງພຣະເຈົ້າ ແລະ ເພື່ອທີ່ຈະບັນລຸຈຸດປະສົງນິລັນດອນຂອງຊີວິດເຮົາ.

ເຮົາພົບຄວາມເຂັ້ມແຂງໃນພຣະເຢຊູ ແລະ ໃນຄຳສອນຂອງພຣະອົງ. ພຣະອົງໄດ້ກ່າວວ່າ, “ຕາມຈິງ, ຕາມຈິງແລ້ວ, ເຮົາກ່າວກັບພວກເຈົ້າ, ວ່າ ນີ້ຄືຄຳສອນຂອງເຮົາ, ແລະ ຜູ້ໃດກໍຕາມທີ່ສ້າງຢູ່ໃນຄຳສອນ ນີ້ ຍ່ອມສ້າງຢູ່ເທິງດານຫີນຂອງເຮົາ ແລະ ປະຕູນະລົກຈະເອົາຊະນະເຂົາບໍ່ໄດ້.”²⁹

ເຮົາເຫັນຄຳສັນຍານີ້ບັນລຸໃນຊີວິດຂອງຜູ້ຄົນທີ່ຊື່ສັດ. ມັນເປັນເວລາໜຶ່ງປີກວ່າມາແລ້ວທີ່ຂ້າພະເຈົ້າໄດ້ຮັບສິດທິພິເສດທີ່ໄດ້ພົບກັບ ທຣາວັສ ແລະ ເຄຊີ. ເຂົາເຈົ້າໄດ້ແຕ່ງງານກັນໃນປີ 2007. ໃນເວລານັ້ນ, ທຣາວັສບໍ່ໄດ້ເປັນສະມາຊິກຂອງສາດສະໜາຈັກ. ເຖິງແມ່ນວ່ານາງເຄຊີໄດ້ເຕີບໃຫຍ່ໃນບ້ານສິດທິຊົນຍຸກສຸດທ້າຍທີ່ເຂັ້ມແຂງ, ແຕ່ນາງໄດ້ຖອຍຫ່າງຈາກສັດທາຂອງນາງຕອນເປັນໄວລຸ້ນ ແລະ ໄດ້ອອກໄປຈາກຮາກຖານຂອງນາງ.

ໃນປີ 2018, ທຣາວັສໄດ້ພົບກັບຜູ້ສອນສາດສະໜາ ແລະ ລາວໄດ້ຮັບບັບຕິສະມາໃນປີ 2019. ທຣາວັສໄດ້ກາຍເປັນຜູ້ສອນສາດສະໜາໃຫ້ກັບນາງເຄຊີ, ຜູ້ທີ່ໄດ້ປະເຊີນກັບການປ່ຽນໃຈເຫລື້ອມໃສທີ່ປ່ຽນແປງຊີວິດເຊັ່ນກັນ. ເຂົາເຈົ້າໄດ້ຜະນຶກເຂົ້າກັນໃນພຣະວິຫານໃນ ເດືອນກັນຍາ ປີ 2020. ປະມານສອງປີຫລັງຈາກການບັບຕິສະມາຂອງລາວ, ທຣາວັສໄດ້ຖືກເອີ້ນໃຫ້ຮັບໃຊ້ໃນຝ່າຍອະທິການ.

ທຣາວັສໄດ້ເປັນພະຍາດຫາຍາກ ທີ່ກໍ່ຕົວເປັນກ້ອນເນື້ອງອກໃນອະໄວຍະວະພາຍໃນຂອງລາວຢ່າງຕໍ່ເນື່ອງ. ລາວໄດ້ຮັບການຜ່າຕັດເອົາເນື້ອງອກທີ່ເກີດຊ້ຳໆອອກຫລາຍຄັ້ງ, ແຕ່ພະຍາດນີ້ປົວບໍ່ຫາຍ. ເມື່ອຫລາຍປີກ່ອນ, ທ່ານໝໍບອກທຣາວັສວ່າ ລາວຈະຢູ່ໄດ້ບໍ່ເຖິງ 10 ປີ.

ນາງເຄຊີມີ ຈໍປະສາດຕາອັກເສບ, ເປັນພະຍາດຫາຍາກທາງພັນທຸກຳ ທີ່ເຮັດໃຫ້ລານສາຍຕາແຄບລົງ ຊຶ່ງບໍ່ສາມາດແກ້ໄຂຈົນຕາບອດສະໜິດ.

ນາງເຄຊີໄດ້ເວົ້າກັບຂ້າພະເຈົ້າເຖິງອະນາຄົດຂອງນາງ. ນາງຄາດການວ່າ, ຊຶ່ງອີກບໍ່ດົນ, ນາງຈະເປັນໝ້າຍ, ຕາບອດ, ບໍ່ມີເງິນຊ່ວຍເຫລືອ, ແລະ ຖືກປະໃຫ້ລ້ຽງລູກນ້ອຍສີ່ຄົນຕາມລຳພັງ. ຂ້າພະເຈົ້າໄດ້ຖາມນາເຄຊີວ່າ ນາງຈະຮັບມືກັບອະນາຄົດທີ່ມືດມົນເຊັ່ນນີ້ໄດ້ແນວໃດ. ນາງຍິ້ມຢ່າງສະຫງົບ ແລະ ເວົ້າວ່າ, “ຂ້ານ້ອຍບໍ່ເຄີຍມີຄວາມສຸກ ຫລື ມີຄວາມຫວັງຫລາຍເທົ່ານີ້ມາກ່ອນໃນຊີວິດ. ພວກຂ້ານ້ອຍໄດ້ຍຶດໝັ້ນໃນຄຳສັນຍາທີ່ພວກຂ້ານ້ອຍໄດ້ຮັບໃນພຣະວິຫານ.”

ຕອນນີ້ທຣາວັສເປັນອະທິການ. ສອງເດືອນແລ້ວນີ້ ລາວໄດ້ຮັບການຜ່າຕັດໃຫຍ່ອີກຄັ້ງ. ແຕ່ລາວເປັນຄົນເບິ່ງໂລກໃນແງ່ດີ ແລະ ມັກສະຫງົບ. ສາຍຕາຂອງນາງເຄຊີຮ້າຍແຮງກວ່າເກົ່າ. ດຽວນີ້ນາງມີໝາຊ່ວຍນຳທາງ ແລະ ນາງບໍ່ສາມາດຂັບລົດໄດ້ອີກ. ແຕ່ນາງຍັງເພິ່ງພໍໃຈ, ລ້ຽງລູກ ແລະ ຮັບໃຊ້ເປັນທີ່ປຶກສາໃນຝ່າຍປະທານອົງການຍິງໜຸ່ມ.

ທຣາວັສ ແລະ ເຄຊີກຳລັງສ້າງບ້ານຂອງເຂົາເຈົ້າຢູ່ເທິງດານຫີນ. ທຣາວັສ ແລະ ເຄຊີໄວ້ວາງໃຈໃນຄຳສອນຂອງພຣະຄຣິດ ແລະ ໃນຄຳສັນຍາວ່າພຣະເຈົ້າຈະ “ຕັ້ງຄວາມທຸກ [ຂອງເຂົາເຈົ້າ] ໄວ້ ເພື່ອຜົນປະໂຫຍດ [ຂອງເຂົາເຈົ້າ].”³⁰ ໃນແຜນອັນສົມບູນແບບຂອງພຣະເຈົ້າ, ຄວາມທຸກທໍລະມານດ້ວຍສັດທາໃນພຣະຄຣິດຈະຖືກເຊື່ອມໂຍງເຂົ້າກັບການກາຍເປັນຄົນສົມບູນແບບຂອງເຮົາໃນພຣະຄຣິດ.³¹ ເຊັ່ນດຽວກັບຄົນສະຫລາດໃນຄຳອຸປະມາ ທີ່ປຸກເຮືອນຂອງຕົນໃສ່ເທິງດານຫີນ,³² ແລະ ຝົນຖັ່ງເທລົງມາ, ແລະ ນ້ຳກໍນອງ, ແລະ ລົມກໍພັດ, ແລະ ປະທະເຮືອນທີ່ທຣາວັສ ແລະ ເຄຊີກຳລັງສ້າງ; ແລະ ມັນຈະບໍ່ເພພັງ, ເພາະວ່າມັນຖືກສ້າງໃສ່ເທິງດານຫີນ.³³

ພຣະເຢຊູໄດ້ກ່າວເຖິງ ຄວາມເປັນໄປໄດ້ ຂອງຝົນ ແລະ ນ້ຳຖ້ວມ ແລະ ລົມໃນຊີວິດຂອງເຮົາ; ພຣະອົງໄດ້ກ່າວເຖິງ ຄວາມແນ່ນອນ ວ່າພະຍຸຈະເກີດຂຶ້ນ. ສິ່ງທີ່ປ່ຽນແປງໄດ້ໃນຄຳອຸປະມານີ້ບໍ່ແມ່ນວ່າພະຍຸຈະເກີດຂຶ້ນຫລືບໍ່ ແຕ່ວ່າເຮົາຈະຕອບສະໜອງຄຳແນະນຳດ້ວຍຄວາມຮັກຂອງພຣະອົງໃນການຟັງ ແລະ ເຮັດສິ່ງທີ່ພຣະອົງໄດ້ສິດສອນໄດ້ແນວໃດ.³⁴ ມັນບໍ່ມີທາງອື່ນເລີຍເພື່ອຄວາມຢູ່ລອດ.

ເມື່ອເຮົາໄດ້ສ້າງບ້ານຂອງເຮົາເທິງຮາກຖານຂອງຄວາມສຳພັນຕາມພັນທະສັນຍາກັບພຣະຄຣິດ, ເຮົາ ກຳລັງໄວ້ວາງໃຈ ໃນຄຳສອນຂອງພຣະຄຣິດ ແລະ ເມື່ອເຮົາມາຫາພຣະອົງ, ເຮົາຈະໄດ້ຮັບຄຳສັນຍາຂອງຊີວິດນິລັນດອນ. ຜູ້ຄົນທີ່ໄວ້ວາງໃຈໃນຄຳສອນຂອງພຣະຄຣິດຈະດຳເນີນໄປໜ້າຢ່າງໝັ້ນຄົງໃນພຣະຄຣິດ ແລະ ອົດທົນຈະເຖິງທີ່ສຸດ. ບໍ່ມີທາງອື່ນທີ່ເຮົາຈະລອດໃນອານາຈັກສະຫວັນ.³⁵

ຂ້າພະເຈົ້າສະແດງປະຈັກພະຍານສ່ວນຕົວເຖິງຄວາມຈິງແທ້ຂອງການຊົງພຣະຊົນ ແລະ ການຟື້ນຄືນພຣະຊົນຂອງພຣະເຢຊູຄຣິດ. ຂ້າພະເຈົ້າເປັນພະຍານວ່າພຣະເຈົ້າອົງເປັນພຣະບິດາຊົງຮັກໂລກຫລາຍທີ່ສຸດ ຈົນໄດ້ປະທານພຣະບຸດຂອງພຣະອົງເພື່ອໄຖ່ເຮົາຈາກບາບ³⁶ ແລະ ປິ່ນປົວເຮົາຈາກຄວາມໂສກເສົ້າ.³⁷ ຂ້າພະເຈົ້າເປັນພະຍານວ່າ ພຣະອົງໄດ້ເອີ້ນສາດສະດາຂອງພຣະເຈົ້າໃນວັນເວລາຂອງເຮົາ, ແມ່ນແຕ່ປະທານຣະໂຊ ເອັມ ແນວສັນ, ຊຶ່ງຜ່ານທາງເພິ່ນ ທີ່ພຣະອົງກ່າວ ແລະ ນຳພາເຮົາ.

ດ້ວຍສຸດໃຈຂອງຂ້າພະເຈົ້າ, ຂ້າພະເຈົ້າເຊື້ອເຊີນທ່ານໃຫ້ໄວ້ວາງໃຈໃນຄຳສອນຂອງພຣະຄຣິດ ແລະ ສ້າງຊີວິດຂອງທ່ານຢູ່ເທິງດານຫີນຂອງພຣະຜູ້ໄຖ່. ພຣະອົງຈະບໍ່ເຄີຍເຮັດໃຫ້ທ່ານຜິດຫວັງ. ໃນພຣະນາມຂອງພຣະເຢຊູຄຣິດ, ອາແມນ.