ຄຳສອນຂອງພຣະເຢຊູຄຣິດ
ເຮົາໄດ້ຮັບພຣະຄຳພີເພື່ອຊີ້ນຳຊີວິດຂອງເຮົາ. ຂ່າວສານຂອງຂ້າພະເຈົ້າໃນມື້ນີ້ປະກອບດ້ວຍພຣະຄຳຂອງພຣະຜູ້ຊ່ວຍໃຫ້ລອດຂອງເຮົາຈຳນວນໜຶ່ງ—ສິ່ງທີ່ພຣະອົງໄດ້ກ່າວ.
ເຮົາເຊື່ອໃນພຣະຄຣິດ. ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເຮົານະມັດສະການພຣະອົງ ແລະ ເຮັດຕາມຄຳສອນຂອງພຣະອົງໃນພຣະຄຳພີ.
ກ່ອນການຕົກ, ພຣະບິດາເທິງສະຫວັນຂອງເຮົາໄດ້ກ່າວກັບອາດາມ ແລະ ເອວາໂດຍກົງ. ຫລັງຈາກນັ້ນ, ພຣະບິດາໄດ້ແນະນຳພຣະບຸດອົງດຽວທີ່ຖືກຳເນີດຂອງພຣະອົງ, ພຣະເຢຊູຄຣິດ, ໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ ແລະ ໄດ້ປະທານພຣະບັນຊາວ່າ “ຈົ່ງຟັງທ່ານ.”1 ຈາກການຊີ້ນຳນີ້ ເຮົາສະຫລຸບໄດ້ວ່າ ບັນທຶກໃນພຣະຄຳພີກ່ຽວກັບຄຳເວົ້າຂອງ “ພຣະເຈົ້າ” ຫລື “ພຣະຜູ້ເປັນເຈົ້າ” ເກືອບທຸກຄັ້ງຈະເປັນພຣະຄຳຂອງພຣະເຢໂຮວາ, ພຣະຜູ້ເປັນເຈົ້າທີ່ຟື້ນຄືນພຣະຊົນຂອງເຮົາ, ພຣະເຢຊູຄຣິດ.2
ເຮົາໄດ້ຮັບພຣະຄຳພີເພື່ອຊີ້ນຳຊີວິດຂອງເຮົາ. ດັ່ງທີ່ສາດສະດານີໄຟໄດ້ສິດສອນເຮົາ, ເຮົາຄວນ “ຊື່ນຊົມດ້ວຍພຣະຄຳຂອງພຣະຄຣິດ; ເພາະຈົ່ງເບິ່ງ, ພຣະຄຳຂອງພຣະຄຣິດຈະບອກພວກທ່ານທຸກຢ່າງທີ່ພວກທ່ານຄວນເຮັດ.”3 ພຣະຄຳພີສ່ວນໃຫຍ່ທີ່ລາຍງານການປະຕິບັດສາດສະໜາກິດຂອງພຣະເຢຊູໃນຊ່ວງມະຕະ ບັນຍາຍເຖິງສິ່ງທີ່ພຣະອົງ ໄດ້ກະທຳ. ຂ່າວສານຂອງຂ້າພະເຈົ້າໃນມື້ນີ້ປະກອບດ້ວຍພຣະຄຳຂອງພຣະຜູ້ຊ່ວຍໃຫ້ລອດຂອງເຮົາຈຳນວນໜຶ່ງ—ສິ່ງທີ່ພຣະອົງ ໄດ້ກ່າວ. ຕໍ່ໄປນີ້ແມ່ນພຣະຄຳທີ່ຖືກບັນທຶກໄວ້ຢູ່ໃນພຣະຄຳພີໃໝ່ (ລວມທັງການເພີ່ມເຕີມທີ່ໄດ້ຮັບການດົນໃຈຂອງໂຈເຊັບ ສະມິດ) ແລະ ໃນພຣະຄຳພີມໍມອນ. ການເລືອກເຫລົ່ານີ້ສ່ວນໃຫຍ່ແມ່ນຢູ່ໃນລຳດັບທີ່ພຣະຜູ້ຊ່ວຍໃຫ້ລອດໄດ້ກ່າວ.
“ເຮົາບອກກັບພວກເຈົ້າຕາມຄວາມຈິງວ່າ, ຖ້າຜູ້ໃດບໍ່ບັງເກີດຈາກນ້ຳ ແລະ ຈາກພຣະວິນຍານ, ຜູ້ນັ້ນຈະເຂົ້າໄປໃນອານາຈັກຂອງພຣະເຈົ້າບໍ່ໄດ້.”4
“ຄົນ … ທີ່ຫິວ ແລະ ກະຫາຍຄວາມຊອບທຳຍ່ອມເປັນສຸກ, ເພາະວ່າເຂົາຈະເຕັມໄປ ດ້ວຍພຣະວິນຍານບໍລິສຸດ.”5
“ຜູ້ໃດສ້າງຄວາມສະຫງົບສຸກກໍເປັນສຸກ: ເພາະວ່າພຣະເຈົ້າຈະຊົງເອີ້ນຜູ້ນັ້ນວ່າເປັນບຸດ.”6
“ເຈົ້າທັງຫລາຍເຄີຍໄດ້ຍິນຄຳທີ່ກ່າວໄວ້ວ່າ, ຢ່າຫລິ້ນຊູ້ສູ່ຜົວເມຍທ່ານ:
“ແຕ່ຝ່າຍເຮົາ ເຮົາບອກພວກເຈົ້າວ່າ, ຜູ້ໃດແນມເບິ່ງແມ່ຍິງດ້ວຍໃຈຄິດຢາກລ່ວງເກີນຍິງນັ້ນ ຜູ້ນັ້ນໄດ້ຫລິ້ນຊູ້ໃນໃຈກັບຍິງນັ້ນແລ້ວ.”7
“ເຈົ້າທັງຫລາຍໄດ້ຍິນຄຳທີ່ກ່າວໄວ້ວ່າ, ຈົ່ງຮັກເພື່ອນບ້ານຂອງເຈົ້າ ແລະ ຊັງສັດຕູ.
“ແຕ່ເຮົາບອກເຈົ້າທັງຫລາຍວ່າ, ຈົ່ງຮັກສັດຕູຂອງເຈົ້າ, [ຈົ່ງໃຫ້ພອນແກ່ຄົນທີ່ປ້ອຍດ່າເຈົ້າ, ຈົ່ງເຮັດດີຕໍ່ຜູ້ທີ່ກຽດຊັງເຈົ້າ, ແລະ ອະທິຖານເພື່ອຜູ້ທີ່ໃຊ້ເຈົ້າຢ່າງໝິ່ນປະໝາດ ແລະ] ຂົ່ມເຫັງເຈົ້າ;
“ເພື່ອວ່າເຈົ້າທັງຫລາຍຈະກາຍເປັນບຸດແຫ່ງພຣະບິດາຜູ້ສະຖິດຢູ່ໃນສະຫວັນ: ເພາະພຣະອົງບັນດານໃຫ້ແສງຕາເວັນຂອງພຣະອົງ ສ່ອງໃສ່ທັງຄົນຊົ່ວ ແລະ ຄົນດີເໝືອນກັນ, ແລະ ໃຫ້ຝົນຕົກໃສ່ທັງຄົນທີ່ຊອບທຳ ແລະ ບໍ່ຊອບທຳ.”8
“ຖ້າເຈົ້າຍົກໂທດຄວາມຜິດຂອງຄົນອື່ນທີ່ໄດ້ເຮັດຕໍ່ເຈົ້າ ພຣະບິດາຂອງເຈົ້າຜູ້ສະຖິດຢູ່ໃນສະຫວັນ ກໍຈະຍົກຄວາມຜິດຂອງເຈົ້າເໝືອນກັນ:
“ແຕ່ຖ້າເຈົ້າບໍ່ຍົກໂທດໃຫ້ຄົນອື່ນ, ພຣະບິດາຂອງເຈົ້າທັງຫລາຍຈະບໍ່ຍົກຄວາມຜິດຂອງເຈົ້າເໝືອນກັນ.”9
“ຖ້າເຈົ້າທັງຫລາຍເປັນຝ່າຍໂລກ, ໂລກກໍຈະຮັກແພງສິ່ງທີ່ເປັນຂອງມັນ: ແຕ່ເພາະເຈົ້າທັງຫລາຍບໍ່ເປັນຂອງຝ່າຍໂລກ, ແລະ ຝ່າຍເຮົາໄດ້ເລືອກເອົາພວກເຈົ້າອອກຈາກໂລກນີ້, ເພາະສະນັ້ນ ໂລກຈຶ່ງກຽດຊັງພວກເຈົ້າ.”10
ດັ່ງນັ້ນ, ຢ່າສະແຫວງຫາສິ່ງທີ່ເປັນຂອງໂລກ, ແຕ່ກ່ອນອື່ນໝົດ ຈົ່ງສະແຫວງຫາທີ່ຈະສ້າງອານາຈັກຂອງພຣະເຈົ້າ, ແລະ ທີ່ຈະສະຖາປະນາຄວາມຊອບທຳຂອງພຣະອົງ, ແລະ ສິ່ງທັງໝົດເຫລົ່ານີ້ ຈະຖືກເພີ່ມເຕີມໃຫ້ແກ່ພວກເຈົ້າ.”11
“[ສະນັ້ນ] ເຈົ້າຢາກໃຫ້ຄົນອື່ນເຮັດຕໍ່ເຈົ້າຢ່າງໃດ ກໍຈົ່ງເຮັດຕໍ່ເພິ່ນຢ່າງນັ້ນເໝືອນກັນ: ອັນນີ້ແມ່ນກົດບັນຍັດ ແລະ ຄຳສັ່ງສອນຂອງ [ສາດສະດາ].”12
“ຈົ່ງລະວັງຜູ້ປະກາດພຣະຄຳປອມເຂົ້າມາຫາພວກເຈົ້າ, ເບິ່ງພາຍນອກເຂົາອ່ອນໂຍນຄືໂຕແກະ, ແຕ່ພາຍໃນແລ້ວເຂົາໂຫດຮ້າຍຄືໝາໄນ.
“ພວກເຈົ້າຈະຮູ້ຈັກຄົນເຫລົ່ານີ້ດ້ວຍການກະທຳຂອງເຂົາ. ມີຜູ້ໃດເກັບໝາກອະງຸ່ນຈາກເຄືອມີໜາມ?
“ດັ່ງນັ້ນ ຕົ້ນໄມ້ດີຍ່ອມເກີດໝາກດີ; ແຕ່ຕົ້ນໄມ້ບໍ່ດີຍ່ອມເກີດໝາກບໍ່ດີ.”13
“ບໍ່ແມ່ນວ່າທຸກຄົນທີ່ເອີ້ນເຮົາວ່າ, ພຣະອົງເຈົ້າ, ພຣະອົງເຈົ້າ, ແລ້ວຈະເຂົ້າໄປໃນອານາຈັກຂອງພຣະເຈົ້າໄດ້; ເຂົ້າໄດ້ແຕ່ຜູ້ທີ່ປະຕິບັດຕາມນ້ຳພຣະໄທຂອງພຣະບິດາຂອງເຮົາ ຜູ້ຊຶ່ງຢູ່ໃນສະຫວັນ.”14
“ບັນດາຜູ້ທີ່ເຮັດການໜັກໜ່ວງ ແລະ ແບກພາລະໜັກ, ຈົ່ງມາຫາເຮົາ, ແລະ ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ.
“ຈົ່ງເອົາແອກຂອງເຮົາແບກໄວ້, ແລ້ວຮຽນຮູ້ຈາກເຮົາ; ເພາະວ່າເຮົາເປັນຜູ້ມີໃຈອ່ອນສຸພາບ ແລະ ຖ່ອມລົງ: ແລ້ວຈິດໃຈຂອງພວກເຈົ້າຈະໄດ້ພົບຄວາມເຊົາເມື່ອຍ.
“ດ້ວຍວ່າ ແອກຂອງເຮົາກໍພໍເໝາະ ແລະ ພາລະຂອງເຮົາກໍເບົາ.”15
“ຖ້າຜູ້ໃດຢາກຕາມເຮົາມາ ໃຫ້ຜູ້ນັ້ນປະຕິເສດຕົນເອງ, ແລະ ຮັບແບກໄມ້ກາງແຂນຂອງຕົນ ແລ້ວຕິດຕາມເຮົາມາ.
“ແລະ ບັດນີ້ໃນການທີ່ມະນຸດຈະຮັບແບກໄມ້ກາງແຂນຂອງຕົນເອງນັ້ນ, ໝາຍເຖິງການປະຕິເສດຕົນເອງຈາກຄວາມບໍ່ເປັນເໝືອນພຣະເຈົ້າ, ແລະ ຄວາມໄຄ່ທັງໝົດຂອງໂລກ, ແລະ ຮັກສາບັນຍັດຂອງເຮົາ.”16
“ສະນັ້ນ, ຈົ່ງປະຖິ້ມໂລກນີ້, ແລະ ຮັກສາຈິດວິນຍານຂອງເຈົ້າໄວ້; ເພາະຖ້າຄົນໃດຄົນໜຶ່ງຈະໄດ້ຊັບສົມບັດ, ຖ້າຫາກເຂົາຈະໄດ້ໝົດທັງໂລກ, ແຕ່ຕ້ອງເສຍຈິດວິນຍານຂອງຕົນ ຄົນນັ້ນຈະໄດ້ປະໂຫຍດອັນໃດ? ຫລື ຄົນນັ້ນຈະເອົາສິ່ງໃດມາແລກເອົາຈິດວິນຍານຂອງຕົນຄືນໄດ້?”17
“ຜູ້ໃດທີ່ເຕັມໃຈປະຕິບັດຕາມຄວາມປະສົງຂອງພຣະເຈົ້າ, ຜູ້ນັ້ນກໍຈະຮູ້ວ່າສິ່ງທີ່ເຮົາສັ່ງສອນນັ້ນ ມາຈາກພຣະເຈົ້າ, ຫລື ເຮົາກ່າວຕາມໃຈຂອງເຮົາເອງ.”18
“ຝ່າຍເຮົາຈຶ່ງບອກແກ່ພວກເຈົ້າວ່າ, ຈົ່ງໝັ່ນຂໍ ແລະ ພວກເຈົ້າຈະໄດ້ຮັບ; ຈົ່ງໝັ່ນຊອກຫາ ແລະ ພວກເຈົ້າຈະໄດ້ພົບ; ຈົ່ງໝັ່ນເຄາະ ແລະ ຈະມີຜູ້ໄຂປະຕູໃຫ້.
“ດ້ວຍວ່າ ທຸກຄົນທີ່ໝັ່ນຂໍ ກໍໄດ້ຮັບ; ຜູ້ໃດທີ່ໝັ່ນຊອກຫາ ກໍໄດ້ພົບ; ແລະ ຜູ້ໃດທີ່ໝັ່ນເຄາະ ກໍຈະມີຜູ້ໄຂປະຕູໃຫ້.”19
“ມີຝູງແກະອື່ນທີ່ເປັນຝູງແກະຂອງເຮົາ: ແຕ່ບໍ່ຢູ່ໃນຄອກນີ້ ເຮົາຈະຕ້ອງພາແກະເຫລົ່ານັ້ນມາເໝືອນກັນ, ພວກເຂົາຈະຟັງສຽງຂອງເຮົາ; ເຮົາຈະເຕົ້າໂຮມພວກເຂົາເຂົ້າເປັນຝູງດຽວທີ່ມີຜູ້ລ້ຽງແຕ່ຜູ້ດຽວ.”20
“ພຣະເຢຊູກ່າວແກ່ນາງວ່າ, “ເຮົານີ້ແຫລະ ເປັນເຫດໃຫ້ຄົນທັງປວງເປັນຄືນມາ, ທັງເປັນຊີວິດ: ຜູ້ທີ່ວາງໃຈເຊື່ອໃນເຮົາ, ເຖິງແມ່ນວ່າຕາຍໄປແລ້ວ ກໍຍັງມີຊີວິດຢູ່:
“ຜູ້ໃດທີ່ຍັງມີຊີວິດຢູ່ ແລະ ເຊື່ອໃນເຮົາຈະບໍ່ຕາຍຈັກເທື່ອ.”21
“[ພຣະບັນຍັດທີ່ຍິ່ງໃຫຍ່ໃນກົດແມ່ນ] ຈົ່ງຮັກພຣະຜູ້ເປັນເຈົ້າ ພຣະເຈົ້າຂອງເຈົ້າດ້ວຍສຸດໃຈ, ດ້ວຍສຸດຈິດ, ແລະ ດ້ວຍສຸດຄວາມຄິດຂອງເຈົ້າ.
“ນັ້ນແຫລະ ແມ່ນກົດບັນຍັດຂໍ້ໃຫຍ່ ແລະ ຂໍ້ຕົ້ນ.
“ຂໍ້ທີສອງກໍເໝືອນກັນຄື, ຈົ່ງຮັກເພື່ອນບ້ານເໝືອນຮັກຕົນເອງ.
“ກົດບັນຍັດທັງໝົດ ແລະ ບັນດາຖ້ອຍຄຳຂອງ [ສາດສະດາ] ກໍຂຶ້ນກັບກົດບັນຍັດສອງຂໍ້ນີ້ແຫລະ.”22
“ຜູ້ທີ່ມີກົດບັນຍັດຂອງເຮົາ ແລະ ເຊື່ອຟັງກົດບັນຍັດນັ້ນ ແມ່ນຜູ້ນັ້ນແຫລະ ທີ່ຮັກເຮົາ: ພຣະບິດາຂອງເຮົາ ຈະຮັກຜູ້ທີ່ເຮົາຮັກ ແລະ ເຮົາຈະຮັກເຂົາເໝືອນກັນ ທັງຈະປະກົດຕົວໃຫ້ແກ່ເຂົາ.”23
“ເຮົາມອບສັນຕິສຸກໄວ້ກັບພວກເຈົ້າ, ເປັນສັນຕິສຸກຂອງເຮົາ, ທີ່ເຮົາມອບໃຫ້ພວກເຈົ້າ: ສັນຕິສຸກທີ່ເຮົາໃຫ້ນັ້ນ, ບໍ່ເໝືອນສັນຕິສຸກທີ່ໂລກໃຫ້. ຢ່າວຸ້ນວາຍເປັນທຸກໃຈ, ແລະ ຢ່າສູ່ຢ້ານ.”24
“ເຮົາມອບກົດບັນຍັດຂໍ້ໃໝ່ໃຫ້ພວກເຈົ້າຄື, ຈົ່ງຮັກຊຶ່ງກັນແລະກັນ; ເຮົາຮັກພວກເຈົ້າຢ່າງໃດ, ພວກເຈົ້າກໍຈົ່ງຮັກຊຶ່ງກັນແລະກັນຢ່າງນັ້ນ.”25
“ຈົ່ງເບິ່ງມື ແລະ ຕີນຂອງເຮົາດູ, ນີ້ແມ່ນເຮົາເອງແທ້, ຈົ່ງຄຳເບິ່ງຕົວເຮົາ ແລະ ພວກເຈົ້າກໍຈະຮູ້, ເພາະວ່າຜີບໍ່ມີເນື້ອໜັງ, ບໍ່ມີກະດູກດັ່ງທີ່ພວກເຈົ້າເຫັນເຮົາມີຢູ່ນີ້.”26
“ເຫດສະນັ້ນ ພວກເຈົ້າຈົ່ງອອກໄປ ຈົ່ງເຮັດໃຫ້ຄົນທຸກຊາດເປັນລູກສິດ ໃຫ້ພວກເຂົາຮັບບັບຕິສະມາໃນພຣະນາມຂອງພຣະບິດາ, ແລະ ຂອງພຣະບຸດ, ແລະ ຂອງພຣະວິນຍານບໍລິສຸດ:
“ສັ່ງສອນພວກເຂົາໃຫ້ຖືຮັກສາທຸກໆສິ່ງທີ່ເຮົາໄດ້ສັ່ງພວກເຈົ້າໄວ້ແລ້ວນັ້ນ: ນີ້ແຫລະ, ເຮົາຢູ່ກັບເຈົ້າທັງຫລາຍທຸກໆວັນຈົນສິ້ນໂລກນີ້.”27
ຫລັງຈາກການປະຕິບັດສາດສະໜາກິດໃນແຜ່ນດິນສັກສິດ, ພຣະເຢຊູຄຣິດໄດ້ປະກົດຕົວຕໍ່ຄົນທີ່ຊອບທຳໃນທະວີບອາເມຣິກາ. ນີ້ຄືພຣະຄຳບາງສ່ວນທີ່ພຣະອົງໄດ້ກ່າວຢູ່ທີ່ນັ້ນ:
“ຈົ່ງເບິ່ງ, ເຮົາຄືພຣະເຢຊູຄຣິດ ພຣະບຸດຂອງພຣະເຈົ້າ. ເຮົາໄດ້ສ້າງຟ້າສະຫວັນ ແລະ ແຜ່ນດິນໂລກ, ລວມທັງທຸກສິ່ງທຸກຢ່າງທີ່ຢູ່ໃນນັ້ນ. ເຮົາໄດ້ຢູ່ກັບພຣະບິດາຕັ້ງແຕ່ຕົ້ນ. ເຮົາຢູ່ໃນພຣະບິດາ, ແລະ ພຣະບິດາຢູ່ໃນເຮົາ; ແລະ ໃນເຮົາພຣະບິດາແຜ່ບາລະມີພຣະນາມຂອງພຣະອົງ.”28
“ເຮົາເປັນຄວາມສະຫວ່າງ ແລະ ຊີວິດຂອງໂລກ. ເຮົາຄື ອາລະຟາ ແລະ ໂອເມຄາ, ເປັນຕົ້ນ ແລະ ທີ່ສຸດ.
“ແລະ ພວກເຈົ້າຢ່າໄດ້ຖວາຍເຄື່ອງບູຊາດ້ວຍການຫລັ່ງເລືອດແກ່ເຮົາອີກຕໍ່ໄປ; ແທ້ຈິງແລ້ວ, ເຄື່ອງບູຊາ ແລະ ເຄື່ອງເຜົາຂອງພວກເຈົ້າໝົດສິ້ນໄປແລ້ວ, ເພາະເຮົາບໍ່ຮັບເອົາເຄື່ອງບູຊາ ແລະ ເຄື່ອງເຜົາຂອງພວກເຈົ້າອີກແລ້ວ.
“ແລະ ໃຫ້ພວກເຈົ້າຖວາຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດຂອງພວກເຈົ້າແກ່ເຮົາເປັນເຄື່ອງບູຊາ. ແລະ ຜູ້ໃດກໍຕາມທີ່ມາຫາເຮົາດ້ວຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ, ເຮົາຈະໃຫ້ບັບຕິສະມາແກ່ຜູ້ນັ້ນດ້ວຍໄຟ ແລະ ດ້ວຍພຣະວິນຍານບໍລິສຸດ. …
“ຈົ່ງເບິ່ງ, ເຮົາໄດ້ມາສູ່ໂລກເພື່ອນຳເອົາການໄຖ່ມາສູ່ໂລກ, ເພື່ອຊ່ວຍໂລກໃຫ້ລອດຈາກບາບ.”29
“ແລະ ເຮົາກ່າວກັບພວກເຈົ້າອີກ, ພວກເຈົ້າຕ້ອງກັບໃຈ ແລະ ຮັບບັບຕິສະມາໃນນາມຂອງເຮົາເສຍກ່ອນ, ແລະ ກາຍເປັນເໝືອນດັ່ງເດັກນ້ອຍ, ຖ້າບໍ່ດັ່ງນັ້ນ ເຈົ້າຈະບໍ່ມີທາງທີ່ຈະໄດ້ອານາຈັກຂອງພຣະເຈົ້າມາເປັນມູນມໍລະດົກໄດ້ເລີຍ.”30
“ສະນັ້ນ ເຮົາຈຶ່ງຢາກໃຫ້ເຈົ້າ ດີພ້ອມ ຄືກັນກັບເຮົາ, ຫລື ພຣະບິດາຂອງເຈົ້າ ຜູ້ປະທັບຢູ່ໃນສະຫວັນຊົງດີພ້ອມ.”31
“ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ຈົ່ງຄອຍເຝົ້າລະວັງ ແລະ ອະທິຖານ ສະເໝີ, ເພື່ອເຈົ້າຈະບໍ່ໄດ້ຖືກມານລໍ້ລວງ, ແລະ ຖືກມັນນຳໄປເປັນຊະເລີຍ.”32
“ສະນັ້ນ ເຈົ້າຕ້ອງອະທິຖານຫາພຣະບິດາຢູ່ສະເໝີໃນນາມຂອງເຮົາ.”33
“ສະນັ້ນ, ອັນໃດກໍຕາມທີ່ເຈົ້າຈະເຮັດ, ຈົ່ງເຮັດໃນນາມຂອງເຮົາ; ສະນັ້ນ ເຈົ້າຈົ່ງເອີ້ນສາດສະໜາຈັກຕາມນາມຂອງເຮົາ.”34
“ຈົ່ງເບິ່ງ ເຮົາໄດ້ມອບພຣະກິດຕິຄຸນຂອງເຮົາໃຫ້ແກ່ເຈົ້າ, ແລະ ນີ້ຄືພຣະກິດຕິຄຸນຊຶ່ງເຮົາໄດ້ມອບໃຫ້ແກ່ເຈົ້າ—ຄືເຮົາໄດ້ມາເກີດໃນໂລກເພື່ອກະທຳຕາມພຣະປະສົງຂອງພຣະບິດາຂອງເຮົາ, ເພາະວ່າພຣະບິດາຂອງເຮົາໄດ້ສົ່ງເຮົາມາ.
“ແລະ ພຣະບິດາຂອງເຮົາໄດ້ສົ່ງເຮົາມາເພື່ອວ່າເຮົາຈະໄດ້ຖືກຍົກຂຶ້ນເທິງໄມ້ກາງແຂນ; ແລະ ຫລັງຈາກເຮົາໄດ້ຖືກຍົກຂຶ້ນເທິງໄມ້ກາງແຂນ ເພື່ອວ່າເຮົາຈະໄດ້ຊັກນຳຄົນທັງຫລາຍມາຫາເຮົາ … ເພື່ອພວກເຂົາຈະໄດ້ມາຢືນຢູ່ຕໍ່ພຣະພັກຂອງເຮົາ ເພື່ອຮັບການພິພາກສາຕາມວຽກງານຂອງພວກເຂົາ, ບໍ່ວ່າຈະເປັນວຽກງານດີ ຫລື ວຽກງານຊົ່ວ.”35
“ບັດນີ້ ນີ້ຄືພຣະບັນຍັດ: ຈົ່ງກັບໃຈ, ເຈົ້າທັງຫລາຍຈົນເຖິງທີ່ສຸດຂອງແຜ່ນດິນໂລກ, ແລະ ຈົ່ງມາຫາເຮົາ ແລະ ຮັບບັບຕິສະມາໃນນາມຂອງເຮົາ, ເພື່ອເຈົ້າຈະໄດ້ຮັບການຊຳລະໃຫ້ບໍລິສຸດ ໂດຍການຮັບພຣະວິນຍານບໍລິສຸດ, ເພື່ອເຈົ້າຈະຢືນຢູ່ໂດຍບໍ່ມີມົນທິນຕໍ່ໜ້າເຮົາໃນວັນສຸດທ້າຍ.”36
ເຮົາເຊື່ອໃນພຣະຄຣິດ. ຂ້າພະເຈົ້າຂໍສະຫລຸບສິ່ງທີ່ພຣະອົງໄດ້ກ່າວກ່ຽວກັບວິທີທີ່ເຮົາຄວນຮູ້ ແລະ ປະຕິບັດຕາມຄຳສອນຂອງພຣະອົງ:
“ແຕ່ [ພຣະຜູ້ປອບໂຍນ] ຄື ພຣະວິນຍານບໍລິສຸດ, ຜູ້ທີ່ພຣະບິດາຈະໃຊ້ມາໃນນາມຂອງເຮົາ ອົງນັ້ນແຫລະ ຈະສັ່ງສອນພວກເຈົ້າທຸກສິ່ງ ແລະ ຈະເຕືອນໃຫ້ພວກເຈົ້າລະນຶກເຖິງທຸກສິ່ງ ຊຶ່ງເຮົາໄດ້ບອກພວກເຈົ້າແລ້ວນັ້ນ.”37
ຂ້າພະເຈົ້າຢືນຢັນຄວາມຈິງຂອງຄຳສອນເຫລົ່ານີ້ໃນພຣະນາມຂອງພຣະເຢຊູຄຣິດ, ອາແມນ.