ເຈົ້າຮູ້ບໍວ່າເປັນຫຍັງຂ້ອຍໃນຖານະຊາວຄຣິດຈຶ່ງເຊື່ອໃນພຣະຄຣິດ?

ໂດຍ ແອວເດີ ອາມັດ ແອັສ ຄໍບິດ

ແຫ່ງສາວົກເຈັດສິບ

ພຣະເຢຊູຄຣິດຕ້ອງທຸກທໍລະມານ, ສິ້ນພຣະຊົນ, ແລະ ຟື້ນຄືນພຣະຊົນມາອີກຄັ້ງເພື່ອໄຖ່ມະນຸດທັງປວງ ຈາກຄວາມຕາຍທາງຮ່າງກາຍ ແລະ ເພື່ອມອບຊີວິດນິລັນດອນໃຫ້ຢູ່ກັບພຣະເຈົ້າ.

ຕອນແລງຂອງມື້ໜຶ່ງຫລັງຈາກເລີກວຽກ, ເມື່ອຫລາຍປີກ່ອນ, ຂ້າພະເຈົ້າໄດ້ຂຶ້ນລົດເມປະຈຳທາງເພື່ອຈະກັບບ້ານຈາກເມືອງນິວຢອກ ໄປຫາລັດນິວເຈີຊີ. ຜູ້ຍິງຄົນໜຶ່ງທີ່ຂ້າພະເຈົ້າບັງເອີນນັ່ງຢູ່ທາງຂ້າງໄດ້ສັງເກດວ່າຂ້າພະເຈົ້າກຳລັງຂຽນຫຍັງລົງໃນຄອມພິວເຕີຂອງຂ້າພະເຈົ້າ ແລະ ໄດ້ຖາມວ່າ, “ເຈົ້າເຊື່ອໃນ … ພຣະຄຣິດແມ່ນບໍ?” ຂ້າພະເຈົ້າຕອບວ່າ, “ໂດຍ,ແມ່ນແລ້ວ!” ຂະນະທີ່ພວກເຮົາລົມກັນຢູ່ນັ້ນ, ຂ້າພະເຈົ້າໄດ້ຮູ້ຈັກວ່າລາວຫາກໍຍ້າຍມາຢູ່ໃໝ່ຈາກປະເທດເຂດອາຊີທີ່ສວຍງາມຂອງລາວ ເພື່ອມາເຮັດວຽກໃນເມືອງນິວຢອກ ບ່ອນທີ່ມີການແຂ່ງຂັນສູງທາງດ້ານຂໍ້ມູນຂ່າວສານເທັກໂນໂລຈີ.

ໃນແບບປົກກະຕິ, ຂ້າພະເຈົ້າໄດ້ຖາມລາວ, “ເຈົ້າຮູ້ບໍວ່າເປັນຫຍັງຂ້ອຍໃນຖານະຊາວຄຣິດຈຶ່ງເຊື່ອໃນພຣະຄຣິດ?” ລາວກໍເຊັ່ນດຽວກັນ ຕອບກັບຂ້າພະເຈົ້າຄືນແບບປົກກະຕິ ແລະ ເຊື້ອເຊີນຂ້າພະເຈົ້າເລົ່າໃຫ້ລາວຟັງ. ແຕ່ວ່າຂະນະທີ່ຂ້າພະເຈົ້າຈະເວົ້າອອກໄປ, ຂ້າພະເຈົ້າກໍມີຊ່ວງເວລາໜຶ່ງທີ່ຄວາມຄິດຫລາຍຢ່າງໄດ້ຫລັ່ງໄຫລເຂົ້າມາໃນໃຈ. ນີ້ກໍເປັນຄັ້ງທຳອິດທີ່ຂ້າພະເຈົ້າຈະໄດ້ອະທິບາຍ “ເຫດຜົນ” ຂອງຊາວຄຣິດໃຫ້ກັບຄົນແປກໜ້າ ທີ່ມີຄວາມສະຫລາດຫລາຍ. ຂ້າພະເຈົ້າບໍ່ສາມາດເວົ້າແບບງ່າຍໆວ່າ, “ຂ້າພະເຈົ້າຕິດຕາມພຣະເຢຊູຄຣິດ ເພາະວ່າພຣະອົງໄດ້ຮັບທຸກທໍລະມານ ແລະ ສິ້ນພຣະຊົນເພື່ອບາບຂອງຂ້າພະເຈົ້າຢ່າງເຕັມພຣະໄທ.” ລາວອາດຈະສົງໄສວ່າ, “ພຣະເຢຊູຈຳເປັນຕ້ອງສິ້ນພຣະຊົນບໍ? ພຣະເຈົ້າໃຫ້ອະໄພ ແລະ ຊຳລະເຮົາໃຫ້ສະອາດຈາກບາບຂອງເຮົາຢ່າງງ່າຍດາຍ ພຽງແຕ່ເຮົາທູນຂໍຈາກພຣະອົງບໍ່ໄດ້ບໍ?”

ທ່ານຈະຕອບແນວໃດໃນເວລາພຽງແຕ່ສອງສາມນາທີນີ້? ທ່ານຈະອະທິບາຍເລື່ອງນີ້ແນວໃດໃຫ້ກັບເພື່ອນຄົນໜຶ່ງ? ເດັກໆ ແລະ ຊາວໜຸ່ມ: ໃຫ້ພວກເຈົ້າລອງຖາມພໍ່ແມ່ ຫລື ຜູ້ນຳລອງເບິ່ງວ່າ, “ເປັນຫຍັງພຣະເຢຊູຈຶ່ງຈຳເປັນຕ້ອງສິ້ນພຣະຊົນ?” ແລະ, ອ້າຍເອື້ອຍນ້ອງທັງຫລາຍ, ຂ້າພະເຈົ້າມີເລື່ອງໜຶ່ງຢາກສາລະພາບ: ເຖິງແມ່ນຂ້າພະເຈົ້າຄິດວ່າຕົວເອງຮູ້ກ່ຽວກັບຄຳສອນ, ປະຫວັດສາດ, ນະໂຍບາຍ, ແລະ ເລື່ອງອື່ນໆຂອງສາດສະໜາຈັກ, ຄຳຕອບສຳລັບຄຳຖາມສຳຄັນກ່ຽວກັບສັດທາຂອງເຮົານີ້ບໍ່ໄດ້ມີມາຢ່າງງ່າຍດາຍ. ໃນມື້ນັ້ນ ຂ້າພະເຈົ້າໄດ້ຕັດສິນໃຈທີ່ຈະສຸມໃຈໃສ່ໃນສິ່ງທີ່ສຳຄັນທີ່ສຸດຕໍ່ຊີວິດນິລັນດອນ.

ແລ້ວ, ຂ້າພະເຈົ້າໄດ້ບອກກັບເພື່ອນໃໝ່ຄົນນັ້ນ¹ ວ່າເຮົາມີວິນຍານທີ່ມາກັບຮ່າງກາຍ ແລະ ວ່າພຣະເຈົ້າຄືພຣະບິດາຂອງວິນຍານຂອງເຮົາ.² ຂ້າພະເຈົ້າໄດ້ບອກກັບລາວວ່າ ເຮົາໄດ້ຢູ່ກັບພຣະບິດາເທິງສະຫວັນຂອງເຮົາກ່ອນເຮົາໄດ້ມາເກີດຢູ່ໂລກມະຕະນີ້.³ ເພາະພຣະອົງຮັກລາວ ແລະ ລູກໆຂອງພຣະອົງ, ພຣະອົງຈຶ່ງວາງແຜນໃຫ້ເຮົາໄດ້ຮັບຮ່າງກາຍຕາມຮູບລັກສະນະຮ່າງກາຍແຫ່ງລັດສະໝີພາບຂອງພຣະອົງ,⁴ ເປັນສ່ວນໜຶ່ງຂອງຄອບຄົວ,⁵ ແລະ ກັບໄປສູ່ທີ່ປະທັບແຫ່ງຄວາມຮັກຂອງພຣະອົງເພື່ອຊື່ນຊົມກັບຊີວິດນິລັນດອນຢູ່ກັບຄອບຄົວຂອງເຮົາ,⁶ ເໝືອນດັ່ງທີ່ພຣະອົງຊົງກະທຳກັບຄອບຄົວຂອງພຣະອົງ.⁷ ແຕ່ວ່າ, ດັ່ງທີ່ຂ້າພະເຈົ້າໄດ້ເວົ້າມາແລ້ວ, ເຮົາຈະຕ້ອງປະເຊີນໜ້າກັບອຸປະສັກຫລັກສອງປະການຄື:⁸ (1) ການຕາຍທາງຮ່າງກາຍ—ການແຍກອອກຈາກກັນຂອງຮ່າງກາຍ ແລະ ວິນຍານຂອງເຮົາ. ແນ່ນອນ, ລາວຮູ້ແລ້ວວ່າເຮົາທຸກຄົນຕ້ອງຕາຍ. ແລະ (2) ການຕາຍທາງວິນຍານ—ການແຍກອອກຈາກພຣະເຈົ້າຍ້ອນຄວາມຜິດບາບ, ຄວາມຜິດພາດ, ແລະ ຄວາມບົກພ່ອງຂອງເຮົາ ເມື່ອຄວາມເປັນມະນຸດເຮັດໃຫ້ເຮົາຫ່າງເຫີນຈາກທີ່ປະທັບອັນສັກສິດຂອງພຣະອົງ.⁹ ລາວກໍກ່ຽວຂ້ອງກັບເລື່ອງນີ້ນຳ.

ຂ້າພະເຈົ້າບອກກັບລາວໄປວ່າ ນີ້ແມ່ນຜົນຕາມມາຂອງກົດເກນແຫ່ງຄວາມຍຸດຕິທຳ. ກົດນິລັນດອນ ນີ້ ຮຽກຮ້ອງໃຫ້ມີການລົງ ໂທດນິລັນດອນ ສຳລັບທຸກຄົນທີ່ມີຄວາມຜິດບາບ ຫລື ການລະເມີດກົດ ຫລື ຄວາມຈິງຂອງພຣະເຈົ້າ, ຖ້າບໍ່ດັ່ງນັ້ນ ເຮົາຈະ ບໍ່ມີວັນ ໄດ້ກັບຄືນໄປຢູ່ໃນທີ່ປະທັບອັນສັກສິດຂອງພຣະອົງ.¹⁰ ມັນຈະບໍ່ຍຸດຕິທຳ, ແລະ ພຣະເຈົ້າ “ປະຕິເສດຄວາມຍຸດຕິທຳບໍ່ໄດ້.”¹¹ ລາວເຂົ້າໃຈເລື່ອງນີ້ ແຕ່ເຂົ້າໃຈໄດ້ງ່າຍກວ່າວ່າ ພຣະເຈົ້າຍັງຊົງເມດຕາ, ຮັກ, ແລະ ກະຕືລືລົ້ນທີ່ຈະໃຫ້ຊີວິດນິລັນດອນຂອງເຮົາເກີດຂຶ້ນ.¹² ຂ້າພະເຈົ້າໄດ້ບອກກັບເພື່ອນຂອງຂ້າພະເຈົ້າໄປວ່າ ເຮົາຍັງມີຜູ້ປໍລະປັກທີ່ສະຫລາດແກມໂກງ ແລະ ມີອຳນາດ—ຊຶ່ງເປັນແຫລ່ງທີ່ມາຂອງຄວາມຊົ່ວຮ້າຍ ແລະ ການຕົວະ—ຕໍ່ຕ້ານເຮົາຢູ່.¹³ ດັ່ງນັ້ນ, ຄົນໃດຄົນໜຶ່ງທີ່ມີອຳນາດຂອງພຣະເຈົ້າ ອັນບໍ່ມີຂອບເຂດ ຈະສາມາດເອົາຊະນະການຕໍ່ຕ້ານ ແລະ ອຸປະສັກດັ່ງກ່າວ ເພື່ອຊ່ວຍເຮົາໃຫ້ລອດ.¹⁴

ແລ້ວຂ້າພະເຈົ້າໄດ້ແບ່ງປັນຂ່າວດີກັບລາວ—“ຂ່າວອັນໜ້າຊື່ນຊົມ … ເຖິງທຸກຄົນ”¹⁵—ວ່າ “ເພາະວ່າ ພຣະເຈົ້າຮັກໂລກຫລາຍທີ່ສຸດ ຈົນໄດ້ປະທານພຣະບຸດອົງດຽວຂອງພຣະອົງ ເພື່ອທຸກຄົນທີ່ວາງໃຈເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດອັນຕະຫລອດໄປເປັນນິດ.”¹⁶ ຂ້າພະເຈົ້າເປັນພະຍານກັບເພື່ອນຂອງຂ້າພະເຈົ້າ, ແລະ ຂ້າພະເຈົ້າເປັນພະຍານກັບທ່ານ, ວ່າພຣະເຢຊູຄຣິດຄືພຣະຜູ້ຊ່ວຍໃຫ້ລອດ, ວ່າພຣະອົງ ໄດ້ ຮັບທຸກທໍລະມານ, ສິ້ນພຣະຊົນ, ແລະ ຟື້ນຄືນພຣະຊົນມາອີກຄັ້ງ—ການຊົດໃຊ້ ອັນບໍ່ມີຂອບເຂດ ຂອງພຣະອົງ—ເພື່ອໄຖ່ມະນຸດທັງປວງ ຈາກຄວາມຕາຍທາງຮ່າງກາຍ¹⁷ ແລະ ເພື່ອມອບຊີວິດນິລັນດອນໃຫ້ຢູ່ກັບພຣະເຈົ້າ ແລະ ຄອບຄົວຂອງເຮົາ¹⁸ ກັບ ທຸກຄົນ ຜູ້ທີ່ຈະຕິດຕາມພຣະອົງ. ພຣະຄຳພີມໍມອນໄດ້ປະກາດວ່າ, “ແລະ ພຣະເຈົ້າ … ມີໄຊຊະນະຕໍ່ຄວາມຕາຍ; ປະທານອຳນາດໃຫ້ພຣະບຸດ … ; ໂດຍທີ່ມີອຸທອນແຫ່ງ [ຄວາມເມດຕາ ແລະ] ສົງສານ … ; ເຮັດໃຫ້ສາຍຮັດແຫ່ງຄວາມຕາຍຂາດອອກ, ຮັບເອົາຄວາມຊົ່ວຮ້າຍ ແລະ ການລ່ວງລະເມີດຂອງພວກເຂົາມາໄວ້ນຳພຣະອົງເອງ, ແລະ ໄຖ່ພວກເຂົາ, ແລະ ຕອບສະໜອງຄວາມຮຽກຮ້ອງຕ້ອງການຂອງຄວາມຍຸດຕິທຳ.”¹⁹

ຂັ້ນຕອນທີ່ພຣະເຈົ້າເປີດເຜີຍທີ່ເຮົາຕ້ອງເຮັດເພື່ອຕິດຕາມພຣະເຢຊູ ແລະ ໄດ້ຮັບຊີວິດນິລັນດອນເອີ້ນວ່າ ຄຳສອນຂອງພຣະຄຣິດ. ມັນລວມທັງ “ສັດທາໃນພຣະເຢຊູຄຣິດ ແລະ ການຊົດໃຊ້ຂອງພຣະອົງ, ການກັບໃຈ, ການຮັບບັບຕິສະມາ [ເຂົ້າໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ], ການຮັບເອົາຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ.”²⁰ ຂ້າພະເຈົ້າໄດ້ແບ່ງປັນຂັ້ນຕອນເຫລົ່ານີ້ກັບເພື່ອນຂອງຂ້າພະເຈົ້າ, ແຕ່ວ່ານີ້ແມ່ນບາງວິທີທີ່ສາດສະດາ ແລະ ອັກຄະສາວົກໄດ້ສິດສອນເມື່ອບໍ່ດົນມານີ້ວ່າ ຄຳສອນຂອງພຣະຄຣິດສາມາດເປັນພອນໃຫ້ແກ່ລູກໆຂອງພຣະເຈົ້າແນວໃດ.

ປະທານຣະໂຊ ເອັມ ແນວສັນ ໄດ້ແນະນຳດັ່ງນີ້: “ຄຳສອນທີ່ບໍລິສຸດຂອງພຣະຄຣິດມີພະລັງຫລາຍ. ມັນປ່ຽນຊີວິດຂອງ ທຸກຄົນ ທີ່ເຂົ້າໃຈ ແລະ ສະແຫວງຫາທີ່ຈະນຳໃຊ້ມັນໃນຊີວິດຂອງຕົນ.”²¹

ແອວເດີ ດີເດີ ແອັຟ ອຸກດອບ ໄດ້ສິດສອນວ່າ, “[ສຳລັບ] ຄວາມເຂັ້ມແຂງຂອງຊາວໜຸ່ມ [ຄູ່ມື] ເນັ້ນໜັກການປະກາດຄຳສອນຂອງ … ພຣະຄຣິດ [ແລະ] ເຊື້ອເຊີນທ່ານ [ຊາວໜຸ່ມ] ໃຫ້ເລືອກຕາມການແນະນຳ [ນັ້ນ].”²²

ແອວເດີ ແດວ ຈີ ເຣັນລັນ ໄດ້ສິດສອນວ່າ, “ພວກເຮົາເຊື້ອເຊີນໃຫ້ ຜູ້ສອນສາດສະໜາ ປະຕິບັດເໝືອນດັ່ງທີ່ເຂົາເຈົ້າໄດ້ຂໍໃຫ້ຄົນທີ່ເຂົາເຈົ້າສິດສອນນັ້ນກະທຳຄື: … ນຳໃຊ້ຄຳສອນຂອງພຣະຄຣິດໃນຊີວິດຂອງເຂົາເຈົ້າ [ແລະ] ເຂົ້າມາ ແລະ ຢູ່ໃນເສັ້ນທາງແຫ່ງພັນທະສັນຍາ.”²³

ຄຳສອນຂອງພຣະຄຣິດໃຫ້ພະລັງແກ່ຜູ້ທີ່ ກຳລັງດີ້ນລົນ ຫລື ຮູ້ສຶກວ່າເຂົາເຈົ້າບໍ່ໄດ້ເປັນພາກສ່ວນຂອງສາດສະໜາຈັກ ຍ້ອນວ່າມັນຊ່ວຍເຂົາເຈົ້າ, ດັ່ງທີ່ ແອວເດີ ດີ ທອດ ຄຣິສໂຕເຟີສັນ ໄດ້ກ່າວວ່າ, “ແນ່ນອນ: ພຣະເຢຊູຄຣິດໄດ້ສິ້ນພຣະຊົນເພື່ອຂ້າພະເຈົ້າ … [ແລະ] ຮັກຂ້າພະເຈົ້າ.”²⁴

ພໍ່ແມ່ທັງຫລາຍ, ຖ້າວ່າລູກຂອງທ່ານມີບັນຫາກັບຫລັກທຳພຣະກິດຕິຄຸນ ຫລື ຄຳສອນຂອງສາດສະດາ, ກະລຸນາ ຕໍ່ຕ້ານການເວົ້າຈາທີ່ຊົ່ວຮ້າຍ²⁵ ຫລື ການເຄື່ອນໄຫວຕໍ່ຕ້ານສາດສະໜາຈັກ ຫລື ຜູ້ນຳ. ການປະພຶດທີ່ເລັກນ້ອຍເຫລົ່ານີ້, ທີ່ຢູ່ພາຍໃນຈິດໃຈຂອງທ່ານສາມາດທຳລາຍຄວາມຊື່ສັດຂອງລູກທ່ານໃນໄລຍະຍາວໄດ້.²⁶ ເປັນການບົ່ງບອກເຖິງຕົວທ່ານວ່າ ທ່ານຈະປົກປ້ອງ ຫລື ສະໜັບສະໜູນລູກທີ່ມີຄ່າຂອງທ່ານ ຫລື ສະແດງຄວາມເປັນອັນດຽວກັນກັບເຂົາ. ແຕ່ພັນລະຍາຂອງຂ້າພະເຈົ້າ, ເຈນ, ແລະ ຂ້າພະເຈົ້າຮູ້ຈັກຈາກປະສົບການສ່ວນຕົວວ່າ ເປັນຫຍັງເຮົາທຸກຄົນຈຶ່ງຕ້ອງການພຣະເຢຊູເປັນຢ່າງຍິ່ງໃນການສິດສອນລູກທີ່ຮັກຂອງເຮົາ ແລະ ວິທີນຳໃຊ້ຫລັກທຳແຫ່ງຄວາມສຸກຂອງພຣະອົງທີ່ຈະຊ່ວຍ ເພີ່ມຄວາມເຂັ້ມແຂງ ແລະ ປິ່ນປົວເຂົາ. ຂໍໃຫ້ເຮົາຫັນພວກເຂົາມາຫາພຣະເຢຊູ, ຜູ້ຊົງເປັນຜູ້ວິງວອນທີ່ແທ້ຈິງ ຕໍ່ພຣະບິດາ. ອັກຄະສາວົກໂຢຮັນໄດ້ສິດສອນວ່າ, “ຜູ້ໃດທີ່ … ດຳລົງຢູ່ໃນຄຳສອນຂອງພຣະຄຣິດ … ກໍມີທັງພຣະບິດາ ແລະ ພຣະບຸດ.” ແລ້ວເພິ່ນໄດ້ເຕືອນເຮົາໃຫ້ລະວັງ “ຜູ້ໃດມາຫາເຈົ້າ, ແລະ ບໍ່ເອົາຄຳສອນນີ້ມານຳ.”²⁷

ບໍ່ດົນມານີ້ຂ້າພະເຈົ້າ ແລະ ເຈນໄດ້ໄປຢ້ຽມຢາມຖິ່ນແຫ້ງແລ້ງກັນດານ ບ່ອນທີ່ໂມເຊໄດ້ຖືງູທອງສຳຣິດຕອກໄວ້ກັບເສົາ ຕໍ່ໜ້າລູກຫລານຂອງອິດສະຣາເອນຜູ້ພະເນຈອນ. ພຣະຜູ້ເປັນເຈົ້າໄດ້ສັນຍາວ່າຈະປິ່ນປົວທຸກຄົນທີ່ຖືກງູພິດກັດ ຖ້າວ່າເຂົາພຽງແຕ່ແນມເບິ່ງມັນ.²⁸ ໃນການຖືເອົາຄຳສອນຂອງພຣະຄຣິດໄວ້ຕໍ່ໜ້າເຮົາ, ສາດສະດາຂອງພຣະຜູ້ເປັນເຈົ້າກໍປະຕິບັດເຊັ່ນດຽວກັນ, “ເພື່ອເພິ່ນຈະປິ່ນປົວຜູ້ຄົນ.”²⁹ ບໍ່ວ່າເຮົາຈະຖືກກັດ ຫລື ຖືກພິດ ຫລື ດີ້ນລົນກັບບັນຫາທີ່ເຮົາປະສົບໃນຖິ່ນແຫ້ງແລ້ງກັນດານມະຕະແຫ່ງນີ້, ຂໍໃຫ້ເຮົາຈົ່ງຢ່າເປັນເໝືອນກັບຄົນເຫລົ່ານັ້ນ, ໃນສະໄໝບູຮານ ແລະ ປະຈຸບັນ, ສາມາດໄດ້ຮັບການປິ່ນປົວແຕ່, ໜ້າເສຍດາຍ, “ບໍ່ແນມເບິ່ງ … ຍ້ອນເຂົາບໍ່ເຊື່ອວ່ານັ້ນຈະປິ່ນປົວເຂົາໄດ້.”³⁰ ພຣະຄຳພີມໍມອນຢືນຢັນ: “ດັ່ງນັ້ນ, … ນີ້ຄືທາງນັ້ນ, ແລະ ບໍ່ມີທາງ ຫລື ພຣະນາມອື່ນໃດຈະປະທານໃຫ້ພາຍໃຕ້ສະຫວັນອີກເລີຍຊຶ່ງໂດຍທາງນັ້ນມະນຸດຈະລອດໄດ້ໃນອານາຈັກຂອງພຣະເຈົ້າ. “ແລະ ບັດນີ້, ຈົ່ງເບິ່ງ, ນີ້ຄືຄຳສອນຂອງພຣະຄຣິດ.”³¹

ຕອນແລງຂອງວັນນັ້ນທີ່ລັດນິວເຈີຊີ, ການແບ່ງປັນວ່າເປັນຫຍັງເຮົາຈຶ່ງຕ້ອງການພຣະເຢຊູຄຣິດ ແລະ ຄຳສອນຂອງພຣະອົງ ໄດ້ມອບເອື້ອຍນ້ອງໃຫ້ກັບຂ້າພະເຈົ້າ ແລະ ມອບອ້າຍນ້ອງຄົນໃໝ່ໃຫ້ກັບລາວ. ພວກເຮົາຮູ້ສຶກເຖິງພະຍານທີ່ສະຫງົບ ແລະ ປອບໂຍນຂອງພຣະວິນຍານບໍລິສຸດ. ຂ້າພະເຈົ້າໄດ້ຂໍຂໍ້ມູນຕິດຕໍ່ກັບລາວ, ແບບທຳມະດາ ແລະ ສົ່ງຕໍ່ການສົນທະນາໃຫ້ກັບຜູ້ສອນສາດສະໜາຂອງພວກເຮົາ. ລາວກໍຍິນດີທີ່ຈະໃຫ້.

“ດັ່ງນັ້ນ, ມັນສຳຄັນພຽງໃດທີ່ຈະເຮັດໃຫ້ສິ່ງເຫລົ່ານີ້ເປັນທີ່ຮູ້ຈັກແກ່ຜູ້ອາໄສຂອງແຜ່ນດິນໂລກ,” ພຣະຄຳພີມໍມອນປະກາດວ່າ—ຈົ່ງຮັກ, ແບ່ງປັນ ແລະ ເຊື້ອເຊີນ³² ຂະນະທີ່ເຮົາເຕົ້າໂຮມອິດສະຣາເອນ ໃນທຸກຊຸມຊົນ ແລະ ຄອບຄົວ ຂອງເຮົາ—“ເພື່ອພວກເຂົາຈະໄດ້ຮູ້ວ່າ ບໍ່ມີເນື້ອໜັງໃດຈະຢູ່ໃນທີ່ປະທັບຂອງພຣະເຈົ້າໄດ້, ນອກຈາກເປັນຜ່ານທາງພຣະຄຸນຄວາມດີ, ແລະ ພຣະເມດຕາ, ແລະ ພຣະຄຸນ [ແລະ ຄຳສອນ] ຂອງພຣະເມຊີອາ.”³³ ໃນພຣະນາມຂອງພຣະເຢຊູຄຣິດ, ອາແມນ.