“ວັນທີ 28 ເດືອນເມສາ–ວັນທີ 4 ເດືອນພຶດສະພາ: ‘ກົດຂອງເຮົາໃນການປົກຄອງສາດສະໜາຈັກຂອງເຮົາ’: ຄຳສອນ ແລະ ພັນທະສັນຍາ 41–44,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 41–44,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 28 ເດືອນເມສາ–ວັນທີ 4 ເດືອນພຶດສະພາ: “ກົດຂອງເຮົາໃນການປົກຄອງສາດສະໜາຈັກຂອງເຮົາ”

ຄຳສອນ ແລະ ພັນທະສັນຍາ 41–44

ສາດສະໜາຈັກໄດ້ເຕີບໂຕຢ່າງໄວໃນປີ 1830 ແລະ 1831, ໂດຍສະເພາະເມື່ອມີສະມາຊິກໃໝ່ຈຳນວນຫລາຍໃນເມືອງເຄີດແລນ, ລັດໂອໄຮໂອ. ການເຕີບໂຕນີ້ເປັນໜ້າຕື່ນເຕັ້ນ ແລະ ໃຫ້ກຳລັງໃຈແກ່ໄພ່ພົນ, ແຕ່ມັນກໍນຳຄວາມທ້າທາຍຫລາຍຢ່າງມາໃຫ້ເຊັ່ນກັນ. ທ່ານຈະລວມກຸ່ມຜູ້ເຊື່ອທີ່ຂະຫຍາຍຢ່າງໄວໃຫ້ເປັນໜຶ່ງດຽວໄດ້ແນວໃດ? ໂດຍສະເພາະ, ທ່ານຈະເຮັດສິ່ງໃດເມື່ອພວກເຂົານຳຄຳສອນ ແລະ ການປະຕິບັດມາຈາກສາດສະໜາເດີມຂອງພວກເຂົາ? ຍົກຕົວຢ່າງ, ເມື່ອໂຈເຊັບ ສະມິດ ໄດ້ໄປເຖິງເມືອງເຄີດແລນ ໃນຕົ້ນເດືອນກຸມພາ ປີ 1831, ເພິ່ນໄດ້ພົບເຫັນສະມາຊິກໃໝ່ແບ່ງປັນສິ່ງຂອງທີ່ເປັນສ່ວນລວມໃຫ້ກັນ ດ້ວຍຄວາມພະຍາຍາມຢ່າງຈິງໃຈ ຕາມແບບຊາວຄຣິດໃນພຣະຄຳພີໃໝ່ (ເບິ່ງ ກິດຈະການ 4:32–37). ພຣະຜູ້ເປັນເຈົ້າໄດ້ແກ້ໄຂ ແລະ ຊີ້ແຈງທີ່ສຳຄັນບາງຢ່າງກ່ຽວກັບເລື່ອງນີ້ ແລະ ຫົວຂໍ້ອື່ນໆ. ພຣະອົງໄດ້ເຮັດເຊັ່ນນີ້ເປັນສ່ວນໃຫຍ່ ຜ່ານທາງການເປີດເຜີຍທີ່ບັນທຶກຢູ່ໃນ ຄຳສອນ ແລະ ພັນທະສັນຍາ 42 ທີ່ພຣະອົງເອີ້ນວ່າ “ກົດຂອງເຮົາໃນການປົກຄອງສາດສະໜາຈັກຂອງເຮົາ” (ຂໍ້ທີ 59). ໃນການເປີດເຜີຍນີ້, ເຮົາຮຽນຮູ້ຄວາມຈິງທີ່ເປັນພື້ນຖານໃນການສະຖາປະນາສາດສະໜາຈັກຂອງພຣະຜູ້ເປັນເຈົ້າໃນຍຸກສຸດທ້າຍ. ແລະ ເຮົາຮຽນຮູ້ວ່າ ເຮົາມີຫລາຍສິ່ງທີ່ຈະຮຽນຮູ້ຕື່ມອີກ: “ຖ້າພວກເຈົ້າຈະຖາມ,” ພຣະຜູ້ເປັນເຈົ້າໄດ້ສັນຍາ, “ພວກເຈົ້າຈະໄດ້ຮັບການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້” (ຄຳສອນ ແລະ ພັນທະສັນຍາ 42:61).

ເບິ່ງ Saints, 1:114–19 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 41

“ຄົນໃດທີ່ຍອມຮັບກົດຂອງເຮົາ ແລະ ປະຕິບັດຕາມ, ຄົນໆນັ້ນເປັນສານຸສິດຂອງເຮົາ.”

ໃນຕົ້ນປີ 1831, ໄພ່ພົນໄດ້ເລີ່ມເຕົ້າໂຮມໃນລັດໂອໄຮໂອ. ພວກເຂົາກະຕືລືລົ້ນທີ່ຈະໄດ້ຮັບກົດທີ່ພຣະເຈົ້າໄດ້ສັນຍາວ່າຈະເປີດເຜີຍຢູ່ທີ່ນັ້ນ (ເບິ່ງ ຄຳສອນ ແລະ ພັນທະສັນຍາ 38:32). ແຕ່ກ່ອນອື່ນໝົດ, ພຣະອົງໄດ້ສິດສອນວິທີທີ່ສານຸສິດຂອງພຣະອົງຄວນກະກຽມທີ່ຈະຮັບເອົາກົດຂອງພຣະອົງ. ຫລັກທຳໃດແດ່ທີ່ທ່ານພົບເຫັນຢູ່ໃນ ຄຳສອນ ແລະ ພັນທະສັນຍາ 41:1–6 ທີ່ຈະໄດ້ຊ່ວຍໄພ່ພົນໃຫ້ໄດ້ຮັບກົດຂອງພຣະເຈົ້າ? ຫລັກທຳເຫລົ່ານີ້ຊ່ວຍທ່ານໃຫ້ໄດ້ຮັບຄຳແນະນຳຈາກພຣະອົງແນວໃດ?

ເບິ່ງ “A Bishop unto the Church,” ໃນ Revelations in Context, 77–83 ນຳອີກ.

ຄຳສອນ ແລະ ພັນທະສັນຍາ 42

ພຣະຜູ້ເປັນເຈົ້າປະທານພຣະບັນຍັດໃຫ້ເຮົາເພາະພຣະອົງຮັກເຮົາ.

ໄພ່ພົນໄດ້ນັບຖືວ່າ ການເປີດເຜີຍທີ່ມີຢູ່ໃນ ຄຳສອນ ແລະ ພັນທະສັນຍາ 42:1–72 ເປັນການເປີດເຜີຍຢ່າງໜຶ່ງທີ່ສຳຄັນທີ່ສຸດ ທີ່ສາດສະດາໄດ້ຮັບ. ມັນແມ່ນການເປີດເຜີຍທຳອິດທີ່ຖືກຈັດພິມ. ເປັນເວລາຫລາຍປີ, ໄພ່ພົນໄດ້ເອີ້ນມັນວ່າ “ກົດ.” ເຖິງແມ່ນພາກນີ້ບໍ່ໄດ້ລວມພຣະບັນຍັດ ຫລື ກົດຂອງພຣະຜູ້ເປັນເຈົ້າທຸກຂໍ້, ແຕ່ມັນມີຄຸນຄ່າພໍທີ່ຈະເອົາໄປໄຕ່ຕອງວ່າເປັນຫຍັງຫລັກທຳເຫລົ່ານີ້ ຈຶ່ງສຳຄັນສຳລັບສາດສະໜາຈັກທີ່ຫາກໍຖືກຟື້ນຟູ. ເປັນຫຍັງມັນຈຶ່ງສຳຄັນສຳລັບເຮົາໃນທຸກວັນນີ້?

ເນື່ອງຈາກ ພາກທີ 42 ຂ້ອນຂ້າງຍາວ, ທ່ານຈຶ່ງອາດພິຈາລະນາສຶກສາເປັນສ່ວນນ້ອຍໆ, ດັ່ງຕໍ່ໄປນີ້. ລະບຸຫລັກທຳທີ່ສິດສອນໃນແຕ່ລະຂໍ້, ແລະ ພິຈາລະນາວ່າ ກົດເຫລົ່ານີ້ເປັນເຄື່ອງໝາຍເຖິງຄວາມຮັກຂອງພຣະຜູ້ເປັນເຈົ້າທີ່ມີຕໍ່ຜູ້ຄົນຂອງພຣະອົງແນວໃດ.

ເປັນຫຍັງພຣະເຈົ້າຈຶ່ງປະທານກົດ ແລະ ພຣະບັນຍັດໃຫ້ເຮົາ? ໃນທາງໃດແດ່ທີ່ທ່ານໄດ້ຮັບພອນໂດຍການຮູ້ ແລະ ການເຮັດຕາມພຣະບັນຍັດ?

ຄຳສອນ ແລະ ພັນທະສັນຍາ 42:30–42

“ນຶກເຖິງຄົນຍາກຈົນ.”

ພາກສ່ວນໜຶ່ງຂອງກົດທີ່ເປີດເຜີຍໄວ້ໃນ ພາກທີ 42, ພຣະຜູ້ເປັນເຈົ້າໄດ້ສິດສອນໄພ່ພົນຂອງພຣະອົງວິທີທີ່ພວກເຂົາສາມາດ, ເໝືອນດັ່ງຜູ້ຕິດຕາມຂອງພຣະຄຣິດໃນສະໄໝບູຮານ, ມີ “ສິ່ງຂອງທັງໝົດເປັນຂອງສ່ວນລວມ” (ກິດຈະການ 2:44; 4 ນີໄຟ 1:3), ໂດຍທີ່ “ບໍ່ມີຄົນຍາກຈົນໃນບັນດາພວກເຂົາ” (ໂມເຊ 7:18). ທ່ານຮຽນຮູ້ຫຍັງແດ່ຈາກ ຄຳສອນ ແລະ ພັນທະສັນຍາ 42:30–42 ກ່ຽວກັບວິທີທີ່ໄພ່ພົນໄດ້ດຳລົງຊີວິດຕາມກົດແຫ່ງການອຸທິດຖວາຍ? (ອຸທິດຖວາຍໝາຍເຖິງການປ່ອຍວາງບາງສິ່ງເພື່ອຈຸດປະສົງອັນສັກສິດ.)

ເຖິງແມ່ນວ່າເຮົາຈະບໍ່ມີ “ສິ່ງຂອງທັງໝົດເປັນຂອງສ່ວນລວມ” ໃນທຸກວັນນີ້, ໄພ່ພົນຍຸກສຸດທ້າຍໄດ້ເຮັດພັນທະສັນຍາທີ່ຈະດຳລົງຊີວິດຕາມກົດແຫ່ງການອຸທິດຖວາຍ. ທ່ານຈະສາມາດອຸທິດຖວາຍສິ່ງທີ່ພຣະເຈົ້າໄດ້ປະທານໃຫ້ແກ່ທ່ານ ເພື່ອເປັນພອນໃຫ້ແກ່ຄົນຂັດສົນໄດ້ແນວໃດ? ບາງທີການຮ້ອງເພງເຊັ່ນ “ນັບພຣະພອນຂອງທ່ານ” (ເພງສວດ ແລະ ເພງຂອງເດັກນ້ອຍ, 8) ສາມາດໃຫ້ແນວຄິດແກ່ທ່ານໄດ້.

ເບິ່ງ Sharon Eubank, “I Pray He’ll Use Us,” Liahona, Nov. 2021, 53–56; “The Law,” ໃນ Revelations in Context, 93–95 ນຳອີກ.

Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ

ຄຳສອນ ແລະ ພັນທະສັນຍາ 42:61, 65–68; 43:1–16

ພຣະເຈົ້າປະທານການເປີດເຜີຍ ເພື່ອນຳພາສາດສະໜາຈັກຂອງພຣະອົງ—ແລະ ເພື່ອນຳພາເຮົາ.

ໃຫ້ວາດພາບວ່າ ທ່ານກຳລັງສົນທະນາກັບສະມາຊິກໃໝ່ຄົນໜຶ່ງຂອງສາດສະໜາຈັກ ຜູ້ຕື່ນເຕັ້ນຫລາຍທີ່ຮູ້ວ່າ ສາດສະໜາຈັກຖືກນຳພາໂດຍການເປີດເຜີຍ. ທ່ານຈະສາມາດໃຊ້ ຄຳສອນ ແລະ ພັນທະສັນຍາ 43:1–16 ເພື່ອຊ່ວຍໃຫ້ລາວຮຽນຮູ້ກ່ຽວກັບແບບແຜນຂອງພຣະຜູ້ເປັນເຈົ້າສຳລັບການນຳພາສາດສະໜາຈັກຂອງພຣະອົງ ຜ່ານທາງສາດສະດາຂອງພຣະອົງໄດ້ແນວໃດ? ທ່ານຈະສາມາດໃຊ້ ຄຳສອນ ແລະ ພັນທະສັນຍາ 42:61, 65–68 ເພື່ອສິດສອນກ່ຽວກັບການໄດ້ຮັບການເປີດເຜີຍສ່ວນຕົວໄດ້ແນວໃດ?

“ສິ່ງທີ່ເປັນສັນຕິສຸກ” ແລະ ສິ່ງທີ່ໜ້າຊື່ນຊົມບາງຢ່າງໃດແດ່ທີ່ທ່ານເຄີຍໄດ້ຮັບຈາກພຣະຜູ້ເປັນເຈົ້າ ຜ່ານທາງພຣະວິນຍານຂອງພຣະອົງ?

ເພື່ອຮຽນຮູ້ກ່ຽວກັບວ່າຜູ້ນຳຂອງສາດສະໜາຈັກໄດ້ຍິນສຸລະສຽງຂອງພຣະຜູ້ເປັນເຈົ້າແນວໃດ, ທ່ານສາມາດເບິ່ງວິດີໂອໜຶ່ງໃນບ່ອນເກັບກຳ “Hear Him” ໃນຫ້ອງສະໝຸດພຣະກິດຕິຄຸນ. ໃຫ້ພິຈາລະນາສ້າງວິດີໂອຂອງທ່ານເອງ, ໂດຍອະທິບາຍວ່າພຣະຜູ້ເປັນເຈົ້າສື່ສານກັບທ່ານແນວໃດ.

ເບິ່ງ Russell M. Nelson, “Revelation for the Church, Revelation for Our Lives,” Liahona, May 2018, 93–96; “All Things Must Be Done in Order,” ໃນ Revelations in Context, 50–53 ນຳອີກ.

ໃຊ້ບົດຮຽນທີ່ໃຊ້ສິ່ງຂອງ. ບົດຮຽນທີ່ໃຊ້ສິ່ງຂອງ ຫລື ພາບຕ່າງໆສາມາດຊ່ວຍໃຫ້ຜູ້ຄົນທີ່ທ່ານສິດສອນເຂົ້າໃຈຄວາມຈິງຂອງພຣະກິດຕິຄຸນໄດ້ດີກວ່າເກົ່າ ແລະ ຈື່ຈຳມັນໄດ້ດົນນານກວ່າເກົ່າ. ຍົກຕົວຢ່າງ, ທ່ານອາດຈະໃຊ້ຈິກຊໍ, ຕໍ່ໃສ່ກັນເທື່ອລະຕ່ອນ, ເພື່ອສິດສອນກ່ຽວກັບການໄດ້ຮັບ “ການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້” (ຄຳສອນ ແລະ ພັນທະສັນຍາ 42:61).

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 41:5

ສານຸສິດແມ່ນຄົນໃດຄົນໜຶ່ງທີ່ຮັບເອົາກົດຂອງພຣະເຈົ້າ ແລະ ເຊື່ອຟັງຕາມ.

ເພື່ອຊ່ວຍໃຫ້ລູກໆຂອງທ່ານຮູ້ວ່າ ການເປັນສານຸສິດຂອງພຣະເຢຊູຄຣິດໝາຍຄວາມວ່າແນວໃດ, ທ່ານສາມາດຂຽນ ຄຳສອນ ແລະ ພັນທະສັນຍາ 41:5 ໃສ່ເຈ້ຍແຜ່ນໜຶ່ງ, ໂດຍປະຊ່ອງວ່າງບ່ອນທີ່ຄຳວ່າ ສານຸສິດ ຄວນຢູ່. ແລ້ວພວກເຂົາສາມາດເບິ່ງໃນ ຂໍ້ທີ 5 ເພື່ອຊອກຫາຄຳທີ່ຫາຍໄປ. ອີງຕາມຂໍ້ນີ້, ການເປັນສານຸສິດຂອງພຣະເຢຊູຄຣິດ ໝາຍຄວາມວ່າແນວໃດ? ເຮົາກຳລັງພະຍາຍາມເປັນສານຸສິດທີ່ດີກວ່າເກົ່າຂອງພຣະຄຣິດແນວໃດ?

ຄຳສອນ ແລະ ພັນທະສັນຍາ 42:2

ເຮົາມີຄວາມສຸກເມື່ອເຮົາເຊື່ອຟັງພຣະບັນຍັດຂອງພຣະຜູ້ເປັນເຈົ້າ.

ລູກໆຂອງທ່ານອາດສະໜຸກສະໜານກັບການຫລິ້ນເກມທີ່ຕ້ອງຟັງຢ່າງຕັ້ງໃຈ ແລະ ປະຕິບັດຕາມຄຳແນະນຳ. ທ່ານສາມາດໃຊ້ເກມນີ້ເພື່ອເວົ້າລົມກ່ຽວກັບຄວາມໝາຍຂອງຄຳວ່າ “ຈົ່ງເຊື່ອຟັງ ແລະ ຟັງ ແລະ ເຊື່ອຟັງ” ພຣະຜູ້ເປັນເຈົ້າ (ຄຳສອນ ແລະ ພັນທະສັນຍາ 42:2). ພຣະອົງໄດ້ໃຫ້ຄຳແນະນຳຢ່າງໃດແດ່ແກ່ເຮົາ? ເຮົາໄດ້ຮັບພອນຢ່າງໃດແດ່ໂດຍການເຊື່ອຟັງກົດ ແລະ ພຣະບັນຍັດຂອງພຣະອົງ?
ທ່ານອາດຈະເຮັດ ໜ້າກິດຈະກຳ ຂອງອາທິດນີ້ກັບລູກໆຂອງທ່ານໃຫ້ສຳເລັດ. ພວກທ່ານອາດຈະຮ້ອງເພງກ່ຽວກັບການເຊື່ອຟັງກົດຂອງພຣະເຈົ້າ, ເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72). ໃຫ້ພິຈາລະນາແບ່ງປັນໃຫ້ກັນແລະກັນວ່າ ການເຊື່ອຟັງກົດຂອງພຣະເຈົ້າໄດ້ນຳຄວາມສຸກມາໃຫ້ພວກທ່ານແນວໃດ.

ຄຳສອນ ແລະ ພັນທະສັນຍາ 42:38

ເຮົາກຳລັງຮັບໃຊ້ພຣະເຢຊູຄຣິດເມື່ອເຮົາຮັບໃຊ້ຄົນອື່ນ.

ຫລັງຈາກທີ່ອ່ານ ຄຳສອນ ແລະ ພັນທະສັນຍາ 42:38 ນຳກັນ, ໃຫ້ຊ່ວຍລູກໆຂອງທ່ານຄິດຫາວິທີທີ່ພວກເຂົາສາມາດຮັບໃຊ້ພຣະເຢຊູ ໂດຍການຮັບໃຊ້ຄົນອື່ນ. ພວກເຂົາສາມາດພົນເຫັນແນວຄິດບາງຢ່າງຈາກວິດີໂອ “Pass It On” (ChurchofJesusChrist.org). ພວກເຂົາກໍສາມາດເບິ່ງຮູບຂອງພຣະຜູ້ຊ່ວຍໃຫ້ລອດກຳລັງຊ່ວຍຄົນອື່ນ, ປິ່ນປົວຄົນເຈັບປ່ວຍ, ຫລື ການເຮັດດີຕໍ່ເດັກນ້ອຍນຳອີກ (ເບິ່ງ ປຶ້ມຮູບພຣະກິດຕິຄຸນ, ເລກທີ 42, 47).

2:3
Pass It On
Children around the world have taken President Thomas S. Monson's counsel to find a way to serve others.
ທ່ານອາດຈະສະແດງໃບບໍລິຈາກສ່ວນສິບ ແລະ ເງິນບໍລິຈາກອື່ນໆ ແລະ ເວົ້າລົມກ່ຽວກັບວິທີໃຊ້ໃບດັ່ງກ່າວເພື່ອມອບສິ່ງທີ່ເຮົາມີ ເພື່ອເປັນພອນໃຫ້ແກ່ຄົນອື່ນ (ເບິ່ງ “Tithing and Donations Online” ນຳອີກ).

ຄຳສອນ ແລະ ພັນທະສັນຍາ 43:1–7

ພຽງແຕ່ສາດສະດາເທົ່ານັ້ນທີ່ສາມາດໄດ້ຮັບການເປີດເຜີຍສຳລັບທັງສາດສະໜາຈັກ.

ເຊື້ອເຊີນລູກໆຂອງທ່ານໃຫ້ຈິນຕະນາການວ່າ ມີບາງຄົນຢືນຂຶ້ນໃນກອງປະຊຸມສະແດງປະຈັກພະຍານ ແລະ ບອກຫວອດວ່າ ເຂົາໄດ້ຮັບການເປີດເຜີຍສຳລັບທັງສາດສະໜາຈັກ (ຍົກຕົວຢ່າງ, ການເປີດເຜີຍທີ່ບອກວ່າ ບໍ່ຄວນກິນຫົວກາຣົດ ຫລື ວ່າເຮົາຄວນລ້າງມືດ້ວຍນົມແທນນ້ຳ.) ເຂົາເວົ້າວ່າເຮົາຄວນຟັງສິ່ງທີ່ເຂົາເວົ້າ ແທນທີ່ຈະຟັງສາດສະດາ. ການເວົ້າເຊັ່ນນັ້ນມີຄວາມຜິດແນວໃດ? ແລ້ວພວກທ່ານສາມາດສຶກສາ ຄຳສອນ ແລະ ພັນທະສັນຍາ 43:1–7 ນຳກັນ ເພື່ອຈະໄດ້ຮູ້ວ່າ ພຣະຜູ້ເປັນເຈົ້າປະທານພຣະບັນຍັດໃຫ້ສາດສະໜາຈັກຂອງພຣະອົງແນວໃດ.
ທ່ານກໍສາມາດສະແດງຮູບຂອງສາດສະດາທີ່ມີຊີວິດຢູ່ ແລະ ເຊື້ອເຊີນລູກໆຂອງທ່ານໃຫ້ແບ່ງປັນບາງຢ່າງທີ່ເພິ່ນໄດ້ສິດສອນເມື່ອບໍ່ດົນມານີ້ນຳອີກ. ຖ້າຫາກພວກເຂົາຕ້ອງການຄວາມຊ່ວຍເຫລືອ, ໃຫ້ສາຍຄລິບວິດີໂອ ຫລື ຂ່າວສານຈາກກອງປະຊຸມໃຫຍ່ສາມັນເມື່ອບໍ່ດົນມານີ້. ການມີສາດສະດາທີ່ມີຊີວິດຢູ່ໃນທຸກວັນນີ້ເປັນພອນແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໂຈເຊັບ ສະມິດ ກຳລັງສິດສອນ — Joseph Smith Preaching [ໂຈເຊັບ ສະມິດ ກຳລັງສັ່ງສອນ], ໂດຍ ແຊມ ລໍເລີ