19–25 ni Me: “Na Veika sa Vu mai Vua na Kalou e Veivakararamataki”

Vunau kei na Veiyalayalati 49–50

Na iVakabula sa noda “ivakatawa vinaka” (Vunau kei na veiyalayalati 50:44). E kila tu o Koya ni so na gauna era dau lakosese na sipi ka sa levu tu ena lekutu na veivakaleqai. Sa qai muataki keda kina o Koya ki na veitaqomaki ni Nona ivunau. Sa dau muataki keda tani o Koya mai na veika rerevaki me vaka na “yalo e dauveivakacalai, era sa veilakoyaki voli e vuravura me ra vakacalai ira na kai vuravura” (Vunau kei na Veiyalayalati 50:2). Na noda muri Koya sa dau kena ibalebale meda biuta vakadua na veivakasama se itovo cala. Oqo e a ka dina vei Leman Copley kei na so tale mai Ohio. Era a ciqoma na kosipeli vakalesuimai ia era se vakabauta tikoga eso na ka e sega ni dodonu. Ena Vunau kei na Veiyalayalati 49, a vakaraitaka kina na Turaga na dina ka vakadodonutaka na vakabauta e liu nei Leman me vakataka na ulutaga ni vakamau kei na iKarua ni Lako Mai ni iVakabula. a ena gauna era sa ciqoma kina na saumaki vou mai Ohio “na yalo [era] sa sega ni kila,” sa vakavulica vei ira na Turaga na sala me ra kila kina na ivakaraitaki dina ni Yalo (Vunau kei na Veiyalayalati 50:15). Na iVakatawa Vinaka e dauvosoti keda, na Luvena “gonelalai,” me da “tubu cake ena loloma soli wale ka kila na ka dina” (Vunau kei na Veiyalayalati 50:40).

Vakasama eso ni Vuli ena iTikotiko vakakina ena Lotu

Vunau kei na Veiyalayalati 49; 50:24

E vinakata o Jisu Karisito meu ciqoma na dina ni Nona kosipeli.

Ni bera nona mai lewena na Lotu, a lewena tu o Leman Copley e dua na ilawalawa vakalotu na yacana na iSoqosoqo Cokovata ni Vakabauti ni iKarua ni Lesu Mai i Karisito, a vakatokai talega me Shaker. Ni oti e dua na veivosaki kei Leman, a vakasaqara o Josefa Simici na veivakamatatataki mai vua na Turaga me baleta eso na ivakavuvuli ni Shaker. A sauma mai na Turaga ena ivakatakila ena wase 49. Eso na nodra vakabauta na Shaker era cavuti koto ena ulutaga ni iwase.

Na cava a vakavulica na Turaga ena wase 49 me vakadodonutaka kina na nodra vakabauta na Lotu Shaker? Na ivakadinadina cava o raica ena ivakatakila oqo ni Nona loloma kei na kauwai vei ira na tamata ka sega ni tu vei ira na taucoko ni Nona dina? O na dolele yani vakacava vei ira ena loloma kei na kauwai?

Na cava e tarai iko me baleta na nona vosa na Turaga ena tikina e 2? Sa rawa mo vakatauvatana oqo ki na ka ena yaco kevaka o sarava ga e dua na tiki ni iyaloyalo yavala, raica e dua ga na tiki ni iba, se rogoca e dua ga na yasa ni dua na veiba. E veisemati vakacava na ivakaro ni Turaga ki na Vunau kei na Veiyalayalati 50:24? Vakasamataka na ka o sa cakava tiko mo ciqoma kina e levu cake na rarama mai vua na Turaga.

Raica talega na “Leman Copley and the Shakers,” ena Revelations in Context, 117–21.

Vunau kei na Veiyalayalati 49:15–17

Na vakamau ni tagane kei na yalewa e sa ka bibi ki na ituvatuva ni Kalou.

Ena nona sasaga me vakamalumalumutaka na ituvatuva nei Tamada Vakalomalagi, e segata o Setani me vakavuna na veilecayaki me baleta na vakamau. Na Turaga, ena yasana kadua, sa dau vakatakila tikoga na dina me baleta na vakamau mai vei ira na Nona parofita. Sa rawa mo raica eso na dina oqo ena Vunau kei na Veiyalayalati 49:15–17; Nai Vakatekivu 2:20–24; 1 Korinica 11:11; kei “Na Matavuvale: Ai Vakaro ki Vuravura Raraba.” Cakava e dua na lisi ni dina eso o kunea. Na cava e sa rui bibi kina na vakamau ki na ituvatuva ni Kalou?

A vakatavulica o Elder Ulisses Soares ni “kosipeli vakalesuimai i Jisu Karisito e kacivaka na ivakavuvuli ni cakacaka vata vakataucoko ena kedrau maliwa na yalewa kei na tagane, ruarua ena bula vakayago kei na tawamudu.” (“Cakacaka Vata kei na Turaga,” Liaona, Nove. 2022, 42). Sa rawa mo vulica na nona itukutuku, ka vakasaqara na ivakavuvuli “ka na vaqaqacotaka na cakacaka vata ena kedrau maliwa na tagane kei na yalewa.” O na rawa vakacava ni vakayagataka na veivakavuvuli oqo ena nomu bula? Kevaka e tarogi iko e dua mai na dua tale na matalotu na vuna e bibi kina na vakamau, o na sauma beka vakacava? Na cava o vakavinavinakataka kina na kila oqo?

Raica talega na Topics and Questions, “Marriage,” “Family,” Gospel Library; David A. Bednar, “Marriage Is Essential to His Eternal Plan,” Ensign, Jiune 2006, 83–84; “Renaissance of Marriage” (vidio), Gospel Library.

Renaissance of Marriage

Hear what President Eyring says we all must do to have a renaissance of happy marriages and productive families.

Dau kauwaitaka na ituvaki ni tamata yadua. E dina ni kena marautaki na vakamau kei na bula vakamatavuvale sa ka vinaka duadua ena kosipeli i Jisu Karisito, eda na sega ni marautaka kece na veivakalougatataki oqo ni da se tiko ena bula vakayago eke. Ena kena veivosakitaki na ulutaga oqo, qarauna vinaka na ituvaki ni tamata yadua kei na matavuvale, vakabibi vei ira na tamata era sa “waraka na Turaga ena yalovosota” me vakayacori kina na yalayala tawamudu (raica na Vunau kei na Veiyalayalati 98:1–3).

Vunau kei na Veiyalayalati 50

Na ivakavuvuli ni Turaga e rawa ni taqomaki au mai na veivakaisini nei Setani.

Era a maqusa na lewe ni Lotu vou mai Ohio me ra ciqoma na ivakaraitaki vakayalo sa yalataki tu ena ivolanikalou. Ia, o Setani, a gadreva sara me vakacalai ira. Kevaka o a kerei mo vukei ira na lewenilotu oqo me ra kila vakavinaka na sala me kilai kina na ivakaraitaki dina ni Yalo Tabu, na ivakavuvuli cava ena Vunau kei na Veiyalayalati 50 o na wasea? (raica vakabibi na tikina e 22–25, 29–34, 40–46). E sa vukei iko vakacava na iVakabula mo kila na kedrau duidui na dina kei na cala?

Raica talega na 1 Korinica 14:1–28; 2 Timoci 3:13–17.

Vunau kei na Veiyalayalati 50:13–24

O ira na qasenivuli kei na gonevuli era sa vakatataki vata mai vua na Yalotabu.

Na bulataki ni kosipeli i Jisu Karisito e vakarautaka e vuqa na madigi me da qasenivuli ka dauvuli talega, ruarua e vale vakakina ena Lotu. E dua na sala o rawa ni vulica kina na Vunau kei na Veiyalayalati 50:13–24 o ya mo droinitaka e dua na iyaloyalo ni qasenivuli kei na dua na gonevuli. E tikiva yadua, cakava e dua na lisi ni vosa kei na malanivosa mai na veitikina oqo e vakavulica vei iko e dua na ka me baleta na vulici kei na vakavulici ni kosipeli. Na gauna cava beka o sa sotava kina na veika ka vakavulica vei iko na bibi ni Yalotabu ena veivakavulici kei na vuli? Vakasamataka na veika e rawa ni o cakava mo vakatorocaketaka kina na nomu sasaga vaka gonevuli kei na qasenivuli.

Vunau kei na Veiyalayalati 50:23–25

“Na veika sa vu mai vua na Kalou e veivakararamataki.”

Ni o vakasamataka vakatitobu na vosa ni iVakabula ena Vunau kei na Veiyalayalati 50:23–25, vakananuma na sala o ciqoma kina na rarama ni Kalou ena nomu bula kei na sala o “vakasava tani kina na butobuto.” Me ivakaraitaki, e dusimaka vakacava na nomu digidigi na veitikina oqo me baleta na sala mo vakayagataka kina na nomu gauna? na veivakamarautaki se itukutuku raraba cava mo vakasaqara? na veivosaki cava mo vakaitavi kina? Na vakatulewa cava tale eso e rawa ni vukei iko kina na veitikina oqo? Na serenilotu me vaka na “Noqu Rarama na Turaga” (Serenilotu, naba 45) e rawa ni vakauqeta na ikuri ni vakasama eso.

Raica talega na “Lako ena rarama ni Kalou,” Me iSakisaki ni iTabagone: iDusidusi mo Cakava na Digidigi, 16–21.

Vakasama eso ni Nodra Vakatavulici na Gonelalai

Vunau kei na Veiyalayalati 49:12–14

Au rawa ni muri Jisu Karisito.

• Mo vakavulica kina vei ira na luvemu na ivakavuvuli ena veitikina oqo, sa rawa mo vakarautaka e va na mawe ni yava pepa kei na va na iyaloyalo e matataka na vakabauti Jisu Karisito, veivutuni, papitaiso, kei na ciqomi ni Yalo Tabu (raica na iyaloyalo ena macawa oqo ena tabana ni itaviqaravi). E rawa ni ra biuta na mawe ni yava ena fuloa na luvemu ka me toka tikivi ira na iyaloyalo. Me ra qai veivukevuke ena taubale ena mawe ni yava ni o wilika tiko na Vunau kei na Veiyalayalati 49:12–14. Vukei ira me ra kila ni da vakayacora na veika e tiko ena iyaloyalo oqo, eda sa muri Jisu Karisito tiko.

• E rawa talega ni o sureti ira na luvemu me ra vakatauvatana na Vunau kei na Veiyalayalati 49:12–14 kei na Cakacaka 2:38 kei vata kei na ikava ni yavu ni vakabauta. Na cava soti era raica ni tautauvata? Na cava sa rui bibi kina na veika dina oqo?

Vunau kei na Veiyalayalati 49:15–17

Na vakamau ni tagane kei na yalewa e sa ka bibi ki na ituvatuva ni Kalou.

• Me tukuni taumada kina na veitikina oqo, e rawa ni o vakamacalataka ni o ira na Shaker e dua na ilawalawa lotu era vakabauta ni sega ni dodonu me ra vakamau na tamata (raica na ulutaga ni wase ni Vunau kei na Veiyalayalati 49). Sureti ira na luvemu me ra raica na veika e vakavulica na Turaga me baleta na vakamau ena Vunau kei na Veiyalayalati 49:15–17. Na cava na kena ibalebale ni “sa qisia na Kalou na vakawati”? Sa rawa mo ni wilika vata na imatai ni tolu na parakaravu ni “Na Matavuvale: Ai Vakaro ki Vuravura Raraba.” Qai veivosakitaka na vuna e bibi kina vua na Tamada Vakalomalagi na vakamau kei na matavuvale.

Vunau kei na Veiyalayalati 50:23–25

“Na veika sa vu mai vua na Kalou e veivakararamataki.”

• Me vakatakilaitaki na Vunau kei na Veiyalayalati 50:23–25, veitalanoa kei ira na luvemu me baleta na duidui ni rarama kei na butobuto. Na cava eda gadreva kina na rarama? Sa rawa mo ni wilika vata na imatai ni parakaravu ni “Lako ena rarama ni Kalou” ena Me iSakisaki ni iTabagone: iDusidusi mo Cakava na Digidigi (tabana e 17) vakakina na Vunau kei na Veiyalayalati 50:23–25. Veivosakitaka na sala eso eda ciqoma kina na rarama ni Kalou kei na sala eso eda rawa ni vakasava tani kina na butobuto. Qai lagata kei ira na gone e dua na sere me baleta na nodra rarama vakayalo, me vaka na “Cila, Cila” (iVolanisere ni Gonelalai, 96).

Vunau kei na Veiyalayalati 50:40–46

Sa noqu iVakatawa Vinaka o Jisu Karisito.

• Ni wiliki vata oti na Vunau kei na Veiyalayalati 50:40–46, sa rawa mo vakaraitaka na iyaloyalo ni iVakabula e salavata kei na ituvatuva oqo ka taroga na taro vakaoqo: E vakacava beka na Nona lomani ira na sipi na ivakatawa? Na sala cava e vaka kina e dua na ivakatawa vei keda na iVakabula?

Me baleta na vakasama tale eso, raica na ilavelave ni mekasini na iTokani ni vula oqo.

iVakatawa Yalomalua, mai vei Yongsung Kim