iMatai ni Yatu, mai vei James Taylor Harwood

26 ni Me–1 ni Jiune: “Sa Yalodina, ka Dodonu, ka Dauveiqaravi Vakavuku”

Vunau kei na Veiyalayalati 51–57

Vei ira na lewe ni Lotu ena 1830 vakacaca, na nodra vakasoqoni vata na Yalododonu kei na kena tarai cake na korolevu o Saioni sa cakacaka vakayalo ka vakakina vakayago, kei na vuqa na veika me qaravi: A gadrevi e dua me volia na qele me ra na vakaitikotiko kina na Yalododonu. A gadrevi e dua me tabaka na ivola kei na veika tabaki tale eso. Ka gadrevi e dua me cicivaka e dua na sitoa me vakarautaka na iyaya vei ira e Saioni. Ena ivakatakila e volai tu ena Vunau kei na Veiyalayalati 51–57, a lesia ka dusimaki ira na tamata na Turaga me ra qarava na itavi oqo.

Ia, ni gadrevi na kila-ka ena veika vakaoqo e Saioni, era vakatavulica talega na ivakatakila oqo ni sa gadreva na Turaga me ra bula kilikili vakayalo na Nona Yalododonu me ra yaco me tamata ni Saioni—na Nona tamata. Sa kacivi keda yadua me da “sa yalodina, ka dodonu, ka dauveiqaravi vakavuku,” me da sa yalo malumalumu, ka “tudei[vaka] sara” na noda itavi sa lesi vei keda (raica na Vunau kei na Veiyalayalati 51:19; 52:15; 54:2). Kevaka eda rawa ni cakava oya—se cava ga noda kilamaqosa vakayago—e rawa ni vakayagataki keda na Turaga me tarai Saioni cake.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 51

E vinakata na Turaga me’u sa yalodina, ka dodonu, ka dauveiqaravi vakavuku.

Kevaka o a dua na lewe ni Lotu ena 1831, o na rairai rawa ni a sureti mo bulataka na lawa ni soli-ka ena nomu solia yani na veika o taukena ki na Lotu vei bisopi. Ena qai vakalesuya yani vei iko o koya, ena vuqa na gauna, na veika o a solia, ka so na gauna kei na kena ivovo. Ia a sega walega ni ka o taukena—a nomu veiqaravi sara mada ga.

Nikua e sa duidui na kena iwalewale, ia na ivakavuvuli era se ka bibi tikoga ki na cakacaka ni Turaga. Ni o wilika na wase 51, vakasamataka na veika sa nuitaki iko kina na Kalou. Na cava e vakaibalebaletaka na vosa “dauveiqaravi” (tikina e 19) kei na “vakatabuya” (tikina e 5) me baleta na veika e namaka vei iko na Kalou?

A vakamacalataka o Peresitedi Spencer W. Kimball: “Ena loma ni Lotu e dua na itavi ni veiqaravi sa ikoya e dua na veivakabauti tabu vakayalo se vakayago ka salavata na kena vakatulewataki. Baleta ni sa nona na Turaga na veika kecega, eda sa dauqarava kina na yagoda, vakasama, matavuvale, kei na iyau. (Raica na Vunau kei na Veiyalayalati 104:11–15.) Na dauveiqaravi yalodina sai koya e dua e vakayagataka na lewa ni ivalavala dodonu, dau kauwaitaki ira na nona, ka dau raici ira na dravudravua kei na vakaleqai” (“Welfare Services: The Gospel in Action,” Ensign,, Nove. 1977, 78).

Raica talega na “The Law of Consecration” (vidio), Gospel Library.

The Law of Consecration

Historians Kate Holbrook and Steven C. Harper discuss what the Law of Consecration is, the three core doctrines pertaining to it, and how we can live it today.

Vunau kei na Veiyalayalati 52:9–11, 22–27

Au rawa ni sureti ira na tani me ra lako mai vei Karisito ena vanua cava ga au lako kina.

Ni a tala na Turaga e vica na iliuliu ni Lotu ki Misuri, a tukuna vei ira me ra vakayagataka na gauna ena nodra ilakolako me ra “vunau voli” kina (tikina e 25–27). E rawa vakacava ni o wasea na kosipeli “ena [nomu] ilakolako,” se ena veigauna matau ni nomu bula?

Vunau kei na Veiyalayalati 52:14–19

E vukei au na Turaga meu levea na veivakacalai.

Ni vuqa na tamata era tukunikataka tiko na ivakaraitaki vakayalo eso, era a kauwaitaka na Yalododonu taumada ni ra na vakacalai. Na ivakaro cava a solia vei ira na Turaga ena Vunau kei na Veiyalayalati 52:14? Na cava a Nona iwali? (raica na tikina e 14–19).

E dua na ivakarau sai koya e dua na ka e dau tokaruataki wasoma, ka rawa ni kilai taumada. Na ivakaraitaki eso e oka kina na wiliwili vaka naba veiveisa se na cabe kei na dromu ni matanisiga ena veisiga yadua. Na ivakaraitaki cava tale eso o rawa ni vakasamataka? Ni o vakasaqaqara ena Vunau kei na Veiyalayalati 52:14–19, raica na ivakarau ni Turaga me levei kina na veivakacalai. Ena rawa ni veivuke me kilai ni “bibivoro” e tukuna tiko na yalomalumalumu kei na veivutuni; na “yalomalua” e vakatura na yalo lokumi kei na lewai koya ga; kei na “veivakatataki cake” e kena ibalebale me da veidusimaki, vakavinakataka cake, se tara cake. Na cava o vakila kina ni ivakarau ni Turaga e okati kina na itovo eso oqo, vakakina na talairawarawa? O na vakayagataka vakacava na iwalewale oqo mo levea kina na veivakacalai?

Vakamacalataka na vosa dredre eso. Ena Gospel Library app, e rawa ni o tabaka ka taura tu e dua na vosa ka qai digitaka na “Define (Vakamacalataka).” O sa na qai kau ki na dua na ivakamacala ni vosa oya. Tovolea oqo ni o sotava na veivosa tawamatata—se na vosa ka sa matata tu vei iko o na via kila vakavinaka cake.

Na cava eso na ivakaraitaki ni veivakacalai ena noda gauna oqo? Eda na kila vakacava ni da sa vakacalai tiko?

Kena ivakaraitaki, o na via vakadikeva beka na nomu digidigi me baleta na iyaloyalo, ivakatagi, kei na itukutuku raraba e yavutaki ena ivakatagedegede ena “Lako ena rarama ni Kalou” ena Me iSakisaki ni iTabagone: iDusidusi ni Vakayaco Digidigi, 16–21.

Raica talega na Gary E. Stevenson, “Kakua ni mai Vakatovolei Au,” Liaona, Nove. 2019, 93–96; “Guide Me to Thee,” Serenilotu, no. 101; Topics and Questions, “Seeking Truth and Avoiding Deception,” Gospel Library.

Vunau kei na Veiyalayalati 54

Au rawa ni gole vua na Turaga ni’u vakararawataki ena nodra digidigi na tani.

O sa bau sotava beka na rarawa ni dua o vakararavi vua a sega ni maroroya na nona yalayala? A yaco oqo vei ira na Yalododonu mai Colesville, New York, era a namaka me ra laki vakaitikotiko ena vanua nei Leman Copely mai Ohio. Mo vuli mai na ka sotavi oqo, vakasamataka mo railesuva na ulutaga ni wase 54 (raica talega na Yalododonu,, 1:125–28; “A Bishop unto the Church,” ena Revelations in Context, 78–79). Kevaka e dua na nomu itokani vei ira na Yalododonu e Colesville, na ivakasala cava o rawa ni kunea ena wase 54 mo wasea vata kei ira?

Qele nei Leman Copely

Vunau kei na Veiyalayalati 56:14–20

Sa kalougata ko ira sa yalo savasava.

Ena veitikina oqo, a vosa tiko na Turaga vei ira na vutuniyau kei ira na dravudravua; ka rawa me ka taleitaki ni vakatauvatani na Nona ivakasala ki na rua na ilawalawa oqo. Na cava era tiko ena veitikina oqo o vakila ni yaga vei iko?

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 51:9

Au rawa ni dau yalodina.

• Me vukei ira na luvemu me ra vulica na ibalebale ni yalodina, e rawa ni o wilika vata na Vunau kei na Veiyalayalati 51:9 ka wasea na kedra italanoa na gone era sotava na vakatulewa me baleta na yalodina. Sa rawa ni o vakayagataka na iyaloyalo, matakau sitokini se pepa me taleitaki vakalevu cake kina na italanoa. E vakalougatataki keda vakacava na Turaga ni da segata me da yalodina?

• Sa rawa mo qitora e dua na qito vata kei ira na luvemu. Ni oti oya, veivosakitaka se na duatani vakacava na qito kevaka e dua e a lawaki. Na cava na vuna e bibi kina me da dau “caka dodonu” vakai keda?

Vunau kei na Veiyalayalati 52:10; 53:3; 55:1

Au ciqoma na isolisoli ni Yalo Tabu mai na veitabaki ni liga.

• Na ciqomi ni Yalo Tabu ena veitabaki ni liga e cavuti vakavica ena Vunau kei na Veiyalayalati 51–57. Oqo e rawa ni dua na madigi vinaka me ra vakavulici kina na luvemu me baleta na cakacaka vakalotu oqo. Me ivakaraitaki, e rawa ni ra raica na iyaloyalo ni dua na gone ni vakadeitaki tiko ka vakamacalataka na ka e yaco tiko ena iyaloyalo. Kerei ira me ra vakasausau ni ra rogoca na “veitabaki ni liga” ni o wilika e dua se sivia na tikina oqo: Vunau kei na veiyalayalati 52:10; 53: 3; 55:1.

• Sa rawa talega mo lagata na “Jisu Karisito” (iVolanisere ni Gonelalai, 105) se dua na sere e tautauvata. Vukei ira na luvemu me ra raica na vosa kei na malanivosa ena sere e vakavulica me baleta na isolisoli ni Yalo Tabu.

  

Vunau kei na Veiyalayalati 52:14–19

E tiko na ivakarau ni Kalou me vukei au me’u kakua ni vakacalai.

• Me vakavulici na ivakarau ni Turaga me levei kina na veivakacalai, e rawa ni o tekivu ena nomu vukei ira na luvemu me ra kunea na ivakaraitaki eso ni ivakarau—ena ituvaki, ena itutuvi duiroka se isulu, se ena bula e veisiga. Vukei ira me ra raica na ivakarau a solia na Turaga ena Vunau kei na Veiyalayalati 52:14–15. Raica me ra kila vinaka na veivosa tawamatata ena veitikina oqo. Eda na vakayagataka vakacava na ivakarau oqo meda kila rawa kina na dina?

Vunau kei na Veiyalayalati 54:4–6

E dodonu me’u dau maroroya tikoga na noqu veiyalayalati.

• Ena nomu vosa ga, wasea vei ira na luvemu na veika a yaco vei ira na Yalododonu era a mai tawana na vanua nei Leman Copely (raica na ulutaga ni wase 54). E rawa ni ra vakatayaloyalotaka na luvemu ni ra dua na lewe ni Lotu ka ra yaco yani ki Ohio. Na cava era na vakila ni oti na nona voroka o Leman na nona veiyalayalati? Na cava e vakavulica vei keda oqo me baleta na maroroi ni noda veiyalayalati se yalayala? Wilika vata na Vunau kei na Veiyalayalati 54:6 me kunei kina na veivakalougatataki me baleti ira na tamata era maroroya na nodra veiyalayalati.

Vunau kei na Veiyalayalati 55:1–4

Au rawa ni vakayagataka na veivakalougatataki sa solia vei au na Kalou me’u vakalougatataki ira kina na tani.

• Me vakatakilaitaki na wase 55, o na gadreva beka mo vakamacalataka ni o William W. Phelps e dua na dautaba niusipepa ka a vulica na kosipeli ka lewena sara na Lotu. Wilika vata kei ira na luvemu na Vunau kei na Veiyalayalati 55:1–4, ka vukei ira me ra kunea na ka a vinakata na Kalou me cakava o William. A tuvanaka vakacava o Koya me vakayagataka na taledi nei William? Oqo ena rawa ni veimuataki ki na dua na veivosaki me baleta na sala e sureti keda kina na Kalou me da vakayagataka na noda taledi me vakalougatataki ira kina na Luvena.

Me baleta na vakasama tale eso, raica na ilavelave ni mekasini na iTokani ni vula oqo.

Ciqoma o Bisopi Partridge na iSolisoli Vakatabui, mai vei Albin Veselka