Yasayasa vaka‑Daviess, Missouri

16–22 ni Jiune: “Sa Gadreva na Turaga na Yalo kei na Vakasama sa Vakarau Tu”

Vunau kei na Veiyalayalati 64–66

Ena draki katakata veivakararawataki ni Okosita, 1831, era a gole lesu tiko eso na italatala qase ki Katiladi mai na vanua o Saioni e Missouri. Era a katakata ka oca na lewe ni ilakolako, ka mai vuki totolo sara me ra veileti. E a rairai vaka na kena taraicake o Saioni, e dua na korolevu ni loloma, duavata, kei na vakacegu, ena taura toka e dua na gauna balavu.

Ka ni marau, na taraicake i Saioni—e Missouri ena 1831 se ena lomada, noda matavuvale, kei na veitabanalevu nikua—e sega ni gadrevi kina me da uasivi sara. Ia, “koi kemudou sa gadrevi mo dou vosota,” a kaya na Turaga (Vunau kei na Veiyalayalati 64:10). Sa gadreva o Koya “na yalo kei na vakasama sa vakarau tu” (tikina e 34). Ka sa gadreva o Koya na yalovosota kei na gugumatua, ni sa tara o Saioni ena yavu ni “veika lalai,” era a vakataucokotaka o ira era sega “ni oca ena cakacaka vinaka” (tikina e 33).

Raica talega na Ira na Yalododonu,, 1:133–34, 136–37.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 64:1–11

“Dou veivosoti vakataki kemudou.”

Vakasamataka na veika oqo ni o vulica na Vunau kei na Veiyalayalati 64:1–11:

• Vakasamataka mada e dua na gauna a vosoti iko kina na Turaga. Na cava o a vakila?

• E tiko beka e dua o gadreva mo vosoti koya? Na cava e rawa ni dau rui dredre kina me da vosoti ira na tani? Na cava e vukei iko mo vorata rawa kina na dredre oqo?

• Na dina cava so me baleta na veivosoti ena Vunau kei na Veiyalayalati 64:1–11 e rairai bibi vei iko? Na cava o nanuma ni vakaroti keda kina na Turaga me da “vosota na tamata kecega”? (tikina e 10).

Kevaka o sasaga voli mo veivosoti, vakasamataka mo vulica na itukutuku nei Elder Jeffrey R. Holland “Na Veiqaravi ni Veivakaduavatataki” (Liaona, Nove. 2018, 77–79) se na itukutuku nei Kristin M. Yee “Na iSala Vakaiukuuku mei Sosomi ni Dravusa: Na Salatu Veivakabulai ni Veivosoti” (Liaona, Nove. 2022, 36–38). Na cava o vulica me baleta na sala e rawa ni vukei iko kina na Karisito mo veivosoti?

Na veimaliwai vakamatavuvale e rawa ni vakarautaka e vuqa na madigi me da veivosoti kina. Vakasamataki ira mada nomu lewe ni matavuvale. O cei o gadreva mo vosoti koya? Eda “vakararawataki” beka vakacava (tikina e 8) ni da sega ni veivosoti vakai keda? Ena tara beka vakacava na nomu veimaliwai vakamatavuvale na veivosoti?

Raica talega na Topics and Questions, “Forgiveness,” Gospel Library; “Forgiveness: My Burden Was Made Light” (vidio), Gospel Library.

Forgiveness: My Burden Was Made Light

After a man loses his wife and several children in a car accident, he finds healing and is able to forgive the offending driver through the power of Jesus Christ.

“Sa dodonu mo dou veivosoti vakataki kemudou” (Vunau kei na Veiyalayalati 64:9).

Vunau kei na Veiyalayalati 64:31–34

E kerea na Turaga na “yalo[qu] kei na [noqu] vakasama sa vakarau tu.”

O sa bau vakila beka na “oca” ena “cakacaka vinaka” taucoko o saga tiko mo rawata? Vakasaqara na itukutuku ni Turaga vei iko ena Vunau kei na Veiyalayalati 64:31–34. Na cava e vinakata na Turaga mo cakava mo vakayacora kina na Nona “cakacaka cecere”?

Vakasamataka mada e dua na lesoni ivakaraitaki ka na vakaraitaka na tikina e 33—e dua na ka levu ka taraicake mai na veika lalai, me vaka e dua na ituvatuva vatu se dua na vale buloko. Na “veika lalai” cava e rawa ni o cakava e veisiga mo “tura [kina] na yavu” ni cakacaka cecere ni Kalou? Na cava soti eso na ivakaraitaki ni “cakacaka cecere” sa solia vei iko na Turaga?

Vunau kei na Veiyalayalati 64:31–34

“Na yalo kei na vakasama sa vakarau tu”

A vakatura o Elder Donald L. Hallstrom na ibalebale oqo me baleta na malanivosa “na yalo kei na vakasama sa vakarau tu”:

“Na yalo sa ivakatakarakara ni loloma kei na yalayala. Eda solibula ka colata na icolacola baleti ira eda lomana ka da na sega ni gumatua kina ena dua tale na vuna. Kevaka e sega ni tiko na loloma, ena malumalumu na noda yalayala. …

Ni “tiko ‘na vakasama sa vakarau tu’ sa na muataki keda meda solia noda igu vinaka duadua kei na vakasama savasava sara meda vakasaqara na vuku ni Kalou. E vakatura ni noda vuli yalodina duadua ni bula taucoko e dodonu me baleta na veika e tawamudu na kena ituvaki. Sa kena ibalebale ni dodonu me tiko e dua na veimaliwai sega ni tagutuvi rawa ena kena rogoci na vosa ni Kalou ka talairawarawa kina” (“The Heart and a Willing Mind,” Ensign,, June 2011, 31–32).

Vunau kei na Veiyalayalati 64:41–43

Ena yaco o Saioni me “nodra drotini na tamata.”

Na drotini sai koya “e dua na kuila se ivakatagedegede era soqoni vata yani kina na tamata ena duavata ni inaki se ivakatakilakila” (iDusidusi ki na iVolanikalou, “Drotini,” Valenivola Vakosipeli). Sa yaco vakacava o Saioni—se na Lotu ni Turaga—me vaka e dua na drotini vei iko? Vakasamataka eso tale na ivakaraitaki oqo ni veika e dau laveti cake, me vaka na drotini, me vakalougatataki ira na tamata: Na Tiko mai na Lekutu 21:6–9; Maciu 5:14–16; Alama 46:11–20. Raica eso tale na sala e vakamacalataki Saioni kina na Turaga ena Vunau kei na Veiyalayalati 64:41–43.

Raica talega na “Sa Totoka Ko Saioni,” Sere ni Lotu, naba 24.

Vunau kei na Veiyalayalati 65

Na matanitu ni Kalou e vuravura ena vakarautaka na vuravura me baleta na lesu mai ni iVakabula.

Vunau kei na Veiyalayalati 65 e solia e dua na ivakamacala veivakauqeti ni ilesilesi ni Lotu ni Turaga ena veisiga e muri. Navuca mo vakasaqara ena iwase oqo, ka vaqara na isau ni taro vakaoqo: Na cava e vinakata na Turaga me vakayacora na Nona matanitu e vuravura? Na cava e vinakata o Koya me’u cakava me’u veivuke kina?

Raica talega na “Prepare Today for the Second Coming” (vidio), ChurchofJesusChrist.org.

Prepare Today for the Second Coming

(Joseph Smith—Matthew 1:46–54; Matthew 24:42–51) An excerpt from “Preparation for the Second Coming,” Ensign or Liahona, May 2004, 8–9.

Vunau kei na Veiyalayalati 66

Sa kila tu na Turaga na nanuma ni yaloqu.

Ni oti ga vakalailai nona lewena na Lotu, a kerea o William E. McLellin vei Josefa Simici me vakatakila na loma ni Kalou me baleti koya. A sega ni kila o Josefa, ni a lima na vakatataro nei William ka a nuitaka ni na sauma na Turaga mai vua na Nona Parofita. Eda sega ni kila na taro nei William, ia na ivakatakila a vagolei vua, ena gauna oqo na Vunau kei na Veiyalayalati 66, a sauma na taro yadua ki na “lomavakacegu vakataucoko” i William (“William McLellin’s Five Questions,” ena Revelations in Context, 138).

Ni o wilika na wase 66, vakasamataka na ka a kila tu na Turaga me baleti William McLellin kei na kauwai kei na inaki eso ni lomana. E sa vakatakila vakacava na Turaga vei iko ni kilai iko o Koya? Ke tiko na nomu veivakalougatataki vakapeteriaki, navuca mo vulica. Ni ko vakayacora qori, na cava e vukei iko kina na Yalo Tabu mo kila vakamatata na loma ni Kalou me baleti iko?

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 64:7–10

E vinakata o Jisu Karisito me’u vosoti ira na tamata kecega.

Me kilai: Ni o vakavulici ira na luvemu me baleta na ivakaro ni Turaga “mo vosota na tamata kecega,” o na vinakata beka mo vakamatatataka ni veivosoti e sega ni kena ibalebale me vakatarai ira na tamata me ra vakararawataki keda. Vakayaloqaqataki ira me ra tukuna vua e dua na uabula nuitaki kevaka e dua e vakararawataki ira se tarai ira vakatani.

• Ni wiliki oti na Vunau kei na Veiyalayalati 64:10 vata kei ira na luvemu, veitalanoataka vata kei ira na kena ibalebale mo vosota e dua. Sa rawa mo wasea e vica na ivakaraitaki rawarawa. De dua e rawa ni ra matanataka na ivakaraitaki eso oqo me ra vakatovotovotaka kina na veivosoti.

• Sa rawa mo kerei ira na luvemu me ra navuca na sala me ra vakavulica kina e dua—me vaka e dua na tacidra gone—me baleta na vosoti ira na tani. Vukei ira me ra raica na malanivosa eso ena Vunau kei na Veiyalayalati 64:7–10 e rawa ni ra vakayagataka ni ra veivakavulici.

• Lagata e dua na sere me baleta na veivosoti, me vaka na “Ni Vukei Au Mai Noqu Kalou” (iVolanisere ni Gonelalai, 52). Na cava e vakatavulica vei keda na sere oqo me baleta na vosoti ira na tani?

Vunau kei na Veiyalayalati 64:33

Na “cakacaka cecere” ni Kalou e tara ena “veika lalai.”

• Vakaraitaka vei ira na luvemu eso na ka era caka mai na vuqa na veitikina lailai, me vaka e dua na qito iba se na ibe ni valagi. Qai wilika vata na Vunau kei na Veiyalayalati 64:33. Na cava na “cakacaka cecere” ni Kalou? Na cava soti na “veika lalai” eda rawa ni cakava me vukea?

Vunau kei na Veiyalayalati 64:34

Au rawa ni muri Jisu ena yaloqu kei na noqu vakasama.

• Ni o wilika vei ira na luvemu mai na Vunau kei na Veiyalayalati 64:34, sa rawa ni o dusi ki na utomu kei na ulumu ni o wilika na “yalo” kei na “vakasama,” ka sureti ira me ra cakava vata kei iko. Me da solia vakacava vua na iVakabula na yaloda (gagadre) kei na noda vakasama (nanuma)?

Vakabibitaka na ivakaraitaki i Jisu Karisito. Vakasamataka na sala o rawa ni vakabibitaka kina na ivakaraitaki ni iVakabula ni o vuli se veivakavulici. Me ivakaraitaki, ni o vakavulica na Vunau kei na Veiyalayalati 64:34, e rawa ni o veivosakitaka kei ira na luvemu me baleta na ivakarau a solia kina na Yalona na iVakabula (gagadre) kei na vakasama (vakanananu) vua na Tamana mai Lomalagi. (Raica na Veivakavulici ena iVakarau ni iVakabula,, 6.)

Vunau kei na Veiyalayalati 66

E kilai au ka lomani au na Turaga.

• Vukei ira na luvemu me ra kila ni o William E. McLellin a lima na nona taro vua na Turaga. A ciqoma o Josefa Simici na kena isau dina ga ni a sega tu ni kila o koya na taro nei William. Tukuna vei ira na luvemu me baleta e dua na gauna a vakaraitaka kina vei iko na Turaga na ka a vinakata o Koya mo cakava, ka veivosakitaka na veivakalougatataki a yaco mai ena nomu muria na Nona veidusimaki. E rawa ni o qai wilika vata na Vunau kei na Veiyalayalati 66:4 ka sureti ira me ra vakasaqara na madigi eso me ra kila na veika e vinakata na Turaga me ra cakava.

  

  Kena matailalai mai Na iKarua ni Lako Mai, mai vei Kevin Keele

Vunau kei na Veiyalayalati 65

Au rawa ni veivuke ena kena vakarautaki na vuravura me ciqomi Jisu Karisito.

• Ni ra raica na luvemu e dua na iyaloyalo ni iKarua ni Lako Mai ni iVakabula, kerei ira me ra vakamacalataka na veika era raica se na cava era kila me baleta na ka a yaco oqo. E rawa talega ni o solia vei ira na vosa kei na malanivosa eso me baleta na iKarua ni Lako Mai me ra raica ena Vunau kei na Veiyalayalati 65. Na cava era vakavulica vei keda na vosa kei na malanivosa eso oqo? Eda na vakavakarau beka vakacava ki na nona lesu mai na iVakabula?

Me baleta na vakasama tale eso, raica na ilavelave ni mekasini na iTokani ni vula oqo.

Sa Vosoti, mai vei Greg Olsen