23–29 ni Jiune: “Tautauvata … na iYau Kecega ni Vuravura Taucoko”

Vunau kei na Veiyalayalati 67–70

Mai na 1828 ki na 1831, a ciqoma kina na parofita o Josefa Simici e vuqa na ivakatakila mai vua na Turaga, ka oka kina na ivakasala vakalou ki na tamata yadua, na idusidusi ni kena liutaki na Lotu, raivotu ni veisiga edaidai, kei na vuqa na dina veivakauqeti ni veigauna tawamudu. Ia e vuqa vei ira na Yalododonu era a se sega ni wilika. Era a se bera ni tabaki na ivakatakila, kei na vica na ilavelave sa tu rawa a volailiga tu ga ena draunipepa tikidua ka veisoliyaki ena kedra maliwa na lewenilotu ka ra kauta wavoki na daukaulotu.

Oti ya, ena Noveba, 1831, a kaciva kina o Josefa e dua na matabose ni iliuliu ni Lotu me veivosakitaki kina na kena tabaki na ivakatakila. Ni ra vakasaqara oti na loma ni Turaga, era a tuvanaka sara na iliuliu oqo me ra tabaka na iVola ni iVakaro—na itekitekivu taumada ni Vunau kei na Veiyalayalati nikua. Sega ni dede sa na rawa vei ira na tamata kece me wilika vakataki ira na vosa ni Kalou ka vakatakilai mai vua e dua na parofita bula, na ivakadinadina matata ni “sa soli tale ki na tamata na idola ni veika vuni ni nona matanitu na noda iVakabula.” Ena vuku ni inaki oqo kei na vuqa na vuna tale eso, era sa vakadeitaka na Yalododonu ena gauna o ya vakakina nikua ni ivakatakila kece oqo sa “tautauvata … na iyau kecega ni Vuravura taucoko” (Vunau kei na Veiyalayalati 70, ulutaga ni iwase).

Raica na Yalododonu,, 1:140–43.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 67:1–9; 68:3-6

Era sa tukuna na italai ni Turaga na Nona lewa ni ra vakauqeti mai vua na Yalo Tabu.

Na vakatulewa me tabaki na ivakatakila a ciqomi mai vei Josefa Simici a vaka me ka rawarawa, ia eso na iliuliu ni Lotu taumada era sega ni vakadeitaka ni a dua na vakasama vinaka. E dua na kauwai a baleta na malumalumu ena ivakarau a vola kina o Josefa Simici na ivakatakila. Na ivakatakila ena wase 67 a qai yaco mai me sauma na kauwai oqo. Na cava o vulica me baleti ira na parofita kei na ivakatakila ni Turaga mai na tikina e 1–9? Na ikuri ni raititobu cava eso o rawata mai na 68:3–6?

O sa mai kila vakataki iko vakacava ni sa dina sara na ivakatakila e solia mai na Kalou vei ira na Nona italai? O na vakasamataka tale beka ga vakatitobu na gauna o a vakila kina ni vosa tiko vei iko na Turaga mai vua e dua na Nona italai (raica na Vunau kei na Veiyalayalati 68:4). Na gauna cava o sa bau vakila kina ni o a “vakayavalati ena Yalo Tabu” (tikina e 3) mo tukuna e dua na ka? E a “tu e [yasamu]” vakacava na Turaga? (tikina e 6).

Ni bera ni a tabaki na iVola ni iVakaro, era a sainitaka eso na iliuliu ni Lotu e dua na ivola ni ivakadinadina ni ra sa dina sara na ivakatakila ena ivola oqo. Me raici e dua na ilavelave ni nodra ivakadinadina, raica na “Testimony, circa 2 November 1831,” Revelation Book 1, 121, josephsmithpapers.org.

Vunau kei na Veiyalayalati 67:10–14

“Vosota tikoga.”

E dau tarovi keda vakacava na vuvu, rere, kei na viavialevu me da toro voleka yani vua na Turaga? Eda na vorata rawa vakacava na “tamata vakavuravura” se “vakanananu vakatamata” me rawa ni da “raici [Koya] ka kila ni [sai Koya]”? (tikina e 12; raica talega na Mosaia 3:19). Na cava eda kunea ena veitikina oqo e vakauqeti keda me da “vosota tikoga me yacova ni [da] sa vinaka sara”? (tikina e 13).

Vunau kei na Veiyalayalati 68:25–31

Au rawa ni vukea me vakanamata vakatabakidua na noqu itikotiko vei Jisu Karisito

Na vosa ni Turaga ena Vunau kei na Veiyalayalati 68:25–31 e baleti ira vakatabakidua na itubutubu, ia se o dua na itubutubu se sega, sa rawa ni o vakayagataka na Nona ivakasala mo cakava na nomu itavi me usutu ni nomu vuvale na ivunau i Jisu Karisito. Sa koto oqo e ra eso na ivakavuvuli e kaya na Turaga ni dodonu me vakatavulici e vale. Vakasamataka na sala o rawa ni cakava kina na veika yadua oqo me tiki ni yavu ni dua na vuvale yavutaki-vei-Karisito—na vuvale o vakaitikotiko kina ena gauna oqo se na nomu itikotiko ena veisiga ni mataka. Na ivurevure kei na taro eso e vakarautaki e rawa ni veivuke.

• Veivutuni: Vulica na Alama 36:17–20, ka raica na sala a vakalougatataki kina o Alama ena dua na gauna bibi baleta ni a vakavulici koya o tamana me baleta na ilesilesi ni veisorovaki ni iVakabula. O na vakauqeta beka vakacava na nomu matavuvale me ra gole vei Jisu Karisito ka veivutuni? (raica talega na 2 Nifai 25:26).

• Vakabauta na Karisito: Wilika na vakatutu e lima nei Peresitedi Russell M. Nelson baleta na vakatorocaketaki ni vakabauta ena “Sa Tucaketale na Karisito; Na Vakabauti Koya ena Tosoya na Ulunivanua” (Liaona, Me 2021, 103). Vakasamataka vakatitobu na sala e rawa ni bulia kina e dua na itovo ni vakabauta ena nomu matavuvale na vakatutu eso oqo.

• Papitaiso: Railesuva na veiyalayalati ni papitaiso me vaka e vakamacalataki ena Mosaia 18:8–10, 13. Ena vaqaqacotaka vakacava na nomu matavuvale na nomu sasaga mo maroroya na veiyalayalati oqo?

• iSolisoli ni Yalo Tabu: Vulica na veisureti ena tabana e 17–19 ni Me iSakisaki ni iTabagone : iDusidusi ni Vakayaco Digidigi. Na cava o vakauqeti kina mo cakava mo sureta kina na veivakayarayarataki ni Yalo Tabu ena nomu itikotiko?

• Masu: Na cava o sa vulica me baleta na mana ni masu ena itikotiko ena “Vosa ni Loloma”? (iVolanisere ni Gonelalai, 102). Na veivakalougatataki cava e yalataka na iVakabula ena 3 Nifai 18:15–21?

• Eso tale na ivakavuvuli o kunea ena Vunau kei na Veiyalayalati 68:25–31:

Na ivakasala cava o na solia vua e dua ka sega ni tokona na lewe ni nona matavuvale na nona sasaga me tara cake na vakabauti Karisito?

Raica talega “Na Matavuvale: Ai Vakaro ki Vuravura Raraba,” Valenivola Vakosipeli; Topics and Questions, “Parenting,” Gospel Library; Dieter F. Uchtdorf, “O Jisu Karisito E Nodra iSakisaki na iTubutubu,” Liaona, Me 2023, 55–59.

Vunau kei na Veiyalayalati 69:1

Era vukei au na itokani “dina ka yalododonu” me’u muri Jisu Karisito.

Na cava o nanuma kina ni a “lewa yalomatua [ni Turaga]” vua e dua e “dina ka yalododonu” me tomani Oliver Cowdery ena ilesilesi e vakamacalataki ena tikina oqo? E yaga vakacava vei iko na ivakavuvuli oqo?

Vukei ira na vuli tiko me ra veilaveti vakai ira. O ira yadua ena nomu kalasi se matavuvale era ivurevure vutuniyau ni ivakadinadina, vakasama, kei na veika e sotavi ena bulataki ni kosipeli. Sureti ira me ra veiwasei ka veilaveti vakai ira.

Vunau kei na Veiyalayalati 70:1–4

Au na saumitaro ena ivakatakila sa solia mai na Turaga.

A solia na Turaga vei ira eso na italatala qase na itavi me ra raica raraba na tabaki ni ivakatakila. E dina ga ni sega ni nomu itavi vakatabakidua o ya, na cava na nomu itavi vaka dauveiqaravi “ena ivakatakila kei na ivakaro”? (tikina e 3).

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 67

Na Vunau kei na Veiyalayalati e vakavulici au me baleti Jisu Karisito.

• Tukuna vei ira na luvemu me baleta na sala a tabaki kina me dua na ivola na ivakatakila nei Josefa Simici (raica na “Wase 23: Na Vunau kei na Veiyalayalati,” ena iTukuni mai na Vunau kei na Veiyalayalati, 90–92, se na kena vidio ena Gospel Library). Vukei ira me ra nanuma eso na ka o sa vulica me baleti Jisu Karisito mai na Vunau kei na Veiyalayalati ena yabaki oqo. E rawa talega ni o veiwaseitaka eso na nomu tikina taleitaki mai na Vunau kei na Veiyalayalati.

  Chapter 23: The Doctrine and Covenants: August–November 1831

• E rawa talega ni o vakaraitaka vei ira na luvemu na iVola Tabu, iVola i Momani, Vunau kei na Veiyalayalati, kei na Mataniciva Talei ka veivosakitaka vata kei ira na sala era duidui kina kei na sala era tautauvata kina (raica na ivakamacala ni ivola eso oqo ena iDusidusi ki na iVolanikalou). Eda na kila vakacava ni ra sa dina na ivolanikalou? Na cava eda vulica mai na Vunau kei na Veiyalayalati 67:4, 9 baleta na ivakatakila a solia na Turaga vei Josefa Simici?

Vunau kei na Veiyalayalati 68:25–31

Au rawa ni papitaiso ni’u sa yabaki walu.

• Ena Vunau kei na Veiyalayalati 68:27, a vakamatatataka kina na Turaga na yabaki me papitaiso kina e dua na tamata. Vukei ira na luvemu me ra kila na veika a kaya o Koya. Cava na vuna e vinakata kina o Jisu me da papitaisotaki? E rawa ni veivuke na sere me vaka na “Jisu Ni A Papitaiso” (iVolanisere ni Gonelalai, 54). Ni o vakayagataka tiko na iyaloyalo eso se tikina e 25–31 (se ruarua), vukei ira na luvemu me ra kunea na veika e vinakata na Turaga me ra vulica na gone.

• Wilika vata kei ira na luvemu na ilesilesi a solia na Turaga vei Oliver Cowdery ena ulutaga ni iwase ni Vunau kei na Veiyalayalati 69. Na ivakasala cava a solia na Turaga ena tikina e 1? Na cava e bibi kina me da dau tiko vata kei ira na tamata era “dina ka yalododonu”? E rawa beka ni ra tukuna na luvemu me baleta e dua era kila e dau “dina ka yalododonu.” Lagata vata e dua na sere e vakayaloqaqataki ira na gone me ra dau dina ka yalododonu me vaka na iVakabula, me vakataka na “Meu Na Muri Jisu Tu” (iVolanisere ni Gonelalai,, 40). Eda na vakadeitaka vakacava ni da sa dina ka yalododonu vua na Turaga? E rawa vakacava ni vakayagataki keda o Koya me vakalougatataki ira na tani ni da sa dina ka yalododonu?

Me baleta na vakasama tale eso, raica na ilavelave ni mekasini na iTokani ni vula oqo.

Na iVola ni iVakaro, na itekitekivu taumada ni Vunau kei na Veiyalayalati, a tabaki ena misini ni tabaivola me vakataka oqo.