Au na Nanuma na Veiyalayalati, mai vei Enrique Manuel Garcia

30 ni Jiune–6 ni Jiulai: “Ena Sega ni Rawata e Dua na Ka na iYaragi Kecega sa Caka me Saqati Kemudrau”

Vunau kei na Veiyalayalati 71–75

Tekivu mai na gauna a se gonetagane kina, a sotavi ira na dauvakalelewa o Josefa Simici—ira sara mada ga na meca—ni a saga voli okoya me cakava na cakacaka ni Kalou. Ia e a rairai vakamosiyalo vakabibi ena mua ni 1831 ni a tekivu vosavakacacataka raraba na Lotu o Ezra Booth, baleta na dauvakalelewa oqo e a dua na tamata vakabauta e liu. E a raici Josefa o Ezra ni vakayagataka na kaukauwa ni Kalou me vakabula kina e dua na yalewa. E a sureti okoya me tomani Josefa e na imatai ni kena vakadikevi na vanua o Saioni e Missouri. Ia a sa mai yali na nona vakabauta ka, ena nona tovolea me vakaucacataka na Parofita, a tabaka kina e dua na itabaivola veitaravi ena dua na niusipepa e Ohio. Ka vaka me mana tiko na nona sasaga eso, ena vuku ni “maliwa ca sa basika ka saqati kina na Lotu” ena yasana oya (Vunau kei na Veiyalayalati 71, ulutaga ni iwase). Na cava e dodonu me ra cakava na tamata vakabauta ena dua na kisi vaka o ya? Me vaka ni sega ni dua na isaunitaro dodonu ena vei ituvaki kece sara, e kena irairai ni vakawasoma—oka kina na kena oqo ena 1831—e sa tiki ni isaunitaro ni Turaga oya me da tukuna na dina ka vakadodonutaka na veika lasu ena kena “vunautaki na … kosipeli” (tikina e 1). Io, era na dau tu ga na dauvakalelewa ena cakacaka ni Turaga, ia e muri, “ena sega ni rawata e dua na ka na iyaragi kecega sa caka me [saqata]” (tikina e 9).

Raica na “Ezra Booth and Isaac Morley,” ena Revelations in Context,, 134.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 71

Ena tuberi au na Yalotabu ni’u vunautaka na kosipeli ni iVakabula.

E rawa ni veivakaleqai ni ra vakalewa se vakalialia na tamata na nomu vakabauta na iVakabula, Nona kosipeli, se Nona Lotu. Ni yaco oqori, na cava o na cakava? E dua na ka vakaoqo a yaco e Ohio ena 1831 (raica na ulutaga ni wase ni Vunau kei na Veiyalayalati 71). Na cava a tukuna na Turaga vei Josefa Simici kei Sidney Rigdon me rau cakava ena Vunau kei na Veiyalayalati 71? De dua e rawa ni o vola na idusidusi eso a solia vei rau na Turaga kei na veivakalougatataki a yalataka o Koya.

Me ikuri ni kena vulici na wase 71, e rawa talega ni o vakadikeva na sala a sauma kina na iVakabula vei ira na Nona dauvakalelewa ena Nona gauna ni veiqaravi e vuravura. Oqo eso na kena ivakaraitaki: Maciu 22:15–22; 26:59–64; Joni 10:37–38. Na cava o vulica mai vei Koya? Na ikuri ni raititobu cava so o rawata mai na Maciu 18:15; Efeso 4:31–32; 2 Timoci 3:12; Jemesa 1:19?

Ena vakayagataki vakacava na Nona ivakasala ki na ituvaki eso o sotava tu nikua? O na rairai vakasamataka na sala mo vakadodonutaka kina ena vakacegu kei na nomu vosa ga na veika lasu eso. Me ivakaraitaki, e rawa ni o tekivu ena nomu vakaraitaka na rokovi ni nona rai na tamata kadua, ka rawa ni o wasea ena yalomalumalumu kei na yalovinaka na veika o vakabauta baleti Jisu Karisito kei na Nona ivakavuvuli. Mo vakavakarau ki na veigauna vakaoqo, de rawa ni o vakatovotovotaka na rai oqo vata kei ira na itokani se lewe ni matavuvale.

Raica talega na Topics and Questions, “Helping Others with Questions,” Gospel Library; Dallin H. Oaks, “Veilomani ka Bulavata ena Maliwa ni Duidui,” Liaona, Nove. 2014, 25–28; Jörg Klebingat, “Bula Vakatisaipeli Qaqa ena iOtioti ni Gauna,” Liaona, Me 2022, 107–10.

Vunau kei na Veiyalayalati 72

E vakalougatataki au na Turaga ena nodra veiqaravi na iliuliu me vaka na bisopi.

Ni a kacivi o Newel K. Whitney me veiqaravi vaka bisopi, a duidui vakalailai na nona itavi eso mai vei ira na bisopi edaidai. Me ivakaraitaki, a raica raraba o Bisopi Witney na vakatabui ni iyau kei na veivakadonui me ra vakaitikotiko e Missouri, ena vanua ko Saioni. Ia ni o wilika me baleta na nona veikacivi ena Vunau kei na Veiyalayalati 72, o na raica beka eso na isema ki na veika era qarava na bisopi nikua—na veika vakayalo mada ga, ke sega so na kena matailailai eso, ni nodra itavi.

Me ivakaraitaki, na sala cava so o dau “tukunikatak[i] … itukutuku” kina vua na nomu bisopi? (tikina e 5). Ena noda gauna oqo, “na lololo [ni] Turaga” e rawa ni oka kina na cau, veiqaravi, kei na taledi eso ni lewe ni tabanalevu (raica na tikina e 10, 12). O na cau beka vakacava ki na lololo oya?

Sa vakalougatataki iko kei na nomu matavuvale vakacava na Turaga mai na veiqaravi ni dua na bisopi?

Raica talega na Quentin L. Cook, “Ira na Bisopi—Era iVakatawa ni Nona Qelenisipi na Turaga,” Liaona, Me 2021, 56–60.

Vunau kei na Veiyalayalati 73

E vuqa tu na madigi me’u wasea kina na kosipeli ni iVakabula.

Ni rau sa lesu mai na nodrau ilesilesi ni kaulotu o Josefa Simici kei Sidney Rigdon (raica na Vunau kei na Veiyalayalati 71), a tukuna vei rau na Turaga me rau tomana tiko na nodrau vakadewataka na iVolatabu (raica na iDusidusi ki na iVolanikalou, “iVakadewa nei Josefa Simici (VJS),” Valenivola Vakosipeli). Ia oya a sega ni kena ibalebale ni vinakata o Koya me rau muduka na wasei ni kosipeli. Me vaka, ni sa tiki ni nona bula e dua na tisaipeli.

Ni o wilika na Vunau kei na Veiyalayalati 73, vakasamataka na sala o rawa ni cakava mo “rawa kina” ni vunautaka tikoga na kosipeli, (tikina e 4)—se me vakaidina sara—me tiki ni nomu bula ena maliwa ni nomu itavi tale eso.

Na wasei ni kosipeli i Jisu Karisito e rawa ni matau ka vakaivakarau.

Vunau kei na Veiyalayalati 75:1–16

“Dou cakacaka vagumatua sara … ka vunautaka yani na dina.”

Na ivakatakila ena wase 75 a vagolei vei ira na tamata era a “vakadonuya [me ra] lako yani ka vunautaka na … kosipeli [ni iVakabula]” (tikina e 2). E dua na sala me vulici kina na ivakatakila oqo o ya me caka e rua na lisi: (1) na sala me mana kina na wasei ni kosipeli kei na (2) sala e dau vakalougatataki ka tokoni keda kina na Turaga ni da cakava oqori.

Na cava o nanuma e kena ibalebale mo “lokuyara” se “vakawelewele” ena kena wasei na kosipeli. Na cava na kena irairai mo “cakacaka vagumatua sara”? (tikina e 3).

Raica talega na “Au Lako Ke Ko Ni Lewa,” Sere ni Lotu, naba 164

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 71

Au rawa ni taqomaka na dina mai na wasei ni noqu ivakadinadina.

• E rawa ni o vakayagataka na ulutaga ni wase ni Vunau kei na Veiyalayalati 71 se na “Wase 25: iLakolako ni Kaulotu nei Josefa Simici kei Sidney Rigdon” (ena iTukuni mai na Vunau kei na Veiyalayalati, 96, se na kena vidio ena Gospel Library) mo vakavulici ira kina na luvemu ena ituvaki eso a vakauqeta na wase 71. Qai vukei ira me ra raica ena tikina e 1 na ka a vinakata na Turaga me rau cakava o Josefa kei Sidney me baleta na “maliwa ca” ki na Lotu. E kaya vakacava o Koya ni na vukei rau? E rawa vakacava ni da vakataki Josefa kei Sidney?

  Chapter 25: Joseph Smith and Sidney Rigdon Go on a Mission: December 1831–January 1832

• E rawa talega ni o lagata e dua na sere e vakauqeti ira na luvemu me ra dina vua na iVakabula, me vaka na “Me Da Dina” (iVolanisere ni Gonelalai, 81). Vukei ira na luvemu me ra vakatovotovotaka na ivakarau me ra wasea kina na veika era kila me baleti Jisu Karisito.

Vunau kei na Veiyalayalati 72:2

Na Turaga e sa kaciva e dua na bisopi me vukei au.

• Na wiliki vata ni Vunau kei na Veiyalayalati 72:2 e rawa ni bulia e dua na madigi me veivosakitaki kina na vuna e solia kina vei keda na Turaga na bisopi (raica talega na “Wase 17: O Ira na Bisopi Taumada ena Lotu,” ena iTukuni mai na Vunau kei na Veiyalayalati,, 64–66, se na kena vidio ena Gospel Library). O iko kei ira na luvemu e rawa ni o kunea na iyaloyalo se iyaya eso e matataka na itavi ni dua na bisopi. Na iyaloyalo kei na tabana ni itaviqaravi ena mua ni ituvatuva oqo e vakarautaka tu eso na vakasama. Sa rawa mo ni qai veitalanoataka vata na veika baleti ira na bisopi o ni sa kila kei na sala sa vakalougatataka kina na nomuni matavuvale na Turaga ena nodra veiqaravi.

  Chapter 17: The First Bishops of the Church: February and December 1831

Dau vakavulica e veigauna me baleti Jisu Karisito. “Se cava ga na ka o vakavulica tiko, nanuma tiko ni o sa vakavulica dina tiko na veika baleti Jisu Karisito kei na sala mo vakataki Koya kina” (Veivakavulici ena iVakarau ni iVakabula, 6). Me ivakaraitaki, ni o vakavulici ira na luvemu baleti ira na bisopi, vakabibitaka ni ra sa matataki Jisu Karisito, ka kacivi mai Vua me ra cakava na Nona cakacaka (raica na 1 Pita 2:25).

Sa kerei ira na bisopi na Turaga me ra qaravi ira na vakaleqai tu.

Vunau kei na Veiyalayalati 75:3

Au rawa ni solia na noqu igu vinaka duadua vua na Turaga.

• Me veivosakitaki kina na kedrau duidui na “vakawelewele” kei na “cakacaka vagumatua sara,” sa rawa mo digia eso na sala ni veiqaravi se cakacaka e vale ka sureti ira na luvemu me ra vakaraitaka ni ra cakava tiko ena vakawelewele ka qai vagumatua sara. Ni o wilika na “kakua tale ga ni vakawelewele” ena Vunau kei na Veiyalayalati 75:3, e rawa ni ra vakaraitaka na luvemu na ivakarau era na cakava kina na cakacaka ena vucesa. Ni o wilika “ia mo … cakacaka vagumatua sara,” e rawa ni ra vakaraitaka na ivakarau era cakacaka kina vakaukauwa. Na cava e bibi kina me da cakava na noda vinaka taucoko ni da qarava na Turaga?

• Ena nona itukutuku “Rua na iVakavuvuli Baleta na Draki ni Bula Kecega” (Liaona, Nove. 2009, 55–58), a tukuna kina o Peresitedi Dieter F. Uchtdorf e rua na italanoa me baleta na cakacaka. Sa rawa mo wasea vei ira na luvemu ka veivosakitaka na kena vakilai ni da cakacaka vakaukauwa ka cakava na noda vinaka duadua.

Me baleta na vakasama tale eso, raica na ilavelave ni mekasini na iTokani ni vula oqo.

Kilai ni Yalololoma ena Nomu Bula, mai vei Keith Larson