iVakaruru, mai vei Shaelynn Abel

7–13 ni Jiulai: “Ena Vakaitamera na Kedra iSau ka Tawamudu na Nodra Lagilagi”

Vunau kei na Veiyalayalati 76

“Na cava ena yaco vei au ni’u sa mate oti?” Voleka ni tamata kece era taroga na taro oqo ena so na ituvaki se dua tale. Ena veisenitiuri sa oti, era a dau vakavulica e vuqa na vakabauta Vakarisito, ni ra vakararavi tiko ena ivakavuvuli vakaivolatabu, me baleti lomalagi kei eli, na parataisi me baleti ira na ivalavala dodonu kei na rarawa me baleta ira na tamata ivalavala ca. Ia ena rawa beka ni ra wasei vakaukauwa sara na matavuvale ni kawatamata taucoko? Ena Feperueri 1832, erau a vakananuma kina o Josefa Simici kei Sidney Rigdon kevaka e a so tale na ka me kilai ena ulutaga oqo (raica na Vunau kei na Veiyalayalati 76, ulutaga ni iwase).

E a tiko dina. Ni rau vakasamataka tiko vakatitobu o Josefa kei Sidney na veika oqo, na Turaga e a “tara na mata ni [nodrau] vakanananu … ka sa tadola kina” (tikina e 19). Erau a ciqoma kina e dua na ivakatakila e veivakurabuitaki sara, rabailevu sara, veivakararamataki sara, ni ra vakatoka sara ga kina na Yalododonu me “na Raivotu.” E a tadolava kina na katuba i lomalagi, ka solia vei ira na luve ni Kalou e dua na rai tadodo vaka-vakasama ni bula tawamudu. A vakatakilai ena raivotu oqo ni lomalagi e sa cecere ka rabailevu ka veiokati vakalevu cake mai na ka era a nanuma taumada e vuqa na tamata. Na Kalou e yalololoma ka dodonu vakalevu sara mai na veika eda kila rawa. Ka sa noda na luve ni Kalou e dua na icavacava tawamudu e lagilagi cake sara mai na veika eda vakananuma rawa.

Raica na Saints, 1:147–50; “The Vision,” ena Revelations in Context, 148–54.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 76

Na veivakabulai e lako mai ena vuku i Jisu Karisito, na Luve ni Kalou.

Na Wase 76 e vakatakila na dina bibi eso me baleta na noda icavacava tawamudu, ia ena sega ni taucoko me da tukuna ni ivakatakila oqo e baleta na tolu na matanitu lagilagi se me baleta sara mada ga na ituvatuva ni veivakabulai. Vakadodonu cake, na wase 76 e baleti Jisu Karisito, okoya e cakava me rawa na ituvatuva ni Kalou me baleta na noda vakabulai kei na lagilagi tawamudu. Ni o wiliwili, o na vakaraica beka na vosa se malanivosa e vakamacalataka na veiwekani i Jisu Karisito kei ira na tamata era na taukena na vei matanitu duidui ni lagilagi. E dua beka na ituvatuva vaka oqo ena rawa ni vukei iko mo vola na veika o kunea.

Matanitu Lagilagi	Veiwekani kei Jisu Karisito	Veivakalougatataki tawamudu
Matanitu Lagilagi Silesitieli (tikina 50–70, 92–96)	Veiwekani kei Jisu Karisito Ciqoma na ivakadinadina kei Jisu Vakayacora ka maroroya na veiyalayalati kei Koya.	Veivakalougatataki tawamudu Savai mai na ivalavala ca Vakamalumalumutaka ena vakabauta
Matanitu Lagilagi Teresitieli (tikina e 71–79, 97)	Veiwekani kei Jisu Karisito	Veivakalougatataki tawamudu
Matanitu Lagilagi Tilesitieli (tikina 81–90, 98–106, 109–12)	Veiwekani kei Jisu Karisito	Veivakalougatataki tawamudu

Na cava o vakauqeti kina mo cakava me vaqaqacotaka na kemu isema vua na iVakabula?

Ni a wilika o Wilford Woodruff na raivotu oqo , a kaya o koya, “Au vakila me’u lomana vakalevu cake sara na Turaga ena noqu bula” (raica na “Domo Eso ni Veivakalesuimai: iVakadinadina Eso ni ‘Raivotu’”). Na cava o vulica me baleti Jisu Karisito mai na tikina e 1–5, 20–24, 39–43, 107–8 e vakavuna mo lomani Koya vakalevu cake?

Raica talega na 1 Pita 3:18–19; 4:6; Dallin H. Oaks, “Na Cava Sa Cakava na Noda iVakabula ena Vukuda?,” Liaona, Me 2021, 75–77; “Loloma i Jisu,” Sere ni Lotu, naba 110.

Vakanamata vei Tamada Vakalomalagi, Jisu Karisito, kei na Nodrau ivunau Mai na veika kece eda rawa ni vulica ena ivolanikalou, na veidina bibi duadua e vukei keda me da tara cake na noda vakabauta na Tamada Vakalomalagi kei Jisu Karisito, veivutuni, cakava ka maroroya na veiyalayalati vata kei Rau, ka ciqoma na Yalo Tabu. E dina ni taleitaki beka me da vakatauvatana se vakadikeva na ivakarau ni bula se itovo ni tamata era na ciqoma na veimatanitu lagilagi duidui, e bibi cake me da vakanamata ga vua na Tamada Vakalomalagi kei na iVakabula. Na veika kece e Rau cakava me vakarautaki keda ki na lagilagi oya ena vagolei keda yani vei Rau.

Ena loma ni rumu oqo, a raica kina o Josefa Simici na raivotu e volai tu ena Vunau kei na Veiyalayalati 76.

Vunau kei na Veiyalayalati 76:5–10, 114–18

Au rawa ni kila na loma ni Kalou “ena kaukauwa ni Yalo Tabu.”

A sega ni rawarawa vei ira kece na lewe ni Lotu me ra ciqoma na ivakatakila ena wase 76, baleta ni vakavulica ni voleka ni o ira kece era na vakabulai ka ciqoma eso na ivakatagedegede ni lagilagi. Me ivakaraitaki, a kaya o Brigham Young: “Na noqu ivakarau e a vaoqo, ni a yaco taumada mai vei au na Raivotu, e a veibasai saraga ka veisaqasaqa ki na noqu vuli taumada. Au a kaya, Wawa vakalailai. Au a sega ni cata; Ia au a sega sara ni kila vakavinaka.” A vakamacalataka o koya ni a “vakasamataka ka masulaka, ka wilika ka vakasamataka, me yacova na gauna au a kila ka ciqoma kina vakavinaka sara vakataki au” (ena “The Vision,” ena Revelations in Context,, 150). Na cava o vulica mai na veika a sotava o koya ka rawa ni vukei iko ni vakatakila mai na Kalou na veika e duidui mai na nomu kila ena gauna oqo? Na cava o vulica me baleta na Kalou ena Vunau kei na Veiyalayalati 76:5–10, 114–18? Na cava era vakavulica na veitikina oqo me baleta na sala o rawa ni kila kina “na … lewa loloma [ni Kalou]”? (tikina e 7).

Vunau kei na Veiyalayalati 76:39–44, 50–70

Na bula vakacerecerei sai koya na ivakarau cecere duadua ni veivakabulai.

Na Vunau kei na Veiyalayalati 76:39–44 e vakamacalataka vakararaba na veivakabulai. Na veitikina e 50–70 e vakamacalataka na bula vakacerecerei, e dua na mataqali veivakabulai vakatabakidua. O na vakamacalataka vakacava na duidui ni veivakabulai kei na bula vakacerecerei? Na cava na itavi ni iVakabula ena ituvatuva ruarua oqo? Na cava o raica ena veitikina oqo e vakauqeti iko mo vakasaqara na bula vakacerecerei?

Raica talega na Joni 3:16–17; Vunau kei na Veiyalayalati 132:20–25.

Vunau kei na Veiyalayalati 76:50–70, 92–95

E vinakata na Tamaqu Vakalomalagi me’u rawata na bula tawamudu ena matanitu vaka silesitieli.

O sa bau lomatarotarotaka beka—se lomaleqataka—me baleta na nomu rawa ni vakataka na tamata ka na ciqoma na lagilagi vakasilesitieli, me vaka e vakamacalataki ena Vunau kei na Veiyalayalati 76:50–70, 92–95? E dina ni bibi me da kila na veika e namaka vei keda na Kalou, navuca talega mo vaqara ena veitikina oqo na veika sa cakava ena vukuda na Kalou—ka sa cakava tiko—me vukei keda me da vakataki Koya. Na cava o nanuma ni bibi kina Vua na nomu sasaga eso?

E veisautaka vakacava na sala o gadreva kina mo bulataka na nomu bula e veisiga na raivotu ni lagilagi vakasilesitieli oqo?

Raica talega na Mosese 1:39; J. Devn Cornish, “Au sa Vinaka Li? Au na Rawata Li?,” Liaona, Nove. 2016, 32–34.

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 76:24

Eda sa luvena kece na Kalou.

• Me vukei ira na luvemu me ra kila na kedra inaki vakalou, e rawa ni o vakaraitaka vei ira na kedra iyaloyalo na gone kei na nodra itubutubu. Sa rawa ni o qai wilika na Vunau kei na Veiyalayalati 76:24 ka veiwaseitaka na vuna o marautaka kina me kila ni da sa “luvena tagane ka luvena yalewa … na Kalou.”

• Sa rawa talega mo ni lagata vata na “Au Luve ni Kalou” (iVolanisere ni Gonelalai, 2–3) ka sureti ira na luvemu me ra dusi ira vakai ira ni ra lagata na “Au.” Qai lagata tale na sere, ka sosomitaka na “Au” kei na “iko” ni ra dusi tiko vua e dua tale.

Vunau kei na Veiyalayalati 76:5, 41–42, 69

Sa noqu iVakabula o Jisu Karisito.

• Sa rawa mo dramataka vata kei ira na luvemu e dua na ituvaki ka taroga kina e dua, “Na cava sa cakava o Jisu Karisito me baleti au?” Sa rawa vei iko kei ira na luvemu mo ni raica na isaunitaro ena tikina e 5, 41–42, se 69 ena wase 76. Sa rawa talega mo ni lagata na “Tala Mai na Luvena,” iVolanisere ni Lalai, 20. Eda na vakaraitaka vakacava na noda vakavinavinakataka na veika sa cakava na iVakabula ena vukuda?

Kena matailalai mai na Dou Laivi Ira na Gone Lalai, mai vei J. Kirk Richards

Vunau kei na Veiyalayalati 76:62

E vinakata na Tamada Vakalomalagi me’u lesu tale ka laki bula tawamudu vata kei Koya.

• E rawa ni o wilika se sarava vakatikina se sarava taucoko kei ira na luvemu na “Wase 26: Na Matanitu Lagilagi e Tolu mai Lomalagi” (ena iTukuni mai na Vunau kei na Veiyalayalati,, 97–103, se na kena vidio ena Gospel Library) ka wasea vakai kemuni na veika o ni taleitaka me baleta na raivotu i Josefa Simici. Me ra wasea na luvemu na nodra nanuma kei na veika era vakila ni na vakacava tu beka me ra laki bula vata kei na Tamada Vakalomalagi ena matanitu vakasilesitieli.

  Chapter 26: The Three Kingdoms of Heaven: 16•February 1832

• E rawa talega ni o wilika na Vunau kei na Veiyalayalati 76:62 ka sureta me ra droinitaka na kedra iyaloyalo vata kei na Tamada Vakalomalagi kei Jisu Karisito ena matanitu vakasilesitieli (raica na tabana ni itaviqaravini macawa oqo).

Vunau kei na Veiyalayalati 76:12, 15–19, 114–16

Na vulici ni ivolanikalou sa rawa ni vukei au me’u “kila na veika vuni ni Kalou.”

• E rawa ni o sureti ira na luvemu me ra wilika na tikina e 15–19 me ra kila na ka erau a cakava o Josefa Simici kei Sidney Rigdon ni rau raica na raivotu ena Vunau kei na Veiyalayalati 76. Tukuna vei ira na luvemu me baleta e dua na gauna o a ciqoma kina na veivakauqeti ni o wilika tiko na ivolanikalou, ka tarogi ira kevaka era sa sotava talega na veika vata oqori.

Me baleta na vakasama tale eso, raica na ilavelave ni mekasini na iTokani ni vula oqo.

Lagilagi vaka iTagede,, mai vei Annie Henrie Nader