“Domo Eso ni Veivakalesuimai: iVakadinadina Eso ni ‘Raivotu’,” Lako Mai, Mo Muri Au—Me Baleta na iTikotiko kei na Lotu: Vunau kei na Veiyalayalati 2025 (2025)

“iVakadinadina Eso ni ‘Raivotu’,” Lako Mai, Mo Muri Au —Me Baleta na iTikotiko kei na Lotu: 2025

Domo Eso ni Veivakalesuimai: iVakadinadina Eso ni “Raivotu”

Wilford Woodruff

A lewena na Lotu o Wilford Woodruff ena Tiseba 1833, voleka ni rua na yabaki ni oti nodrau ciqoma o Josefa Simici kei Sidney Rigdon na raivotu ka volai tu ena Vunau kei na Veiyalayalati 76. E a vakaitikotiko okoya mai New York ena gauna o ya ka vulica me baleta “na Raivotu” mai vei ira na daukaulotu era veiqaravi tiko ena vanua o ya. Ena veiyabaki e muri a tukunikataka okoya na nona vakanananu eso me baleta na ivakatakila oqo:

“Au a vakavulici mai na noqu gauna ni gone ni dua na Lomalagi ka dua na Eli, ka tukuni vei au ni sa dua vata ga na kedra itotogi na dau caka ca kece ka dua vata ga na nodra lagilagi na ivalavala dodonu. …

“… Ni’u wilika na raivotu … , e a vakararamataka noqu vakasama ka solia vei au na reki levu, sa kena irairai vei au ni Kalou ka vakatakila mai na ivakavuvuli vei ira na tamata e a vuku, dodonu ka dina, ka taukena ruarua na vinaka ni itovo ni bula kei na vakasama vinaka kei na kila ka vinaka duadua, ka’u vakila me’u lomana vakalevu cake sara na Turaga ena noqu bula.”

“Na ‘Raivotu’ [sa ikoya] e dua na ivakatakila ka vakavotui kina e levu cake na rarama, na dina kei na ivakavuvuli mai na ivakatakila kecega ka volai tu ena ivola kecega eda sa bau wilika. E vakamatatataka ki na noda vakasama na keda ituvaki ena gauna oqo, na vanua eda a lako mai kina, na cava eda mai tiko kina eke, kei na vanua eda lako tiko kina. Ena rawa ni kila mai na ivakatakila oqori e dua ga na tamata se na vakacava na nona tikina kei na nona ituvaki.”

“Ni bera ni’u se raici Josefa au a kaya ni’u sega ni kauwaitaka se sa yabaki vica okoya, se vakacava na nona gone o koya; Au sega ni kauwaitaka se vakacava na kena irairai—se balavu sara na uluna se lekaleka; na tamata ka tosoya yani ki liu na ivakatakila oya [na raivotu e volai tu ena wase 76] e a dua na parofita ni Kalou. Au a kila ga vakai au.”

Phebe Crosby Peck

Ni rogoca o Phebe Peck na nodrau vakavulica o Josefa kei Sidney “na Raivotu,” e a vakaitikotiko voli kina mai Missouri ka susugi ira cake tiko e lima na luvena vaka dua na tina sega ni vakawati. E a vakurabuitaki ka vakauqeti koya vakalevu sara na raivotu ka vola kina okoya na veika oqo me wasea na veika e sa kila rawa vata kei na nona vuvale raraba:

“Na Turaga sa vakatakila tiko mai na veika vuni ni Matanitu vakalomalagi vei ira na Luvena. … Erau a sikovi keitou o Josefa Simici kei Sidney Rigdon ena vulaitubutubu sa oti, ka levu na neitou soqoni rekitaki ena nodrau a tiko eke, ka vuqa na veika vuni a cereki ki matai keitou, ka solia vei au na vakacegu cecere. Keitou a rawa ni raica kina na lako sobu mai ni Kalou ni vakarautaka tiko na tikina eso ni vakacegu baleti ira na luvena. Ia ko koya yadua ena sega ni ciqoma na taucoko ni kosipeli ka tu me sotia qaqa ena inakinaki i Karisito ena sega ni rawa ni tiko ena iserau ni Tamada kei na Luvena. Ia sa vakarautaki tu e dua na vanua vei ira kece era sega ni ciqoma, ia sa ikoya na vanua ni lagilagi e lailai sobu sara mai na tiko ena matanitu vaka-Silesitieli. Au na sega ni tovolea meu vakuria me baleta na veika oqo ni ra sa tabaki rawa ka sa lako tiko yani ki vuravura. Ia ena rairai nomu e dua na madigi mo wilika vakai iko, ka kevaka o cakava oqori, au nuitaka ni o na wilika ena dua na yalo mareqeti kei na vakamamasu, ni sa kilikili kaya me kilai na veika oqo. Ka’u gadreva mo vakasaqaqara sara kina, ni sai koya oqo e sa solia wale mai na noda marau ena vuravura oqo kei na vuravura sa bera mai.”