Independence, Missouri, 1831, mai vei Al Rounds

2–8 ni June: “Gumatua ena Cakacaka Vinaka”

Vunau kei na Veiyalayalati 58–59

Ena gauna era sa raica kina na italatala qase ena Lotu ena imatai ni gauna na vanua ni siti o Saioni—Independence, Missouri—a sega ni kena era a namaka. Eso era a nanuma ni ra na raica e dua na itikotiko raraba sa rawati koya tu, ka gugumatua vata kei na dua na ilawalawa Yalododonu kaukauwa. Ia era a kunea ga e dua na itikotiko lailai e taudaku, e sega kina na veivakatorocaketaki era matau kina ka ra tu ga kina eso na lewenivanua voravora ena iyala ni vanua ka ra sega kina na Yalododonu. Ia a qai laurai ni a sega ni kerea na Turaga me ra lako walega mai ki Saioni—a vinakata o Koya me ra mai tarai Saioni cake.

Ni sega ni veisotari na veika eda namaka kei na ka dina e yaco, eda rawa ni nanuma na ka a kaya na Turaga vei ira na Yalododonu ena 1831: “Dou na sega ni raica rawa e matamudou vakayago, ena gauna oqo, na ituvatuva ni nomudou Kalou … kei na lagilagi ena muria mai ni sa oti e vuqa na veika rarawa” (Vunau kei na Veiyalayalati 58:3). Io, na bula e sinai tu ena veika dredre, na ivalavala ca sara mada ga, ia eda se rawa tikoga ni “vakayacora na veika dodonu eso; [ni] sa tu vei [keda] na kaukauwa” (tikina e 27–28).

Raica talega na Ira na Yalododonu,, 1:127–33.

Vakasama eso ni Vuli ena iTikotiko vakakina ena Lotu

Vunau kei na Veiyalayalati 58:1–5; 59:23

“Ni sa oti na veika rarawa ena yaco na veivakalougatataki.”

Era a nuitaka na Yalododonu ni ena nodra bula taucoko, ena seraka mai na yasayasa vaka-Jekesoni ki Saioni, e dua na vanua me ra na soqoni vata kece mai kina na Yalododonu. Ia, na nodrau gauna ena yasayasa vaka-Jekesoni a sinai ena veivakararawataki. Ena loma ga ni vica na yabaki, era a vakasaurarataki me ra biubiu ka “waraka vakalailai tale mada … na kena vueti ko Saioni” (Vunau kei na Veiyalayalati 105:9).

Na cava o vulica me baleta na dredre se bolebole eso mai na vosa ni Turaga ena Vunau kei na Veiyalayalati 58:1–5? Na cava o nanuma kina ni so na veivakalougatataki e dau yaco ga mai ni oti na veika dedre? Na veivakalougatataki cava beka o sa ciqoma ni oti na veika dredre?

Na cava o vulica mai na Vunau kei na Veiyalayalati 59:23 e kauta mai vei iko na inuinui?

Vunau kei na Veiyalayalati 58:26–29

Au rawa ni “vakayacora na veika dodonu eso” ena noqu “kila ga vakataki [au].”

Me tiki ni nomu vulica na veitikina oqo, o na cakava beka e dua na lisi ni so na ka o sa “gumatua[taka]” tiko. Era sa “cakacaka vinaka” kece sara beka? Vakasamataka vakatitobu na cava o rawa ni cakava mo “vakayacora na veika dodonu eso”—ka navuca mo vakarautaka na lalawa mo cakava kina.

Na cava o nanuma e vinakata kina na Turaga mo cakava “e levu na ka mai na [nomu] kila ga”? Na cava ena yaco kevaka o “waraka ga me kitaka na ka e tukuni [vei iko] ena veika taucoko”? Na cava e vakuria na 2 Nifai 2:27 ki na nomu kila na ivakavuvuli oqo?

Raica talega na Dale G. Renlund, “Mo ni Digitaki Koya Edaidai,” Liaona, Nove. 2018, 104–6.

Vunau kei na Veiyalayalati 58:42–43

E vosoti au na Turaga ni’u veivutuni.

Na yalayala ni Turaga ena Vunau kei na Veiyalayalati 58:42 me vosoti ira vakataucoko o ira era veivutuni e veivakauqeti, dina ga ni vakavurea eso na taro: Na cava na kena ibalebale me da veivutuni? Au na kila vakacava kevaka au sa veivutuni? E kalougata, ni a tomana na Turaga, “Ena ka oqo dou na kila kina…” (tikina e 43).

Oqo eso tale na taro e dau tu vei ira na tamata ena so na gauna me baleta na veivutuni. Na cava e vakavulica vei iko na Yalotabu ni o vulica na ivurevure vakaturi e vakarautaki toka e ra?

E vukei au vakacava me’u veivutuni na vakatusai ni noqu ivalavala ca? Raica na Same 32:1–5; Na Vosa Vakaibalebale 28:13; Mosaia 27:34–37; Alama 39:12–13.

Au sa saga tiko me’u biuta laivi na noqu ivalavala ca, ia au dau caka cala tikoga. E se vakabau tiko beka ga na noqu veivutuni? Raica na Bradley R. Wilcox, “Na Bula Kilikili e Sega ni Yali Kina na Cala,” Liaona, Nove. 2021, 61–67; “Daily Restoration” (vidio), Gospel Library.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

Me’u na vakadeitaka vakacava ni sa vosoti au na iVakabula? Raica na Tad R. Callister, “Na Veisorovaki i Jisu Karisito,” Liaona, Me 2019, 85–87, vakabibi na iwase ka kena ulutaga “2. iValavala Ca.”

E rawa ni o kunea eso tale na raititobu ena “Taro kei na Kena iSau” me baleta na veivutuni ena Me iSakisaki ni iTabagone: E Dua na iDusidusi ni Digidigi (tabana e 8–9).

Raica talega na Veiulutaga kei na Veitaro, “Repentance,” Gospel Library.

Vunau kei na Veiyalayalati 59

O cei beka o Polly Knight?

O Polly Knight kei na watina, o Joseph Knight Sr., rau a dua vei ira era a imatai me ra vakabauta na veikacivi vakaparofita nei Josefa Simici. E rau a tokona vakabibi sara na Parofita ena cakacaka ni kena vakadewataki na iVola i Momani o Polly kei Joseph. E ratou a biubiu mai na vuvale na Knight mai Colesville, New York, me ratou laki soqoni vata kei ira na Yalododonu mai Ohio ka tarava sara nodra sa vakaroti me ra toki yani ki na yasayasa vaka-Jekesoni, Missouri. Ni ra lako tiko, a tekivu me torosobu na bula nei Polly, ia a yalodei tikoga me na raici Saioni ni bera ni mate. A mai vica walega na siga na nona tiko e Missouri ni qai takali yani (raica na Ira na Yalododonu,, 1:127–28, 132–33). Na Vunau kei na Veiyalayalati 59 a ciqomi ena siga a mate kina, kei na tikina e 1 kei na 2 e vaka me baleti koya tiko.

Vunau kei na Veiyalayalati 59:4–19.

Era sa dua na veivakalougatataki na iVakaro.

Na cava o nanuma e kena ibalebale me da “vakaisalataki … ena ivakaro”? (tikina e 4). Vakasamataka na sala e vakalougatataki iko kina na Turaga ena nomu segata mo talairawarawa ki na ivakaro yadua ena tikina e 5–19.

Wasea na veika o sa vulica tiko. Ena vuqa na gauna, na raititobu vakayalo o ciqoma ena nomu vulica na ivolanikalou ena rawa ni vaqaqacotaka na nodra vakabauta na nomu matavuvale, itokani, kei ira na lewe ni tabanalevu. Wasea vei ira na veika o sotava, na veika o vakila, kei na nomu ivakadinadina baleti Jisu Karisito.

Vunau kei na Veiyalayalati 59:9–19

Na Siga ni Vakacecegu e siga ni Turaga.

Ni yalataka oti me vakalougatataki ira na Yalododonu mai Saioni ena “ivakaro e vuqa,” a vakamatatataka vakatabakidua na Turaga e dua na ivakaro: na ivakaro me ra rokova na Nona “siga tabu” (Vunau kei na Veiyalayalati 59:4, 9). Ni ko vulica na Vunau kei na Veiyalayalati 59:9–19, vakasamataka vakatitobu na vuna a rairai bibi kina me ra rokova na Siga ni Vakacecegu o ira na Yalododonu oqo ni ra saga voli me ra tarai Saioni. Na cava e bibi kina vei iko?

E rawa talega ni o vakasamataka vakatitobu se o vakayagataka tiko li na Siga ni Vakacecegu ena sala a nakita na Turaga. E vukei iko vakacava na vakatabui ni Siga ni Vakacecegu me “kakua ni tauvi iko na duka ni ka vakavuravura”? (tikina e 9). Na cava o rawa ni cakava mo “qaravi koya ga sa Cecere Sara”? (tikina e 10).

O na raica beka ni a vakayagataka na Turaga na vosa me vaka na “yalomarau,” “yaloreki,” kei na “mamarau” me vakavulica na veika e baleta na Siga ni Vakacecegu. Na cava e vakavuna me dau ka rekitaki vei iko na Siga ni Vakacecegu? O na vakamacalataka vakacava vua e dua na vuna o digitaka kina mo rokova na siga ni Turaga?

Na cava o vulica mai na serenilotu “Vueta Cake Nai Vunau” (Serenilotu, naba 85) me baleta na inaki kei na veivakalougatataki ni Siga ni Vakacecegu?

Raica talega na Nai Vakatekivu 2:2–3; Aisea 58:13–14; Russell M. Nelson, “Me Ka e Rekitaki na Siga ni Vakacecegu,” Liaona, Me 2015, 129–32.

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 58:26–28

Sa solia vei au na Tamada Vakalomalagi na kaukauwa me’u digidigi.

• Na wiliki vata ni Vunau kei na Veiyalayalati 58:26–28 e rawa ni solia vei iko kei ira na luvemu e dua na madigi me veivosakitaka na kaukauwa sa solia vei keda na Tamada Vakalomalagi me da digitaka kina na caka vinaka. O ni na rairai veitalanoataka beka vakai kemuni me baleta na digidigi eso o ni sa cakava kei na ka a yaco me kena isau Era na vinakata beka na luvemu me ra droinitaka e dua na iyaloyalo ni veika era sotava.

• Sa rawa mo vola na digidigi ena dua na yasa ni pepa kei na kena revurevu ena yasana kadua ka vakayagataka na pepa oqo me vakaraitaka ni noda digidigi kei na kena revurevu e rau sega ni tawasei rawa. Sa rawa vei ira na luvemu me ra vola e vica na digidigi ka veivosakitaka na kena revurevu e lako mai vei ira. Mo ni qai wilika vata na Vunau kei na Veiyalayalati 58:27–28 ka veivosakitaka na digidigi e “vakayacora na veika dodonu eso” se na revurevu vinaka. E dau vakalougatataki se solia vakacava vei keda na “kena isau” na Tamada Vakalomalagi ni da segata me da caka vinaka? (tikina e 28).

Vunau kei na Veiyalayalati 59:7, 18–21

“Vakavinavinakataka na Turaga na nomu Kalou ena veika kecega.”

• Navuca mo wilika na veitikina oqo ni o lako vata kei ira na luvemu mo ni taubale se raica na iyaloyalo ni veika bula, ka vakaraica na veika e “reki kina na mata ka marau kina na yalo” (tikina e 18). E rawa talega ni o raica na veika vata oqo ena dua na sere me vaka na “Rogoca na Sere ni Manumanu” (iVolanisere ni Gonelalai, 16). Se o rawa ni sureti ira me ra droinitaka na iyaloyalo ni veika era vakavinavinakataka ka laiva me ra tukuna vei iko me baleta na nodra droini. Me da na vakaraitaka vakacava na noda vakavinavinaka me baleta na veika oqo?

A bulia na Turaga e vuqa na ka totoka me kauta mai vei keda na reki.

Vunau kei na Veiyalayalati 59:9–12

Na Siga ni Vakacecegu e siga ni Turaga.

• Na cava eda rawa ni cakava ena Sigatabu me da sokalou vua na Turaga ka kunea na reki? Vukei ira na luvemu me ra raica na vakasama eso ena Vunau kei na Veiyalayalati 59:9–12 kei na tabana ni itaviqaravi ena macawa oqo. E rawa talega ni ra kunea na iyaloyalo se iyaya me matataka na veika eda cakava ena Siga ni Vakacecegu (me vaka na iyaloyalo ni sakaramede ena ituvatuva oqo). Ena vukei keda vakacava na veika oqo me da vakila ni da voleka cake vei Tamada Vakalomalagi kei Jisu Karisito?

Me baleta na vakasama tale eso, raica na ilavelave ni mekasini na iTokani ni vula oqo.

Droini mai vei Marti Major