« ថ្ងៃទី ១៩–២៥ ខែ ឧសភា ៖ ‹ អ្វីដែលមកពីព្រះ ជាពន្លឺ › ៖ គោលលទ្ធិ និងសេចក្តីសញ្ញា ៤៩–៥០ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ៤៩–៥០ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ថ្ងៃទី ១៩–២៥ ខែ ឧសភា ៖ « អ្វីដែលមកពីព្រះ ជាពន្លឺ »

គោលលទ្ធិ និងសេចក្តីសញ្ញា ៤៩–៥០

ព្រះអង្គសង្គ្រោះគឺជា « អ្នកគង្វាលល្អ » របស់យើង ( គោលលទ្ធិ និងសេចក្ដីសញ្ញា ៥០:៤៤ ) ។ ទ្រង់ជ្រាបថា ពេលខ្លះចៀមដើរវង្វេងផ្លូវ ហើយទីរហោស្ថានមានគ្រោះថ្នាក់ជាច្រើន ។ ដូច្នេះ ទ្រង់ដឹកនាំយើងពេញដោយក្តីស្រឡាញ់ ទៅរកសុវត្ថិភាពនៃគោលលទ្ធិរបស់ទ្រង់ ។ ទ្រង់ដឹកនាំយើងចេញឆ្ងាយពីគ្រោះថ្នាក់ដូចជា « វិញ្ញាណក្លែងក្លាយ ដែលបានចេញទៅលើផែនដី ដោយបោកបញ្ឆោតមនុស្សលោក » ( គោលលទ្ធិ និងសេចក្ដីសញ្ញា ៥០:២ ) ។ ជាញឹកញាប់ ការធ្វើតាមទ្រង់មានន័យថា ការបោះបង់គំនិត ឬប្រពៃណីមិនត្រឹមត្រូវចេញ ។ នេះជាការពិតសម្រាប់ លីម៉ាន ខូព្លី និងអ្នកផ្សេងទៀតនៅរដ្ឋអូហៃអូ ។ ពួកគេបានទទួលយកដំណឹងល្អដែលបានស្ដារឡើងវិញ ប៉ុន្តែនៅតែប្រកាន់ខ្ជាប់នូវជំនឿមួយចំនួនដែលមិនត្រឹមត្រូវ ។ នៅក្នុង គោលលទ្ធិ និងសេចក្តីសញ្ញា ៤៩ ព្រះអម្ចាស់បានប្រកាសពីសេចក្ដីពិត ដែលបានកែតម្រូវជំនឿពីមុនរបស់ លីម៉ាន ស្ដីពីប្រធានបទដូចជាអាពាហ៍ពិពាហ៍ និងការយាងមកជាលើកទីពីររបស់ព្រះអង្គសង្គ្រោះ ។ ហើយពេលអ្នកប្រែចិត្តជឿនៃរដ្ឋអូហៃអូ « បានទទួលវិញ្ញាណទាំងឡាយ ដែល [ ពួកគេ ] ពុំអាចយល់ » ព្រះអម្ចាស់បានបង្រៀនពួកគេអំពីរបៀបបែងចែកការបើកបង្ហាញនៃព្រះវិញ្ញាណពិត ( គោលលទ្ធិ និងសេចក្តីសញ្ញា ៥០:១៥ ) ។ អ្នកគង្វាលល្អគឺមានអំណត់ជាមួយនឹងយើង—« កូនក្មេងតូច » របស់ទ្រង់ ដែល « ត្រូវតែចម្រើនឡើងក្នុងព្រះគុណ និងក្នុងការចេះដឹងអំពីសេចក្ដីពិត » ( គោលលទ្ធិ និងសេចក្ដីសញ្ញា ៥០:៤០ ) ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្តីសញ្ញា ៤៩; ៥០:២៤

ព្រះយេស៊ូវគ្រីស្ទចង់ឲ្យខ្ញុំទទួលយកសេចក្តីពិតនៃដំណឹងល្អរបស់ទ្រង់ ។

ពីមុនចូលរួមក្នុងសាសនាចក្រ លីម៉ាន ខូព្លី ជាផ្នែកនៃក្រុមសាសនាមួយដែលគេហៅថា សមាគមនៃពួកអ្នកជឿដល់ការយាងមកលើកទីពីររបស់ព្រះគ្រីស្ទ ដែលគេស្គាល់ថាជា ពួកសេកើរ ។ ក្រោយពីការសន្ទនាជាមួយនឹងលីម៉ាន យ៉ូសែប ស្ម៊ីធបានស្វែងរកការបញ្ជាក់ពីព្រះអម្ចាស់អំពីការបង្រៀនរបស់ពួកសេកើរមួយចំនួន ។ ព្រះអម្ចាស់បានឆ្លើយតបជាមួយនឹងវិវរណៈនៅក្នុង កណ្ឌទី ៤៩ ។ ជំនឿមួយចំនួនរបស់ពួកសេកើរ ត្រូវបានលើកឡើងនៅក្នុងក្បាលកណ្ឌនេះ ។

តើព្រះអម្ចាស់បង្រៀននៅក្នុង កណ្ឌទី ៤៩ ដើម្បីកែតម្រូវជំនឿរបស់ពួកសេកើរ ? តើភស្តុតាងអ្វីខ្លះដែលអ្នកឃើញនៅក្នុងវិវរណៈនៃសេចក្តីស្រឡាញ់ និងការព្រួយបារម្ភរបស់ទ្រង់ចំពោះអ្នកដែលមិនមានភាពពេញលេញនៃសេចក្តីពិតរបស់ទ្រង់ ? តើបងប្អូនអាចឈោងទៅជួយដល់ពួកគេដោយសេចក្ដីស្រឡាញ់ និងការព្រួយបារម្ភដោយរបៀបណា ?

តើបងប្អូនចាប់អារម្មណ៍អ្វីអំពីការសង្កេតឃើញរបស់ព្រះអម្ចាស់នៅក្នុង ខទី ២ ? បងប្អូនអាចប្រៀបធៀបការណ៍នេះទៅនឹងអ្វីដែលកើតឡើង ប្រសិនបើបងប្អូនមើលតែមួយផ្នែកនៃភាពយន្ត ឃើញមួយផ្នែកនៃល្បែងផ្គុំរូប ឬស្តាប់តែភាគីម្ខាងនៃជម្លោះ ។ តើការព្រមានរបស់ព្រះអម្ចាស់ទាក់ទងនឹង គោលលទ្ធិ និងសេចក្តីសញ្ញា ៥០:២៤ ដោយរបៀបណា ? សូមពិចារណាអំពីអ្វីដែលបងប្អូនកំពុងធ្វើ ដើម្បីទទួលបានពន្លឺបន្ថែមពីព្រះអម្ចាស់ ។

សូមមើលផងដែរ « Leman Copley and the Shakers » នៅក្នុង Revelations in Context ទំព័រ ១១៧–១២១ ។

គោលលទ្ធិ និងសេចក្តីសញ្ញា ៤៩:១៥–១៧

អាពាហ៍ពិពាហ៍រវាងបុរស និងស្ត្រី គឺជាផ្នែកមួយដ៏សំខាន់ក្នុងផែនការរបស់ព្រះ ។

នៅក្នុងកិច្ចប្រឹងប្រែងមួយដើម្បីបំផ្លាញផែនការរបស់ព្រះវរបិតាសួគ៌ សាតាំងព្យាយាមបង្កើតភាពច្របូកច្របល់អំពីអាពាហ៍ពិពាហ៍ ។ ម្យ៉ាងវិញទៀត ព្រះអម្ចាស់បន្តបើកសម្ដែងសេចក្ដីពិតអំពីអាពាហ៍ពិពាហ៍តាមរយៈព្យាការីរបស់ទ្រង់ ។ បងប្អូនអាចស្វែងរកសេចក្តីពិតទាំងនេះមួយចំនួននៅក្នុង គោលលទ្ធិ និងសេចក្តីសញ្ញា ៤៩:១៥–១៧; លោកុប្បត្តិ ២:២០–២៤; កូរិនថូស ទី១ ១១:១១ និង « ក្រុមគ្រួសារ ៖ សេចក្តីប្រកាសដល់ពិភពលោក » ។ សូមធ្វើបញ្ជីនៃសេចក្តីពិតដែលបងប្អូនរកឃើញ ។ ហេតុអ្វីអាពាហ៍ពិពាហ៍មានសារៈសំខាន់ខ្លាំងម្ល៉េះចំពោះផែនការរបស់ព្រះ ?

អែលឌើរ អូលីសេស សូរ៉េស បានបង្រៀនថា « ដំណឹងល្អដែលបានស្តារឡើងវិញរបស់ព្រះយេស៊ូវគ្រីស្ទប្រកាសអំពីគោលការណ៍នៃភាពជាដៃគូដ៏ពេញលេញរវាងបុរស និងស្ត្រី ទាំងជីវិតរមែងស្លាប់ និងភាពអស់កល្បជានិច្ច » ( « ក្នុងភាពជាដៃគូជាមួយនឹងព្រះអម្ចាស់ » លីអាហូណា ខែ វិច្ឆិកា ឆ្នាំ ២០២២ ទំព័រ ៤២ ) ។ បងប្អូនអាចសិក្សាសារលិខិតនេះ ដោយរកមើលគោលការណ៍គ្រឹះ « ដែលពង្រឹងភាពជាដៃគូរវាងបុរស និងស្រ្តី » ។ តើបងប្អូនអាចអនុវត្តគោលការណ៍ទាំងនេះនៅក្នុងជីវិតរបស់បងប្អូនដោយរបៀបណា ? ប្រសិនបើមាននរណាម្នាក់មានជំនឿផ្សេងដទៃបងប្អូនសួរបងប្អូនថា ហេតុអ្វីបានជាអាពាហ៍ពិពាហ៍សំខាន់ តើបងប្អូននឹងឆ្លើយតបដោយរបៀបណា ? ហេតុអ្វីបានជាបងប្អូនមានអំណរគុណចំពោះការយល់ដឹងនេះ ?

សូមមើលផងដែរ Topics and Questions « Marriage » « Family » នៅលើបណ្ណាល័យ ដាវីឌ អេ បែដណា « Marriage Is Essential to His Eternal Plan » Ensign ខែ មិថុនា ឆ្នាំ ២០០៦ ទំព័រ ៨៣–៨៤ « Renaissance of Marriage » ( វីដេអូ ) នៅលើបណ្ណាល័យដំណឹងល្អ ។

សូមប្រយ័ត្នប្រយែងចំពោះស្ថានភាពរបស់បុគ្គលម្នាក់ៗ ។ ខណៈពេលដែលអាពាហ៍ពិពាហ៍ដ៏រីករាយ និងជីវិតគ្រួសារគឺមានសារៈសំខាន់នៅក្នុងដំណឹងល្អនៃព្រះយេស៊ូវគ្រីស្ទ នោះយើងទាំងអស់គ្នាមិនអាចរីករាយនឹងពរជ័យទាំងនេះក្នុងជីវិតរមែងស្លាប់ឡើយ ។ នៅក្នុង ការពិភាក្សាអំពីប្រធានបទនេះ សូមប្រយ័ត្នប្រយែងនូវកាលៈទេសៈផ្សេងៗរបស់បុគ្គល និងគ្រួសារ ជាពិសេសចំពោះអ្នកដែលកំពុង « អត់ឱនរង់ចាំព្រះអម្ចាស់ » ដើម្បីបំពេញសេចក្តីសន្យាដ៏អស់កល្បជានិច្ច ( សូមមើល គោលលទ្ធិ និងសេចក្តីសញ្ញា ៩៨:១–៣ ) ។

គោលលទ្ធិ និងសេចក្តីសញ្ញា ៥០

ការបង្រៀនរបស់ព្រះអម្ចាស់អាចការពារខ្ញុំពីការបញ្ឆោតរបស់សាតាំង ។

សមាជិកថ្មីនៃសាសនាចក្រនៅរដ្ឋអូហៃអូ មានចិត្តអន្ទះសាចង់ទទួលបានការបើកសម្ដែងខាងវិញ្ញាណ ដែលបានសន្យានៅក្នុងព្រះគម្ពីរ ។ ទោះជាយ៉ាងណា សាតាំងមានចិត្តចង់បញ្ឆោតពួកគេ ។ ប្រសិនបើបងប្អូនត្រូវបានសុំឲ្យជួយសមាជិកទាំងនេះយល់អំពីរបៀបដើម្បីស្គាល់ការបើកសម្ដែងពិតប្រាកដនៃព្រះវិញ្ញាណបរិសុទ្ធ តើគោលការណ៍អ្វីខ្លះនៅក្នុង គោលលទ្ធិ និងសេចក្តីសញ្ញា ៥០ ដែលបងប្អូននឹងចែកចាយ ? ( សូមមើលជាពិសេស ខទី ២២–២៥, ២៩–៣៤, ៤០–៤៦ ) ។ តើព្រះអង្គសង្គ្រោះបានជួយបងប្អូនឲ្យដឹងអំពីភាពខុសគ្នារវាងសេចក្ដីពិត និងកំហុសឆ្គងដោយរបៀបណា ?

សូមមើលផងដែរ កូរិនថូស ទី១ ១៤:១–២៨; ធីម៉ូថេ ទី២ ៣:១៣–១៧ ។

គោលលទ្ធិ និងសេចក្តីសញ្ញា ៥០:១៣–២៤

គ្រូបង្រៀន និងសិស្សត្រូវបានបំភ្លឺរួមគ្នាតាមរយៈព្រះវិញ្ញាណ ។

ការរស់នៅតាមដំណឹងល្អនៃព្រះយេស៊ូវគ្រីស្ទ ផ្តល់ឱកាសជាច្រើនដើម្បីធ្វើជាគ្រូបង្រៀន និងជាសិស្សទាំងនៅផ្ទះ និងនៅព្រះវិហារ ។ របៀបមួយដែលបងប្អូនអាចសិក្សា គោលលទ្ធិ និងសេចក្តីសញ្ញា ៥០:១៣–២៤ គឺត្រូវគូររូបគ្រូបង្រៀន និងសិស្ស ។ នៅក្បែរបុគ្គលម្នាក់ៗ សូមធ្វើបញ្ជីពាក្យ និងឃ្លាមកពីខគម្ពីរទាំងនេះ ដែលបង្រៀនបងប្អូននូវអ្វីមួយអំពីការរៀនសូត្រ និងការបង្រៀនដំណឹងល្អ ។ តើបងប្អូនទទួលបានបទពិសោធន៍ ដែលបានបង្រៀនបងប្អូនអំពីសារសំខាន់នៃព្រះវិញ្ញាណនៅក្នុងការបង្រៀន និងការរៀនសូត្រនៅពេលណា ? សូមពិចារណាអំពីអ្វីដែលបងប្អូនអាចធ្វើ ដើម្បីកែលម្អការខិតខំរបស់បងប្អូនក្នុងនាមជាសិស្ស និងគ្រូបង្រៀនដំណឹងល្អ ។

គោលលទ្ធិ និងសេចក្ដីសញ្ញា ៥០:២៣–២៥

« អ្វីដែលមកពីព្រះ ជាពន្លឺ » ។

នៅពេលបងប្អូនជញ្ជឹងគិតអំពីព្រះបន្ទូលរបស់ព្រះអង្គសង្រ្គោះនៅក្នុង គោលលទ្ធិ និងសេចក្តីសញ្ញា ៥០:២៣–២៥ សូមគិតអំពីរបៀបដែលបងប្អូនបានទទួលពន្លឺរបស់ព្រះនៅក្នុងជីវិតរបស់បងប្អូន និងរបៀបដែលបងប្អូន « បណ្ដេញសេចក្ដីងងឹត » ចេញ ។ ឧទាហរណ៍ តើខគម្ពីរទាំងនេះណែនាំជម្រើសរបស់បងប្អូនយ៉ាងដូចម្ដេច អំពីរបៀបចំណាយពេលវេលារបស់បងប្អូន ? តើការកម្សាន្ត ឬប្រព័ន្ធផ្សព្វផ្សាយអ្វីដែលត្រូវស្វែងរក ? តើការសន្ទនាណាដែលត្រូវចូលរួម ? តើការសម្រេចចិត្តអ្វីផ្សេងទៀតដែលខគម្ពីរទាំងនេះអាចជួយបងប្អូនបាន ? ទំនុកតម្កើងដូចជាបទ « ទ្រង់ជាពន្លឺខ្ញុំ » ( ទំនុកតម្កើង ល.រ. ៣៩ ) អាចបំផុសគំនិតបន្ថែម ។

សូមមើលផងដែរ « ដើរក្នុងពន្លឺរបស់ព្រះ » ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ទំព័រ ១៦–២១ ។

គំនិតសម្រាប់បង្រៀនកុមារ

គោលលទ្ធិ និងសេចក្ដីសញ្ញា ៤៩:១២–១៤

ខ្ញុំអាចធ្វើតាមព្រះយេស៊ូវគ្រីស្ទបាន ។

ដើម្បីបង្រៀនកូនៗរបស់បងប្អូនអំពីគោលការណ៍នៅក្នុងខគម្ពីរទាំងនេះ បងប្អូនអាចរៀបចំស្នាមបាតជើងនៅលើក្រដាសចំនួនបួន និងរូបភាពចំនួនបួនសន្លឹកដែលតំណាងឲ្យសេចក្តីជំនឿលើព្រះយេស៊ូវគ្រីស្ទ ការប្រែចិត្ត ពិធីបុណ្យជ្រមុជទឹក និងការទទួលព្រះវិញ្ញាណបរិសុទ្ធ ( សូមមើលរូបភាពនៅក្នុងសប្តាហ៍នេះ ទំព័រសកម្មភាព ) ។ កូនៗរបស់បងប្អូនអាចដាក់ស្នាមបាតជើងនៅលើឥដ្ឋដោយមានរូបភាពនៅក្បែរស្នាមបាតជើងទាំងនេះ ។ បន្ទាប់មក ពួកគេអាចប្តូរវេនគ្នាដើរលើស្នាមបាតជើងនៅពេលបងប្អូនអាន គោលលទ្ធិ និងសេចក្តីសញ្ញា ៤៩:១២–១៤ ។ សូមជួយពួកគេយល់ថានៅពេលយើងធ្វើរឿងនៅក្នុងរូបភាពទាំងនេះ នោះយើងកំពុងធ្វើតាមព្រះយេស៊ូវគ្រីស្ទ ។
បងប្អូនក៏អាចអញ្ជើញកូនៗរបស់បងប្អូនឲ្យប្រៀបធៀបផងដែរ គោលលទ្ធិ និងសេចក្តីសញ្ញា ៤៩:១២–១៤ ជាមួយ កិច្ចការ ២:៣៨ និងជាមួយ មាត្រានៃសេចក្តីជំនឿទីបួន ។ តើពួកគេអាចរកឃើញភាពស្រដៀងគ្នាអ្វីខ្លះ ? ហេតុអ្វីសេចក្ដីពិតទាំងនេះមានសារៈសំខាន់ ?

គោលលទ្ធិ និងសេចក្តីសញ្ញា ៤៩:១៥–១៧

អាពាហ៍ពិពាហ៍រវាងបុរស និងស្ត្រី គឺជាផ្នែកមួយដ៏សំខាន់ក្នុងផែនការរបស់ព្រះ ។

ដើម្បីពន្យល់អំពីខគម្ពីរទាំងនេះ បងប្អូនអាចពន្យល់ថា ពួកសេកើរគឺជាក្រុមដែលជឿថាមនុស្សមិនគួររៀបអាពាហ៍ពិពាហ៍ឡើយ ( សូមមើល ក្បាលកណ្ឌនៃគោលលទ្ធិ និងសេចក្តីសញ្ញា ៤៩ ) ។ សូមអញ្ជើញកូនៗរបស់បងប្អូនឲ្យស្វែងរកដំណើររឿង ដែលព្រះអម្ចាស់បានបង្រៀនអំពីអាពាហ៍ពិពាហ៍នៅក្នុង គោលលទ្ធិ និងសេចក្ដីសញ្ញា ៤៩:១៥–១៧ ។ តើវាមានន័យដូចម្ដេចដែលថា « អាពាហ៍ពិពាហ៍គឺត្រូវបានតែងតាំងមកពីព្រះ » ? ប្រហែលជាបងប្អូនអាចអានរួមគ្នានូវកថាខណ្ឌបីដំបូងនៃ « ក្រុមគ្រួសារ ៖ ការប្រកាសដល់ពិភពលោក » ។ បន្ទាប់មក សូមនិយាយអំពីមូលហេតុដែលអាពាហ៍ពិពាហ៍ និងគ្រួសារមានសារៈសំខាន់ចំពោះព្រះវរបិតាសួគ៌ ។

គោលលទ្ធិ និងសេចក្ដីសញ្ញា ៥០:២៣–២៥

« អ្វីដែលមកពីព្រះ ជាពន្លឺ » ។

ដើម្បីណែនាំ គោលលទ្ធិ និងសេចក្តីសញ្ញា ៥០:២៣–២៥ សូមនិយាយជាមួយកូនៗរបស់បងប្អូនអំពីភាពខុសគ្នារវាងពន្លឺ និងសេចក្តីងងឹត ។ ហេតុអ្វីយើងត្រូវការពន្លឺ ? បងប្អូនអាចអានជាមួយគ្នានូវកថាខណ្ឌដំបូងនៃ « ដើរក្នុងពន្លឺរបស់ព្រះ » នៅក្នុង ដើម្បីកម្លាំងនៃយុវជន ៖ សេចក្តីណែនាំសម្រាប់ធ្វើការជ្រើសរើស ( ទំព័រ ១៧ ) ក៏ដូចជា គោលលទ្ធិ និងសេចក្តីសញ្ញា ៥០:២៣–២៥ ។ និយាយអំពីរបៀបដែលយើងទទួលពន្លឺរបស់ព្រះ និងរបៀបដែលយើងអាចបណ្តេញភាពងងឹតចេញ ។ បន្ទាប់មក បងប្អូនអាចច្រៀងចម្រៀងរួមគ្នាជាមួយកុមារនូវបទចម្រៀងមួយអំពីពន្លឺខាងវិញ្ញាណរបស់ពួកគេ ដូចជាបទ « រះឡើង » ( សៀវភៅចម្រៀងកុមារ ទំព័រ ៩៦ ) ។

គោលលទ្ធិ និងសេចក្ដីសញ្ញា ៥០:៤០–៤៦

ព្រះយេស៊ូវគ្រីស្ទគឺជាអ្នកគង្វាលល្អរបស់ខ្ញុំ ។

ក្រោយពីអាន គោលលទ្ធិ និងសេចក្ដីសញ្ញា ៥០:៤០–៤៦ ជាមួយគ្នារួចហើយ បងប្អូនអាចបង្ហាញរូបភាពរបស់ព្រះអង្គសង្គ្រោះ ដែលមាននៅខាងចុងនៃគម្រោងមេរៀននេះ ហើយសួរសំណួរទាំងនេះ ៖ តើអ្នកគង្វាលមានអារម្មណ៍យ៉ាងណាអំពីកូនចៀមរបស់ទ្រង់ ? តើព្រះអង្គសង្គ្រោះគឺដូចជាអ្នកគង្វាលរបស់យើងយ៉ាងដូចម្ដេច ?

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

អ្នកគង្វាលល្អ — Gentle Shepherd [ អ្នកគង្វាលសុភាព ] ដោយ យ៉ុងស៊ុង គីម