« ថ្ងៃទី ២៦ ខែ ឧសភា–ថ្ងៃទី ១ ខែ មិថុនា ៖ ‹ អ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ › ៖ គោលលទ្ធិ និងសេចក្តីសញ្ញា ៥១–៥៧ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ៥១–៥៧ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ថ្នាលទីមួយ [ First Furrow ] ដោយ ជេមស៍ ថេលើរ ហាវួដ

ថ្ងៃទី ២៦ ខែ ឧសភា–ថ្ងៃទី ១ ខែ មិថុនា ៖ « អ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ »

គោលលទ្ធិ និងសេចក្តីសញ្ញា ៥១–៥៧

សម្រាប់សមាជិកសាសនាចក្រនៅក្នុងទសវត្សរ៍ឆ្នាំ ១៨៣០ ការប្រមូលផ្តុំពួកបរិសុទ្ធ និងការកសាងទីក្រុងស៊ីយ៉ូន គឺជាការងារខាងវិញ្ញាណក៏ដូចជាខាងសាច់ឈាមដែរ ដែលមានបញ្ហាជាក់ស្តែងជាច្រើនដែលត្រូវដោះស្រាយ ៖ ត្រូវការនរណាម្នាក់ទិញដីដើម្បីឲ្យពួកបរិសុទ្ធអាចរស់នៅបាន ។ ត្រូវការនរណាម្នាក់បោះពុម្ពសៀវភៅ និងការបោះពុម្ពឯកសារផ្សេងទៀត ។ ហើយត្រូវការនរណាម្នាក់បើកហាងមួយ ដើម្បីចែកចាយរបស់របរដល់ប្រជាជននៅស៊ីយ៉ូន ។ នៅក្នុងវិវរណៈដែលបានកត់ត្រានៅក្នុង គោលលទ្ធិ និងសេចក្តីសញ្ញា ៥១–៥៧ ព្រះអម្ចាស់បានតែងតាំង និងណែនាំប្រជាជនឲ្យធ្វើកិច្ចការទាំងនេះ ។

ប៉ុន្ដែខណៈដែលជំនាញខាងកិច្ចការបែបនេះត្រូវការខ្លាំងនៅក្នុងស៊ីយ៉ូន វិវរណៈទាំងនេះក៏បង្រៀនដែរថា ព្រះអម្ចាស់សព្វព្រះទ័យឲ្យពួកបរិសុទ្ធរបស់ទ្រង់មានភាពស័ក្ដិសមខាងវិញ្ញាណ ដើម្បីបានហៅជារាស្ដ្រក្រុងស៊ីយ៉ូន—រាស្រ្តរបស់ទ្រង់ ។ ទ្រង់ហៅយើងម្នាក់ៗឲ្យធ្វើជា « អ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ » ដោយមានវិញ្ញាណទន់ទាប « ឈរយ៉ាងខ្ជាប់ខ្ជួន » នៅក្នុងទំនួលខុសត្រូវដែលបានចាត់តាំងរបស់យើង ( សូមមើល គោលលទ្ធិ និងសេចក្ដីសញ្ញា ៥១:១៩; ៥២:១៥; ៥៤:២ ) ។ ប្រសិនបើយើងអាចធ្វើដូចនោះបាន—មិនថាជំនាញខាងសាច់ឈាមយើងយ៉ាងណាទេ—នោះព្រះអម្ចាស់អាចប្រើយើងដើម្បីកសាងក្រុងស៊ីយ៉ូនបាន ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្តីសញ្ញា ៥១

ព្រះអម្ចាស់សព្វព្រះទ័យឲ្យខ្ញុំធ្វើជាអ្នកកាន់កាប់ត្រួតត្រាដោយស្មោះត្រង់ យុត្តិធម៌ និងឈ្លាសវៃ ។

ប្រសិនបើបងប្អូនជាសមាជិកនៃសាសនាចក្រនៅឆ្នាំ ១៨៣១ បងប្អូនអាចត្រូវបានអញ្ជើញឲ្យរស់នៅតាមច្បាប់នៃការថ្វាយ ដោយប្រគល់អចលនទ្រព្យរបស់បងប្អូនជូនទៅកាន់សាសនាចក្រតាមរយៈប៊ីស្សព ។ នៅក្នុងករណីភាគច្រើន លោកនឹងបង្វិលមកឲ្យបងប្អូនវិញនូវអ្វីដែលបងប្អូនបានបរិច្ចាគ ហើយពេលខ្លះជាមួយផលលើសទៀតផង ។ ប៉ុន្តែទ្រព្យនោះលែងជាទ្រព្យរបស់បងប្អូនទៀតហើយ—វាគឺជាការមើលខុសត្រូវរបស់បងប្អូន ។

នាសព្វថ្ងៃ នីតិវិធីមានលក្ខណៈខុសគ្នា ប៉ុន្ដែគោលការណ៍នៅតែមានសារៈសំខាន់ចំពោះកិច្ចការរបស់ព្រះអម្ចាស់ ។ នៅពេលបងប្អូនអាន កណ្ឌទី ៥១ សូមគិតអំពីអ្វីដែលព្រះបានទុកព្រះទ័យលើបងប្អូន ។ តើពាក្យ « អ្នកកាន់កាប់ត្រួតត្រា » ( ខទី ១៩ ) និង « បានថ្វាយ » ( ខទី ៥ ) វាបញ្ជាក់ន័យយ៉ាងណាអំពីការរំពឹងទុករបស់ព្រះមកលើបងប្អូន ?

ប្រធាន ស្ពែនស៊ើរ ដបុលយូ ឃឹមបឹល បានពន្យល់ថា « នៅក្នុងសាសនាចក្រ ការកាន់កាប់ត្រួតត្រាមួយគឺជាការទុកចិត្តខាងវិញ្ញាណ ឬខាងសាច់ឈាមដ៏ពិសិដ្ឋមួយដែលវារួមមាននូវការទទួលខុសត្រូវ ។ ដោយសារអ្វីៗជារបស់ផងព្រះអម្ចាស់ យើងកាន់កាប់ត្រួតត្រាលើរូបកាយ គំនិត ក្រុមគ្រួសារ និងទ្រព្យសម្បត្តិរបស់យើង ។ ( សូមមើល គោលលទ្ធិ និងសេចក្តីសញ្ញា ១០៤:១១–១៥ ) ។ អ្នកកាន់កាប់ត្រួតត្រាដ៏ស្មោះត្រង់ម្នាក់ គឺជាបុគ្គលម្នាក់ដែលអនុវត្តអំណាចគ្រប់គ្រងសុចរិត មើលថែគ្រួសារខ្លួនផ្ទាល់ ហើយរកមើលអ្នកក្រីក្រ និងទុរគត៌ » ( « Welfare Services: The Gospel in Action » Ensign ខែវិច្ឆិកា ឆ្នាំ១៩៧៧ ទំព័រ ៧៨ ) ។

សូមមើលផងដែរ « The Law of Consecration » ( វីដេអូ ) នៅលើបណ្ណាល័យដំណឹងល្អ ។

គោលលទ្ធិ និងសេចក្ដីសញ្ញា ៥២:៩–១១, ២២–២៧

ខ្ញុំអាចអញ្ជើញមនុស្សដទៃឲ្យមករកព្រះគ្រីស្ទ នៅគ្រប់ទីកន្លែងដែលខ្ញុំទៅ ។

នៅពេលព្រះអម្ចាស់បានចាត់ថ្នាក់ដឹកនាំសាសនាចក្រមួយចំនួនទៅកាន់រដ្ឋមិសសួរី ទ្រង់បានមានព្រះបន្ទូលប្រាប់ពួកលោកឲ្យប្រើពេលវេលាធ្វើដំណើរ ហើយ « ផ្សាយនៅតាមផ្លូវ »( ខទី ២៥–២៧ ) ។ តើបងប្អូនអាចចែកចាយដំណឹងល្អ « តាមផ្លូវ » ឬនៅអំឡុងព្រឹត្តិការណ៍ធម្មតានៃជីវិតរបស់បងប្អូនដោយរបៀបណា ?

គោលលទ្ធិ និងសេចក្ដីសញ្ញា ៥២:១៤–១៩

ព្រះអម្ចាស់ជួយខ្ញុំចៀសវាងការបោកបញ្ឆោត ។

ដោយមានមនុស្សជាច្រើនអះអាងពីការបើកបង្ហាញខាងវិញ្ញាណ នោះពួកបរិសុទ្ធសម័យដើមបានព្រួយបារម្ភនឹងការត្រូវបានគេបញ្ឆោត ។ តើការព្រមានអ្វីខ្លះដែលព្រះអម្ចាស់បានប្រទានឲ្យពួកគាត់នៅក្នុង គោលលទ្ធិ និងសេចក្តីសញ្ញា ៥២:១៤ ? តើទ្រង់មានដំណោះស្រាយអ្វី ? ( សូមមើល ខទី ១៤–១៩ ) ។

គំរូគឺជាអ្វីដែលកើតឡើងដដែលៗ តាមរបៀបដែលអាចទាយទុកជាមុនបាន ។ ឧទាហរណ៍រួមមានការរាប់ដោយលេខគូ ឬព្រះអាទិត្យរះ និងលិចរាល់ថ្ងៃ ។ តើមានគំរូអ្វីខ្លះទៀតដែលបងប្អូនអាចគិតដល់ទេ ? នៅពេលបងប្អូនស្វែងយល់ គោលលទ្ធិ និងសេចក្តីសញ្ញា ៥២:១៤–១៩ សូមស្វែងរកគំរូរបស់ព្រះអម្ចាស់សម្រាប់ការចៀសវាងពីការបោកបញ្ឆោត ។ វាអាចនឹងជួយក្នុងការកត់សម្គាល់ថា « ទន់ទាប » បញ្ជាក់អត្ថន័យនៃអារម្មណ៍បន្ទាបខ្លួន និងការប្រែចិត្ត « សុភាព » បង្ហាញពីភាពទន់ភ្លន់ និងការគ្រប់គ្រងខ្លួនឯង និង « ស្អាងឡើង » មានន័យថា ណែនាំ កែលម្អ ឬស្ថាបនា ។ ហេតុអ្វីបានជាបងប្អូនមានអារម្មណ៍ថា គំរូរបស់ព្រះអម្ចាស់រួមបញ្ចូលនូវគុណសម្បត្តិទាំងនេះ ព្រមទាំងការគោរពប្រតិបត្តិផងដែរ ? តើបងប្អូនអាចអនុវត្តគំរូនេះដោយរបៀបណា ដើម្បីចៀសវាងការបោកបញ្ឆោត ?

ស្វែងយល់និយមន័យពាក្យពិបាកៗ ។ នៅក្នុងកម្មវិធីបណ្ណាល័យដំណឹងល្អ បងប្អូនអាចចុចឲ្យជាប់ពាក្យមួយ ហើយជ្រើស « កំណត់និយមន័យ » ។ បន្ទាប់មក បងប្អូននឹងទៅដល់និយមន័យនៃពាក្យនោះ ។ សូមសាកល្បងធ្វើបែបនេះនៅពេលបងប្អូនជួបពាក្យដែលមិនធ្លាប់ស្គាល់ ឬពាក្យដែលហាក់ដូចជាស្គាល់ហើយ ដែលបងប្អូនចង់យល់ឲ្យកាន់តែច្បាស់ ។

តើមានឧទាហរណ៍អ្វីខ្លះអំពីការបោកបញ្ឆោតនៅសម័យយើង ? តើយើងអាចដឹងដោយរបៀបណានៅពេលដែលយើងត្រូវបានបោកបញ្ឆោត ?

ជាឧទាហរណ៍ បងប្អូនអាចពិចារណាវាយតម្លៃជម្រើសរបស់បងប្អូនទាក់ទងនឹងភាពយន្ត តន្ត្រី និងប្រព័ន្ធផ្សព្វផ្សាយសង្គមដោយផ្អែកលើស្តង់ដារនៅក្នុង « ដើរក្នុងពន្លឺរបស់ព្រះ » នៅក្នុង ដើម្បីកម្លាំងនៃយុវជន ៖ សេចក្តីណែនាំសម្រាប់ធ្វើការជ្រើសរើស ទំព័រ ១៦–២១ ។

សូមមើលផងដែរ ហ្គែរី អ៊ី ស្ទីវ៉ែនសុន « Deceive Me Not » Liahona ខែ វិច្ឆិកា ឆ្នាំ ២០១៩ ទំព័រ ៩៣–៩៦; « នាំខ្ញុំរកទ្រង់ » ទំនុកតម្កើង ល.រ. ៥០; Topics and Questions « Seeking Truth and Avoiding Deception » នៅលើបណ្ណាល័យដំណឹងល្អ ។

គោលលទ្ធិ និងសេចក្តីសញ្ញា ៥៤

ខ្ញុំអាចងាកទៅរកព្រះអម្ចាស់ ពេលខ្ញុំឈឺចាប់ដោយសារការជ្រើសរើសរបស់មនុស្សដទៃ ។

តើបងប្អូនធ្លាប់រងការខកចិត្ត នៅពេលនរណាម្នាក់ដែលបងប្អូនពឹងផ្អែកមិនបានរក្សាការតាំងចិត្តរបស់ពួកគេដែរឬទេ ? ការណ៍បានកើតឡើងចំពោះពួកបរិសុទ្ធមកពីខូលស្វិល រដ្ឋញូវយ៉ក ដែលបានរំពឹងទុកដើម្បីស្នាក់នៅលើដីរបស់ លីម៉ាន ខូព្លី នៅក្នុងរដ្ឋអូហៃអូ ។ ដើម្បីរៀនអំពីបទពិសោធន៍នេះ សូមពិចារណាមើលឡើងវិញពីចំណងជើង កណ្ឌទី ៥៤ ( សូមមើលផងដែរ ពួកបរិសុទ្ធ; ១:១២៥–២៨; « A Bishop unto the Church » នៅក្នុង Revelations in Context ទំព័រ ៧៨–៧៩ ) ។ ប្រសិនបើបងប្អូនមានមិត្តម្នាក់ក្នុងចំណោមពួកបរិសុទ្ធនៅ ខូលស្វិល តើការប្រឹក្សាអ្វីដែលបងប្អូនអាចស្វែងរកនៅក្នុង កណ្ឌទី ៥៤ ដើម្បីចែកចាយជាមួយពួកគេ ?

គោលលទ្ធិ និងសេចក្តីសញ្ញា ៥៦:១៤–២០

មានពរហើយ អស់អ្នកដែលមានចិត្តបរិសុទ្ធ ។

នៅក្នុងខគម្ពីរទាំងនេះ ព្រះអម្ចាស់បានមានបន្ទូលទៅកាន់ទាំងអ្នកមានផង និងអ្នកក្រផង វាអាចជារឿងគួរឲ្យចាប់អារម្មណ៍ ដើម្បីប្រៀបធៀបការប្រឹក្សារបស់ទ្រង់ទៅនឹងក្រុមទាំងពីរនេះ ។ នៅក្នុងខគម្ពីរទាំងនេះ តើអ្វីដែលមានអារម្មណ៍ថាទាក់ទងផ្ទាល់នឹងបងប្អូន ?

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្ដីសញ្ញា ៥១:៩

ខ្ញុំអាចធ្វើជាមនុស្សស្មោះត្រង់ ។

ដើម្បីជួយកូនរបស់បងប្អូនរៀនអំពីអត្ថន័យនៃភាពស្មោះត្រង់ បងប្អូនអាចអានជាមួយគ្នានូវ គោលលទ្ធិ និងសេចក្តីសញ្ញា ៥១:៩ និងចែកចាយដំណើររឿងរបស់កុមារដែលប្រឈមមុខនឹងការសម្រេចចិត្តអំពីភាពស្មោះត្រង់ ។ បងប្អូនអាចប្រើរូបភាព តុក្តាធ្វើពីស្រោមជើង ឬ តុក្តាក្រដាសដើម្បីធ្វើឲ្យសាច់រឿងកាន់តែមានចំណាប់អារម្មណ៍ ។ តើព្រះអម្ចាស់ប្រទានពរយើង នៅពេលយើងខិតខំដើម្បីមានភាពទៀងត្រង់ដោយរបៀបណា ?
សូមពិចារណាលេងល្បែងមួយជាមួយកូនៗរបស់បងប្អូន ។ បន្ទាប់មកទៀត សូមពិភាក្សាអំពីរបៀបដែលល្បែងនេះអាចមានភាពខុសគ្នា ប្រសិនបើនរណាម្នាក់លេងខូចនោះ ។ ហេតុអ្វីបានជាវាសំខាន់ដើម្បី « ប្រព្រឹត្តដោយទៀងត្រង់ » ជាមួយគ្នា ?

គោលលទ្ធិ និងសេចក្តីសញ្ញា ៥២:១០; ៥៣:៣; ៥៥:១

ខ្ញុំទទួលអំណោយទាននៃព្រះវិញ្ញាណបរិសុទ្ធដោយការដាក់ដៃលើ ។

ការទទួលព្រះវិញ្ញាណបរិសុទ្ធតាមរយៈការដាក់ដៃលើ គឺត្រូវបានលើកឡើងជាច្រើនដងនៅក្នុង គោលលទ្ធិ និងសេចក្ដីសញ្ញា ៥១–៥៧ ។ ការណ៍នេះអាចជាឱកាសដ៏ល្អមួយ ដើម្បីបង្រៀនកូនៗរបស់បងប្អូនអំពីពិធីបរិសុទ្ធទាំងនេះ ។ ឧទាហរណ៍ ពួកគេអាចមើលរូបភាពរបស់កុមារដែលបានទទួលពិធីបញ្ជាក់ និងពិពណ៌នាអំពីអ្វីដែលកំពុងកើតឡើងនៅក្នុងរូបភាពនេះ ។ សូមឲ្យពួកគេទះដៃ នៅពេលពួកគេឮ « ដាក់ដៃលើ » ឬ « ការដាក់ដៃលើ » ខណៈដែលបងប្អូនអាន ៖ គោលលទ្ធិ និងសេចក្តីសញ្ញា ៥២:១០; ៥៣:៣; ៥៥:១ ។
បងប្អូនអាចក៏អាចច្រៀងបទ « ព្រះវិញ្ញាណបរិសុទ្ធ » ( សៀវភៅចម្រៀងកុមារ ទំព័រ ៥៦ ) ឬបទចម្រៀងដែលស្រដៀងគ្នាមួយ ។ សូមជួយកូនៗរបស់បងប្អូនស្វែងរកពាក្យ និងឃ្លានៅក្នុងបទចម្រៀងដែលបង្រៀនអំពីអំណោយទាននៃព្រះវិញ្ញាណបរិសុទ្ធ ។

គោលលទ្ធិ និងសេចក្ដីសញ្ញា ៥២:១៤–១៩

ព្រះមានគំរូដើម្បីជួយខ្ញុំ កុំឲ្យគេបោកបញ្ជោត ។

ដើម្បីបង្រៀនអំពីគំរូរបស់ព្រះអម្ចាស់ សម្រាប់ការចៀសវាងពីការបោកបញ្ឆោត នោះបងប្អូនអាចចាប់ផ្តើមដោយជួយកុមារឲ្យស្វែងរកគំរូនៃរបៀបនានា—នៅក្នុងធម្មជាតិ នៅក្នុងភួយ ឬសម្លៀកបំពាក់ដែលមានចម្រុះពណ៌ ឬក្នុងជីវិតប្រចាំថ្ងៃ ។ សូមជួយពួកគេស្វែងរកគំរូដែលព្រះអម្ចាស់បានប្រទានមកនៅក្នុង គោលលទ្ធិ និងសេចក្តីសញ្ញា ៥២:១៤–១៥ ។ សូមប្រាកដថាពួកគេយល់ពាក្យដែលមិនស្គាល់ណាមួយនៅក្នុងខគម្ពីរទាំងនេះ ។ តើយើងអាចប្រើគំរូនេះដើម្បីស្គាល់សេចក្តីពិតដោយរបៀបណា ?

គោលលទ្ធិ និងសេចក្តីសញ្ញា ៥៤:៤–៦

ខ្ញុំគួរតែរក្សាសេចក្តីសញ្ញារបស់ខ្ញុំជានិច្ច ។

តាមពាក្យសម្ដីផ្ទាល់ខ្លួនរបស់បងប្អូន សូមចែកចាយជាមួយកូនៗរបស់បងប្អូននូវអ្វីដែលបានកើតឡើងចំពោះពួកបរិសុទ្ធដែលបានមករស់នៅលើដីរបស់ លីម៉ាន ខូព្លី ( សូមមើលចំណងជើងទៅ កណ្ឌទី ៥៤ ) ។ កូនៗរបស់បងប្អូនអាចសម្តែងធ្វើជាសមាជិកនៃសាសនាចក្រដែលបានមកដល់រដ្ឋអូហៃអូ ។ តើពួកគេនឹងមានអារម្មណ៍យ៉ាងណាបន្ទាប់ពី លីម៉ាន បានបំពានសេចក្តីសញ្ញារបស់គាត់ ? តើការណ៍នេះបង្រៀនយើងអ្វីខ្លះអំពីការរក្សាសេចក្តីសញ្ញា ឬសេចក្តីសន្យារបស់យើង ? សូមអានជាមួយគ្នា គោលលទ្ធិ និងសេចក្តីសញ្ញា ៥៤:៦ ដើម្បីស្វែងរកពរជ័យសម្រាប់មនុស្សដែលរក្សាសេចក្ដីសញ្ញារបស់ខ្លួន ។

គោលលទ្ធិ និងសេចក្ដីសញ្ញា ៥៥:១–៤

ខ្ញុំអាចប្រើពរជ័យដែលព្រះបានប្រទានដល់ខ្ញុំដើម្បីប្រទានពរដល់អ្នកដទៃ ។

ដើម្បីណែនាំ កណ្ឌទី ៥៥ បងប្អូនប្រហែលជាចង់ពន្យល់ថា ចំពោះ វិលលាម ដ័បបុលយូ ហ្វែប្ស គឺជាអ្នកបោះពុម្ពសារព័ត៌មានម្នាក់ដែលបានរៀនអំពីដំណឹងល្អ ហើយបានចូលរួមក្នុងសាសនាចក្រ ។ សូមអានជាមួយកូនៗរបស់បងប្អូន គោលលទ្ធិ និងសេចក្តីសញ្ញា ៥៥:១–៤ ហើយជួយពួកគេស្វែងរកអ្វីដែលព្រះសព្វព្រះទ័យឲ្យ វិលលាម ធ្វើ ។ តើទ្រង់មានគម្រោងប្រើទេពកោសល្យរបស់ វិលលាម ដោយរបៀបណា ? ការណ៍នេះអាចនាំឲ្យមានការពិភាក្សាអំពីរបៀបដែលព្រះ អាចអញ្ជើញយើងឲ្យប្រើទេពកោសល្យរបស់យើងដើម្បីប្រទានពរដល់បុត្រាបុត្រីរបស់ទ្រង់ ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

ពួកបរិសុទ្ធកំពុងថ្វាយទំនិញរបស់ពួកគេ — ប៊ីស្សព ប៉ាទ្រិច ទទួលការថ្វាយ ដោយ អាលប៊ីន វេសេលកា