« ថ្ងៃទី ៥–១១ ខែ ឧសភា ៖ ‹ សេចក្ដីសន្យាទាំងប៉ុន្មាន … នោះ នឹងត្រូវបានសម្រេចហើយ › ៖ គោលលទ្ធិ និងសេចក្តីសញ្ញា ៤៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ៤៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ថ្ងៃទី ៥–១១ ខែ ឧសភា ៖ « សេចក្ដីសន្យាទាំងប៉ុន្មាន … នោះ នឹងត្រូវបានសម្រេចហើយ »

គោលលទ្ធិ និងសេចក្ដីសញ្ញា ៤៥

វិវរណៈនៅក្នុង កណ្ឌទី ៤៥ ត្រូវបានទទួលស្របតាមក្បាលកណ្ឌ « សេចក្ដីអំណរដល់ពួកបរិសុទ្ធ » ។ ហើយមានអ្វីជាច្រើនដែលត្រូវមានអំណរនៅក្នុងវិវរណៈនេះ ។ នៅក្នុងនោះ ព្រះអង្គសង្គ្រោះប្រទានការសន្យាដ៏ទន់ភ្លន់របស់ទ្រង់ ដើម្បីអង្វរជំនួសយើងនៅចំពោះព្រះវរបិតា ( សូមមើល ខទី ៣–៥ ) ។ ទ្រង់ប្រាប់ពីសេចក្ដីសញ្ញាដ៏នៅអស់កល្បអស់កាលជានិច្ចរបស់ទ្រង់ដែលបានសាយភាយពាសពេញពិភពលោក ដូចជា « សារទូត … ដើម្បីរៀបចំផ្លូវថ្វាយ [ ទ្រង់ ] » ( ខទី ៩ ) ។ ហើយទ្រង់ព្យាករពីការយាងមកជាលើកទីពីរដ៏រុងរឿងរបស់ទ្រង់ ។ ព្រះអង្គសង្គ្រោះធ្វើកិច្ចការទាំងអស់នេះ ខណៈពេលដែលទ្រង់ជ្រាបហើយផងដែរថា ទាំងនេះជាគ្រាដ៏លំបាក ( សូមមើល ខទី ៣៤ ) មួយផ្នែកដោយសារតែគ្រោះថ្នាក់ដែលនឹងត្រូវកើតឡើងមុនពេលទ្រង់យាងមក ។ ប៉ុន្តែគ្រោះថ្នាក់នោះ ភាពងងឹតនោះមិនមានកម្លាំងគ្រប់គ្រាន់ដើម្បីពន្លត់ពន្លឺនៃសេចក្តីសង្ឃឹមនោះទេ ។ « ដ្បិតយើងប្រាប់អ្នកជាប្រាកដថា » ព្រះអម្ចាស់បានប្រកាស « យើងជា … ពន្លឺដែលភ្លឺមកក្នុងសេចក្ដីងងឹត » ( ខទី ៧ ) ។ នោះជាហេតុផលតែមួយគត់ដើម្បីទទួលបានវិវរណៈនេះ—ជាមួយនឹងការប្រឹក្សា និងការព្រមាន និងសេចក្ដីពិតដែលទ្រង់ចង់ប្រទានឲ្យ—ដោយអំណរ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្ដីសញ្ញា ៤៥:១–៥

ព្រះយេស៊ូវគ្រីស្ទគឺជាព្រះអង្គគាំទ្ររបស់ខ្ញុំជាមួយនឹងព្រះវរបិតា ។

នៅពេលយើងមានអារម្មណ៍ថាមិនគ្រប់គ្រាន់ ឬមិនស័ក្តិសមនៅចំពោះព្រះ យើងអាចស្វែងរកការធានាមកពីព្រះបន្ទូលរបស់ព្រះអង្គសង្គ្រោះនៅក្នុង គោលលទ្ធិ និងសេចក្តីសញ្ញា ៤៥:១–៥ ។ នៅពេលបងប្អូនស្វែងរកខគម្ពីរទាំងនេះ សូមពិចារណាសំណួរដូចតទៅនេះ ៖

តើពាក្យ ឬឃ្លាណានៅក្នុងខគម្ពីរទាំងនេះដែលមានអត្ថន័យបំផុតសម្រាប់បងប្អូន ?
ព្រះអង្គគាំទ្រ គឺជាអ្នកដែលគាំទ្រ ឬណែនាំជាសាធារណៈដល់បុគ្គលម្នាក់ ឬបុព្វហេតុ ។ យោងតាមខគម្ពីរទាំងនេះ តើព្រះយេស៊ូវគ្រីស្ទធ្វើការណ៍នេះសម្រាប់បងប្អូនដោយរបៀបណា ? តើអ្វីដែលធ្វើឲ្យទ្រង់មានគុណសម្បត្តិដើម្បីធ្វើការណ៍នេះ ?
តើអ្វីដែលធ្វើឲ្យបងប្អូនចាប់អារម្មណ៍ចំពោះព្រះបន្ទូលរបស់ព្រះអង្គសង្គ្រោះទៅកាន់ព្រះវរបិតា ? ( ខទី ៤–៥ ) ។

បងប្អូនក៏អាចសិក្សាអំពីអ្វីដែលអែលឌើរ ឌែល ជី រិនឡាន់ បានបង្រៀនអំពីព្រះយេស៊ូវគ្រីស្ទ ជាព្រះអង្គគាំទ្ររបស់យើង នៅក្នុង « Choose You This Day » ( Liahona ខែ វិច្ឆិកា ឆ្នាំ ២០១៨ ទំព័រ ១០៤–១០៥ ) ។ យោងតាមអែលឌើរ រិនឡាន់ តើគោលបំណងរបស់ព្រះអង្គសង្គ្រោះធៀបទៅនឹងគោលបំណងរបស់លូស៊ីហ្វើរយ៉ាងដូចម្ដេច ?

វគ្គបទគម្ពីរខាងក្រោមអាចបន្ថែមដល់ការយល់ដឹងរបស់បងប្អូន អំពីតួនាទីរបស់ព្រះអង្គសង្គ្រោះជាអង្គគាំទ្រ ។ នៅពេលបងប្អូនសិក្សាអំពីវា សូមពិចារណាសរសេរឃ្លា ឬសេចក្តីពិតដែលបងប្អូនអាចចែកចាយជាមួយអ្នកដទៃ ៖ នីហ្វៃទី២ ២:៨–៩; ម៉ូសាយ ១៥:៧–៩; មរ៉ូណៃ ៧:២៧–២៨; គោលលទ្ធិ និងសេចក្តីសញ្ញា ២៩:៥; ៦២:១ ។ ហេតុអ្វីបានជាឃ្លាទាំងនេះមានអត្ថន័យចំពោះបងប្អូន ?

សូមមើលផងដែរ « ខ្ញុំឆ្ងល់យ៉ាងអស្ចារ្យ » ទំនុកតម្កើង ល.រ. ១១៥; Topics and Questions « Atonement of Jesus Christ » នៅលើបណ្ណាល័យដំណឹងល្អ; « The Mediator » ( វីដេអូ ) នៅលើបណ្ណាល័យដំណឹងល្អ ។

គោលលទ្ធិ និងសេចក្ដីសញ្ញា ៤៥:៩–១០

ដំណឹងល្អគឺជាបទដ្ឋានមួយចំពោះជាតិសាសន៍ទាំងឡាយ ។

កាលពីបុរាណ បទដ្ឋានគឺជាផ្ទាំងបដាដែលយកទៅក្នុងសមរភូមិ ដែលប្រើដើម្បីប្រមូលផ្តុំ និងបង្រួបបង្រួមកងទ័ព ។ បទដ្ឋានក៏ជាគំរូមួយ ឬជាច្បាប់មួយដែលដែលអ្វីៗផ្សេងទៀតត្រូវធ្វើតាម ។ នៅពេលបងប្អូនអាន គោលលទ្ធិ និងសេចក្តីសញ្ញា ៤៥:៩–១០ សូមពិចារណាអំពីរបៀបដែលសេចក្ដីសញ្ញារបស់បងប្អូនជាមួយព្រះអម្ចាស់ ដែលបានធ្វើជាបទដ្ឋានមួយសម្រាប់បងប្អូន ។

គោលលទ្ធិ និងសេចក្ដីសញ្ញា ៤៥:១១–៧៥

ព្រះយេស៊ូវគ្រីស្ទនឹងយាងត្រឡប់មកវិញក្នុងសិរីល្អ ។

ការយាងមកជាលើកទីពីររបស់ព្រះអម្ចាស់ត្រូវបានពិពណ៌នាថាទាំង « ធំ » និង « គួរស្ញែងខ្លាច » ( ម៉ាឡាគី ៤:៥ ) ។ នៅក្នុង គោលលទ្ធិ និងសេចក្តីសញ្ញា ៤៥ ការពិពណ៌នាទាំងពីរហាក់ដូចជាត្រូវគ្នាណាស់ ។ វិវរណៈនេះរួមបញ្ចូលទាំងការព្រមានដោយស្ងប់ស្ងាត់ និងការសន្យាដ៏មានសង្ឃឹមអំពីការយាងមករបស់ព្រះអម្ចាស់ ។ នៅពេលបងប្អូនសិក្សា ខទី ១១–៧៥ សូមពិចារណាអំពីរបៀបដែលបងប្អូនអាចរៀបចំខ្លួនសម្រាប់ការយាងមកជាលើកទីពីរ ដោយសេចក្តីជំនឿទៅលើព្រះគ្រីស្ទជាជាងការភ័យខ្លាច ។ សូមកត់ត្រាអ្វីដែលបងប្អូនរកឃើញនៅក្នុងតារាងដូចនេះ ៖

ការព្យាករណ៍ ឬសេចក្តីសន្យា	អ្វីដែលខ្ញុំអាចធ្វើ
ការព្យាករណ៍ ឬសេចក្តីសន្យា ពន្លឺ ( ដំណឹងល្អ ) នឹងផ្ដល់ឲ្យអស់អ្នកដែលអង្គុយនៅក្នុងសេចក្តីងងឹត ( ខទី ២៨ )	អ្វីដែលខ្ញុំអាចធ្វើ ទទួលពន្លឺ—និងចែកចាយពន្លឺ ( ខទី ២៩ )
ការព្យាករណ៍ ឬសេចក្តីសន្យា	អ្វីដែលខ្ញុំអាចធ្វើ
ការព្យាករណ៍ ឬសេចក្តីសន្យា	អ្វីដែលខ្ញុំអាចធ្វើ
ការព្យាករណ៍ ឬសេចក្តីសន្យា	អ្វីដែលខ្ញុំអាចធ្វើ

នៅក្នុងវីដេអូ « Men’s Hearts Shall Fail Them » ( បណ្ណាល័យដំណឹងល្អ ) តើដំបូន្មានអ្វីដែលប្រធាន រ័សុល អិម ណិលសុន បានផ្ដល់ឲ្យដើម្បីជួយយើងប្រឈមមុខនឹងស្ថានការណ៍ដ៏គួរឲ្យភ័យខ្លាចដោយសេចក្តីសុខសាន្ត ?

គោលលទ្ធិ និងសេចក្ដីសញ្ញា ៤៥:៣១–៣២, ៥៦–៥៧

ខ្ញុំអាច « ឈរនៅក្នុងទីបរិសុទ្ធទាំងឡាយ » ហើយមិនរើឡើយ ។

តើបងប្អូនរៀនបានអ្វីខ្លះនៅក្នុង គោលលទ្ធិ និង សេចក្ដីសញ្ញា ៤៥:៣១–៣២, ៥៦–៥៧ អំពីការរៀបចំខ្លួនសម្រាប់ការយាងមកលើកទីពីររបស់ព្រះអម្ចាស់ ? តើ « ទីបរិសុទ្ធ » របស់បងប្អូនជាអ្វី ? តើ « ពុំរើឡើយ » មានន័យដូចម្ដេច ? តើបងប្អូនអាចធ្វើឲ្យកន្លែងដែលបងប្អូននៅកាន់តែបរិសុទ្ធដោយរបៀបណា ?

សូមកត់ចំណាំថា ព្រះអម្ចាស់បានសំដៅទៅលើរឿងប្រៀបប្រដូចអំពីស្ត្រីព្រហ្មចារីដប់នាក់ ដោយប្រៀបធៀបប្រេងនៅក្នុងរឿងប្រៀបប្រដូចទៅនឹងសេចក្តីពិត និងព្រះវិញ្ញាណបរិសុទ្ធ ។ សូមពិចារណាអានរឿងប្រៀបប្រដូចនេះនៅក្នុង ម៉ាថាយ ២៥:១–១៣ ដោយចាំការណ៍នោះក្នុងចិត្ត ។ តើបងប្អូនទទួលបានការយល់ដឹងអ្វីខ្លះ ?

សូមមើលផងដែរ ដេវីឌ អេ បែដណា « If Ye Had Known Me » Liahona ខែ វិច្ឆិកា ឆ្នាំ ២០១៦ ទំព័រ ១០២–១០៥ ។

ស្រ្តីព្រហ្មចារីយ៍ឈ្លាសវៃទាំងប្រាំនាក់ — រឿងប្រៀបប្រដូចនៃស្ត្រីព្រហ្មចារីដប់នាក់ ដោយ ដាន ប៊ើរ

គោលលទ្ធិ និងសេចក្ដីសញ្ញា ៤៥:១១–១៥, ៦៦–៧១

ស៊ីយ៉ូនគឺជាកន្លែងដែលមានសុវត្ថិភាពសម្រាប់ពួកបរិសុទ្ធរបស់ព្រះ ។

ពួកបរិសុទ្ធនៅសម័យ យ៉ូសែប ស្ម៊ីធ មានចិត្តចង់សាងសង់ទីក្រុងស៊ីយ៉ូន ជាទីក្រុងយេរូសាឡិមថ្មី ( សូមមើល អេធើរ ១៣:២–៩; ម៉ូសេ ៧:១៨, ៦២–៦៤ ) ។ តើបងប្អូនរៀនអ្វីខ្លះអំពីស៊ីយ៉ូន—ទាំងទីក្រុងបុរាណនៅជំនាន់អេណុស និងទីក្រុងនៅថ្ងៃចុងក្រោយ—មកពី គោលលទ្ធិ និងសេចក្តីសញ្ញា ៤៥:១១–១៥, ៦៦–៧១ ? សព្វថ្ងៃនេះ បញ្ជាឲ្យបង្កើតទីក្រុងស៊ីយ៉ូនសំដៅទៅលើការស្ថាបនានគររបស់ព្រះនៅគ្រប់ទីកន្លែងដែលយើងរស់នៅ ។ តើបងប្អូនអាចធ្វើអ្វីខ្លះដើម្បីជួយកសាងទីក្រុងស៊ីយ៉ូន នៅកន្លែងដែលបងប្អូនរស់នៅ ?

គំនិតសម្រាប់បង្រៀនកុមារ

គោលលទ្ធិ និងសេចក្តីសញ្ញា ៤៥:៣–៥

ព្រះយេស៊ូវគ្រីស្ទគឺជាព្រះអង្គគាំទ្ររបស់ខ្ញុំជាមួយនឹងព្រះវរបិតា ។

បងប្អូនប្រហែលជាចង់ជួយកូនរបស់បងប្អូនឲ្យយល់ថា អង្គគាំទ្រគឺជាអ្នកដែលផ្តល់ការគាំទ្រដល់អ្នកដទៃទៀត ។ បន្ទាប់មក បងប្អូនអាចនិយាយអំពីឧទាហរណ៍នៃការធ្វើជាអ្នកគាំទ្រដែលពួកគេអាចនឹងស្គាល់ ( ដូចជាការក្រោកឈរការពារមិត្តភក្តិ ) ។ នៅពេលបងប្អូនអាន គោលលទ្ធិ និងសេចក្តីសញ្ញា ៤៥:៣–៥ រួមគ្នាសូមជួយកូនរបស់បងប្អូនឲ្យរកឃើញថា នរណាជាអង្គគាំទ្ររបស់យើង និងរបៀបដែលទ្រង់ជួយយើង ។

គោលលទ្ធិ និងសេចក្ដីសញ្ញា ៤៥:៣២

ខ្ញុំអាច « ឈរនៅក្នុងទីបរិសុទ្ធ » ។

វាអាចនឹងសប្បាយក្នុងការដាក់រូបភាពផ្ទះ អគារសាសនាចក្រ និងព្រះវិហារបរិសុទ្ធនៅជុំវិញបន្ទប់ ។ បន្ទាប់មក បងប្អូនអាចផ្ដល់ជាតម្រុយឲ្យកូនៗរបស់បងប្អូនដោយពិពណ៌នាពីកន្លែងទាំងនេះ ហើយអញ្ជើញពួកគេឲ្យឈរនៅជិតរូបភាពដែលបងប្អូនកំពុងពិពណ៌នា ។ សុំឲ្យពួកគេឈរស្ងៀម ខណៈពេលដែលបងប្អូនអានបន្ទាត់ទីមួយចេញពី គោលលទ្ធិ និងសេចក្តីសញ្ញា ៤៥:៣២ ។ តើកន្លែងបរិសុទ្ធណាខ្លះដែលព្រះប្រទានឲ្យយើង ? សូមជួយកូនរបស់បងប្អូនយល់ថា ដើម្បី« ឈរនៅក្នុងទីបរិសុទ្ធទាំងឡាយ ហើយនឹងពុំត្រូវបានរើឡើយ » មានន័យថា ត្រូវជ្រើសរើសត្រឹមត្រូវគ្រប់ពេលវេលាទាំងអស់ មិនថាមានរឿងអ្វីកើតឡើងនោះទេ ។ តើយើងអាចធ្វើឲ្យគេហដ្ឋានរបស់យើងជាទីកន្លែងកាន់តែបរិសុទ្ធមួយដោយរបៀបណា ?

គោលលទ្ធិ និងសេចក្ដីសញ្ញា ៤៥:៩

ដំណឹងល្អនៃព្រះយេស៊ូវគ្រីស្ទ គឺជាបទដ្ឋាននៃពិភពលោកនេះ ។

បងប្អូនអាចពន្យល់ទៅកាន់កូនៗរបស់បងប្អូនថា កាលពីបុរាណ បទដ្ឋានគឺជាផ្ទាំងបដា ឬទង់ដែលគេយកទៅពេលធ្វើចម្បាំង ។ វាជួយឲ្យពួកទាហានដឹងពីកន្លែងជួបជុំគ្នា និងអ្វីដែលត្រូវធ្វើ ។ សូមអានជាមួយគ្នា គោលលទ្ធិ និងសេចក្តីសញ្ញា ៤៥:៩ ហើយពិភាក្សាអំពីរបៀបដែលដំណឹងល្អគឺដូចជាបទដ្ឋានមួយ ។ កូនៗរបស់បងប្អូនអាចរីករាយនឹងការបង្កើតបទដ្ឋាន ឬទង់ផ្ទាល់ខ្លួនរបស់ពួកគេ រួមទាំងរូបភាព ឬពាក្យដែលបង្ហាញពីអារម្មណ៍របស់ពួកគេអំពីព្រះអង្គសង្គ្រោះ ។

លើកបទដ្ឋានឡើង — ដំណឹងល្អគឺដូចជាបទដ្ឋាន ឬផ្ទាំងបដា ឬទង់មួយអញ្ចឹង ។

គោលលទ្ធិ និងសេចក្ដីសញ្ញា ៤៥:៤៤–៤៥

ព្រះយេស៊ូវគ្រីស្ទ នឹងយាងមកម្ដងទៀត ។

ការបំផ្លិចបំផ្លាញដែលនឹងកើតឡើងមុនការយាងមកជាលើកទីពីរ អាចធ្វើឲ្យកុមារភ័យខ្លាច ។ ការចង្អុលបង្ហាញពួកគេទៅកាន់ព្រះយេស៊ូវគ្រីស្ទ អាចជួយពួកគេទន្ទឹងរង់ចាំដោយសេចក្ដីជំនឿ ! សូមពិចារណាអញ្ជើញពួកគេឲ្យគិតអំពីរបៀបដែលពួកគេទទួលអារម្មណ៍ នៅពេលនរណាម្នាក់សំខាន់កំពុងមកលេងពួកគេ ដូចជាលោកតា លោកយាយ ឬមិត្តភក្តិ ។ តើពួកគេត្រៀមខ្លួនសម្រាប់ការមកលេងនេះយ៉ាងដូចម្តេចខ្លះ ? បន្ទាប់មក បងប្អូនអាចបង្ហាញរូបភាពរបស់ព្រះអង្គសង្រ្គោះ ហើយអាន គោលលទ្ធិ និងសេចក្តីសញ្ញា ៤៥:៤៤–៤៥ ។ សូមចែកចាយគ្នាទៅវិញទៅមកពីអារម្មណ៍របស់បងប្អូនអំពីការយាងមករបស់ព្រះអង្គសង្គ្រោះ ។
ដើម្បីជួយកូនៗរបស់បងប្អូនឲ្យមានអារម្មណ៍រំភើប ចំពោះការយាងមកជាលើកទីពីររបស់ព្រះអង្គសង្គ្រោះ នោះបងប្អូនអាចសរសេរនៅលើសន្លឹកក្រដាសអំពីការសន្យាដ៏មានសង្ឃឹមមួយចំនួនមកពី កណ្ឌទី ៤៥ ( សូមមើល ឧទាហរណ៍ ខទី ៤៤–៤៥, ៥១–៥២, ៥៥, ៥៨–៥៩, ៦៦–៧១ ) ។ សូមឲ្យក្រដាសទៅកូនរបស់បងប្អូន ហើយសុំឲ្យពួកគេលើកដៃរបស់ពួកគេ នៅពេលដែលការសន្យាដែលពួកគេកំពុងកាន់ត្រូវបានរៀបរាប់នៅពេលបងប្អូនអានខគម្ពីរទាំងនេះ ។ សូមពិភាក្សាថាតើការសន្យាទាំងនេះមានន័យយ៉ាងណា ។ បងប្អូនក៏អាចច្រៀងជាមួយកូនៗរបស់បងប្អូននូវបទចម្រៀង អំពីការយាងមករបស់ព្រះអង្គសង្រ្គោះ ដូចជាបទ « ពេលទ្រង់យាងមកម្តងទៀត » ( សៀវភៅចម្រៀងកុមារ ទំព័រ ៤៦–៤៧ ) ។

ជួយកុមារឲ្យស្គាល់ព្រះវិញ្ញាណ ។ នៅពេលបងប្អូនបង្រៀនកូនៗរបស់បងប្អូន សូមប្រាប់ពួកគេនៅពេលបងប្អូនទទួលអារម្មណ៍នៃព្រះវិញ្ញាណបរិសុទ្ធ ។ សូមនិយាយអំពីរបៀបដែលបងប្អូនស្គាល់ឥទ្ធិពលរបស់ទ្រង់ ។ ឧទាហរណ៍ បងប្អូនអាចទទួលអារម្មណ៍ថាមានសុវត្ថិភាព ឬរីករាយកាលដែលច្រៀងចម្រៀងអំពីព្រះអង្គសង្រ្គោះ ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

ការយាងមកជាលើកទីពីររបស់ព្រះយេស៊ូវគ្រីស្ទ — ការយាងមកជាលើកទីពីរ ដោយ ហារី អាន់ឌើរសិន