19–25 mayo: “Li k’a’ru re li Dios a’an saqen”

Tzol’leb’ ut Sumwank 49–50

Li Kolonel a’an “li chaab’il aj ilol karneer” choq’ qe (Tzol’leb’ ut Sumwank 50:44). A’an naxnaw naq wan naq neke’b’eek chi najt li karneer, ut xiwxiw li yamyookil ch’och’. Jo’kan naq rik’in rahok naxk’am qab’e sa’ li kolb’a-ix naxk’e lix tzol’leb’. Nokoxnajtob’resi rik’in li k’a’ru xiwxiw, jo’ li “musiq’ej li aj b’alaq’eb’, li xikenaqeb’ sa’ li ch’och’, chixb’alaq’inkil li ruchich’och’” (Tzol’leb’ ut Sumwank 50:2). Xtaaqenkil li Qaawa’ naraj naq taqakanab’ li b’alaq’il na’leb’ malaj xna’leb’il li ruchich’och’. A’an yaal chaq choq’ re laj Leman Copley ut eb’ li kristiaan aran Ohio. Ke’xk’ulub’a li evangelio k’ojob’anb’il wi’chik, a’b’an toj yookeb’ chixb’aanunkil junjunq li na’leb’ li moko us ta. Sa’ Tzol’leb’ ut Sumwank 49, li Qaawa’ kixch’olob’eb’ li na’leb’ li ke’xtuqub’eb’ li na’leb’ kixpaab’ laj Leman chirix li sumlaak ut li xkab’ xk’ulunik li Kolonel. Ut naq li ak’ komon aran Ohio “ke’xk’uleb’ li musiq’ej li ink’a’ ke’ru chixtawb’al ru,” li Qaawa’ kixk’ut chiruheb’ chan ru xtz’ilb’al rix b’ar wan lix yaalil k’utb’esihom li Musiq’ej (Tzol’leb’ ut Sumwank 50:15). Li Chaab’il aj Ilol Karneer wan xkuyum qik’in, eb’ lix “kok’aleb’,” li “tento te’k’iiq sa’ li usilal ut sa’ xnawb’al li yaal” (Tzol’leb’ ut Sumwank 50:40).

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 49; 50:24

Li Jesukristo naraj naq tink’ulub’aheb’ li yaal sa’ lix evangelio.

Rub’elaj naq ki’ok sa’ li Iglees, laj Leman Copley a’an chaq xkomon jun ch’uut chi aj paab’anel nawb’il ru jo’ li Xch’utamileb’ laj Paab’ahom re li Xkab’ Xk’utunik li Kristo, malaj eb’ laj Shaker. Chirix jun seraq’ik rik’in laj Leman, laj Jose Smith kixsik’ xna’leb’ rik’in li Qaawa’ chirix junjunq li na’leb’ neke’xk’ut laj Shaker. Li Qaawa’ kixsume a’an sa’ jun k’utb’esinb’il na’leb’ sa’ li raqal 49. Junjunq reheb’ li na’leb’ neke’xpaab’ laj Shaker neke’tawman sa’ xjolomil li tasal.

K’a’ru kixk’ut li Qaawa’ sa’ li tasal 49 re xtuqub’ankil ru lix na’leb’eb’ laj Shaker? Ma nakak’e reetal sa’ li k’utb’esinb’il na’leb’ a’in lix rahom ut lix k’a’uxl a’an chirixeb’ li kristiaan li toj maji’ neke’xtaw lix tz’aqalil li yaal? Chan ru naru taaye’ laa wuq’ reheb’ rik’in rahok ut ajok tenq’ank?

K’a’ru nakaweek’a chirix li kixsume li Qaawa’ sa’ li raqal 2? Naru nakajuntaq’eeta a’in rik’in naq jun raqal ajwi’ li kaxmu nakawil, malaj yal jun ajwi’ xcha’al li rompecabezas nakawil, malaj naq b’ab’ay ajwi’ xcha’al li seraq’ nakawab’i. K’a’ru rilom lix q’usum li Qaawa’ rik’in Tzol’leb’ ut Sumwank 50:24? Tz’il rix k’a’ru yookat chixb’aanunkil re xk’ulb’al xkomon lix saqen li Qaawa’.

Chi’ilmanq ajwi’ “Leman Copley y los tembladores,” sa’ Revelaciones en contexto, 124–129.

Tzol’leb’ ut Sumwank 49:15–17

Lix sumlajik li winq rik’in li ixq aajel ru sa’ lix k’uub’anb’il na’leb li Dios.

Sa’ jun xyalb’al xq’e re xt’anb’al lix k’uub’anb’il na’leb’ li qaChoxahil Yuwa’, laj Satanas naxyal xq’e chixk’eeb’al li sachk sa’ xyanqeb’ li sumalil. Junpak’al chik, li Qaawa’ rik’ineb’ lix profeet toj yoo chixk’utb’esinkil li yaal chirix li sumlaak. Naru nakataw junjunq reheb’ li yaal a’an sa’ Tzol’leb’ ut Sumwank 49:15–17; Genesis 2:20–24; 1 Korintios 11:11; ut “Li Junkab’al: Jun Jek’inb’il Aatin choq’ re li Ruchich’och.” Tz’iib’aheb’ li yaal nakataweb’. K’a’ut naq aajel ru li sumlaak sa’ lix k’uub’anb’il na’leb’ li Dios?

Li Elder Ulisses Soares kixk’ut naq “sa’ lix evangelio li Jesukristo li k’ojob’anb’il wi’chik nak’utman li na’leb’ re li sumk’anjelak rik’in li ixq ut li winq, sa’ li yu’am sa’ ruchich’och’ jo’ ajwi’ sa’eb’ li junelik q’e kutan” (“Sa’ sumk’anjelak rik’in li Qaawa’,” Jolomil ch’utub’aj-ib’ re octubre 2022). Naru nakatzol a’an ut taasik’eb’ na’leb’ “li neke’xkawob’resi li sumk’anjelak rik’in li ixq ut li winq.” Chan ru naru nakawoksiheb’ li na’leb’ a’an sa’ laa yu’am? Wi junaq jalan xpaab’aal tixpatz’ raj aawe k’a’ut naq li sumlaak aajel ru, k’a’ raj ru taasume? K’a’ut naq nakatb’antioxin chirix li na’leb’ a’an?

Chi’ilmanq ajwi’ Temas y Preguntas, “Matrimonio,” “Familia,” Biblioteca del Evangelio; David A. Bednar, “El matrimonio es esencial para Su plan eterno,” Liahona, junio 2006, 83–84; “Renacimiento del matrimonio” (video), Biblioteca del Evangelio.

Renaissance of Marriage

Hear what President Eyring says we all must do to have a renaissance of happy marriages and productive families.

Chat-aatinaq chi eek’anb’il rik’ineb’ chixjunil. Us ta li wank sa’ sumal chi sa ut li wank sa’ junkab’al chi sa a’an li naxk’ut lix evangelio li Jesukristo, moko chiqajunil ta nokoru chixyalb’aleb’ xsahil li osob’tesihom a’an naq wanko sa’ li ruchich’och’. Naq tat-aatinaq chirix li na’leb’ a’an, chat-aatinaq chi eek’anb’il rik’ineb’ li kristiaan ut junkab’al, mas wi’chik rik’ineb’ li kristiaan li “rik’in kuyuk neke’royb’eni li Qaawa’” re naq te’tz’aqloq ru lix junelik yeechi’ihom (chi’ilmanq Tzolʼlebʼ ut Sumwank 98:1–3).

Tzolʼlebʼ ut Sumwank 50

Lix k’utum li Qaawa’ naru tixkol wix chiru xb’alaq’il na’leb’ laj Satanas.

Eb’ li ak’ komon re li Iglees aran Ohio k’eek’ookeb’ xch’ool chixk’ulb’aleb’ lix k’utb’esihom li Musiq’ej li yeechi’inb’ileb’ sa’ li loq’laj hu. A’b’anan, laj Satanas k’eek’o xch’ool chixb’alaq’inkileb’. Wi taapatz’manq raj aawe naq taatenq’aheb’ li komon a’an chixtawb’al ru chan ru te’xk’e reetal li yaal naxk’utb’esi li Santil Musiq’ej, b’ar wan reheb’ li na’leb’ re Tzol’leb’ ut Sumwank 50 taawotz raj? (che’ilmanq tz’aqal li raqal 22–25, 29–34, 40–46). Chan ru naq li Kolonel nakatxtenq’a chixnawb’al ru li yaal ut li ink’a’ yaal?

Chi’ilmanq ajwi’ 1 Korintios 14:1–28; 2 Timoteo 3:13–17.

Tzolʼlebʼ ut Sumwank 50:13–24

Neke’waklesiik raameb’ sa’ komonil li ani neke’tzolok ut li ani neke’k’utuk xb’aan li Musiq’ej.

Xyu’aminkil lix evangelio li Jesukristo naxk’e naab’al qahoonal re wank choq’ aj k’utunel ut choq’ aj tzolonel, sa’ li qochoch ut sa’ li Iglees. Jun na’leb’ re xtzolb’al Tzol’leb’ ut Sumwank 50:13–24 a’an xyiib’ankil xjalam-uuch jun aj k’utunel ut jun aj tzolonel. Chixk’atqeb’ a’an, tz’iib’aheb’ li aatin ut ch’ol aatin li wankeb’ sa’ li raqal a’an li neke’xk’ut junaq na’leb’ chawu chirix xtzolb’al ut xk’utb’al li evangelio. Jo’q’e xanumsi k’a’ruhaq li xk’ut chawu lix aajelil ru li Musiq’ej sa’ li k’utuk ut li tzolok? K’oxla li naru taab’aanu re xchaab’ilob’resinkil lix yalb’al aaq’e jo’ aj k’utunel ut aj tzolonel sa’ li evangelio.

Tzol’leb’ ut Sumwank 50:23–25

“Li kʼaʼru re li Dios aʼan saqen.”

Naq taatz’il rix li raatin li Kolonel neke’tawman sa’ Tzol’leb’ ut Sumwank 50:23–25, k’oxla chan ru nakak’ul lix saqen li Dios sa’ laa yu’am ut chan ru “nakawaalinasi … li q’ojyin.” Qayehaq, chan ru naq eb’ li raqal a’an nakate’xb’eresi chixsik’b’al ru chan ru taawoksi laa hoonal? k’a’ru nakab’aanu re rajsinkil aawu? k’a’ru li seraq’ nakattz’aqon wi’? K’a’ chik ru naru nakatxtenq’a chixsik’b’al ru li raqal a’an? Jun li b’ich jo’ “Laa’at lin saqen” (Eb’ li B’ich, 47) naru ajwi’ tixk’e xkomon chik laa na’leb’.

Chi’ilmanq ajwi’ “Chatb’eeq sa’ xsaqen li Dios,” Choq’ re Xkawilaleb’ li Saaj: Jun tenq’ re xsik’b’al ru laa b’e, 16–21.

Li na’leb’ re xtzolb’aleb’ li kok’al

Tzol’leb’ ut Sumwank 49:12–14

Naru nintaaqe li Jesukristo.

• Re xk’utb’aleb’ li na’leb’ reheb’ li raqal a’in chiruheb’ laa kok’al, naru nakayiib’eb’ xjalam-uuch li oqej chiru hu ut kaahib’ jalam-uuch li te’reetali li paab’aal chirix li Jesukristo, li jalb’a-k’a’uxlej, li kub’iha’, ut lix k’ulb’al li Santil Musiq’ej (che’ilmanq li jalam-uuch sa’ li perel re kok’ k’anjel re li xamaan a’in). Eb’ laa kok’al naru neke’xk’e li oqej chiru li tz’ak ut eb’ li jalam-uuch chixk’atq. Chirix a’an naru neke’xk’e xhoonal chi b’eek sa’ xb’eeneb’ li oqej naq yooqat chixyaab’asinkil Tzol’leb’ ut Sumwank 49:12–14. Tenq’aheb’ chixtawb’al ru naq sa’ li hoonal naq naqab’aanu li k’a’ru wan sa’ li jalam-uuch yooko chixtaaqenkil li Jesukristo.

• Naru ajwi’ nakab’oqeb’ laa kok’al chixjuntaq’eetankil Tzol’leb’ ut Sumwank 49:12–14 rik’in Hechos 2:38 ut rik’in li xkaa xraqalil li paab’aal. K’a’ru li juntaq’eet neke’xtaw? K’a’ut naq aajeleb’ ru li yaal a’an?

Tzol’leb’ ut Sumwank 49:15–17

Lix sumlajik li winq rik’in li ixq aajel ru sa’ lix k’uub’anb’il na’leb li Dios.

• Re aatinak chirixeb’ li raqal a’in ch’olob’ naq eb’ laj Shaker a’aneb’ jun li ch’uut li ke’xpaab’ naq eb’ li kristiaan ink’a’ tento te’sumlaaq (chi’ilmanq lix jolomil Tzol’leb’ ut Sumwank 49). Kanab’eb’ li kok’al chixtawb’al kok’ na’leb’ kixk’ut li Qaawa’ chirix li sumlaak sa’ Tzol’leb’ ut Sumwank 49:15–17. K’a’ru naraj naxye naq “li sumlaak k’ojob’anb’il xb’aan li Dios”? Maare naru nekeril sa’ komonil oxib’ raqal sa’ xtiklajik li “Li Junkab’al: Jun Jek’inb’il Aatin choq’ re li Ruchich’och.” Chirix a’an aatinanqex chirix k’a’ut naq li sumlaak ut li junkab’al aajeleb’ ru choq’ re li qaChoxahil Yuwa’.

Tzol’leb’ ut Sumwank 50:23–25

“Li kʼaʼru re li Dios aʼan saqen.”

• Re aatinak chirix Tzol’leb’ ut Sumwank 50:23–25, aatinan rik’ineb’ laa kok’al chirix xjalanil li saqen ut li aak’ab’. K’a’ut naq naqaj ru li saqen? Naru nekeril sa’ komonil li xb’een raqal sa’ “Chatb’eeq sa’ xsaqen li Dios” sa’ Choq’ re Xkawilaleb’ li Saaj: Jun tenq’ re xsik’b’al ru laa b’e (perel 17) jo’kan ajwi’ Tzol’leb’ ut Sumwank 50:23–25. Yehomaq chan ru naq naqak’ul lix saqen li Dios ut chan ru naru naqanajtob’resi li aak’ab’ B’ichahomaq jun li b’ich li na’aatinak chirix li musiq’ejil saqen, maare “Lemtz’un” (B’ichleb’aal choq’ reheb’ li Kok’al, 96).

Tzol’leb’ ut Sumwank 50:40–46

Li Jesukristo a’an lin Chaab’il aj Ilol Karneer.

• Chirix rilb’al Tzol’leb’ ut Sumwank 50:40–46 sa’ komonil, naru taak’ut xjalam-uuch li Kolonel li wan sa’ li tusleb’ aatin a’in ut taawoksiheb’ li patz’om jo’eb’ a’in: K’a’ru nareek’a jun aj ilol karneer chirixeb’ lix karneer? Chan ru nak’anjelak li Kolonel jo’ aj ilol qe?

Re xtawb’al xkomon chik li na’leb’, chi’ilmanq li hu Amigos re li po a’in.

Li chaab’il aj ilol karneer, xb’aan laj Yongsung Kim