Jun ch’utam sa’ pim, xb’aan laj Worthington Whittredge

12–18 mayo: “Chesik’ chi anchal eech’ool eb’ li maatan q’axal chaab’il”

Tzol’leb’ ut Sumwank 46–48

Naq laj Parley P. Pratt, laj Oliver Cowdery, laj Ziba Peterson, ut laj Peter Whitmer, alalb’ej, ke’el chaq Kirtland ut xkoheb’ re xjultikankil li evangelio, ke’xkanab’ numenaq jun cient chi ak’ komon re li Iglees li k’a’jo’ x’anchalileb’ xch’ool a’ut b’ab’ay ajwi’ xnawomeb’ ut xb’eresinkileb’. Maak’a’eb’ li tenq’anel hu, eb’ li ch’utam re xtzolb’aleb’ laj jolominel, chi moko xpuktesinkileb’ li jolomil ch’utub’aj-ib’—relik chi yaal, yal junjunqeb’ ajwi’ lix Hu laj Mormon wankeb’ chaq rik’ineb’. Naab’al reheb’ li ak’ aj paab’anel a’in ke’k’ame’ rik’in li evangelio li k’ojob’anb’il wi’chik xb’aan li yeechi’ihom naq te’xnumsi lix ninqi ut sachb’a-ch’oolejil k’utb’esihom li Musiq’ej, jo’eb’ li wankeb’ sa’ li Ak’ Chaq’rab’ (chi’ilmanq, jo’ eetalil, 1 Korintios 12:1–11). A’b’an naab’aleb’ li ink’a’ ke’ru chixk’eeb’aleb’ reetal lix k’utb’esihom li Musiq’ej. Naq kiril li sachok na’leb’ a’an, laj Jose Smith kitijok re xk’ulb’al xtenq’. Lix sumehom li Qaawa’ wan xloq’al choq’ re li kutan a’in, naq wankeb’ li neke’xtz’eqtaana malaj ink’a’ neke’xk’e reetal li k’a’ru re li Musiq’ej. A’an kixch’olob’ naq tz’aqal yaaleb’ lix k’utb’esihom li Musiq’ej. Kixch’olob’ ajwi’ naq a’aneb’ maatan naxk’e li qaChoxahil Yuwa’ aj rahonel, “k’eeb’ileb’ choq’ re xchaab’ilaleb’ li ani neke’rahok re [a’an] ut neke’paab’ank re chixjunil lix taqlahom, ut li ani nasik’ok xb’aanunkil chi jo’kan” (Tzol’leb’ ut Sumwank 46:9).

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 46:1–7

Li Kolonel naxk’e xchaab’il k’ulunikeb’ chixjunil li neke’raj loq’onink sa’ lix Iglees.

Ma nakak’oxla naq laa wamiiw ut laa wech kab’al neke’reek’a naq k’ulb’ileb’ sa’ chaab’ilal sa’eb’ li ch’utam re laa teep? K’a’ru yookat chixb’aanunkil re naq eb’ li ch’utam sa’ li Iglees a’anaqeb’ ch’utam te’raj sutq’iik wi’ laa wech kab’al? K’oxla chan ru taawoksi lix na’leb’ li Qaawa’ wan sa’ Tzol’leb’ ut Sumwank 46:1–7 (chi’ilmanq ajwi’ 2 Nefi 26:24–28; 3 Nefi 18:22–23).

Naru ajwi’ nakak’oxla junaq hoonal b’ar wi’ katwulak sa’ li Iglees—malaj sa’ junaq chik ch’utam jalan—xb’een sut. K’a’ru ke’xb’aanu li kristiaan re aatenq’ankil chireek’ankil naq k’ulb’ilat aran?

Chi’ilmanq ajwi’ Moroni 6:5–9; “Bienvenida” (video), Biblioteca del Evangelio.

Sahil k’ulunik sa’ ComeUntoChrist.org

Sahil k’ulunik choq’ aawe sa’ xyanq jun ch’uut chi kristiaan b’ar wi’ chixjunileb’ yookeb’ chixyalb’aleb’ xq’e chi wank jo’ kixk’ut li Jesus. Chalqat ut chawil li k’a’ru naqapaab’ sa’ ComeUntoChrist.org

Tzol’leb’ ut Sumwank 46:7–33

Lin Choxahil Yuwa’ naxk’eheb’ chaq we li musiq’ejil maatan re rosob’tesinkileb’ li was wiitz’in.

Eb’ laj santil paab’anel sa’ xtiklajik li Iglees ke’xpaab’ naq wankeb’ musiq’ejil maatan, a’b’an ki’ajman ru naq te’tenq’aaq chixk’eeb’aleb’ reetal ut chixtawb’aleb’ ru. Naq tattzoloq chirixeb’ li maatan re li Musiq’ej sa’ Tzol’leb’ ut Sumwank 46:7–33, tz’il rix “k’a’ut naq k’eeb’ileb’” (raqal 8). K’a’ru nakatzol chirix li Dios—li nak’ehok reheb’ li maatan a’an?

Ma naru nakajultikaheb’ kristiaan nakawileb’ chiroksinkileb’ li maatan a’in malaj jalaneb’ chik musiq’ejil maatan? Chan ru naq “ke’xchaab’ilob’resiheb’ … li ralal xk’ajol li Dios”? (raqal 26). Naru ajwi’ nakawil ma naru nakataweb’ reetalil li k’iila paay chi musiq’ejil maatan sa’eb’ li loq’laj hu jo’eb’ a’in: 1 Reyes 3:5–15; Daniel 2:26–30; Hechos 3:1–8; Helaman 5:17–19; Mormon 1:1–5; Eter 3:1–15; Tzol’leb’ ut Sumwank 6:10–12; Moises 7:13.

Li tzolok taab’aanu chirixeb’ li musiq’ejil maatan naru nakatxk’am chi k’oxlak chirixeb’ li maatan xk’ehom li Dios aawe. Chan ru taawoksiheb’ li maatan a’in re rosob’tesinkileb’ li ralal xk’ajol a’an? Wi ak xak’ul rosob’tesihom li yuwa’b’ejil aj k’anjel, naru naq a’an naxye resil junjunqeb’ li maatan li k’eeb’ileb’ aawe. Rilb’al li aatin kixwotz li Elder John C. Pingree, alalb’ej, “Wan jun ink’anjel choq’ aawe,” naru naxk’e chi chalk sa’ aak’a’uxl li maatan li ink’a’ nanaq sa’ aach’ool (Jolomil ch’utub’aj-ib’ re octubre 2017).

Wi nawulak raj chawu xtzolb’al chan ru xtawb’aleb’ li musiq’ejil maatan, li na’leb’ natawman sa’ xtiklajik li aatin kixwotz li Elder Juan Pablo Villar, “Xk’eeb’aleb’ chi eek’ank li qamusiq’ejil ich’mul,” naru nakatxtenq’a (Jolomil ch’utub’aj-ib’ re abril 2019). K’a’ru li “eek’asink” naru nakatxtenq’a chixchaab’ilob’resinkileb’ laa musiq’ejil maatan?

Chi’ilmanq ajwi’ Temas y preguntas “Espíritu Santo,” Biblioteca del Evangelio.

Tzolʼlebʼ ut Sumwank 47

Li Qaawa’ naraj naq lix Iglees tixtz’iib’a li resilal.

Lix b’obq’al laj John Whitmer re xtz’iib’ankil resilal li Iglees kixk’e chi xik chi uub’ej li na’leb’ na’ux sa’ xyanqeb’ lix tenamit li Dios re xtz’iib’ankil li esilal. K’a’ut nakak’oxla naq aajel ru choq’ re li Qaawa’ naq natz’iib’aman jun li esilal? K’oxlan chirixeb’ li na’leb’ sa’ li tasal 47, jo’ ajwi’ sa’ 2 Nefi 29:11–12; Moises 6:5; Abraham 1:28, 31. K’a’ru nakak’oxla naq li Dios naraj naq taatz’iib’a chirix laa yu’am.

Sa’ FamilySearch, naru nakak’uulaheb’ k’iila paay chi na’leb’ ut numsihom chirix laa yu’am—ut xyu’ameb’ laa xe’ aatoon (chi’ilmanq FamilySearch.org).

Chi’ilmanq ajwi’ Henry B. Eyring, “Aay, chijultiko’q, chijultiko’q eere,” Jolomil ch’utb’aj-ib’ re octubre 2007.

Laj John Whitmer

Tzolʼlebʼ ut Sumwank 47

Li Santil Musiq’ej naru nikinxb’eresi naq nikink’anjelak sa’ lin b’oqb’al.

Maare naru nakaweek’a li kireek’a laj John Whitmer naq kiraj xnawb’al naq lix b’oqb’al nachal chaq rik’in li Dios. K’a’ru kixye li Qaawa’ sa’ Tzol’leb’ ut Sumwank 47 re laj John Whitmer—ut aawe laa’at—re waklesink ch’oolej chi k’anjelak sa’ li b’oqom naxk’e a’an?

Lix k’anjel jun aj k’utunel. Li k’utuk moko a’an ta ka’ajwi’ xyaab’asinkil junaq esil. A’an b’an xk’uub’ankil junaq na’ajej b’ar wi’ te’tzoloq li komon ut b’ar wi’ te’xtaweb’ li yaal xjuneseb’ rib’ ut xwotzb’al chirib’ileb’ rib’ li k’a’ru neke’xtzol (chi’ilmanq Li K’utuk jo’ li Kolonel, 26).

Li na’leb’ re xtzolb’aleb’ li kok’al

Tzol’leb’ ut Sumwank 46:2–6

Naru nintenq’aheb’ li was wiitz’in chireek’ankil naq kulb’ileb’ chi chaab’il sa’ li iglees.

• Chirix rilb’al Tzol’leb’ ut Sumwank 46:5 rik’ineb’ laa kok’al, wotz k’a’ru naraj li Kolonel naq te’reek’a li kristiaan sa’ lix Iglees a’an. Patz’ reheb’ laa kok’al naq te’xk’oxla naq xe’ril jun kristiaan chi wulak xb’een sut sa’ li Iglees. Tenq’aheb’ chixk’oxlankil chan ru naru neke’xtenq’a li kristiaan a’an chireek’ankil naq k’ulb’il.

Tzolʼlebʼ ut Sumwank 46:7–26

Lin Choxahil Yuwa’ naxk’eheb’ chaq we li musiq’ejil maatan re rosob’tesinkileb’ li was wiitz’in.

• Re xtenq’ankileb’ laa kok’al chi tzolok chirixeb’ li musiq’ejil maatan neke’ch’olob’aman sa’ Tzol’leb’ ut Sumwank 46:13–26, naru nakawoksi li na’leb’ a’in. Naru taatz’iib’aheb’ li maatan chiruheb’ kok’ hu ut taamuqeb’ b’ar wi’ wankex. Naq eb’ laa kok’al te’xtaweb’ li kok’ hu, tenq’aheb’ chixtawb’al b’ar natawman resil li maatan a’an sa’ li raqal 46. Rik’in li junjunq chi maatan, ye reheb’ chan ru neke’oksiman re rosob’tesinkileb’ li qas qiitz’in (li na’leb’ neke’tawman sa’ “Ch’ol 20: Eb’ li maatan re li Musiq’ej,” sa’ Eb’ li Esilal sa’ li Tzol’leb’ ut Sumwank, 77–80, naru neke’tenq’an).

  Chapter 20: Gifts of the Spirit: 8•March 1831

• Aatinan rik’ineb’ laa kok’al chirixeb’ li maatan li nakaweek’a naq xk’e chaq li qaChoxahil Yuwa’ reheb’ a’an ut kanab’eb’ chi aatinak chirixeb’ li maatan neke’ril rik’ineb’ chirib’ileb’ rib’. Jo’ naxye Tzol’leb’ ut Sumwank 46:8–9, 26, k’a’ut naq li qaChoxahil Yuwa’ naxk’e qamusiq’ejil maatan? Chan ru naru neke’qoksi li qamaatan re rosob’tesinkileb’ li qas qiitz’in?

Tzol’leb’ ut Sumwank 47:1, 3

Naru nintz’iib’a resil inyu’am.

• Kanab’eb’ laa kok’al chixk’eeb’al reetal k’a’ru kiraj li Qaawa’ naq tixb’aanu laj John Whitmer sa’ Tzol’leb’ ut Sumwank 47:1, 3. Naru ajwi’ neketaweb’ kok’ seraq’ sa’ li loq’laj hu ut teewotzeb’ a’an cherib’il eerib’. Jultika naq neke’qanaw ru li seraq’ a’an xb’aan naq wan ani kitz’iib’an chaq re.

• K’oxla chan ru taamusiq’aheb’ laa kok’al chixtz’iib’ankileb’ xseraq’ xjuneseb’ rib’. Naru nakawotz junjunq raqal xatz’iib’a laa’at sa’ laa diario malaj junaq seraq’ chirix junaq lee xe’toonil (chi’ilmanq FamilySearch.orgFamilySearch.org malaj li aplicacion Recuerdos). Naru taawotz junjunq li patz’om li naru tixtenq’aheb’ chixtikib’ankil li raatineb’ sa’eb’ lix diario, jo’ “K’a’ru xk’ulman chiru li xamaan a’in li teeraj naq lee ri te’xnaw ru?” malaj “Chan ru xeril li ruq’ li Qaawa’ sa’ lee yu’am chiru li xamaan a’in?” Eb’ li kok’al toj ka’ch’ineb’ naru te’xyiib’ xjalam-uuch li k’a’ru neke’xnumsi, malaj naru taachap xyaab’eb’ xkux naq yookeb’ chi seraq’ik chirix xyu’ameb’. K’a’ruheb’ li osob’tesink li neke’chal rik’in xtz’iib’ankil jun “esilal chi tustu”? (Tzol’leb’ ut Sumwank 47:1).

Tzol’leb’ ut Sumwank 48:2–3

Naru nintenq’aheb’ li was wiitz’in naq ninwotz li k’eeb’il we.

• Naq taawil Tzol’leb’ ut Sumwank 48:2–3 rik’ineb’ laa kok’al, maare tento taach’olob’ naq eb’ li kristiaan yookeb’ chi chalk aran Ohio chalen chaq li rokeb’aal li saq’e ut maak’a’eb’ xna’aj re te’wanq. K’a’ru kixtaqla li Qaawa’ naq te’xb’aanu laj santil paab’anel re te’tenq’anq? Tenq’aheb’ laa kok’al chixk’oxlankil k’a’ru naxk’e li Dios reheb’ li naru neke’xwotz rik’ineb’ li ras riitz’in. Naru ajwi’ nakab’icha jun li b’ich rik’ineb’ jo’ “Li roq ha’ naxye” (B’ichleb’aal choq’ reheb’ li kok’al, 116).

Re xtawb’al xkomon chik li na’leb’, chi’ilmanq li hu Amigos re li po a’in.

Chixjunileb’ li neke’raj xloq’oninkil li Kolonel k’ulb’ileb’ sa’ lix ch’utameb’ laj santil paab’anel.