Kena matailalai mai na Bukanikeba ena Missouri, mai vei Bryan Mark Taylor

9–15 ni Jiune: “Au na Tiko Ga kei Ira sa Yalododonu”

Vunau kei na Veiyalayalati 60–63

Ena itekivu ni Okosita ni 1831, era a vakavakarau tiko o Josefa Simici kei ira na italatala qase tale eso ni Lotu me ra lesu tale ki Katiladi ni oti e dua na veisiko lekaleka ki na “vanua ko Saioni” (Vunau kei na Veiyalayalati 59:3). A vinakata na Turaga me ra vunautaka na kosipeli ena nodra ilakolako (raica na Vunau kei na Veiyalayalati 52:10), ka so vei ira a cakava ena gugumatua. Ia eso tale era a lomalomarua. “Era vunitaka na taledi au sa solia vei ira,” a kaya na Turaga, “ena nodra rerevaka na tamata” (Vunau kei na Veiyalayalati 60:2). E vuqa vei keda eda kila na ka era vakila na italatala qase oqo. E dina ga ni da taleitaka na kosipeli, na rere kei na vakatitiqa e rawa ni tarovi keda mai na kena wasei. Ia sa yalololoma na Turaga. Sa kila o Koya “na malumalumu ni tamata kei na sala me vukei [keda] kina” (Vunau kei na Veiyalayalati 62:1). Era kabuacara tu ena ivakatakila eso oqo kivei ira na daukaulotu taumada na veivakadeitaki e rawa ni vukei keda me da ulabaleta na noda rere kei na malumalumu: “Sa rawa me’u qisi kemudou mo dou savasava.” “Sa tu ena qeteqete ni ligaqu na bula ni tamata kecega.” “Au na tiko ga kei ira sa yalododonu.” Ka “Ko koya sa yalodina tiko ga ka dauvosota, ena vakamalumalumutaki vuravura.” (Vunau kei na Veiyalayalati 60:7; 61:6; 62:9; 63:47.)

Vakasama eso ni Vuli ena iTikotiko vakakina ena Lotu

Vunau kei na Veiyalayalati 60; 62

Au rawa ni wasea na noqu loloma kei na ivakadinadina baleti Jisu Karisito.

E yaco vakacava na nomu ivakadinadina ni kosipeli me vaka e dua na “taledi,” se iyau talei mai vua na Kalou? Ena sala cava soti eda dau “vunitaka [kina] na [noda] taledi”? Vunau kei na Veiyalayalati 60:2; raica talega na Maciu 25:14–30).

Na itukutuku veivakayaloqaqataki cava mai vua na Turaga o raica rawa ena wase 60 kei na 62? E tara cake vakacava na nomu yalodei ena wasei ni kosipeli na itukutuku oqo? Ni o vakasamataka vakatitobu na veitaro oqo, navuca mo lagata se wilika na qaqani “Au Bole Meu sa Kaulotu Edai” (iVolanisere ni Gonelalai, 90). Na cava o vulica mai na nodra sere na gone oqo me baleta na wasei ni kosipeli?

Raica talega na wase ni “Wasea na Kosipeli” ena Valenivola ni Kosipeli.

Au rawa ni doudou me’u wasea na noqu vakabauti Karisito.

Vunau kei na Veiyalayalati 60:2–4; 61:1–2, 20, 36–38; 62:1, 6

E vakavulica na ivolanikalou me baleti Jisu Karisito.

Ni vakaroti ira na Nona daukaulotu, a vakatakila kina na Turaga na dina bibi eso me baleti Koya. Vakaraica na dina eso oqo ena Vunau kei na Veiyalayalati 60:2–4; 61:1–2, 20, 36–38; 62:1, 6. Na italanoa cava soti mai na ivolanikalou e vakaraitaka na itavi kei na itovodei eso ni iVakabula o sa kunea rawa? (raica, me ivakaraitaki, na Joni 8:1–11; Ica 2:14–15).

Vunau kei na Veiyalayalati 62

Na noqu vakatulewa e dodonu me veiraurau kaya na “vakatulewa kei na veivakauqeti ni Yalo.”

Sa dau solia na Turaga na veidusimaki me baleta na dina tawamudu kei na ivakavuvuli, ia e dau biuta vakawasoma vei keda o Koya me vakadeitaka na matailalai ni sala me da cakacakataka kina na veivakavuvuli oqo. O raica vakacava na ivakavuvuli oqo e vakaraitaki tu ena Vunau kei na Veiyalayalati 62? (raica talega na Vunau kei na Veiyalayalati 60:5; 61:22). O sa bau raica beka vakacava na ivakavuvuli oqo ena nomu bula? Na cava e vinaka kina vei keda me da vakatulewa ga ka sega ni namaka na Kalou me tukuna vakadodonu vei keda na ka me da cakava?

Raica talega na Ica 2:18–25; Vunau kei na Veiyalayalati 58:27–28.

Vunau kei na Veiyalayalati 63:7–12

Era dau yaco mai na ivakatakilakila ena vakabauta kei na loma ni Kalou.

Ena icavacava ni ituvatuva oqo, e tiko kina e dua na ivakaraitaki ni cakamana a vakauqeti Ezra Booth vakatitobu: A vakabulai ena cakamana na ligai Elsa Johnson. Ni raica oti ga oqori, a papitaiso sara o Ezra ena yalo nanamaki. Ia, ena loma ga ni vica na vula, a yali na nona vakabauta o Ezra ka yaco sara me vakalewa na Parofita. E rawa vakacava oqo, ni vakasamataki na cakamana a vakadinadinataka o koya?

Vakasamataka vakatitobu oqo ena nomu wilika na Vunau kei na Veiyalayalati 63:7–12. Na dina cava soti o vulica me baleta na ivakatakilakila kei na vakabauta?

Raica talega na Maciu 16:1–4; Joni 12:37; Momani 9:10–21; Ica 12:12, 18.

Vunau kei na Veiyalayalati 63:16

Au rawa ni bula savasava ena noqu vakanananu kei na ivalavala.

Ena Vunau kei na Veiyalayalati 63:16, a vakadeitaka tale na iVakabula na veika a vakatavulica o Koya ena Veiyalayalati Vou—ni lawa ni tiko savasava e sega ni dodonu me vakatulewataki walega ena noda ivalavala ia na noda vakanananu talega (raica na Maciu 5:27–28). Ni o wilika na Vunau kei na Veiyalayalati 63:16, vola na ivakaro e solia na iVakabula me baleta na vakanananu ni dodomo ca. Sa rawa talega mo vakasamataka vakatitobu na veibasai ni ivakaro yadua. Me kena ivakaraitaki, na cava eso na vosa se malanivosa e veibasai ni rere? Na veivakalougatataki cava tale e lako mai ni dau tiko na vakanananu kei na ivalavala savasava?

E vuqa na tamata era nanuma ni ivakatagedegede ni Turaga ni tiko savasava ni vakasama kei na ivalavala era sa ivakarau makawa se veivakasaurarataki sara mada ga. Na duidui cava ena yaco kevaka era sasaga kece na luve ni Kalou me ra bulataka na lawa oqo? Sa rawa mo vaqara na isau ni taro oqo ena itukutuku nei Elder David A. Bednar “Eda Vakabauta na Tiko Savasava” (Liaona, Me 2013, 41–44) se “Sa ka tabu na yagomu” (Me iSakisaki ni iTabagone: E Dua na iDusidusi ni Digidigi, 23–26). Na itukutuku cava ni inuinui o kunea rawa?

Dina ga ni da kila tu na veivakalougatataki ni tiko savasava ena noda vakanananu kei na ivalavala, e sega ni kena ibalebale oya ni rawarawa. O na taura beka e so na gauna mo vakasamataka vakatitobu na cava e dredre kina vei iko mo maroroya na ivakatagedegede ni tiko savasava ni iVakabula—kei na cava e vakarawarawataka. Na ivakasala cava soti o rawa ni wasea vei ira na tani me baleta na veika mo cakava ni o temaki ena vakanananu tawakilikili eso?

Veitokoni vakai kemudou. E dua na veivakalougatataki levu ni sota vata ena veisoqoni ni Lotu kei na kalasi sa ikoya na madigi me da tokoni mai vei ira na wekada Yalododonu ena noda sasaga me da muria na iVakabula. E vuqa vei keda eda sotava na bolebole vata oqori, ka sa rawa ni dua na kaukauwa levu na veika eda sotava raraba. Kakua ni rere mo tusanaka ni tiko na nomu bolebole. Wasea vakai kemudou na veika ena vukei iko mo bulataka na lawa ni Kalou ka vorata na veitemaki.

Raica talega na Vunau kei na Veiyalayalati 121:45; Topics and Questions, “Virtue,” Gospel Library; “Standards: Sexual Purity and Modesty—True Confidence” (vidio), Gospel Library; AddressingPornography.ChurchofJesusChrist.org.

Standards: Sexual Purity and Modesty - True Confidence

Two young women share their secret for confidence and self-worth: the companionship of the Holy Ghost.

Vunau kei na Veiyalayalati 63:58–64

Na veika tabu e dodonu me qaravi ena vakarokoroko.

Na ivakavuvuli ena Vunau kei na Veiyalayalati 63:58–64 e sivia yani na cavuti wale ga ni yaca ni Turaga. Na veika tabu cava tale eso e lako “mai cake,” se mai vua na Kalou? Na cava na kena ibalebale “me qarauni” na noda cavuta na veika oqo?

Me baleta na vakasama tale eso, raica na ilavelave ni vula oqo ni mekasini na Liaona kei na Me iSakisaki ni iTabagone .

Vakasama eso ni Nodra Vakatavulici na Gonelalai

Vunau kei na Veiyalayalati 60:4; 61:1–2, 36; 62:1

Na ivolanikalou e vakavulica me baleti Jisu Karisito.

• Sa rawa mo vola eso na itukutuku me baleta na iVakabula e kune ena Vunau kei na Veiyalayalati 60–62 ena veitiki ni pepa lalai. Me ra qai vakasotara vata na luvemu na itukutuku eso oqo ki na iyaloyalo kei Jisu mai na Nona cakacaka vakalotu e vuravura (raica na iVola ni Yaloyalo Vakosipeli, naba 34–61) e vakaraitaka na ivakarau eso oqo. E vakatakilai Koya vakai Koya vakacava vei keda nikua?

  

Kena matailalai mai na Ena iNaki Oqo, mai vei Yongsung Kim

Vunau kei na Veiyalayalati 60:7; 61:1–2; 62:1

Ena vosoti au na Turaga kevaka au veivutuni.

• Ni o wilika na Vunau kei na Veiyalayalati 60:7; 61:2 vata kei ira na luvemu, vukei ira me ra kunea na veivosa e tautauvata ena veitikina oqo. Vakananuma vei ira ni ivakatakila oqo a soli vei Josefa Simici kei ira eso tale na iliuliu ni Lotu. Na cava a vinakata na Turaga me ra kila? E rawa talega ni o veivosakitaka na veika e vakila na iVakabula me baleti keda ni da caka cala kei na ibalebale ni veivutuni. Me vaka ena Vunau kei na Veiyalayalati 62:1, ena veivuke vakacava o Jisu ni da temaki?

Vunau kei na Veiyalayalati 62:3, 9

E vinakati au o Jisu Karisito me’u wasea Nona kosipeli.

• O na tarogi ira beka na luvemu se cava era na kaya kevaka e dua e tarogi ira se cava era taleitaka baleti Jisu Karisito kei na Nona Lotu. Ena rawa ni soli vakasama vei ira na lagati vata ni dua na sere me baleta na wasei ni kosipeli, me vaka na “Au Bole Meu Sa Kaulotu Edai” (iVolanisere ni Gonelalai, 90). Sa rawa mo qai wilika na Vunau kei na Veiyalayalati 62:3 ka kerei ira na luvemu me ra vakarogoca na cava e yaco ni da wasea na noda ivakadinadina. Ena veivuke vakacava na yalayala ena tikina e 9 kevaka eda lomaleqa?

Vunau kei na Veiyalayalati 63:64

Au rawa ni dau vakarokoroko.

• Me vakamacalataki kina na Vunau kei na Veiyalayalati 63:64, sa rawa mo lagata kei ira na luvemu e dua na sere me baleta na vakarokoroko, me vaka na “Sega Walega ni Vakarokoroko” (iVolanisere ni Gonelalai, naba 12). Sa rawa mo qai veivosakitaka na sala duidui eso mo vakaraitaka kina na vakarokoroko vua na Tamada Vakalomalagi kei Jisu Karisito.

• E rawa ni o vukei ira na luvemu me ra kila na cava na vakarokoroko ena nomu veitalanoa vata kei ira me baleta e dua na iyaya e vakamareqeti vei ira, me vaka e dua na ka ni vakatatalo, ivola, se itutuvi taleitaki. Tarogi ira se ra qarauna ka taqomaka vakacava na veika e bibi vei ira Qai wilika vata na Vunau kei na Veiyalayalati 63:64. Na veika cava soti e duatani—se ka tabu—vua na Tamada Vakalomalagi? (raica, me ivakaraitaki, na tikina e 61 kei na tabana ni itaviqaravi ena macawa oqo). Me da cakava vakacava na veika oqo—ena noda vosa kei na noda ivalavala?

Me baleta na vakasama tale eso, raica na ilavelave ni mekasini na iTokani ni vula oqo.

Vakabulai ni Tabai Elsa Johnson,, mai vei Sam Lawlor