Li xam chire li nima’ Missouri, xb’aan laj Bryan Mark Taylor

9–15 junio: “Laaʼin wankin junelik rikʼinebʼ li tiikebʼ chi paabʼank”

Tzol’leb’ ut Sumwank 60–63

Sa’ xtiklajik agosto re 1831, laj Jose Smith ut wankeb’ chik xkomon li xb’eenil re li Iglees yookeb’ chixkawresinkil rib’ re sutq’iik aran Kirtland chirix jun ula’anink sa’ li “ch’och’ Sion” (Tzol’leb’ ut Sumwank 59:3). Li Qaawa’ kiraj naq te’xjultika li evangelio chiru lix b’eenikeb’ (chi’ilmanq Tzol’leb’ ut Sumwank 52:10), ut junjunq reheb’ a’an ke’xyal xq’e chixb’aanunkil. A’b’an wankeb’ chik li ke’wiib’an rix xch’ool. “Neke’xmuq b’an li maatan li kink’e reheb’,” chan li Qaawa’ “xb’aan xxuwankil ru li winq” (Tzol’leb’ ut Sumwank 60:2). Naab’al qe laa’o naqanaw k’a’ru xe’reek’a li xb’eenil a’an. Us ta naqara li evangelio, li xiw ut li xkab’ rix ch’oolej naru nokohe’xram re naq ink’a’ taqawotz. A’b’an li Qaawa’ wan li ruxtaan. A’an “naxnaw lix q’unal xmetz’ew li winq ut chan ru xk’eeb’al qatenq’ankil” (Tzol’leb’ ut Sumwank 62:1). Sa’eb’ li k’utb’esinb’il na’leb’ a’in choq’ reheb’ li misioneer neke’tawman li yaal li naru nokohe’xtenq’a chixq’axb’aleb’ ru li qaxiw ut li qamajelal: “Naruhan chiwu xk’eeb’al eesantilal.” “Chixjunil li tz’ejwalej wan sa’ wuq’.” “Laa’in wankin junelik rik’ineb’ li tiikeb’ chi paab’ank.” Ut li “ani tiik chi paabʼank ut nakuyuk, taanumtaaq saʼ xbʼeen li ruchichʼochʼ.” (Tzol’leb’ ut Sumwank 60:7; 61:6; 62:9; 63:47.)

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 60; 62

Naru ninwotz lin rahom ut lix nawom inch’ool chirix li Jesukristo.

Chan ru naq lix nawom aach’ool chirix li evangelio chanchan jun li “maatan,” malaj jun b’ihomal naxk’e li Dios? Chan ru naq wan naq “naqamuq li qamaatan”? (Tzol’leb’ ut Sumwank 60:2; chi’ilmanq ajwi’ Mateo 25:14–30).

K’a’ruheb’ li na’leb’ naxk’e li Qaawa’ sa’eb’ li tasal 60 ut 62 li neke’xwaklesi aach’ool? Chan ru naq eb’ li na’leb’ a’in neke’xk’e xkawil aach’ool chixwotzb’al li evangelio? Naq nakatz’il rixeb’ li patz’om a’in, naru nakab’icha malaj nakawil ruheb’ li aatin sa’ “Nawaj tinwanq choqʼ jun li misioneer” (B’ichleb’aal choq’ reheb’ li kok’al, 90). K’a’ru nakatzol sa’ li b’ich a’in reheb’ li kok’al chirix xwotzb’al li evangelio?

Chi’ilmanq ajwi’ li jun ch’uut “Compartir el Evangelio” sa’ li Biblioteca del Evangelio.

Naru ninte lin ch’ool rik’in xwotzb’al lin paab’aal chirix li Kristo.

Tzol’leb’ ut Sumwank 60:2–4; 61:1–2, 20, 36–38; 62:1, 6

Eb’ li loq’laj hu neke’k’utuk chirix li Jesukristo.

Naq kixtzoleb’ lix misioneer, li Qaawa’ kixk’utb’esiheb’ aajel ruhil yaal chirix a’an. Sik’eb’ li yaal a’an sa’ Tzol’leb’ ut Sumwank 60:2–4; 61:1–2, 20, 36–38; 62:1, 6. B’ar wankeb’ li seraq’ sa’ loq’laj hu neke’xk’utb’esi lix k’anjel ut eb’ lix chaab’ilal li Kolonel xataw? (chi’ilmanq, jo’ eetalil, Jwan 8:1–11; Eter 2:14–15).

Tzolʼlebʼ ut Sumwank 62

Li k’a’ru ninsik’ ru tento naq tixtuqub’ ru “xchaab’ilal li na’leb’ ut lix b’eresihom li Musiq’ej.”

Li Qaawa’ naxk’e b’eresihom chirix li yaal ut eb’ li junelikil na’leb’, a’b’an wan naq nokoxkanab’ re naq laa’o taqil chan ru taqak’anjela li k’a’ru neke’xye li na’leb’ a’an. Chan ru nakawil chi k’utmank li na’leb’ a’in sa’ Tzol’leb’ ut Sumwank 62? (chi’ilmanq ajwi’ Tzol’leb’ ut Sumwank 60:5; 61:22). Chan ru naq xawil chi kʼanjelak li naʼlebʼ aʼin saʼ laa yuʼam laaʼat? K’a’ut naq us naq taqasik’ k’a’ru taqab’aanu qajunes qib’ sa’ xna’aj royb’eninkil naq li Dios tixye qe k’a’ru taqab’aanu?

Chi’ilmanq ajwi’ Eter 2:18–25; Tzol’leb’ ut Sumwank 58:27–28.

Tzol’leb’ ut Sumwank 63:7–12

Eb’ li eetalil neke’chal xb’aan li paab’aal ut xb’aan li rajom li Dios.

Sa’ xraqik li tusleb’ aatin a’in, wan jun reetalil li sachb’a-ch’oolej li kixsach xch’ool laj Ezra Booth: Lix tel xElsa Johnson kik’ira jo’ jun sachb’a-ch’oolej. Chirix naq kiril a’an, laj Ezra kikub’e xha’ chi sa xch’ool. A’b’anan, chirix xnumik yal junjunq po, kisach xpaab’aal laj Ezra ut ki’ok chixwech’b’al rix li profeet. Chan ru naq kik’ulman a’in, chirix naq kiril jun sachb’a-ch’oolej?

K’oxlan chirix a’in naq yooqat chirilb’al Tzol’leb’ ut Sumwank 63:7–12. K’a’ru li yaal nakatzol chirix li eetalil ut li paab’aal?

Chi’ilmanq ajwi’ Mateo 16:1–4; Jwan 12:37; Mormon 9:10–21; Eter 12:12, 18.

Tzol’leb’ ut Sumwank 63:16

Naru ninwan chi saq wu sa’ lin k’a’uxl ut sa’ lin b’aanuhom.

Sa’ Tzol’leb’ ut Sumwank 63:16, li Kolonel kixch’olob’ li k’a’ru kixk’ut sa’ li Ak’ Chaq’rab’—naq li chaq’rab’ re saq ru ch’oolej tento naq taanumtaaq xwankil sa’ xb’een li qab’aanuhom, ut ajwi’ sa’ xb’een li qak’a’uxl (chi’ilmanq Mateo 5:27–28). Naq nakawil Tzol’leb’ ut Sumwank 63:16, tz’iib’a lix q’usum li Kolonel chirix li yib’ ru k’a’uxlej. Naru ajwi’ nakatk’oxlak chirix k’a’ru li chaab’il chik junpak’al li junjunq chi q’usum. Qayehaq, b’ar wankeb’ junjunq li aatin malaj ch’ol aatin li neke’xkaʼpak’ali li xiw? K’a’ chik ru li osob’tesihom neke’k’ulman naq saq ru li qak’a’uxl ut li qab’aanuhom?

Naab’aleb’ li kristiaan neke’xk’oxla naq lix tusulal ru li wank naxk’ut li Qaawa’ rik’in li saq ruhil ch’oolej ut b’aanuhom ak q’eel chik ut naramok. K’a’ raj ru li jalan wi ta chixjunileb’ li ralal xk’ajol li Dios yookeb’ raj chixyalb’al xq’e chixyu’aminkil li chaq’rab’ a’an? Naru nakasik’ xsumenkil li patz’om a’in sa’ li aatin kixwotz li Elder David A. Bednar, “Creemos en ser castos” (Liahona, mayo 2013, 41–44), malaj “Loq’ laa junxaqalil” (Choq’ re Xkawilaleb’ li Saaj: Jun tenq’ re xsik’b’al ru laa b’e, 23–26). K’a’ru li na’leb’ naxk’e li oyb’enihom nakataw?

Us ta naqanaweb’ ru li osob’tesihom neke’chal xb’aan li wank chi saq qu sa’ qak’a’uxl ut qab’aanuhom, wan naq ch’a’aj a’an. Naru nakak’oxla k’a’ru li ch’a’aj chawu sa’ xpaab’ankil li xtusulal li wank naxk’e li Kolonel rik’in li saq ruhil ch’oolej—ut k’a’ru li moko ch’a’aj ta. K’a’ru naru nakaye reheb’ jalan chik li kristiaan naq te’aaleeq xb’aaneb’ li tz’ajnil k’a’uxlej?

Xtenq’ankil qib’ chiqib’il qib’. Jun reheb’ li xnimal ru rosob’tesihomeb’ li ch’utam ut li tzolok sa’ li Iglees a’an naq naru naqak’ul qatenq’ankil rik’ineb’ laj santil paab’anel sa’ lix yalb’al qaq’e chixtaaqenkil li Kolonel. Naab’al qe laa’o juntaq’eeteb’ li ch’a’ajkilal neke’qanumsi ut chixjunil a’an naru nokohe’xtenq’a. Matxuwak chixk’ulub’ankil naq wan aach’a’ajkilal. Wotzomaq cherib’il eerib’ li k’a’ru naru nekexxtenq’a chixyu’aminkileb’ lix chaq’rab’ li Dios ut teeq’ax ru li aaleek.

Chi’ilmanq ajwi’ Tzol’leb’ ut Sumwank 121:45; Temas y Preguntas, “Virtud,” Biblioteca del Evangelio; “Normas: La pureza sexual y la modestia - La verdadera confianza” (video), Biblioteca del Evangelio; AddressingPornography.ChurchofJesusChrist.org.

Standards: Sexual Purity and Modesty - True Confidence

Two young women share their secret for confidence and self-worth: the companionship of the Holy Ghost.

Tzol’leb’ ut Sumwank 63:58–64

Li k’a’ru loq’ tento taa’ilmanq rik’in oxloq’.

Eb’ li na’leb’ wankeb’ sa’ Tzol’leb’ ut Sumwank 63:58–64 nim wi’chik xyaalal chiru yal ka’ajwi’ xpatz’b’al xk’ab’a’ li Qaawa’. K’a’ru chik ru li k’a’aq re ru loq’ neke’chal “chaq taqe’q,” malaj rik’in li Dios? K’a’ru naraj naxye aatinak chirixeb’ li k’a’aq re ru a’an “chi k’eeb’il reetal”?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzolʼlebʼ ut Sumwank 60:4; 61:1–2, 36; 62:1

Eb’ li loq’laj hu neke’k’utuk chirix li Jesukristo.

• Maare naru nakatz’iib’a junjunq reheb’ li na’leb’ chirix li Kolonel li neke’tawman sa’ Tzol’leb’ ut Sumwank 60–62 chiruheb’ kok’ hu. Chirix a’an, eb’ laa kok’al naru te’xk’uliheb’ li na’leb’ a’an rik’in xjalam-uuch li Kolonel sa’ lix k’anjel sa’ ruchich’och’ (chi’ilmanq Hu reheb’ li Jalam-uuch re li Evangelio, 34–61) li te’xk’utb’esiheb’ li chaab’ilal a’an. Chan ru naxk’e rib’ a’an re naq taqanaw ru?

  

Jalam-uuch re Choq’ re li ajom a’in, xb’aan laj Yongsung Kim

Tzolʼlebʼ ut Sumwank 60:7; 61:1–2; 62:1

Li Qaawa’ tixkuy inmaak wi ninjal ink’a’uxl.

• Naq taawil Tzol’leb’ ut Sumwank 60:7; 61:2 rik’ineb’ laa kok’al, tenq’aheb’ chixtawb’aleb’ li aatin juntaq’eeteb’ xyaalal sa’eb’ li raqal a’an. Jultika reheb’ naq eb’ li k’utb’esinb’il na’leb’ a’an ke’k’eeman re laj Jose Smith ut re xkomoneb’ chik laj jolominel sa’ li Iglees. K’a’ru kiraj li Qaawa’ naq te’xnaw? Naru ajwi’ nekeye k’a’ru nareek’a li Kolonel chiqix naq naqak’ul li sachk ut k’a’ru naraj naxye xjalb’al qak’a’uxl. Jo’ naxye Tzol’leb’ ut Sumwank 62:1, chan ru natenq’an li Jesus naq noko’aaleek?

Tzolʼlebʼ ut Sumwank 62:3, 9

Li Jesukristo naraj naq tinwotz lix evangelio.

• Naru nakapatz’ reheb’ laa kok’al k’a’ raj ru te’xye wi ta jun ramiiweb’ tixpatz’ reheb’ k’a’ru mas nawulak chiruheb’ chirix li Jesukristo ut chirix lix Iglees. Xb’ichankil jun li b’ich na’aatinak chirix xwotzb’al li evangelio, maare “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90), naru naxk’e xna’leb’eb’. Chirix a’an naru nakawil Tzol’leb’ ut Sumwank 62:3 ut taapatz’ reheb’ laa kok’al naq te’rab’i k’a’ru nak’ulman naq naqawotz lix nawom qach’ool. Chan ru naq li yeechi’ihom wan sa’ li raqal 9 naru natenq’an wi nokoxuwak?

Tzol’leb’ ut Sumwank 63:64

Naru ninwan rik’in oxloq’.

• Re aatinak chirix Tzol’leb’ ut Sumwank 63:64, naru taab’icha rik’ineb’ laa kok’al jun li b’ich chirix li oxloq’, jo’ “Li oxloq’ink” (B’ichleb’aal choq’ reheb’ li kok’al, 12). Chirix a’an naru nakaye chan ru naru naqak’ut qoxloq’ihom chiru li qaChoxahil Yuwa’ ut li Jesukristo.

• Naru nakatenq’aheb’ laa kok’al chixtawb’al ru k’a’ru li oxloq’ink naq nakat-aatinak rik’ineb’ chirix junaq k’a’aq re ru aajel ru choq’ reheb’, jo’ jun b’atz’uul, jun li hu, malaj jun li isb’. Patz’ reheb’ chan ru neke’ril ut neke’xkol rix li k’a’aq re ru aajel ru choq’ reheb’. Chirix a’an naru nekeril Tzolʼlebʼ ut Sumwank 63:64. K’a’ru xchaq’al ru—malaj loq’—choq’ re li qaChoxahil Yuwa’? (chi’ilmanq li raqal 61 ut li perel re kok’ k’anjel re li xamaan a’in). Chan ru tento te’qil li k’a’aq re ru a’an—rik’in li qaatin ut li qab’aanuhom?

Re xtawb’al xkomon chik li na’leb’, chi’ilmanq li hu Amigos re li po a’in.

Xk’irtesinkil lix tel li xElsa Johnson, xb’aan laj Sam Lawlor