Independence, Missouri, sa’ 1830, xb’aan laj Al Rounds

2–8 junio: “K’eeb’ilaqeb’ rib’ chi anchaleb’ xch’ool sa’ jun chaab’il k’anjel”

Tzol’leb’ ut Sumwank 58–59

Naq eb’ li xb’eenil re li Iglees ke’ril xb’een sut li tenamit Sion—Independence, Missouri—maawa’ a’an li ke’royb’eni chaq. Ke’wan li ke’xk’oxla naq te’xtaw raj jun nimla tenamit q’axal chaab’il, nujenaq rik’in jun kawil ch’uut chi aj santil paab’anel. Ke’xtaw b’an jun ch’ina k’aleb’aal, maak’a’eb’ wi’ li k’a’aq re ru k’aynaqeb’ wi’ sa’ xyu’ameb’, ut sa’ xna’aj jun ch’uut chi aj santil paab’anel, ke’wan aran yal junjunqeb’ li kristiaan moko tzolb’ileb’ ta. Li Qaawa’ ink’a’ yal kixpatz’ reheb’ naq te’chalq aran Sion—kiraj ajb’an wi’ naq te’xkab’la Sion.

Naq li k’a’ru naqoyb’eni ink’a’ naxk’am rib’ rik’in li yoo chi k’ulmank, naru taajultiko’q qe li kixye li Qaawa’ reheb’ laj santil paab’anel sa’ 1831: “Ink’a’ naru nekeril rik’in ruchich’och’il xnaq’ eeru, sa’ li kutan a’in, lix k’oxlahom lee Dios … ut li loq’alil li taawanq chirix xnumsinkil naab’al li rahilal” (Tzol’leb’ ut Sumwank 58:3). Yaal naq li qayu’am nujenaq chi ch’a’ajkilal, ut wan naq rik’in ajwi’ maa’usilal, a’b’an toj naru “taqak’e chi uxliik naab’al li tiikilal; xb’aan naq wan wankilal qik’in” (eb’ li raqal 27–28).

Chi’ilmanq ajwi’ Santos, 1:130–136.

Li na’leb’ re tzolok sa’ li ochoch ut sa’ li iglees

Tzolʼlebʼ ut Sumwank 58:1–5; 59:23

“Chirix xnumsinkil naabʼal li rahilal nachal li osobʼtesink.”

Eb’ laj santil paab’anel ke’royb’eni naq chiru lix yu’ameb’, li na’ajej Jackson taa’atz’umaq jo’ jun na’ajej taaruuq te’xch’utub’ wi’ rib’ chixjunileb’ laj santil paab’anel. A’b’anan, lix kutankileb’ sa’ li na’ajej Jackson ke’nume’ rik’in k’iila yale’k. Chiru wiib’ oxib’ chihab’ chik, tento naq ke’el aran ut “te’oyb’eninq chiru jarub’aq kutan re taatojmanq rix Sion” (Tzol’leb’ ut Sumwank 105:9).

K’a’ru nakatzol chirix li yale’k malaj ch’a’ajkilal sa’ li raatin li Qaawa’ li neke’tawman sa’ Tzol’leb’ ut Sumwank 58:1–5? K’a’ut nakak’oxla naq wankeb’ li osob’tesink li neke’chal ka’ajwi’ chirix li rahilal? K’a’ruheb’ li osob’tesink ak xak’ul chirix xkuyb’al li rahilal?

K’a’ru nakatzol sa’ Tzol’leb’ ut Sumwank 59:23 li naxk’e aawoyb’enihom?

Tzol’leb’ ut Sumwank 58:26–29

Naru “nink’e chi uxliik naab’al li tiikilal” “chi yal ajb’il inb’aan.”

Jo’ xcha’al li xtzolb’aleb’ li raqal a’an, naru nakatz’iib’a junjunq reheb’ li k’a’aq re ru li “k’eeb’il wi’ aawib’ chi anchal aach’ool.” Ma “chaab’il k’anjeleb’” chixjunileb’ a’an? K’oxla k’a’ru naru nakab’aanu re xk’eeb’al “chi uxliik naab’al li tiikilal”—ut k’uub’ k’a’ru taab’aanu re xtz’aqob’resinkil ru.

K’a’ut naraj li Qaawa’ naq taab’aanu “k’iila k’a’aq re ru chi yal ajb’il aab’aan”? K’a’ raj ru taak’ulmanq wi ta “minb’il [raj] ru sa’ chixjunil li k’a’aq re ru”? K’a’ru naxye sa’ 2 Nefi 2:27 chirix li na’leb’ a’in?

Chi’ilmanq ajwi’ Dale G. Renlund, “Sik’omaq ru anajwan,” Jolomil ch’utub’aj-ib’ re octubre 2018.

Tzol’leb’ ut Sumwank 58:42–43

Li Qaawa’ naxkuy inmaak naq ninjal ink’a’uxl.

Lix yeechi’ihom li Qaawa’ sa’ Tzol’leb’ ut Sumwank 58:42 re xkuyb’aleb’ xmaak chi tz’aqal li ani neke’xyal xk’a’uxl k’a’jo’ xchaq’al ru, us ta naxk’e ajwi’ junjunq li patz’om: K’a’ru naraj naxye li jalb’a-k’a’uxlej? Chan ru tinnaw ma xinjal ink’a’uxl? Us tana naq li Qaawa’ toj naxye: “Jo’ka’in naru teenaw…” (raqal 43).

Arin wankeb’ junjunq lix patz’omeb’ li kristiaan chirix li jalb’a-k’a’uxlej. K’a’ru naxk’ut chawu li Musiq’ej naq nakatzoleb’ li na’leb’ wankeb’ arin?

Chan ru naq xxootoninkil lin maak nikinixtenq’a chixjalb’al ink’a’uxl? Chi’ilmanq Salmos 32:1–5; Proverbios 28:13; Mosiah 27:34–37; Alma 39:12–13.

Yookin chixyalb’al xkanab’ankileb’ lin maak, a’b’an toj nink’ul li sachk. Ma toj yoo chi uxmank lix jalb’al ink’a’uxl? Chi’ilmanq Bradley R. Wilcox, “Li wank chi k’ulub’ej moko naraj ta naxye naq tz’aqal qe qu,” Jolomil ch’utub’aj-ib’ re octubre 2021; “Restauración diaria” (video), Biblioteca del Evangelio.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

Chan ru tinnaw naq li Kolonel xkuy inmaak? Chi’ilmanq Tad R. Callister, “Lix tojb’al rix li maak xb’aan li Jesukristo,” Jolomil ch’utub’aj-ib’ re abril 2019, a’ tz’aqal li raqal “2. Li maak.”

Naru nakataw xkomon aana’leb’ sa’ “Li patz’ok ut li sumenk” chirix li jalb’a-k’a’uxlej sa’ Choq’ re Xkawilaleb’ li Saaj: Jun tenq’ re xsik’b’al ru laa b’e (perel 8–9).

Chi’ilmanq ajwi’ Temas y Preguntas, “Arrepentimiento,” Biblioteca del Evangelio.

Tzolʼlebʼ ut Sumwank 59

Ani li xPolly Knight?

Li xPolly Knight ut lix b’eelom, aj Joseph Knight, yuwa’b’ej, a’aneb’ junjunq reheb’ li xb’een ke’xpaab’ naq laj Jose Smith a’an profeet. Li xPolly ut laj Joseph k’a’jo’ naq ke’xtenq’a li profeet sa’ li k’anjel re xjaltesinkil ru lix Hu laj Mormon. Li junkab’al Knight ke’el chaq Colesville, Nueva York re xch’utub’ankil rib’eb’ rik’ineb’ laj santil paab’anel aran Ohio, ut moqon ke’taqlaak chi xik sa’ li Condado Jackson, Missouri. Naq yookeb’ chaq chi b’eek, kiyajer li xPolly, a’b’an k’eek’o xch’ool chirilb’al Sion rub’elaj naq taakamq. Kixnumsi yal junjunq li kutan aran Missouri toja’ naq kikam (chi’ilmanq Santos, 1:130–131, 135–136). Tzo’leb’ ut Sumwank 59 kik’ule’ sa’ li kutan kikam wi’, ut eb’ li raqal 1 ut 2 maare yookeb’ chi aatinak chirix tz’aqal a’an.

Tzol’leb’ ut Sumwank 59:4–19

Eb’ li taqlahom a’aneb’ osob’tesihom.

K’a’ru naraj naxye “te’xk’ul choq’ xkorooneb’ … li taqlahom”? (raqal 4). K’oxla chan ru naq li Qaawa’ nakatrosob’resi naq nakayal aaq’e chiroxloq’inkileb’ li taqlahom neke’tawman sa’eb’ li raqal 5–19.

Wotz li k’a’ru nakatzol. Wan naq, li musiq’ejil b’eresihom nakak’ul naq nakatzoleb’ li loq’laj hu naru naxkawob’resi lix paab’aaleb’ laa junkab’al, laa wamiiw, ut eb’ li komon re laa teep. Wotz rik’ineb’ a’an laa numsihom, laa week’ahom, ut lix nawom aach’ool chirix li Jesukristo.

Tzol’leb’ ut Sumwank 59:9–19

Li hilob’aal kutan a’an xkutankil li Qaawa’.

Chirix xyeechi’inkil naq taarosob’tesiheb’ laj santil paab’anel aran Sion rik’in “li taqlahom chi maaka’ch’in xk’ihal,” li Qaawa’ kixka’suti jun reheb’ li taqlahom: li taqlahom re roxloq’inkil lix “santil kutan” (Tzol’leb’ ut Sumwank 59:4, 9). Naq yooqat chixtzolb’al Tzol’leb’ ut Sumwank 59:9–19, k’oxla k’a’ut naq roxloq’inkil li hilob’aal kutan q’axal aajel chaq ru choq’ reheb’ laj santil paab’anel a’in naq ke’xsik’ xwaklesinkil Sion. K’a’ut naq nim xloq’al choq’ aawe?

Naru ajwi’ taatz’il rix ma yookat chiroksinkil li hilob’aal kutan jo’ naraj li Qaawa’? Chan ru naq roxloq’inkil li hilob’aal kutan nakatxtenq’a chi kanaak “chi maak’a’ aatz’ajnil xb’aan li ruchich’och’”? (raqal 9). K’a’ru naru taab’aanu re xq’axtesinkil “aaloq’onihom chiru li Q’axal Taqenaq Xwankil”? (raqal 10).

Naru nakak’e reetal naq li Qaawa’ kiroksiheb’ aatin jo’ “saho’k ch’oolej,” “xsahil lee ch’ool” ut “xsahil eerilob’aal” re k’utuk chirix li hilob’aal kutan. K’a’ru nak’ehok xsahil li hilob’aal kutan choq’ aawe? Chan raj ru taach’olob’ chiru anihaq chik k’a’ut naq nakasik’ ru roxloq’inkil lix kutan li Qaawa’?

K’a’ru nakatzol sa’ li b’ich “Saʼ loqʼal, chi qʼun bʼichan” (Eb’ li B’ich, 85) chirix li rajom ut li rosob’tesihom li hilob’aal kutan?

Chi’ilmanq ajwi’ Genesis 2:2–3; Isaias 58:13–14; Russell M. Nelson, “Li hilob’aal a’an sahil kutan,” Jolomil ch’utub’aj-ib’ re abril 2015.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 58:26–28

Li qaChoxahil Yuwa’ kixk’e chaq inwankil re sik’ok-u.

• Rilb’al Tzol’leb’ ut Sumwank 58:26–28 sa’ komonil naru naxk’e aahoonal laa’at ut eb’ laa kok’al chi aatinak chirix li wankilal xk’e qe li qaChoxahil Yuwa’ re xsik’b’al ru li us. Naru nekeraatina eerib’ cherib’il eerib’ chirix li jalan jalanq chi na’leb’ neke’sik’ ru xb’aanunkil ut k’a’ru xk’ulman chirix a’an. Maare taawulaq raj chiruheb’ laa kok’al xyiib’ankil xjalam-uuch lix numsihomeb’.

• Naru nakatz’iib’a sik’om-u chiru jun hu ut k’a’ru xk’ulman chi junpak’al chik li hu, ut taawoksi li hu a’an re xk’utb’al naq li k’a’ru naqasik’ ru ut li k’a’ru nak’ulman ink’a’ jachjookeb’ ru. Maare te’ruuq laa kok’al chixtz’iib’ankil junjunq li na’leb’ xe’xsik’ ru ut k’a’ru xk’ulman chirix a’an. Chirix a’an naru nekeril Tzol’leb’ ut Sumwank 58:27–28 ut tex’aatinaq chirix li na’leb’ nekesik’ ru li “neke’xk’e chi uxliik naab’al li tiikilal” malaj li k’a’ru chaab’il neke’chal. Chan ru “nokoxq’ajkamu malaj nokorosob’tesi li qaChoxahil Yuwa’ naq naqayal qaq’e chixb’aanunkil li us? (raqal 28).

Tzol’leb’ ut Sumwank 59:7, 18–21

“Tatbʼantioxinq chiru li Qaawaʼ laa Dios saʼ chixjunil li kʼaʼaq re ru.”

• Naru taawileb’ li raqal a’an naq yooqex chi b’eek malaj naq yooqex chirilb’aleb’ xjalam-uuch li qasutam, ut teek’e reetal li k’a’aq re ru “neke’xsahob’resi li uhej ut … neke’xsahob’resi xch’ool li aamej” (raqal 18). Naru ajwi’ nekek’eheb’ reetal a’an sa’ jun li b’ich jo’ “Raabʼilin xbʼaan li Dios saʼ choxa” (B’ichleb’aal choq’ reheb’ li kok’al, 16–17). Malaj ut, naru nakab’oqeb’ laa kok’al chixyiib’ankileb’ xjalam-uuch li k’a’ru neke’xb’antioxi ut taakanab’eb’ chixseraq’inkil li na’leb’ chirix lix jalam-uucheb’. Chan ru naru toob’antioxinq chirixeb’ li k’a’aq re ru a’an?

Li Qaawa’ kixyo’ob’tesi naab’al li k’a’aq re ru xchaq’al ru re xsahob’resinkil qach’ool.

Tzol’leb’ ut Sumwank 59:9–12

Li hilob’aal kutan a’an lix kutankil li Qaawa’.

• K’a’ru naru naqab’aanu sa’ li domingo re xloq’oninkil li Qaawa’ ut xtawb’al xsahil qach’ool? Tenq’aheb’ laa kok’al chixtawb’aleb’ na’leb’ sa’ Tzol’leb’ ut Sumwank 59:9–12 ut sa’ li perel re kok’ k’anjel re li xamaan a’in. Maare naru ajwi’ nakataweb’ jalam-uuch malaj k’a’aq re ru li te’reetali li k’a’ru naqab’aanu sa’ li hilob’aal kutan (jo’ xjalam-uuch li loq’laj wa’ak li wan sa’ li tusleb’ aatin a’in). Chan ru naq eb’ li k’a’aq re ru a’in nokohe’xtenq’a chi wulak chi wank jo’ li qaChoxahil Yuwa’ ut li Jesukristo?

Re xtawb’al xkomon chik li na’leb’, chi’ilmanq li hu Amigos re li po a’in.

Jalam-uuch xb’aan li xMarti Major