Mau reo nō te fa’aho’i-fa’ahou-ra’a mai : Te mau ’itera’a pāpū nō « te ’ōrama »

Wilford Woodruff

’Ua tomo mai ’o Wilford Woodruff i roto i te ’Ēkālesia i te ’āva’e Tītema 1833, fātata e piti matahiti i muri a’e i tō Iosepha Semita ’e ’o Sidney Rigdon fāri’ira’a i te ’ōrama i pāpa’ihia i roto i Te Ha’api’ira’a Tumu ʼe te mau Fafaura’a 76. Tē ora ra ’oia i New York i te reira taime ’e ’ua ha’api’i ’oia i « te ’ōrama » mai roto mai i te mau misiōnare e tāvini ra i te reira vāhi. E rave rahi matahiti i muri mai ’ua fa’a’ite ’oia i tōna mau mana’o i ni’a i teie heheura’a :

« ’Ua ha’api’ihia ia’u i tō’u na’ina’ira’a ē, hō’ē ra’i ’e hō’ē hade, ’e ’ua parauhia mai iā’u ē, te ta’ato’ara’a o te feiā ’ī’ino hō’ē ā tā rātou fa’autu’ara’a ’e te feiā parau ti’a hō’ē ā hanahana […]

« I tō’u tai’ora’a i taua ’ōrama rā, ’ua ha’amāramarama te reira i tō’u ferurira’a ’e ’ua fa’ari’i i te ’oa’oa rahi i roto iā’u, ’ua ’ite a’era vau ē, te Atua ’o tei heheu mai i taua parau tumu ra i te ta’ata nei, e Atua pa’ari ïa, te ti’a ’e te parau mau, tei roto iāna te mau ’ateriputi maita’i roa a’e, ’e te mana’o maita’i ’e te ’ite, ’ua ’ite a’era vau ē, ’ua tano tāna parau nō ni’a i te here, te aroha, te ’āfaro ’e te ha’avā, ’e ’ua tupu te mana’o i roto iā’u ’ia here i te Fatu hau atu i tei mua ra i roto i tō’u orara’a. »

« Te ’ōrama’ e heheura’a ïa ’o tē hōro’a i te māramarama hau atu, te parau mau hau atu ’e te parau tumu hau atu i te tahi atu ā heheura’a i pāpa’ihia i roto i te mau huru buka ato’a tei tai’ohia e tātou. Tē fa’a’ite pāpū mai nei te reira ia tātou i tō tātou huru i teie taime, nō hea mai tātou, nō te aha tātou i’ō nei, ’e tē haere nei tātou i hea. E ’ite te huru ta’ata ato’a nā roto i teie heheura’a e aha tāna tuha’a ’e tōna huru ».

« Hou ’a ’ite ai au ia Iosepha ’ua parau vau ē, ’aita vau i tāu’a e aha tōna matahiti, ’e ’aore rā, e aha tōna ’āpī ; ’aita vau i tāu’a e aha tōna hōho’a—e rouru roroa ānei tōna ’e ’aore rā, e rouru poto ānei ; te ta’ata tei fa’a’ite i teie heheura’a [te ’ōrama i fa’ahitihia i roto i te tufa’a 76] e peropheta ïa nā te Atua. ’Ua ’ite au i te reira nā roto iā’u iho. »

Phebe Crosby Peck

I te fa’aro’ora’a ’o Phebe Peck ia Iosepha ’e ia Sidney i te ha’api’ira’a i ni’a i te « ’ōrama », tē ora ra ’oia i Missouri ’e tē ha’apa’o ra ’oia i nā tamari’i to’opae ’ei metua vahine ’ōtahi. ’Ua fa’ahiahia roa ’oia i te ’ōrama ’e ’ua fa’auru iāna ē, nō reira ’oia i pāpa’i ai i teie mau mea i raro nei nō te fa’a’ite i te mau mea tāna i ha’api’i i tōna fēti’i :

« Tē heheu mai nei te Fatu i te mau parau ’aro o te bāsileia i te ao ra i tāna mau tamari’i […] ’Ua haere mai ’o Iosepha Semita ’e ’o Sidney Rigdon e fārerei ia mātou i te tau fa’atupura’a rā’au i ma’iri a’e nei, ’e ’ua fa’atupu mātou e rave rahi putuputura’a ’oa’oa i tō rāua pārahira’a i’ō nei, ’e ’ua fāri’i mātou e rave rahi parau ’aro tei hōhorahia mai i mua ia mātou, ’ua hōro’a mai te reira iā’u i te tāmāhanahana rahi. E nehenehe tātou e hi’o i te aroha o te Atua i te fa’aineinera’a i te mau fare nō te hau nō tāna mau tamari’i. E ’o ’oia ’o tei ’ore e fāri’i i te ’īra’a o te ’evanelia ’e ’ia ti’a ’ei fa’ehau itoito i roto i te ’ohipa a te Mesia, e ’ore ïa e ti’a ’ia pārahi i pīha’i iho i te Metua ’e te Tamaiti. Terā rā, tē vai ra hō’ē vāhi i fa’aineinehia nō rātou ato’a ’aita e fāri’i, terā rā, e vāhi hanahana iti roa a’e ïa i te pārahira’a i roto i te bāsileia tiretiera. E’ita vau e tāmata i te parau i te tahi atu ā mau parau nō ni’a i teie mau mea i te mea ē, te nene’ihia ra te reira i teienei ’e e fa’ataehia te reira i tō te ao ato’a nei. ’E e fāri’i paha ’outou i te hō’ē rāve’a nō te tai’ora’a nō ’outou iho, ’e mai te mea e nā reira ’outou, tē ti’aturi nei au ē, e tai’o ’outou ma te ha’apa’o maita’i ’e ma te ’ā’au pure, nō te mea, e mea faufa’a roa teie mau mea. ’E tē hina’aro nei au ’ia ’imi ’outou i te reira, nō te mea, nā te reira e hōro’a mai ia tātou te ’oa’oa i roto i teie ao ’e i roto i te ao a muri atu. »

Mau fa’ata’ara’a

1. « Remarks », Deseret News, 27 nō Mē 1857, 91.

2. Deseret News, 3 nō ’Ātete 1881, 481 ; hi’o ato’a Te mau ha’api’ira’a a te mau peresideni o te ’Ēkālesia : Wilford Woodruff (2004), 120–21.

3. « Parau fa’a’ite », Deseret Weekly, 5 nō Tetepa 1891, 322.

4. « Rata nā Phebe Crosby Peck ia Anna Jones Pratt », 10 nō ’Ātete 1832, fare vaira’a buka ’ā’amu a te ’Ēkālesia, Roto Miti ; pāpa’ira’a ’e te tomara’a fa’a’āpīhia.