Tuha’a nō Christ and the Rich Young Ruler [Te Mesia ’e te ha’apa’o ture tao’a rahi], nā Heinrich Hofmann

21–27 nō Tiurai : Te vāhi « tei hōro’ahia atu te mea rahi ra, e mea rahi ato’a ïa tē tītauhia atu »

Te Ha’api’ira’a Tumu ʼe te mau Fafaura’a 81–83

I te ’āva’e Māti 1832, ’ua pi’i te Fatu ia Jesse Gause ’ia riro ’oia ’ei tauturu nō Iosepha Semita i roto i te peresidenira’a o te autahu’ara’a teitei (tei parauhia i teie nei, te Peresidenira’a Mātāmua). Te Ha’api’ira’a Tumu ’e te mau Fafaura’a 81 e heheura’a ïa nā te taea’e Gause nō tōna pi’ira’a ’āpī. ’Aita rā ’o Jesse Gause i tāvini ma te ha’apa’o maita’i, nō reira ’ua pi’ihia ’o Frederick G. Williams nō te mono iāna. ’Ua mono te i’oa o te taea’e Williams i te i’oa o te taea’e Gause i roto i te heheura’a.

E au ē, e ’ere i te ’ohipa fifi roa, terā rā, tē fa’a’ite ra te reira i te tahi parau faufa’a : te rahira’a o te mau heheura’a i roto i Te Ha’api’ira’a Tumu ’e te mau Fafaura’a, ’ua fa’ataehia ïa i te mau ta’ata pāpū maita’i, terā rā, e nehenehe tātou e ’imi, i te mau taime ato’a, ’ia fa’a’ohipa i te reira i ni’a ia tātou iho (hi’o 1 Nephi 19:23). Ia taio ana’e tātou te parau a’o a te Fatu ia Frederick G. Williams ’ia « fa’a’eta’eta i te mau turi ’āvae paruparu », e nehenehe tātou e feruri i te mau ta’ata e ti’a ia tātou ’ia fa’a’eta’eta (Te Ha’api’ira’a Tumu ʼe te mau Fafaura’a 81:5). ’Ia tai’o ana’e tātou i te anira’a a te Fatu i te mau melo o te United Firm ’ia « ru’uru’u atu ia ’outou iho i teie nei fafaura’a », e nehenehe tātou e feruri i tā tātou iho mau fafaura’a. ’E e nehenehe tātou e tai’o i tāna fafaura’a : « ’Ua ru’uru’uhia vau […] ’ia rave ’outou i te mea tā’u i parau ra », mai te huru ē, tē paraparau mai nei ’oia ia tātou (Te Ha’api’ira’a Tumu ’e te mau Fafaura’a 82:10, 15). E rave tātou i te reira, inaha, ’ua parau ato’a te Fatu ē, « ’o tā’u e parau atu nei i te hō’ē ra, ’o tā’u ato’a ïa e parau atu nei i te tā’āto’ara’a » (’īrava 5).

Hi’o « Newel K. Whitney and the United Firm », « Jesse Gause : Tauturu nō te peropheta », i roto i Revelations in Context, 142–47, 155–57.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 81:4–5 ; 82:18–19

« E rahi roa te maita’i tā ’oe e fa’atupu i tō ’oe na mau ta’ata tupu. »

I roto i te mau ’īrava e rave rahi i roto i Te Ha’api’ira’a Tumu ’e te mau Fafaura’a 81–83, tē ani mai nei te Fatu ia tātou ’ia tauturu i te mau ta’ata tei hina’aro i te tauturu ’ati a’e ia tātou. A ’ōpua i te tapa’o i te mau irava ’ia ’itehia mai ia ’outou. Hō’ē o te mau hi’ora’a fa’a’itera’a rahi roa a’e, tei roto ïa i Te Ha’api’ira’a Tumu ’e te mau Fafaura’a 81:4–5. Teie te tahi mau uira’a nō te tauturu ia ’outou ’ia feruri hōhonu i teie mau ’īrava :

• E aha te tahi mau rāve’a e nehenehe ai te hō’e ta’ata e « paruparu » ? E aha te aura’a ’ia « aupuru » ia rātou ? Ahea te tāvinira’a huru Mesia ia vetahi ’ē e tauturu mai iā’u i te taime ’a paruparu ai au ?

• E aha te mea e « tautau [ai] i raro » te rima o te hō’ē ta’ata, ’ia au i teie fa’ahōho’ara’a ? Nāhea vau e nehenehe ai e « ’āfa’i mai i ni’a » i taua mau rima ra ?

• E aha te aura’a nō teie parau « te mau turi ’āvae paruparu » ? Nahea i te fa’a’eta’etara’a ia rātou ?

E nāhea te Fa’aora i te rave i teie mau mea nō ’oe ?

Pēnei a’e nā roto i tō ’outou tuatāpapara’a i teie ’īrava, te ha’amana’o nei ’outou i te tahi ta’ata tā ’outou e nehenehe « e aupuru », « e ’āfa’i mai i ni’a », ’e ’aore rā, « e fa’a’eta’eta. » E aha tā ’outou e rave nō te aupuru i te reira ta’ata ?

E aha atu ā tā ’oe i ha’api’i i ni’a i te tāvinira’a ia vetahi ’ē i roto i Te Ha’api’ira’a Tumu ’e te mau Fafaura’a 82:18–19 ? E nehenehe ato’a ’oe e māta’ita’i i te video « Teachings of Thomas S. Monson : Rescuing Those in Need » (Vaira’a buka ’evanelia). ’Ua nāhea te mau melo nō te pāroita a te ’episekōpo Monson i te fa’ahōho’ara’a i te mea tā teie mau ’īrava e ha’api’i nei ?

Teachings of Thomas S. Monson: Rescuing Those in Need

Bishop Thomas Monson and his ward welcome a poor German family into their community, providing them with housing, warmth, and food for Christmas.

Hi’o ato’a Iakoba 2:17–19 ; Mosia 18:8–9 ; « Te mau ’ohipa a te Atua » (video), ChurchofJesusChrist.org.

Works of God

Two families share how they have seen the works of God made manifest in their lives as ward members reach out in love and understanding.

Carl Heinrich Bloch (1834–1890), Te Mesia i te Fa’aorara’a i te ma’i i Beteseda, 1883, pēni hinu, 100 3/4 x 125 1/2 initi. Brigham Young University Museum of Art, hoʼohia mai nā roto i te moni tei hōroʼahia e Jack R. ’e ’o Mary Lois Wheatley, 2001.

Te Ha’api’ira’a Tumu ’e te mau Fafaura’a 82:3

’Ua rahi roa te hōro’a a te Fa’aora nō’u ’e tē tītau nei ’oia iā’u i taua hōro’a nāna ra.

E riro te tai’ora’a i teie ’īrava e fa’auru ia ’oe e ’ia hi’o fa’ahou i te mea tā te Atua i hōro’a ia ’oe—i te mau ha’amaita’ira’a pae tino ’e te pae vārua. ’A ha’amana’o noa i te reira ’a tai’o ai ’outou i te toe’a o te tufa’a 82. I tō ’outou mana’o, e aha tā te Atua e tītau nei ia ’outou ?

Hi’o ato’a « Nō te mea ’ua rahi te mau ha’amaita’ira’a », Te mau hīmene, N°130.

Te Ha’api’ira’a Tumu ʼe te mau Fafaura’a 82:8–10

’Ua riro te mau fa’auera’a ’ei tāpa’o fa’a’ite nō te aroha o te Atua ia tātou.

Mai te mea ’outou ’e ’aore rā te vetahi tā ’outou i mātau e ’ua uiui ē nō te aha te Fatu i hōro’a mai ai e rave rahi fa’auera’a, Te Ha’api’ira’a Tumu ʼe te mau Fafaura’a 82:8–10 ’o tei tauturu. E aha te mau mana’o nō roto mai i teie mau ’īrava tei tauturu ia ’outou ’ia fa’ata’a i te vetahi ’ē, nō te aha ’outou i mā’iti ai i te pe’e i te mau fa’auera’a a te Fatu ? E aha tā ’oe e nehenehe e fa’aau i te mau fa’auera’a tei nehenehe e tauturu mai ? E nehenehe ’outou e fa’ari’i mai i te tahi atu ā mau mana’o i roto i Te Ha’api’ira’a Tumu ’e te mau Fafaura’a 1:37–38 ; 130:20–21 ’e te video « E maita’i ’e e ’oa’oa te feiā e ha’apa’o i te mau fa’auera’a a te Atua » (Vaira’a buka ’evanelia). E aha te mau ’itera’a tei ha’api’i ia ’outou ’ia hi’o i te mau fa’auera’a ’ei ha’amaita’ira’a ?

Blessed and Happy Are Those Who Keep the Commandments of God

Read Elder Keetch's full conference talk here: https://www.lds.org/general-conference/2015/10/blessed-and-happy-are-those-who-keep-the-commandments-of-god?lang=eng&_r=1

A feruri i te tahi mau fa’auera’a tā te Atua i horo’a mai ia ’outou. E aha tā teie mau fa’auera’a i ha’api’i ia ’oe i ni’a iāna ’e tōna hina’aro ? (hi’o i te ’īrava 8). ’Ua nāhea tō ’outou orara’a i te tauira’a maoti te ha’apa’ora’a i teie mau fa’auera’a ?

E aha tā ’oe i ’apo mai i ni’a i te Fatu mai roto mai i teie ’īrava 10 ? I tō ’outou mana’o, e aha te aura’a nō te Fatu ia « ru’uru’uhia » ? (hi’o ato’a i te ’īrava 15).

’Ua nāhea tō te Fatu tāpe’ara’a i tāna mau fafaura’a i roto i tō ’outou orara’a ? E aha tā ’oe e parau i te vetahi ’ē ’aita ’oia e hina’aro e ha’apa’o i te mau fa’auera’a nō te mea ’aita rātou i fāri’i i te mau ha’amaita’ira’a tā rātou i ti’aturi ? Tē ’ite ra ānei ’outou i te tahi mau mana’o tauturu i roto i te a’ora’a a Elder D. Todd Christofferson « Tō tātou tā’amura’a i te Atua » ? (Liahona, Mē 2022, 78–80).

Hi’o ato’a Topics and Questions, « Commandments [Te mau fa’auera’a] », Vaira’a buka ’evanelia.

Te Ha’api’ira’a Tumu ’e te mau Fafaura’a 82:10

E ha’amaita’i te Fatu ia tātou nā roto i tāna iho mau rāve’a fa’ahiahia.

’Ua parau te tuahine Virginia H. Pearce, melo tahito nō te peresidenira’a rahi o te Feiā ’Āpī Tamāhine, nō ni’a i te hō’ē vahine tei ha’ape’ape’a nō tāna mau tamari’i tei ha’apa’o ’ore. Ma te ri’ari’a, ’ua tāmata ’oia i te mau mea ato’a tāna e nehenehe e feruri nō te ’imi i te mau ha’amaita’ira’a a te Fatu nō rātou. ’Ua tu’u ’oia i te hō’ē ’ōpuara’a hāhāvai ’ia haere pinepine ’oia i te hiero ’e ’ia ’ite pāpū ē e fa’atura te Fatu i teie fa’atusiara’a rahi ma te tauira’a i te ’ā’au o tāna mau tamari’i. ’Ua fa’a’ite mai te vahine :

« I muri a’e hō’ē ’ahuru matahiti i te terera’a pinepine i te hiero ’e te pure tāmau, ’ua pe’ape’a ri’i au i te paraura’a ē ’aita te mau mā’itira’a a tā’u mau tamari’i i taui […]

« ’Ua taui rā vau. ’Ua riro vau ’ei vahine ta’a ’ē […] ’Ua marū roa tō’u ’ā’au. ’Ua ī au i te aroha. E nehenehe ta’u e rave e rahi atu ā ma te mata’u ore, te ahoaho, te pe’ape’a, te fa’ahapara’a, ’e te ri’ari’a. ’Ua fa’a’ore au i te tā’ōti’a i tō’u taime ’e ’ua nehenehe au e tīa’i i te Fatu. ’E tē fārerei pinepine nei au i te mau fa’a’itera’a nō te mana o te Fatu. Tē hāpono mai nei ’oia i te mau parau poro’i marū ’e te ha’iha’i ’o tē ’ite i tōna aroha nōu ’e nō tā’u mau tamari’i. ’Ua taui tā’u mau tīa’ira’a. Maoti i te tīa’ira’a ’ia taui tā’u mau tamari’i, ’ua tīa’i au i teie mau hāmani maita’i pinepine e te mārū ’e ’ua ’ī roa tō’u ’ā’au mehara nō rātou […]

« ’Ua taui tā’u mau pure. ’Ua hau tō’u fa’a’itera’a atu i tō’u here ’e ’ua hau ato’a tō’u māuruuru […] Tē ha’a nei te Fatu ma te mau rāve’a fa’ahiahia mau, ’e ’ua ’ī au i tei hau i ni’a a’e i te mau ’itera’a ato’a » (i roto « Pure : hō’ē ’ohipa na’ina’i ’e te ’ōhie », I te terono [2017], 288–89).

Te Ha’api’ira’a Tumu ’e te mau Fafaura’a 83

« E ha’apa’ohia te mau vahine ’ivi ’e te mau tamari’i ’ōtare ho’i. »

I te ’āva’e ’Ēperēra 1832, mai tei fa’auehia mai e te Fatu, ’ua rātere ’o Iosepha Semita fātata e 800 maire te ātea nō te fārerei i te feiā mo’a tei ha’aputuputu i Missouri (hi’o Te Ha’api’ira’a Tumu ʼe te mau Fafaura’a 78:9). ’A parahi ai ’oia i reira, ’ua farerei ’oia i te tahi pupu-ta’ata i reira e rave rahi vahine ivi e ’atu’atu nei i tā rātou mau tamari’i o rātou ana’e. I rotopū ia rātou, tē vai ra o Phebe Peck ’e o Anna Rogers tā te peropheta i mātau maita’i. I Missouri i te mau matahiti 1830, ’ua iti roa te mana o te ture-fenua e hōro’a ra i te mau vahine ’ivi nō te faufa’a fenua a tā rātou mau tāne i pohe. E aha tā ’outou e ha’api’i ra i roto i te tufa’a 83 i te nīoa parau o te Fatu nō te mau vahine ’ivi ’e te mau ’ōtare ? ’Ua ’ite ānei ’outou i te vetahi i roto i taua huru orara’a ’e tei fāna’o i tō ’outou aroha ’e te ’aupuru ? E aha te tahi mau rāve’a e vai ra tā ’outou e ’ia hōro’a atu nā te mau vahine ’ivi, te mau ’ōtare, te mau metua vahine ’ōtahi, ’e te tahi nāu pu’e ta’ata tei hina’aro i te tauturu ?

Hi’o ato’a Isaia 1:17 ; Iakobo 1:27.

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 81:3

E nehenehe au e pure i te Atua « ma te reo ’e ma te ’ā’au ato’a. »

• ’a tai’o ai ’outou i Te Ha’api’ira’a Tumu ’e te mau Fafaura’a 81:3 e tā ’outou mau tamari’i, ’a tauturu ia rātou ’ia feruri i te tahi mau vāhi « ta’ata » ’e te tahi mau vāhi « ta’ata ’ore » i reira rātou e nehenehe ai e pure. E nehenehe ato’a ’outou e fa’aro’o ’e ’aore rā e hīmene ’e ’o rātou i te hō’ē hīmene i ni’a i te pure, mai te « I terā hora ma te hau » (Te mau hīmene, N°76). ’A fa’a’ite te tahi i te tahi i te mea nō roto i te hīmene ’o tē ha’api’i nei i te tahi parau mau faufa’a roa i ni’a i te pure. E nehenehe ato’a ’outou e paraparau nō ni’a i te paraura’a ma te fa’atura i te Metua i te ao ra.

• Nō te fa’aitoito i tā ’outou mau tamari’i ’ia pure i roto i tō rātou ’ā’au, e nehenehe ’outou e hōro’a ia rātou i te mau māfatu pāpie ’e ’a ani ia rātou ’ia pēni ’e ’aore rā ’ia pāpa’i i te hō’ē mea tā rātou e hina’aro e pure i te Metua i te ao ra. ’A fa’a’ite pāpū ē, ’ua ’ite te Metua i te ao ra i te mea tā tātou e feruri nei ’e e mana’o nei, ’e e nehenehe ’oia e fa’aro’o i tā tātou mau pure noa atu ē, e’ita tātou e ha’apūai i te parau. E nehenehe ā ’outou e fa’a’ite ia rātou i te tahi ’itera’a ’a pure ai ’outou i roto i tō ’outou ’ā’au ’e te fa’aro’o ra te Metua i te ao ra ia ’outou.

Te Ha’api’ira’a Tumu ’e te mau Fafaura’a 81:5

Tē hinaʼaro nei ’o Iesu ʼia tāuturu vau i te feiā tei hina’aro i te tauturu.

• ’A pēni ’e tā ’outou mau tamari’i i te hōho’a nō te rima ’e te turi ’āvae, ’e ’a ani i tā ’outou mau tamari’i ’ia ’imi i teie mau tuha’a o te tino i roto i Te Ha’api’ira’a Tumu ’e te mau Fafaura’a 81:5. E aha tā te Fatu e ani mai nei ia tātou i te rave ? E nehenehe ’outou e fa’a’ite te tahi i te tahi i te mau rāve’a i ha’apūai ai te ta’ata ia ’outou i te taime ’a « paruparu » ’outou ’e tō ’outou turi ’āvae. E nehenehe te video « Pass It On » (ChurchofJesusChrist.org) e hōro’a i tā ’outou mau tamari’i i te mau mana’o e nāhea rātou i te tāvini ia vetahi ’ē. E nehenehe ’outou e hīmene ’āmui i te hō’ē hīmene nō ni’a i te aupurura’a, mai te « Ana’ana te ’ē’a » (Te mau hīmene, N°137). E nehenehe ato’a ’outou e tauturu i tā ’outou mau tamari’i ’ia hāmani i te tahi fa’anahora’a nō te tauturu i te hō’ē noa ta’ata tei hina’aro i te tauturu i teie hepetoma.

  Pass It On

  Children around the world have taken President Thomas S. Monson's counsel to find a way to serve others.

• E nehenehe ato’a ’outou e fa’a’ohipa i te mau hōho’a ’e ’aore rā te mau video nō te fa’ati’a i te mau ’ā’amu ’ōhie nō Iesu Mesia i te tāvinira’a ia vetahi ’ē (hi’o i te mau hōho’a i roto i teie arata’i’ra’a ; Buka hōho’a nō te ’evanelia, mau numera 41, 42, 46, 47, 55 ; ’e ’aore rā hō’ē o te mau video nō te Bibilia i roto i te Vaira’a buka ’evanelia). Nāhea tātou e pe’e ai i te hi’ora’a maita’i o te Fa’aora i te tauturura’a ia vetahi ’ē ?

  

E nehenehe tātou e fa’atoro i tō tātou rima i te mau ta’ata tei hina’aro i te tauturu mai tā te Fa’aora i rave.

Tauturu i tā ’outou mau tamari’i ’ia fāri’i i tā rātou iho fa’aurura’a. Te ha’api’ira’a ’ua hau atu ïa i te fa’a’ite-noa-ra’a i te parau mau—te aura’a ra, te tauturura’a i te tahi atu mau ta’ata ’ia riro ’ei pīahi ti’amā. ’Eiaha noa e parau i tā ’outou mau tamari’i e nāhea rātou e tāvini ia vetahi ’ē, ’ei hi’ora’a, ’a fa’aitoito ia rātou ’ia ’imi i te arata’ira’a a te Fatu e ’o vai tā rātou e nehenehe e tauturu.

Te Ha’api’ira’a Tumu ’e te mau Fafaura’a 82:10

’Ua fafau mai te Metua i te ao ra i te mau ha’amaita’ira’a ’a tūtava ai au i te ha’apa’o iāna.

• E nehenehe ’outou ’e tā ’outou mau tamari’i e hi’o i roto i Te Ha’api’ira’a Tumu ’e te mau Fafaura’a 82:8–10 nō te mau pāhonora’a i te uira’a « Nō te aha te Metua i te ao ra i hōro’a mai ai ia tātou i te mau fa’auera’a ? » E hina’aro paha ’outou e tauturu i tā ’outou mau tamari’i ’ia feruri i te mau hi’ora’a nō tāna mau fa’auera’a (hi’o, ’ei hi’ora’a, Exodo 20:4–17 ; Mataio 22:37–39 ; Te Ha’api’ira’a Tumu ’e te mau Fafaura’a 89:5–17). E tauturu paha mai te mea e ’imi ’e ’aore rā e pēni ’outou ’e tā ’outou mau tamari’i i te mau hōho’a nō te fa’ahōho’a te tahi o rātou. Nāhea te mau fa’auera’a a te Metua i te ao ra i te fa’a’ite i tōna here ia tātou ?

• Pēnei a’e e tauturu te tahi ha’uti ’ōhie ’ia ’ite tā ’outou mau tamari’i e ’ua riro te mau fa’auera’a a te Atua ’ei ha’amaita’ira’a, ’eiaha rā ’ei hōpoi’a. E nehenehe te hō’ē ta’ata e hōro’a i te mau arata’ira’a nō te tauturu i te tahi atu ta’ata, tei tāpo’ihia te mata, nō te rave i te tahi mea mai te hō’ē sandwich ’e ’aore rā te penira’a i te tahi hōho’a. ’A feruri i te tahi ’ohipa ’ārearea ’e te ha’arau ! I muri iho ’a ’āparau mea nāhea tō te Atua mau fa’auera’a i riro ai mai te mau arata’ira’a i roto i teie ha’uti.

Nō te tahi atu ā mana’o, ’a hi’o i te ve’a Hoa nō teie ’āva’e.

Fa’ahōho’ara’a nō te fa’aorara’a Iesu i te hō’ē ta’ata, nā Dan Burr