“Hulio 14–20: ‘Iturongkayto’: Doktrina ken ken Katulagan 77–80,” Umaykayo, Sumurot Kaniak—Para iti Pagtaengan ken Simbaan: Doktrina ken Katulagan 2025 (2025)
“Doktrina ken Katulagan 77–80,” Umaykayo, Sumurot Kaniak—Para iti Pagtaengan ken Simbaan: 2025
Agawiden, ni Yongsung Kim
Hulio 14–20: “Iturongkayto”
Doktrina ken Katulagan 77–80
Nakurkurang ngem dua a tawen kalpasan a naisubli ti Simbaan ni Jesucristo, dimmakkel daytoy iti nasurok a 2,000 a miembro ket napardas ti panagdakkelna. Idi Marso 1832 nakipagkita ni Joseph Smith kadagiti dadduma pay a lider ti Simbaan “tapno paglilinnawagan ti pakaseknan ti Simbaan”: ti panagkasapulan a mangipablaak kadagiti paltiing, panaggatang iti daga a paguummongan, ken panangaywan kadagiti nakurapay (kitaen iti Doktrina ken Katulagan 78, paulo ti benneg). Tapno maipaay dagitoy a kasapulan, immawag ti Apo iti bassit a bilang dagiti lider ti Simbaan tapno mangbukel iti United Firm, maysa a grupo a mamagkaykaysa kadagiti panagkagumaanda a “mangipatungpal ti gagem” ti Apo (bersikulo 4) kadagitoy a lugar. Ngem uray kadagita kasta a banag nga administratibo, impamaysa ti Apo dagiti banag ti kinaagnanayon. Kamaudiananna, ti panggep ti maysa a pagimalditan wenno maysa a pagidulinan—a kas iti amin a banag iti pagarian ti Dios—ket ti mangisagana kadagiti annakna nga umawat iti “maysa a lugar iti celestial a lubong” ken “dagiti kinabaknang ti kinaagnanayon” (dagiti bersikulo 7, 18). Ket no narigat a maawatan dagita a bendision ita, iti baet ti adu nga ar-aramiden iti inaldaw a panagbiag, ipanamnamana kadatayo, “Agragsakkayo, ta iturongkayto” (bersikulo 18).
Dagiti Kapanunotan iti Panagsursuro iti Pagtaengan ken iti Simbaan
Mangted ti Dios iti pannakaammo kadagiti tao nga agkalikagum iti daytoy.
Bayat ti panagtrabaho da Joseph Smith ken Sidney Rigdon iti naipaltiing a patarus ti Biblia, adda saludsodda maipapan iti libro ti Apocalipsis, kas iti ar-aramiden ti adu a tattao. Ket kas pagaammo unay ni Joseph, no agkurang iti sirib, mabalinna ti agkiddaw iti Dios. Dagiti nalawag a pannakaammo ken pannakaawat a nagun-odna adda iti Doktrina ken Katulagan 77. Bayat ti panangbasayo iti daytoy a benneg, ibilang ti panangisurat kadagiti nalawag a pannakaammo ken pannakaawat kadagiti adda pakainaiganna a kapitulo iti libro ti Apocalipsis. Ania ti masursuroyo manipud iti panagadalyo maipapan iti panangawat iti paltiing?
Patarus ti Biblia, ni Liz Lemon Swindle
Ania ti United Firm?
Naipasdek ti United Firm a mangasikaso ti pagipablaakan ti Simbaan ken dagiti aramid a pakaseknan iti Ohio ken Missouri. Binukel da Joseph Smith, Newel K. Whitney, ken dadduma pay a lider ti Simbaan a namagtitipon kadagiti pamataudanda tapno maipaay dagiti temporal a kasapulan ti dumakdakkel a Simbaan. Daksanggasat ta, nailumlom iti utang ti United Firm ket nawara idi 1834 idi saanen a mabayadan dagiti utang.
Kitaen met iti “Newel K. Whitney and the United Firm,” iti Revelations in Context, 142–47; Church History Topics, “United Firm (‘United Order’),” Gospel Library.
Makatulongak a “mangipatungpal iti gagem” ni Cristo ken ti Simbaanna.
Imbaga ti Apo ken ni Joseph Smith ken dagiti dadduma pay a lider ti Simbaan a ti panangasikaso iti maysa a pagidulinan ken pagimalditan ket makatulong a “mangipatungpal iti gagem, a nagikumitanyo” (Doktrina ken Katulagan 78:4). Ania koma ti masaoyo iti “gagem” ti Simbaan ti Mangisalakan? Utobenyo daytoy bayat ti panangbasayo iti Doktrina ken Katulagan 78:1–7. Ania ti sumagmamano kadagiti nadumaduma a wagas a makatulongkayo a mangpadur-as iti dayta a panggep —agraman iti pamiliayo?
Kitaen met iti Sapasap a Handbook, 1.2.
Doktrina ken Katulagan 78:17–18
Iturongnakto ti Apo.
Apay iti panagkunayo a no dadduma awagan ti Apo dagiti pasurotna a ”babassit nga ubbing”? (Doktrina ken Katulagan 78:17). Nariknam kadin a kas iti maysa a bassit nga ubing, nalabit gapu iti maysa a banag a “dimo pay la maawatan” wenno “di kabaelan”? (dagiti bersikulo 17–18). Ania ti makitayo kadagitoy a bersikulo a makatulong kadakayo nga “agragsak” (bersikulo 18) iti kakasta a panawen? Ibilangyo ti panangsapul iti ladawan ti bagiyo idi ubingkayo pay, ken utoben no kasano a dimmakkelkayo iti naespirituan manipud idin. Wenno panunotenyo ti maysa a banag a narigat kadakayo idi ubingkayo pay ngem nalaklaka itan. Iti ania a wagwagas a kayat pay laeng ti Nailangitan nga Ama nga agbalinkayo a kas iti maysa nga ubing? (kitaen iti Mosiah 3:19). Kasano nga Isu ket “iturturongnakayo”?
Maawatko ti amin a banag nga addaan iti panagyaman.
Tapno agsagana nga agadal iti Doktrina ken Katulagan 78:19–79, mabalinyo nga ilista dagiti nasayaat a banag a napasamak kadakayo ita. Kalpasanna ilistayo dagiti banag a kasla saanda a bendision kadakayo. Utobenyo dagitoy a listaan bayat ti panangbasayo iti Doktrina ken Katulagan 78:19. Ania ti pagdumaan ti biagyo no awatenyo ti “amin a banag” nga addaan iti panagyaman—uray dagiti banag a mabalin a kasla saan a bendision?
Tapno masursuro ti ad-adu pay maipapan iti no kasano a makaimpluensia iti biagyo ti panagyaman iti Dios, sukisokenyo dagitoy a nasantuan a kasuratan ket ilistayo dagiti kinapudno a masarakanyo: Salmo 107:8–9; Lucas 17:11–19; Taga Filipos 4:6–7; Mosiah 2:19–24; Alma 34:38; 37:37; Doktrina ken Katulagan 46:32; 59:7, 15–21.
Ibilang ti panangsukisok iti mensahe ni Presidente Dieter F. Uchtdorf a “Grateful in Any Circumstances” (Liahona, Mayo 2014, 70–77) para iti balakad maipapan iti no kasano ti agbalin a managyaman. Mabalinyo pay a sapulen ti isu met la a balakad iti video “President Russell M. Nelson on the Healing Power of Gratitude” (Gospel Library). Kasano nga apektuan ti panangyaman ti relasionyo ken ni Jesucristo?
President Russell M. Nelson on the Healing Power of Gratitude
In his 96 years, President Russell M. Nelson of The Church of Jesus Christ of Latter-day Saints has seen many trials. But he says there's a simple remedy to help us find joy in hard times—gratitude.
Sukisoken ken ibinglay. No natudingankayo a mangisuro, agsapulkayo kadagiti wagas a mangtulong kadagiti tao a mangsukisok kadagiti nasantuan a kasuratan wenno balikas dagiti propeta—iti bukbukodda wenno iti babassit a grupo—ken ibinglay no ania ti masursuroda. Kas pagarigan, iti daytoy nga aktibidad mabalinyo nga ikkan ti tunggal indibidual wenno grupo iti benneg ti mensahe ni Presidente Uchtdorf ket kiddawen kadakuada nga ibinglayda ti maysa a ragup ti balikas wenno binatog a mariknada a manggupgop iti insurona.
Kitaen met iti “Count Your Blessings,” Hymns, no. 241; Topics and Questions, “Gratitude,” Gospel Library.
Napatpateg ti awag nga agserbi iti Dios ngem iti no sadino ti pagserbiak.
Maipanggep iti Doktrina ken Katulagan 80, insuro ni Elder David A. Bednar, “Nalabit a maysa kadagiti leksion nga isursuro ti Mangisalakan kadatayo iti daytoy a paltiing ket maysa a naidutok nga aramiden nga agtrabaho iti maysa a maitudo a lugar ket kasapulan ken napateg ngem maikadua laeng iti awag nga agtrabaho” (“Called to the Work,” Liahona, Mayo 2017, 68). Ania dagiti padas a nakatulong kenka a makasursuro a pudno dagiti balikas ni Elder Bednar? Ania dagiti nayon nga adalen a masarakanyo iti Doktrina ken Katulagan 79–80 a makatulong iti maysa a tao a kaaw-awatna laeng ti maysa a baro a calling?
Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Pinarsua ti Dios ti tunggal parsua iti daga.
-
Bayat ti panagbasayo ken dagiti annakyo iti Doktrina ken Katulagan 77:2 nga aggigiddan, mabalinyo a kitaen dagiti ladawan dagiti ayup, agraman dagiti insekto ken tumatayab. Mabalin nga itudo dagiti annakyo dagiti ladawan no basaenyo dagiti balikas a “dagiti ayup,” “dagiti banag nga agkarayam,” ken “tumatayab iti tangatang.” Ibinglay iti tunggal maysa no kasano a tulongannakayo dagiti pinarsua ti Dios a makarikna iti ayatna.
Pinarsua ti Dios ti amin a parsua iti daga.
Makatulongak a “mangipatungpal iti gagem” ni Jesucristo.
-
Tapno matulonganyo dagiti annakyo a mangpanunot maipapan kadagiti akemda iti trabaho ti Apo, ibilangyo ti makipagbasa kadakuada iti Doktrina ken Katulagan 78:4 a mangilasin iti “gagem” a “nangikumitantayo” (inawat wenno pinilitayo a suportaran) idi nabuniagantayo. Allukoyenyo ida a mangsapul kadagiti binatog iti nasantuan a kasuratan a kas kadagitoy para kadagiti posible a sungbat: Mosiah 18:8–10; Doktrina ken Katulagan 20:37; Moises 1:39. Mabalin a magustuan dagiti annakyo ti mangyakem iti no kasano a makatulongda iti aramid ti Apo. Kas pagarigan, ania ti kayarigan ti “mangibaklay kadagiti dagensen ti tunggal maysa” wenno “mangawat iti [bagbagitayo] ti nagan ni Jesucristo”? Kasano daytoy a “mangipatungpal iti gagem” ni Cristo?
Maibinglayko dagiti banag nga adda kaniak kadagiti dadduma.
-
Tapno maisuroyo no ania ti kaipapanan ti “maipatas kadagiti naindagaan a banag” (bersikulo 6), mabalinyo nga ikkan dagiti annakyo kadagiti ladawan ti tattao nga agkasapulan (mabisbisin, nasugatan, wenno malamlammin) ken dagiti banag a makatulong koma (kas iti taraon, benda, wenno ules). Kalpasanna, mabalin nga iparis dagiti annakyo dagiti ladawan kadagiti banag. Ania ti mabalintayo nga ibinglay a mangtulong kadagiti tao nga agkasapulan?
-
Tapno makaala iti sumagmamano a konteksto para iti benneg 78, basaenyo a kadua dagiti annakyo dagiti binatog iti baba ti umuna a dua a ladawan ti “Kapitulo 28: Mapan Manen ni Propeta Joseph Missouri” (iti Dagiti Estoria iti Doktrina ken Katulagan, 108, wenno iti katupagna a video iti Gospel Library). Kalpasanna mabalin dagiti annakyo nga agpammarang a tumultulongda iti maysa a tao a mangbangon iti maysa a balay, mangibingbinglay ti taraon, wenno agserserbi iti sabali a wagas.
2:39Chapter 28: The Prophet Joseph Goes to Missouri Again: March–May 1832
Iturongnakto ni Jesucristo.
-
Mabalin a naragsak para kadagiti annakyo a pagsasaritaan maipanggep iti no ania ti kayat a sawen ti agbalin a maysa a lider ket kalpasanna mangidaulo iti aktibidad. Kalpasan ti aggigiddan a panangbasa iti Doktrina ken Katulagan 78:18, mabalinyo a pagsasaritaan dagiti panawen no kasapulantayo ni Jesus a mangiturong kadatayo. Aggigiddan nga agkansion iti maysa a kanta kas iti “I Will Walk with Jesus” (Gospel Library).
Mabalinko nga awaten ti “amin a banag a siyayaman.”
-
Basaen a kadua dagiti annakyo ti Doktrina ken Katulagan 78:19 tapno matakuatan iti no ania dagiti kari ti Apo para kadagiti siyayaman. Tulonganyo dagiti annakyo a makaawat no ania ti kaipapanan ti “maminggasut”, nalabit babaen iti panangipakita kadakuada ti maysa a bassit a banag ken kalpasanna 100 a kapada dayta a banag. Nalabit a mabalinda ti mangidrowing kadagiti ladawan dagiti banag a naawatda manipud iti Dios “a siyayaman.”
Para iti ad-adu pay a kapanunotan, kitaen iti isyu ti magasin a Friend iti daytoy a bulan.
Minuyongan ti Dios, ni Sam Lawlor