Alu i le Aiga, saunia e Yongsung Kim

14–20 Iulai: ‟O Le a Ou Taitaia Outou i le Ala”

Mataupu Faavae ma Feagaiga 77–80

E le’i atoa le lua o tausaga talu ona toefuatai mai le Ekalesia a Iesu Keriso, ae ua oo i le silia ma le 2,000 tagata auai ma sa vave ona tupu. Ia Mati 1832, sa feiloai ai Iosefa Samita ma taitai o le Ekalesia “e soalaupule i pisinisi faale-Ekalesia”: o le manaomia ona lolomi o faaaliga, faatauina mai o le fanua e faapotopoto i ai, ma le tausiga mo e matitiva (tagai i le Mataupu Faavae ma Feagaiga 78, ulutala o le vaega). Ina ia ausia nei manaoga, na valaau ai le Alii i se vaega toaitiiti o taitai o le Ekalesia e faatulaga le Kamupani Soofaatasi, o se vaega o le a tuufaatasia a latou taumafaiga e “ave i luma le faamoemoe” o le Alii (fuaiupu 4) i nei eria. Ae e ui lava i mataupu faaletaitai faapena, sa taulai lava le Alii i mea o le faavavau. Mulimuli ane, o le faamoemoega o se masini lolomitusi po o se faleteuoloa—e pei o isi mea uma i le malo o le Atua—ua mo le saunia o Lana fanau ia maua “se nofoaga i le lalolagi selesitila” ma “oa o le faavavau” (fuaiupu 7, 18). Ma afai o na faamanuiaga e faigata ona malamalama i ai i le taimi nei, i le lotolotoi o le pisi o le olaga i aso taitasi, ua Ia faamautinoa mai ia i tatou, “Ia fiafia, ona o le a Ou taitaia outou i le ala” (fuaiupu 18).

Manatu mo le Aoaoina i le Aiga ma i le Lotu

Mataupu Faavae ma Feagaiga 77

E tuuina mai e le Atua le malamalama i tagata o e sailia.

A o galulue Iosefa Samita ma Sini Rikitone i le faaliliuga musuia o le Tusi Paia, sa i ai ni a la fesili e uiga i le tusi o Faaaliga, e pei ona iai i le toatele o tagata. Ma e pei ona silafia lelei e Iosefa, pe a leai sona poto, e mafai ona ia ole atu i le Atua. O malamalamaaga na ia maua o loo i le Mataupu Faavae ma Feagaiga 77. A o e faitau i lenei vaega, mafaufau e tusifaamaumau ou malamalamaaga i mataupu talafeagai o loo i le tusi o Faaaliga. O le a se mea ua e aoaoina mai lau suesuega e uiga i le mauaina o faaaliga?

Faaliliuga o le Tusi Paia, saunia e Liz Lemon Swindle

Mataupu Faavae ma Feagaiga 78

O le a le Kamupani Soofaatasi?

Sa amataina le Kamupani Soofaatasi e pulea lelei ai pisinisi lolomitusi ma mataupu faapisinisi a le Ekalesia i Ohaio ma Misuri. Sa i ai Iosefa Samita, Newel K. Whitney, ma isi taitai o le Ekalesia o e sa tuufaatasi a latou punaoa ia ausia ai manaoga faaletino o le Ekalesia ua faatupulaia. O le mea e faanoanoa ai, sa pa’ū atu le Kamupani Soofaatasi i aitalafu ma sa soloia ai i le 1834 ina ua le mafai ona taulimaina ia aitalafu.

Tagai foi i le ‟Newel K. Whitney and the United Firm,” i le Revelations in Context, 142–47; O Autu o le Talafaasolopito o le Ekalesia, ‟United Firm (‘United Order’),” Gospel Library.

Mataupu Faavae ma Feagaiga 78:1–7

E mafai ona ou fesoasoani e “ave i luma le faamoemoe” o Keriso ma Lana Ekalesia.

Sa ta’u atu e le Alii ia Iosefa Samita ma isi taitai o le Ekalesia, o le puleaina o se faleteuoloa ma se falelomitusi o le a fesoasoani e “ave i luma le faamoemoe, lea ua outou tautino i ai” (Mataupu Faavae ma Feagaiga 78:4). O le a sau tala o le a le “faamoemoe” o le Ekalesia a le Faaola? Mafaufau loloto i lenei mea a o e faitau i le Mataupu Faavae ma Feagaiga 78:1–7 O a nisi o auala eseese e mafai ona e fesoasoani ai e faalautele lena faamoemoe—e aofia ai i lou aiga?

Tagai fo’i i le Tusitaulima Aoao, 1.2.

Mataupu Faavae ma Feagaiga 78:17–18

O le a taitaia a’u e le Alii i le ala.

Aisea e te manatu e ta’u ai e le Alii i nisi o taimi Ona soo o “fanau iti”? (Mataupu Faavae ma Feagaiga 78:17). O anafea na e lagonaina ai le pei o oe o se tamaitiiti laitiiti, atonu ona o se mea e te “lei malamalama” [i ai] pe “le mafai ona … gafatia”? (fuaiupu 17–18). O a ni mea ua e maua i nei fuaiupu e mafai ona fesoasoani ai ia te oe “ia fiafia” (fuaiupu 18) i taimi faapena? Mafaufau e su’e sou ata a o e laitiiti, ma mafaufau loloto pe na faapefea ona e tuputupu a’e faaleagaga talu mai lena taimi. Pe mafaufau i se mea sa faigata ia te oe a o e talavou ae ua faigofie atu i le taimi nei. O a ni auala e finagalo ai pea le Tama Faalelagi ia te oe ia pei o se tamaitiiti? (tagai i le Mosaea 3:19). O faapefea ona Ia ‟[taitai] outou i le ala”?

Mataupu Faavae ma Feagaiga 78:19

E mafai ona ou taliaina “mea uma ma le faafetai.”

Ina ia saunia e suesue i le Mataupu Faavae ma Feagaiga 78:19, e mafai ona e faia se lisi o mea lelei na tutupu ia te oe i lenei aso. Ona fai lea o se lisi o mea e le foliga moni mai o ni faamanuiaga ia te oe. Mafaufau loloto i nei lisi a o e faitau i le Mataupu Faavae ma Feagaiga 78:19. O le a le eseesega e faia ai i lou olaga pe afai e te mauaina ‟mea uma” ma le faafetai—e oo lava i mea atonu e le foliga mai o ni faamanuiaga?

Ina ia aoao atili e uiga i le ala e mafai ai e le lotofaafetai i le Atua ona faatosinaina lou olaga, suesue i mau nei ma fai se lisi o upumoni e te maua: Salamo 107:8–9; Luka 17:11–19; Filipi 4:6–7; Mosaea 2:19–24; Alema 34:38; 37:37; Mataupu Faavae ma Feagaiga 46:32; 59:7, 15–21.

Mafaufau e suesue le sāvali a Peresitene Dieter F. Uchtdorf “Ia Lotofaafetai i Soo Se Tulaga” (Liahona, Me 2014, 70–77) mo se fautuaga e uiga i le auala e lotofaafetai ai. E mafai ona e vaavaai mo fautuaga faapena i le vitiō ‟President Russell M. Nelson on the Healing Power of Gratitude” (Gospel Library). E mafai faapefea ona aafia lau sootaga ma Iesu Keriso ona o le lotofaafetai?

Peresitene Russell M. Nelson: O Se Tatalo Faaperofeta o le Lotofaafetai, Faamoemoe, ma le Faamalologa mo le Lalolagi

In his 96 years, President Russell M. Nelson of The Church of Jesus Christ of Latter-day Saints has seen many trials. But he says there's a simple remedy to help us find joy in hard times—gratitude.

Saili ma faasoa atu. Afai ua tofia oe e aoao atu, vaavaai mo ni auala e fesoasoani ai i tagata e suesue i tusitusiga paia po o upu a perofeta—e i latou lava pe i ni vaega toalaiti—ma faasoa atu mea ua latou aoaoina. Mo se faataitaiga, i lenei gaoioiga e mafai ona e tuuina atu i tagata taitoatasi po o vaega se vaega o le sāvali a Peresitene Uchtdorf ma fai atu ia i latou e faasoa mai se fasifuaitau po o se fuaiupu latou te lagona e aotele ai mea sa ia aoao mai.

Tagai foi i le ‟Faitau Ou Manuia,” Viiga, nu. 141; Autu ma Fesili, ‟Lotofaafetai,” Gospel Library.

Mataupu Faavae ma Feagaiga 79–80

O le valaauga e auauna atu i le Atua e sili atu ona taua nai lo o le nofoaga ou te auauna atu ai.

E faatatau i le Mataupu Faavae ma Feagaiga 80, na aoao mai ai Elder David A. Bednar, “Atonu o se tasi o lesona o loo aoao mai e le Faaola ia i tatou i lenei faaaliga e faapea, o se tofiga e galue i se nofoaga faapitoa e tatau ma taua ae e lona lua i le valaauga e auauna atu” (“Valaauina i le Galuega,” Liahona, Me 2017, 68). O a ni aafiaga ua fesoasoani ia te oe e te iloa ai ua moni upu a Elder Bednar? O a ni lesona faaopoopo e mafai ona e maua i le Mataupu Faavae ma Feagaiga 79–80 e mafai ona fesoasoani ai i se tagata ua faatoa mauaina se valaauga?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Faaliliuga a Iosefa Samita o le Tusi Paia

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 77:2

Na faia e le Atua meaola uma i luga o le lalolagi.

• A o outou faitauina faatasi ma lau fanau le Mataupu Faavae ma Feagaiga 77:2 e mafai ona outou vaai i ata o manu, e aofia ai iniseti ma manulele. E mafai e lau fanau ona faasino i ata pe a e faitauina upu ‟manu feai,” ‟mea fetolofi,” ma ‟manu felelei o le ea.” Faasoa atu i le tasi ma le isi le auala e fesoasoani ai foafoaga a le Atua ia te oe e lagonaina Lona alofa.

Na faia e le Atua meaola uma i luga o le fogaeleele.

Mataupu Faavae ma Feagaiga 78:4

E mafai ona ou fesoasoani e “faaalualu ai i luma le faamoemoe” a Iesu Keriso.

• Ina ia fesoasoani i lau fanau e mafaufau e uiga i a latou matafaioi i le galuega a le Alii, mafaufau e faitau faatasi ma i latou le Mataupu Faavae ma Feagaiga 78:4 e faailoa ai le ‟faamoemoe” sa tatou ‟tautino” (taliaina pe filifili e lagolago) ina ua tatou papatiso. Fesoasoani ia i latou e saili i totonu o mau e pei o nei mo ni tali talafeagai: Mosaea 18:8–10; Mataupu Faavae ma Feagaiga 20:37; Mose 1:39. Atonu e fiafia lau fanau e faatino le auala e mafai ai ona latou fesoasoani i le galuega a le Alii. Mo se faataitaiga, e faapei foliga o le “tauave avega a le tasi” po o le “tauave i o [tatou] luga le suafa o Iesu Keriso”? E faapefea e lenei mea ona ‟faaalualu i luma le faamoemoe” o Keriso?

Mataupu Faavae ma Feagaiga 78:6

E mafai ona ou faasoa atu mea ua ou maua i isi.

• Ina ia aoao atu le uiga o le ‟tutusa i mea faaletino” (fuaiupu 6), e mafai ona e tuuina atu i lau fanau ni ata o tagata e manaomia le fesoasoani (fiaaai, manunu’a, po o ma’alili) ma mea faitino o le a fesoasoani (e pei o meaai, o se fusi, po o se palanikeke). Ona mafai lea e lau fanau ona faafetaui ata ma mea faitino. O le a se mea e mafai ona tatou faasoa atu e fesoasoani ai i tagata e manaomia le fesoasoani?

• Ina ia maua se matālalaga mo le vaega 78, faitau faatasi ma lau fanau ia fuaiupu i lalo o ata muamua e lua o le “Mataupu 28: Ua Toe Alu le Perofeta o Iosefa i Misuri” (i le Tala o le Mataupu Faavae ma Feagaiga, 108, po o le vitiō talafeagai i le Gospel Library). Ona faafoliga lea o lau fanau o loo latou fesoasoani i se tasi e fau se fale, faasoa atu meaai, po o auauna atu i se isi auala.

  Chapter 28: The Prophet Joseph Goes to Missouri Again: March–May 1832

Mataupu Faavae ma Feagaiga 78:18

O le a taitai a’u e Iesu Keriso i le ala.

• Atonu e manaia mo lau fanau le talanoa i le uiga o le avea ma se taitai ona taitai lea o se gaoioiga. A uma ona faitau faatasi le Mataupu Faavae ma Feagaiga 78:18, e mafai ona outou talanoaina taimi tatou te manaomia ai Iesu e taitai i tatou. Mafaufau e usu se pese e pei o le ‟O Le a Ou Savali ma Iesu” (Gospel Library).

Mataupu Faavae ma Feagaiga 78:19

E mafai ona ou taliaina “mea uma ma le faafetai.”

• Faitau faatasi ma lau fanau le Mataupu Faavae ma Feagaiga 78:19 e iloa ai mea ua folafola mai e le Alii i tagata o e loto faafetai. Fesoasoani i lau fanau ia malamalama i le uiga o le “sautuaselau lava,” atonu e ala i le faaali atu o se mea faitino laitiiti ona faaali atu lea o le 100 o lena mea faitino. Atonu e mafai ona latou tusia ni ata o mea ua latou maua mai le Atua ‟ma le faafetai.”

Mo nisi manatu, tagai i le lomiga o lenei masina o le mekasini o le Uo .

Faatoaga a le Atua, saunia e Sam Lawlor