Ou Te Manatua le Feagaiga, saunia e Enrique Manuel Garcia

30 Iuni–6 Iulai: “E Leai Se Auupega Ua Faia E Faasaga Ia Te Oulua E Manumalo”

Mataupu Faavae ma Feagaiga 71–75

Talu mai lava lona taulealea, sa feagai lava Iosefa Samita ma tagata faitio—faapea foi ma fili—a’o taumafai o ia e fai le galuega a le Atua. Ae atonu na faapitoa lava le faigata tele i le faaiuga o le 1831 ina ua amata ona faitioina faalauaitele ma le ita e Ezra Booth le Ekalesia, ona i le tulaga lenei, o le tagata faitio o sē sa avea muamua ma tagata talitonu. Na vaai Ezra o faaaoga e Iosefa le mana o le Atua e faamalolo ai se tamaitai. Sa valaaulia o ia e o faatasi ma Iosefa i le sailiiliga muamua lava o le fanua o Siona i Misuri. Peitai, talu mai lena taimi sa aluese ai lona faatuatua ma, i se taumafaiga e faaleaga le Perofeta, sa ia lolomiina ai ni faasologa o tusi i se nusipepa a Ohaio. Ma sa foliga mai sa manuia ana taumafaiga ona o “lagona ita na tutupu mai e faasaga i le Ekalesia” i le eria (Mataupu Faaave ma Feagaiga 71, ulutala o le vaega). O a ni mea e tatau ona fai e tagata talitonu i se tulaga faapena? E ui ina e le’o i ai se tali sa’o se tasi mo tulaga uma lava, e foliga mai e masani lava—e aofia ai le tulaga lenei i le 1831—o se vaega o le tali a le Alii o le, ia puipui le upumoni ma faasa’o faamatalaga pepelo e ala i le “folafolaina atu [o le] talalelei” (fuaiupu 1). Ioe, o le a i ai e le aunoa tagata e faitio i le galuega a le Alii, ae i le iuga, “e leai se ʼauupega ua faia e faasaga [i ai] e manumalo” (fuaiupu 9).

Tagai i le “Ezra Booth ma Isaac Morley,” i le Revelations in Context, 134.

Manatu mo le Aoaoina i le Aiga ma i le Lotu

Mataupu Faavae ma Feagaiga 71

O le a taialaina a’u e le Agaga a o o’u folafola atu le talalelei a le Faaola.

E mafai ona faapopoleina pe a faitioina pe tauemuina e tagata lou faatuatua i le Faaola, Lana talalelei, po o Lana Ekalesia. Pe a tupu lena mea, o le a lau mea e fai? Sa tupu foi se mea faapena i Ohaio i le 1831 (tagai i le faaulutala o le vaega o le Mataupu Faavae ma Feagaiga 71). O le a le mea na ta’u atu e le Alii ia Iosefa Samita ma Sini Rikitone e fai e uiga i ai, i le Mataupu Faavae ma Feagaiga 71? Atonu e mafai ona e lisiina faatonuga na tuuina atu e le Alii ia i latou ma faamanuiaga na Ia folafola mai.

E faaopoopo atu i le suesueina o le vaega 71, e mafai foi ona e suesue i le ala na tali atu ai le Faaola i Ana au faitio i le taimi o Lana galuega i le olaga nei. O nisi nei o faataitaiga: Mataio 22:15–22; 26:59–64; Ioane 10:37–38. O a ni mea ua e aoaoina mai ia te ia? O a ni malamalamaaga faaopoopo e te maua mai le Mataio 18:15; Efeso 4:31–32; 2 Timoteo 3:12; Iakopo 1:19?

E mafai faapefea ona faatatau Lana fautuaga i tulaga o loo feagai ma oe i le asō? Atonu e te mafaufau i ni auala e faasa’o filemu ai mea sese i au lava upu. Mo se faataitaiga, e mafai ona e amata i le faailoa atu o le faaaloalo mo manatu o le isi tagata, ona mafai lea ona e faasoa atu i se auala lotomaualalo ma agalelei mea e te talitonu i ai e uiga ia Iesu Keriso ma Ana aoaoga. Ina ia saunia mo nei taimi, atonu e mafai ona e faata’ita’ia lenei faiga i uo po o tagata o le aiga.

Tagai foi i Autu ma Fesili, ‟Fesoasoani i Isi i Fesili,” Gospel Library; Dallin H. Oaks, “Ola Faatasi ma Alolofa atu i Isi e Eseese o Tatou Talitonuga,” Liahona, Nov. 2014, 25–28; Jörg Klebingat, “Avea ma Soo Lototoa i Aso e Gata Ai,” Liahona, Me 2022, 107–10.

Mataupu Faavae ma Feagaiga 72

E faamanuiaina a’u e le Alii e ala i le auaunaga a taitai e pei o epikopo.

Ina ua valaauina Newel K. Whitney e avea ma epikopo, sa fai si eseese o ona tiute mai i tiute o epikopo i aso nei. Mo se faataitaiga, sa vaai e Epikopo Whitney le faapaiaga o le fanua ma le faatagaga e nofofo ai i Misuri, i le laueleele o Siona. Ae a o e faitau e uiga i lona valaauga i le Mataupu Faavae ma Feagaiga 72, atonu e ono maitauina ai nisi o sootaga i mea o loo faia e epikopo i aso nei—o le mea e sili ai i le agaga, pe afai e le o mea fitoitonu, o o latou tiute.

Mo se faataitaiga, o a ni auala e te “tuu atu [ai] … se tala” i lou epikopo? (fuaiupu 5). I o tatou aso, ‟o le faleteuoloa a le Alii” e mafai ona aofia ai foai, auaunaga, ma taleni a tagata o le uarota (tagai i fuaiupu 10, 12). E mafai faapefea ona e saofaga atu i lena faleteuoloa?

Ua faapefea ona faamanuiaina oe ma lou aiga e le Alii e ala i le auaunaga a se epikopo?

Tagai foi i le sāvali a Quentin L. Cook, “O Epikopo—O Leoleo Mamoe i Lafu a le Alii,” Liahona, Me 2021, 56–60.

Mataupu Faavae ma Feagaiga 73

E tele ni o’u avanoa e faasoa atu ai le talalelei.

Ina ua toe foi mai Iosefa Samita ma Sini Rikitone mai le la tofiga faafaifeautalai (tagai i le Mataupu Faavae ma Feagaiga 71), sa ta’u atu e le Alii ia i la’ua e faaauau le la faaliliuga o le Tusi Paia (tagai Taiala i Tusitusiga Paia, “Faaliliuga a Iosefa Samita (FIS),” Gospel Library). Ae e le faapea ai la na Ia finagalo ia tuu lo latou faasoaina atu o le talalelei. Aua, o se vaega o le olaga o se soo.

A o e faitau i le Mataupu Faavae ma Feagaiga 73, mafaufau pe mafai faapefea ona e faia le talaiga o le talalelei o se mea e faifaipea, “e tusa ai ma le mafai” (fuaiupu 4)—po o le talafeagai—o se vaega o lou olaga faatasi ai ma isi ou tiutetauave.

O le faasoaina atu o le talalelei a Iesu Keriso e mafai ona avea ma mea masani ma faalenatura.

Mataupu Faavae ma Feagaiga 75:1–16

‟Galue ma lou malosi … folafola atu le mea moni.”

O le faaaliga i le vaega 75 sa faatatau i tagata o e na ‟tuuina atu [o latou] igoa e o atu e folafola atu le talalelei [a le Faaola]” (fuaiupu 2). O se tasi o auala e suesue ai lenei faaaliga o le faia lea o ni lisi se lua: (1) auala e faasoa atu ai ma le mataalia le talalelei ma le (2) auala e faamanuia ma lagolagoina ai i tatou e le Alii a o tatou faia.

O le a lou manatu o le a le uiga o le “faatuai” po o le “faapaie” i le faasoaina atu o le talalelei? O le a le foliga o le ‟galue ma lou malosi”? (fuaiupu 3).

Tagai fo’i i le “Ou te Alu i Mea e te Tofia,” Viiga, nu. 169.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• N. K. Whitney & Co. Faleoloa

• Epikopo

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 71

E mafai ona ou tu atu mo le upumoni e ala i le faasoaina atu o la’u molimau.

• E mafai ona e faaaogaina le ulutala o le Mataupu Faavae ma Feagaiga 71 po o le “Mataupu 25: Ua Malaga atu Iosefa Samita ma Sini Rikitone i se Misiona” Tala o le Mataupu Faavae ma Feagaiga, 96 po o vitio fesootai i le Gospel Library) e aoao ai lau fanau e uiga i tulaga na musuia ai le vaega 71. Ona fesoasoani lea ia i latou ia iloa i le fuaiupu 1 le mea na finagalo le Alii ia Iosefa ma Sini e fai e uiga i ‟lagona le lelei” faasaga i le Ekalesia. O le a le mea na Ia fetalai mai o le a faapefea ona Ia fesoasoani ia i la’ua? E mafai faapefea ona tatou pei o Iosefa ma Sini?

  Chapter 25: Joseph Smith and Sidney Rigdon Go on a Mission: December 1831–January 1832

• E mafai foi ona outou usuina se pese e musuia ai lau fanau ia faamaoni i le Faaola, e pei o le “Tu Mo Le Mea Tonu” (Tusipese a Tamaiti, 81). Fesoasoani i lau fanau e faataitai pe faapefea ona faasoa mai mea latou te iloa e uiga ia Iesu Keriso.

Mataupu Faavae ma Feagaiga 72:2

Ua valaauina e le Alii se epikopo e fesoasoani ia te a’u.

• O le faitauina faatasi o le Mataupu Faavae ma Feagaiga 72:2 e mafai ona fatu ai se avanoa e talanoaina ai pe aisea ua tuuina mai ai e le Alii ia i tatou epikopo (tagai foi i le “Mataupu 17: O Epikopo Muamua o le Ekalesia,” i le Tala o le Mataupu Faavae ma Feagaiga, 64–66, po o le vitiō talafeagai i le Gospel Library). E mafai e oe ma lau fanau ona maua ata po o mea faitino e faatusa i tiutetauave o se epikopo. O le itulau o ata ma gaoioiga o loo i le faaiuga o lenei otootoga o loo maua ai ni nai manatu. Ona mafai lea ona outou talanoa faatasi e uiga i epikopo ua outou iloaina ma le ala ua faamanuiaina ai e le Alii lou aiga e ala i la latou auaunaga.

  Chapter 17: The First Bishops of the Church: February and December 1831

Aoao soo atu e uiga ia Iesu Keriso. “Po o a lava mea o loo e aoaoina atu, ia manatua o loo e aoao moni atu e uiga ia Iesu Keriso ma le ala e avea ai e faapei o Ia” (Aoao Atu i le Ala a le Faaola, 6). Mo se faataitaiga, pe a e aoaoina lau fanau e uiga i epikopo, faamamafa atu o i latou o sui o Iesu Keriso, na valaauina e Ia e faia Lana galuega (tagai 1 Peteru 2:25).

Ua talosagaina e le Alii epikopo e tausia tagata e manaomia le fesoasoani.

Mataupu Faavae ma Feagaiga 75:3

E mafai ona tuu atu a’u taumafaiga aupito sili ona lelei i le Alii.

• Ina ia talanoa e uiga i le eseesega i le va o le ‟paie” ma le ‟galue ma [lo tatou] malosi,” atonu e mafai ona e filifilia nisi o galuega auauna atu po o feau i le fale ma valaaulia lau fanau e faataitai le faia faapaiē ona toe fai lea ma lo latou malosi. A o e faitau le “pe faapaie” i le Mataupu Faavae ma Feagaiga 75:3, e mafai e lau fanau ona faaali atu pe faapefea ona latou faia ma le paie ia feau. A e faitau ‟ae galulue ma lo outou malosi,” e mafai ona latou faaalia le ala latou te galulue malosi ai. Aisea e taua ai le faia o le mea sili pe a tatou auauna atu i le Alii?

• I lana sāvali “O Mataupu Faavae e Lua mo Soo se Tamaoaiga” (Liahona, Nov. 2009, 55–58), na faamatala ai e Peresitene Dieter F. Uchtdorf ni tala se lua e uiga i le galue. Atonu e mafai ona e faasoa atu i lau fanau ma talanoa e uiga i lagona o le iloaina sa tatou galulue malosi ma faia le mea sili tatou te mafaia.

Mo nisi manatu, tagai i le lomiga o lenei masina o le mekasini o le Uo .

Iloaina o le Alofa Mutimutivale Agamalu i Lou Olaga, saunia e Keith Larson