23–29 Iuni: “Taua … nai lo Oa o le Lalolagi Atoa”

Mataupu Faavae ma Feagaiga 67–70

Mai i le 1828 e oo i le 1831, na maua ai e le Perofeta o Iosefa Samita le tele o faaaliga mai le Alii, e aofia ai fautuaga faalelagi mo tagata taitoatasi, faatonuga i le puleaina o le Ekalesia, ma faaaliga vaaia o aso e gata ai, ma le tele o upumoni musuia o le faavavau. Peitai o le toatele o le Au Paia latou te le’i faitauina. Sa le’i lomiaina faaaliga i lena taimi, ma e itiiti ni kopi sa maua sa tusilimaina i itulau taitasi ia na feaveai faataamilo i tagata o le ekalesia ma feaveai e faifeautalai.

Ona oo lea ia Novema 1831, sa valaauina e Iosefa se aufono o taitai o le Ekalesia e soalaupule le lolomiina o faaaliga. Ina ua uma ona tāpā le finagalo o le Alii, sa faia loa e nei taitai ni fuafuaga ia lolomiina le Tusi a Mamona. O le a vave ae mafai e tagata uma ona faitau mo i latou lava le afioga a le Atua na faaali mai e ala mai i se perofeta soifua, o ni faamaoniga manino, “o ki o mealilo o le malo o lo tatou Faaola ua toe faatuatuaina mai i tagata.” Mo nei ma le tele o isi mafuaaga, ua manatu ai le Au Paia i le taimi lena ma le taimi lenei, o nei faaaliga ua “taua … nai lo oa o le Lalolagi atoa” (Mataupu Faavae ma Feagaiga 70, ulutala o le vaega, ulutala o le vaega).

Tagai foi i le Au Paia, 1:140–43.

Manatu mo le Aoaoina i le Aiga ma i le Lotu

Mataupu Faavae ma Feagaiga 67:1–9; 68: 3–6

E tautalagia e auauna a le Alii Lona finagalo pe a uunaia ai e le Agaga Paia.

O le faaiuga e lolomi ia faaaliga lea na maua e Iosefa Samita, e foliga mai o se mea faigofie, ae sa le’i mautinoa e nisi o taitai o le Ekalesia anamua, o se manatu lelei lea. O se tasi o atugaluga sa faatatau lea i faaletonu i le auala na tusia ai e Iosefa Samita ia faaaliga. O le faaaliga i le vaega e 67 na oo mai e tali ai lena atugaluga. O le a se mea ua e aoao i ai e uiga i perofeta a le Alii ma faaaliga mai fuaiupu 1–9? O a ni malamalamaaga faaopoopo e te maua mai i le 68:3–6?

Na faapefea ona e iloa mo oe lava ia o faaaliga ua tuuina mai e le Atua i Ana auauna e moni? E mafai foi ona e mafaufau loloto i aafiaga ina ua e lagonaina le fetalai mai o le Alii ia te oe e ala mai i se tasi o Ana auauna (tagai i le Mataupu Faavae ma Feagaiga 68:4). O anafea na e lagonaina ai le ‟uunaia e le Agaga Paia” (fuaiupu 3) e fai atu se tala? Na faapefea ona ‟tu i tafatafa o oe” le Alii? (fuaiupu 6).

A o le’i lomiaina le Tusi o Poloaiga, e i ai nisi o taitai o le Ekalesia na sainia se molimau tusitusia e faapea, ua moni faaaliga o loo i le tusi. Ina ia vaai i se kopi o la latou molimau, tagai i le “Testimony, circa 2 November 1831,” Revelation Book 1, 121, josephsmithpapers.org.

Mataupu Faavae ma Feagaiga 67:10–14

“Faaauau i le onosai.”

E mafai faapefea e le lotovale, fefe, ma le faamaualuga ona taofia i tatou mai le latalata atili atu i le Alii? E faapefea ona tatou faatoilaloina le ‟tagata natura” po o le ‟mafaufau faaletino” ina ia mafai ai ona tatou ‟vaai [ia te Ia] ma iloa ai [o Ia]”? (fuaiupu 12; tagai foi i le Mosaea 3:19). O le a se mea ua e maua i nei fuaiupu ua musuia ai oe ia “faaauau pea i le onosai seia faaatoatoaina [oe]”? (fuaiupu 13).

Mataupu Faavae ma Feagaiga 68:25–31

E mafai ona ou fesoasoani e faaogatotonu lo’u aiga ia Iesu Keriso.

O afioga a le Alii i le Mataupu Faavae ma Feagaiga 68:25–31 e faasino patino lava i mātua, ae pe o oe o se matua pe leai, e mafai ona e faaaogaina Lana fautuaga e fai lau vaega e faatotonugalemu ai lou aiga i le aoaoga faavae a Iesu Keriso. O loo lisi atu i lalo nisi o mataupu faavae na fetalai le Alii e tatau ona aoao atu i totonu o le aiga. Mafaufau pe mafai faapefea ona e faia vaega taitasi nei o le faavae o se aiga e totonugalemu ia Keriso—o le aiga o loo e nofo ai i le taimi nei po o lou aiga i le lumanai. O punaoa ma fesili ua tuuina atu e mafai ona fesoasoani.

• Salamo: Suesue le Alema 36:17–20, ma matau pe na faapefea ona faamanuiaina Alema i se taimi faigata ona sa aoaoina o ia e lona tamā e uiga i le misiona togiola a le Faaola. E mafai faapefea ona e fesoasoani e musuia lou aiga e liliu atu ia Iesu Keriso ma salamo? (tagai foi i le 2 Nifae 25:26).

• Faatuatua ia Keriso: Faitau ia fautuaga e lima a Peresitene Russell M. Nelson mo le atiinaa’eina o le faatuatua i le ‟Ua Toetu Keriso; O Le Faatuatua ia te Ia o le a Aveesea ai Mauga” (Liahona, Me 2021, 103). Mafaufau loloto pe mafai faapefea e nei fautuaga ona fatuina se aganuu o le faatuatua i lou aiga.

• Papatisoga: Iloilo feagaiga o le papatisoga e pei ona faamatalaina i le Mosaea 18:8–10, 13. E mafai faapefea e au taumafaiga e tausia lenei feagaiga ona faamalosia lou aiga?

• Meaalofa o le Agaga Paia: Suesue i valaaulia o loo i itulau 17–19 o le Mo le Malosi o le Autalavou: O Se Taiala mo le Faia o Filifiliga. O le a se mea ua musuia oe e fai e valaaulia ai le uunaiga a le Agaga Paia i totonu o lou aiga?

• Tatalo: O le a se mea ua e aoaoina e uiga i le mana o le tatalo i totonu o le aiga i le ‟O Loo Tautalagia Iinei le Alofa”? (Tusipese a Tamaiti, 102). O a faamanuiaga ua folafola mai e le Faaola i le 3 Nifae 18:15–21?

• O isi mataupu faavae e te maua i le Mataupu Faavae ma Feagaiga 68:25–31:

O le a se fautuaga e te tuuina atu i se tasi e le lagolagoina e tagata o lona aiga a latou taumafaiga e fausia le faatuatua ia Keriso?

Tagai foi i le “O Le Aiga: O Se Folafolaga i le Lalolagi,” Gospel Library; Autu ma Fesili, “Tulaga Faamatua,” Gospel Library; Dieter F. Uchtdorf, “O Iesu Keriso o le Malosi o Matua,” Liahona, Me 2023, 55–59.

Mataupu Faavae ma Feagaiga 69:1

O uo “moni ma faamaoni” e fesoasoani ia te a’u e mulimuli ia Iesu Keriso.

Aisea e te manatu ai o le ‟poto i [le Alii]” mo se tasi e ‟moni ma faamaoni” e o faatasi ma Oliva Kaotui i le tofiga o loo faamatala mai i lenei fuaiupu? E faapefea ona faatatau lenei mataupu faavae ia te oe?

Fesoasoani i tagata aoao e sii a’e e le tasi le isi. O tagata taitoatasi o i lau vasega po o le aiga o se puna faa’oaina o molimau, manatu ma aafiaga i le ola ai i le talalelei. Valaaulia i latou e faasoa atu ma siitia le tasi ma le isi.

Mataupu Faavae ma Feagaiga 70:1–4

Ou te tali atu mo faaaliga ua tuuina mai e le Alii.

Na tuuina atu e le Alii i nisi o le au toeaina le tiutetauave o le vaaia o le lolomiina o faaaliga. E ui ina e le o ia te oe lena tiutetauave faapitoa, ae o le a lou tiute faatausimea ma matafaioi i “faaaliga ma poloaiga”? (fuaiupu 3).

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• O Le Tusi o Poloaiga

• Faaaliga a Iosefa Samita

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 67

E aoao mai a’u e le Mataupu Faavae ma Feagaiga e uiga ia Iesu Keriso.

• Ta’u atu i lau fanau e uiga i le auala na lolomiina ai faaaliga a Iosefa Samita i se tusi (tagai i le “Mataupu 23: O Le Mataupu Faavae ma Feagaiga,” i le Tala o le Mataupu Faavae ma Feagaiga, 90–92, po o le vitiō talafeagai i luga o le Gospel Library). Fesoasoani ia latou manatua nisi o mea ua e aoaoina e uiga ia Iesu Keriso mai le Mataupu Faavae ma Feagaiga i lenei tausaga. E mafai foi ona e faasoa atu i le tasi ma le isi nisi o fuaiupu e sili ona e fiafia i ai mai le Mataupu Faavae ma Feagaiga.

  Chapter 23: The Doctrine and Covenants: August–November 1831

• E mafai foi ona e faaali atu i lau fanau le Tusi Paia, Tusi a Mamona, Mataupu Faavae ma Feagaiga, ma le Penina Tau Tele ma talanoa ma i latou pe faapefea ona eseese i latou ma pe faapefea foi ona tutusa (tagai i faamatalaga o nei tusi i le Taiala i Tusitusiga Paia). E faapefea ona tatou iloa e moni tusitusiga paia? O le a se mea tatou te aoao mai i le Mataupu Faavae ma Feagaiga 67:4,9 e uiga i faaaliga na tuuina mai e le Alii ia Iosefa Samita?

Mataupu Faavae ma Feagaiga 68:25–31

E mafai ona ou papatiso pe a valu o’u tausaga.

• I le Mataupu Faavae ma Feagaiga 68:27, na faamanino mai ai e le Alii le matua e tatau ona papatiso ai se tagata. Fesoasoani i lau fanau ia iloa mea na Ia fetalai mai ai. Aisea e finagalo ai Iesu ia tatou papatiso? O se pese e pei o le “Papatisoga” (Tusipese a Tamaiti, 54) e mafai ona fesoasoani. Faaaoga ata po o fuaiupu 25–31 (po o mea uma e lua), fesoasoani i lau fanau ia iloa mea e finagalo le Alii i tamaiti e aoao.

• Faitau faatasi ma lau fanau e uiga i le tofiga na tuu atu e le Alii ia Oliva Kaotui i le faaulutala o le vaega mo le Mataupu Faavae ma Feagaiga 69. O le a le fautuaga na tuuina mai e le Alii i le fuaiupu 1? Aisea e taua ai le i ai faatasi ma tagata “o le a faamaoni ma faatuatuaina”? Atonu e mafai e lau fanau ona faamatala e uiga i se tasi latou te iloa e ‟faamaoni ma faatuatuaina.” Usu faatasi se pese e faamalosia ai tamaiti ia faamaoni ma faatuatuaina e pei o le Faaola, e pei o le “O Loo Ou Taumafai e Avea e Pei o Iesu,” (Tusipese a Tamaiti, 40). E mafai faapefea ona faamautinoa ua tatou faamaoni ma faatuatua i le Alii? E mafai faapefea ona Ia faaaogaina i tatou e faamanuia ai isi pe a tatou faamaoni ma faatuatuaina?

Mo nisi manatu, tagai i le lomiga o lenei masina o le mekasini o le Uo .

O le Tusi o Poloaiga, na muamua mai i le Mataupu Faavae ma Feagaiga, sa lomiaina i se masini lomitusi e pei o lenei.