First Furrow, saunia e James Taylor Harwood

26–1 Iuni: “O Se Tausimea Faamaoni, Fai Mea Tonu, ma Atamai”

Mataupu Faavae ma Feagaiga 51–57

Mo tagata o le Ekalesia i le vaitaimi o le 1830, o le faapotopotoina o le Au Paia ma le fausiaina o le aai o Siona, sa o ni galuega faaleagaga ma faaletino foi, faatasi ai ma le tele o mataupu aoga e tautalagia: Sa manaomia se tagata e faatauina mai fanua e mafai ona faamautu i ai le Au Paia. Sa manaomia se tagata e lolomiina tusi ma isi lomiga. Ma sa manaomia se tagata e faafoe se faleoloa e tuuina atu ai oloa ia i latou i Siona. I faaaliga o loo tusia i le Mataupu Faavae ma Feagaiga 51–57, na tofia ma faatonuina ai e le Alii ia tagata e taulimaina nei galuega.

Ae e ui ina manaomia tomai i ia mea i Siona, ae o nei faaaliga o loo aoao mai ai foi e finagalo le Alii i Lana Au Paia ia agavaa faaleagaga e ta’ua o se nuu o Siona—o Lona nuu. Ua Ia valaau ia i tatou taitoatasi ina ia avea “o se tausimea faamaoni, fai mea tonu, ma atamai,” i ai se agaga salamo, “tu mausali” i o tatou tiutetauave atofaina (tagai i le Mataupu Faavae ma Feagaiga 51:19; 52:15; 54:2). Afai e mafai ona tatou faia lena mea—e tusa lava po o a o tatou tomai faaletino—e mafai e le Alii ona faaaoga i tatou e fausia Siona.

Manatu mo le Aoaoina i le Aiga ma i le Lotu

Mataupu Faavae ma Feagaiga 51

E finagalo le Alii ia avea a’u ma se tausimea faamaoni, fai mea tonu, ma le poto.

Ana faapea sa avea oe ma se tagata o le Ekalesia i le 1831, atonu na valaaulia oe e ola i le tulafono o le faapaiaga e ala i lou saini e avatu lou fanua i le Ekalesia e ala atu i le epikopo. Ona Ia faafoi atu lea ia te oe, i le tele lava o tulaga, mea na e foaiina atu, o nisi taimi e faatasi ai ma se faasiliga. Ae sa le toe avea o se meatotino na’o oe—sa avea ma au mea tausi.

O aso nei ua eseese faiga, ae o loo taua pea mataupu faavae i le galuega a le Alii. A o e faitau i le vaega 51, mafaufau i mea ua tuuina mai e le Atua ia te oe. O a uiga o upu “tausimea” (fuaiupu e 19) ma le “faapaia” (fuaiupu e 5) ma o le a se mea ua fautuaina mai ai e uiga i faamoemoega o le Atua ia te oe?

Na faamatala e Peresitene Spencer W. Kimball: “I le Ekalesia o se tausimea o se faatuatuaga paia faaleagaga pe faaletino lea e i ai le tali atu. Ona o mea uma e a le Alii ia, o i tatou o tausimea i o tatou tino, mafaufau, aiga, ma meatotino. (Tagai i le Mataupu Faavae ma Feagaiga 104:11–15.) O se tausimea faamaoni o se tasi e faaaogaina le pule amiotonu, tausia ana lava, ma vaavaai atu i e matitiva ma e le tagolima’ (Welfare Services: The Gospel in Action,’,” Ensign, Nov. 1977, 78).

Tagai foi i le “O le Tulafono o le Faapaiaga” (vitiō), Gospel Library.

The Law of Consecration

Historians Kate Holbrook and Steven C. Harper discuss what the Law of Consecration is, the three core doctrines pertaining to it, and how we can live it today.

Mataupu Faavae ma Feagaiga 52:9–11, 22–27

E mafai ona ou valaaulia isi e o mai ia Keriso i soo se mea ou te alu i ai.

Ina ua auina mai e le Alii ni nai taitai o le Ekalesia i Misuri, na ia ta’u atu ia i latou e faaaoga le taimi e malaga ai ma “talai atu i le ala” (fuaiupu 25-27 E mafai faapefea ona e faasoa atu le talalelei ‟i le ala,” po o le taimi o mea masani e tutupu i lou olaga?

Mataupu Faavae ma Feagaiga 52:14–19

E fesoasoani le Alii ia te a’u e aloese mai le faaseseina.

Faatasi ai ma le tele o tagata sa faapea mai [na latou maua] ni faaaliga faaleagaga, sa popole ai le uluai Au Paia ina ne’i faaseseina. O a lapataiga na tuuina atu ia i latou e le Alii i le Mataupu Faavae ma Feagaiga 52:14? O le a Lana tali? (tagai fuaiupu 14–19).

O se mamanu o se mea e ta’u soo i se auala masani, ma taumateina. O faataitaiga e aofia ai le faitauina e oo lava i fuainumera soagia po o le oso a’e o le la ma le goto ifo i aso taitasi. O a isi faataitaiga e mafai ona e mafaufau i ai? A o e suesue i le Mataupu Faavae ma Feagaiga 52:14–19, faailoa mai le mamanu a le Alii mo le aloese ai mai le faaseseina. Atonu e fesoasoani le mātau o le ‟salamo” e ta’u mai ai se lagona o le lotomaualalo ma le salamo; O le ‟agamalu” e ta’u mai ai le agamalu ma le loto pulea; ma o le ‟faagaeetia” o lona uiga ia aoao, faaleleia, pe atia’e. Aisea e te lagona ai o le mamanu a le Alii e aofia ai nei uiga auaumama, faapea foi ma le usiusitai? E faapefea ona e faaaogaina lenei mamanu e aloese ai mai le faaseseina?

Faamalamalama upu faigata. I le polokalama o le Gospel Library, e mafai ona e oomia ma taofi i luga o se upu ona filifili lea o le ‟Faamatala.” Ona ave lea o oe i se faauigaga o lena upu. Faataitai le mea lenei pe a e tau atu i upu e le masani ai—po o upu e foliga masani ai e te fia malamalama atili i ai.

O a nisi o faataitaiga o le faaseseina i o tatou aso? E mafai faapefea ona tatou iloa le taimi e faaseseina ai i tatou?

Mo se faataitaiga, atonu e te mafaufau e iloilo au filifiliga e faatatau i ata tifaga, musika, ma ala o faasalalauga faaagafesootai e faavae i tulaga faatonuina i le “Savavali i le malamalama o le Atua” i le Mo le Malosi o le Autalavou: O Se Taiala mo le Faia o Filifiliga, 16–21.

Tagai foi i le sāvali a Gary E. Stevenson, “Aua E Te Taufaasese Mai Ia Te A’u,” Liahona, Nov. 2019, 93–96; “Guide Me to Thee,” Hymns, no. 101; Autu ma Fesili, “Sailia le Upumoni ma Aloese mai le Faaseseina,” Gospel Library.

Mataupu Faavae ma Feagaiga 54

E mafai ona ou liliu atu i le Alii pe a faamanu’alia a’u ona o filifiliga a isi.

Pe na i ai se taimi na e mafatia ai i le le fiafia ina ua le tausia e se tasi e te faalagolago i ai a latou tautinoga? O lenei mea na tupu i le Au Paia mai Kolesavile, Niu Ioka, o e na faamoemoe e faamautu i le fanua o Limani Copley i Ohaio. Ina ia aoao mai lenei aafiaga, e mafai e tagata o le vasega ona iloilo le autu i le vaega 54 (tagai foi i le Au Paia, 1:125–28; “A Bishop unto the Church,” Revelations in Context, 78–79). Ana i ai sau uo i le Au Paia i Kolesavile, o le a se fautuaga e mafai ona e maua i le vaega 54 e faasoa atu ma i latou?

Faatoaga a Limani Copley

Mataupu Faavae ma Feagaiga 56:14-20

Amuia e loto mama.

I nei fuaiupu, sa fetalai mai ai le Alii i e mauoa ma i e matitiva; atonu e manaia le faatusatusa o Lana fautuaga i nei vaega e lua. O a ni mea o loo i nei fuaiupu e talafeagai ia te oe lava ia?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Siona/Ierusalema Fou

• Faasinomaga a sa Lamana

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 51:9

E mafai ona ou faamaoni.

• Ina ia fesoasoani i lau fanau e aoao le uiga o le faamaoni, e mafai ona outou faitau faatasi le Mataupu Faavae ma Feagaiga 51:9 ma faasoa atu tala o tamaiti o loo feagai ma faaiuga e uiga i le faamaoni. E mafai ona e faaaoga ata, papeti totini, po o pepe meataalo e faamanaia atili ai nei tala. E faapefea ona faamanuiaina i tatou e le Alii a o tatou taumafai ia faamaoni?

• Mafaufau e taaalo ma lau fanau i se taaloga. A uma, talanoaina pe o le a se eseesega o le taaloga pe ana faimamago se tasi. Aisea e taua ai le “ia faamaoni” i le tasi ma le isi?

Mataupu Faavae ma Feagaiga 52:10; 53:3; 55:1

Ou te mauaina le meaalofa a le Agaga Paia e ala i le faaeega o lima.

• O le mauaina o le Agaga Paia e ala i le faaee atu o lima, o loo ta’ua soo i totonu o le Mataupu Faavae ma Feagaiga 51–57. Atonu o se avanoa lelei lenei e aoao ai lau fanau e uiga i lenei sauniga. Mo se faataitaiga, e mafai ona latou tilotilo i se ata o se tamaitiiti o loo faamauina ma faamatala le mea o loo tupu i le ata. Fai atu ia i latou e patipati o latou lima pe a latou faalogoina le fuaitau “faaee atu o lima” po o le “faaee o lima” a’o e faitauina se fuaiupu se tasi pe sili atu o fuaiupu nei: Mataupu Faavae ma Feagaiga 52:10; 53:3; 55:1.

• E mafai foi ona e usuina le pese “O Le Agaga Paia,” (Tusipese a Tamaiti, 56) po o se isi pese faapea. Fesoasoani i lau fanau e sue upu ma fasifuaitau i le pese o loo aoao mai ai e uiga i le meaalofa o le Agaga Paia.

  

Mataupu Faavae ma Feagaiga 52:14–19

E i ai le mamanu a le Atua e fesoasoani ia te a’u ina ia lē faaseseina a’u.

• Ina ia aoao atu e uiga i le mamanu a le Alii mo le aloese mai le faaseseina, e mafai ona e amata i le fesoasoani i tamaiti e su’e faataitaiga o mamanu—i le natura, i palanikeke felanulanuai po o lavalava, po o le olaga i aso taitasi. Fesoasoani ia i latou e su’e le mamanu na tuuina mai e le Alii i le Mataupu Faavae ma Feagaiga 52:14–15. Ia mautinoa ua latou malamalama i soo se upu e le masani ai i nei fuaiupu. E mafai faapefea ona tatou faaaogaina lenei mamanu e iloa ai le upumoni?

Mataupu Faavae ma Feagaiga 54:4–6

E tatau ona ou tausia a’u feagaiga i taimi uma.

• I au lava upu, faasoa atu i lau fanau le mea na tupu i le Au Paia o e na o mai e nonofo i le fanua a Limani Copley (tagai i le ulutala o le vaega 54). E mafai ona faafoliga lau fanau o se tagata o le Ekalesia ua taunuu i Ohaio. Faamata o a ni o latou lagona ina ua solia e Limani lana feagaiga? O le a se mea ua aoao mai e lenei tala ia i tatou e uiga i le tausiga o a tatou feagaiga po o folafolaga? Faitau faatasi le Mataupu Faavae ma Feagaiga 54:6 e iloa ai faamanuiaga mo tagata o e tausia a latou feagaiga.

Mataupu Faavae ma Feagaiga 55:1–4

E mafai ona ou faaaogaina faamanuiaga na aumai e le Atua ia te a’u e faamanuia ai isi.

• Ina ia faalauiloa atu le vaega 55, atonu e te manao e faamalamalama atu o Viliamu W. Phelps o se tagata lomitusi o se nusipepa na aoaoina e uiga i le talalelei ma auai i le Ekalesia. Faitau faatasi ma lau fanau le Mataupu Faavae ma Feagaiga 55:1–4, ma fesoasoani ia latou iloa le mea na finagalo le Atua e fai e Viliamu. Na faapefea ona Ia fuafua e faaaoga taleni a Viliamu? O lenei mea e mafai ona taitai atu ai i se talanoaga e uiga i le ala e ono valaaulia ai i tatou e le Atua e faaaoga a tatou taleni e faamanuia ai Ana fanau.

Mo nisi manatu, tagai i le lomiga o lenei masina o le mekasini o le Uo .

Ua Maua e Epikopo Paterika Faapaiaga, saunia e Albin Veselka