19–25 Me: “O Le Mea e Mai i le Atua O le Malamalama Lea”

Mataupu Faavae ma Feagaiga 49–50

O le Faaola o lo tatou “leoleo mamoe lelei” (Mataupu Faavae ma Feagaiga 50:44). E silafia e Ia o nisi o taimi e sē ai mamoe ma o le vaomatua e tele mea e lamatia ai. O lea Na te taitai atu ai ma le alofa i tatou i le saogalemu o Ana aoaoga faavae. E Na te taitai ese i tatou mai mea e lamatia ai e pei o “agaga sese, ua o atu i le lalolagi, ua faasese ai le lalolagi” (Mataupu Faavae ma Feagaiga 50:2). O le mulimuli ia te Ia e masani ona faauigaina o le lafoai o manatu po o tu ma aga lē sa’o. Sa moni lenei mea mo Limani Copley ma isi i Ohaio. Sa latou taliaina le talalelei toefuataiina ae sa tumau pea i nisi o talitonuga e lē sa’o. I le Mataupu Faavae ma Feagaiga 49, na folafola mai ai e le Alii ni upumoni na faapea ona faasa’oina ai talitonuga muamua o Limani e uiga i autu e pei o le faaipoipoga ma le Afio Mai Faalua o le Faaola. Ma ina ua “talia [e tagata liliu mai o Ohaio] … ia agaga ua lē mafai ona [latou] malamalama i ai,” sa aoaoina loa i latou e le Alii i auala e iloatino ai faaaliga moni a le Agaga (Mataupu Faavae ma Feagaiga 50:15). E onosai le Leoleo Mamoe Lelei ia i tatou, o Lana “fanau laiti,” o e e “ao ina … tutupu aʼe i le malosi faaleagaga ma i le malamalama o le upumoni” (Mataupu Faavae ma Feagaiga 50:40).

Manatu mo le Aoaoina i le Aiga ma i le Lotu

Mataupu Faavae ma Feagaiga 49; 50:24

E finagalo Iesu Keriso ia ou taliaina upumoni o Lana talalelei.

Ao le’i auai i le Ekalesia, sa avea Limani Copley ma se tasi o se vaega faalelotu na ta’ua o le Sosaiete Tuufaatasi o le Au Talitonu i le Faaali Faalua Mai o Keriso, lea e ta’ua foi o le au Sieka. Ina ua uma se talanoaga ma Limani, sa saili e Iosefa Samita se faamaninoga mai le Alii e uiga i nisi o aoaoga a le au Sieka. Sa tali mai le Alii i le faaaliga i le vaega e 49. O nisi o talitonuga o le au Sieka o loo ta’ua i le ulutala o le vaega.

O le a le mea na aoao mai e le Alii i le vaega 49 e faasa’o ai talitonuga o le au Sieka? O le a se faamaoniga o e vaaia i lenei faaaliga o Lona alofa ma le popole mo tagata e le o i ai le atoaga o Lana upumoni? E mafai faapefea ona e aapa atu ia i latou ma le alofa ma le popole?

O le a se mea ua faageetia ai oe e uiga i le maitau a le Alii i le fuaiupu 2? E mafai ona e faatusatusaina lenei mea i le mea e tupu pe afai e te matamata na o se vaega o se tifaga, vaai i se fasi paso se tasi, pe faalogo i le itu e tasi o se finauga. E faapefea ona fesootai le lapataiga a le Alii i le Mataupu Faavae ma Feagaiga 50:24? Mafaufau i mea o loo e faia e maua atili ai le malamalama mai le Alii.

Tagai foi i le ‟Leman Copley and the Shakers,” i le Revelations in Context, 117–21.

Mataupu Faavae ma Feagaiga 49:15–17

O le faaipoipoga i le va o le alii ma le tamaitai e taua i le fuafuaga a le Atua.

I se taumafaiga e faavaivaia le fuafuaga a le Tama Faalelagi, ua saili Satani e fatu se fenumiai e uiga i le faaipoipoga. O le Alii, i le isi itu, o loo faaauau pea ona faaalia mai upumoni e uiga i le faaipoipoga e ala mai i Ana perofeta. E mafai ona e maua nisi o lenei upumoni i le Mataupu Faavae ma Feagaiga 49:15–17; Kenese 2:20–24; 1 Korinito 11:11; ma le ‟O Le Aiga: O Se Folafolaga i le Lalolagi.” Fai se lisi o upumoni e te maua. Aisea e matuā taua ai le faaipoipoga i le fuafuaga a le Atua?

Na aoao mai Elder Ulisses Soares e faapea ‟o le talalelei toefuataiina a Iesu Keriso ua folafola mai ai le mataupu faavae o le faipaaga atoatoa i le va o le tamaitai ma le alii, i le olaga nei ma i le faavavau” (“I Le Faipaaga Ai ma le Alii,” Liahona, Nov. 2022, 42). E mafai ona e suesue i lana sāvali, ma vaavaai mo mataupu faavae ‟e faamalosia ai le faigapaaga i le va o le alii ma le tamaitai.” E faapefea ona e faaaogaina nei mataupu faavae i lou olaga? Afai e fesili atu se tasi o se isi faatuatuaga ia te oe pe aisea e taua ai le faaipoipoga, e faapefea ona e tali atu? Aisea e te faafetai ai mo lenei malamalamaaga?

Tagai foi i Autu ma Fesili, ‟Faaipoipoga,” ‟Aiga,” Gospel Library; David A. Bednar, ‟E Taua le Faaipoipoga i Lana Fuafuaga e Faavavau,” Liahona, Iuni 2006, 83–84; ‟Renaissance of Marriage” (vitiō), Gospel Library.

Renaissance of Marriage

Hear what President Eyring says we all must do to have a renaissance of happy marriages and productive families.

Ia nofouta i tulaga faaletagata lava ia. E ui o le fiafia i le faaipoipoga ma le olaga faaleaiga o le mea sili lea i le talalelei a Iesu Keriso, ae tatou te le o maua uma le olioli i nei faamanuiaga a o i ai i le olaga nei. I le talanoaina o lenei autu, ia nofouta i tulaga eseese o tagata taitoatasi ma aiga, aemaise lava mo tagata o loo “faatalitali ma le onosai i le Alii” mo folafolaga e faavavau ina ia faataunuuina (tagai i le Mataupu Faavae ma Feagaiga 98:1–3).

Mataupu Faavae ma Feagaiga 50

O aoaoga a le Alii e mafai ona puipuia ai a’u mai mea taufaasese a Satani.

Sa naunau tagata fou o le Ekalesia i Ohaio e maua faaaliga faaleagaga na folafola mai i tusitusiga paia. Peitai, sa naunau Satani e faasese i latou. Afai e talosagaina oe e fesoasoani i nei tagata ia malamalama pe faapefea ona iloa faaaliga moni a le Agaga Paia, o a mataupu faavae i le Mataupu Faavae ma Feagaiga 50 o le a e faasoa atu? (tagai faapitoa i fuaiupu 22–25, 29–34, 40–46). Na faapefea ona fesoasoani le Faaola ia te oe ia iloa le eseesega i le va o le upumoni ma le mea sese?

Tagai foi i le 1 Korinito 14:1–28; 2 Timoteo 3:13–17.

Mataupu Faavae ma Feagaiga 50:13–24

O faiaoga ma tagata aoao e aoaoina faatasi e le Agaga.

O le ola ai i le talalelei a Iesu Keriso e maua ai le tele o avanoa e avea ai ma faiaoga ma tagata aoao, i le aiga ma i le Ekalesia. O se tasi o auala e mafai ona e suesueina ai le Mataupu Faavae ma Feagaiga 50:13–24 o le tusi lea o se ata o se faiaoga ma se tagata aoao. I autafa o ata, fai se lisi o upu ma fasifuaitau mai nei fuaiupu e aoao atu ai ia te oe se mea e uiga i le aoao mai ma le aoao atu o le talalelei. O le a se taimi na e maua ai ni aafiaga na aoaoina ai oe i le taua o le Agaga i le aoao atu ma le aoaoina? Mafaufau i mea e mafai ona e faia e faaleleia atili ai au taumafaiga o se tagata aoao ma se faiaoga o le talalelei.

Mataupu Faavae ma Feagaiga 50:23–25

“O le mea e mai i le Atua o le malamalama lea.”

A o e mafaufau loloto i upu a le Faaola i le Mataupu Faavae ma Feagaiga 50:23–25, mafaufau pe faapefea ona e maua le malamalama o le Atua i lou olaga ma le ala e te “tuliesea ai le pouliuli” i lou olaga. Mo se faataitaiga, e faapefea ona taiala e nei fuaiupu au filifiliga e uiga i le auala e faaalu ai lou taimi? o a faafiafiaga po o ala o faasalalauga e sailia? o fea talanoaga e auai i ai? O a isi faaiuga e mafai ona fesoasoani ai nei fuaiupu ia te oe? O se viiga e pei o le “O Iesu Lo’u Sulu” (Viiga, nu. 49) e ono musuia ai mafaufauga faaopoopo.

Tagai fo’i i le “Savali i le malamalama o le Atua,” Mo le Malosi o le Autalavou: O Se Taiala mo le Faia o Filifiliga, 16–21.

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Leman Copley

• O Meaalofa a le Agaga

• O Talitonuga Faalelotu i Ona Po o Iosefa Samita

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 49:12–14

E mafai ona ou mulimuli ia Iesu Keriso.

• Ina ia aoao lau fanau i mataupu faavae i nei fuaiupu, e mafai ona e saunia ni tulagavae pepa se fa ma ni ata se fa e faatusa i le faatuatua ia Iesu Keriso, salamo, papatisoga, ma le mauaina o le Agaga Paia (tagai i ata o loo i le itulau o gaoioigao lenei vaiaso). E mafai e lau fanau ona tuu tulagavae i luga o le fola ma ata i o latou tafatafa. Ona mafai lea ona latou auauai e savavali i tulagavae a o e faitauina le Mataupu Faavae ma Feagaiga 49:12–14. Fesoasoani ia i latou ia malamalama a tatou faia vaega o loo i nei ata, o loo tatou mulimuli ia Iesu Keriso.

• E mafai foi ona e valaaulia lau fanau e faatusatusa le Mataupu Faavae ma Feagaiga 49:12–14 ma le Galuega 2:38 ma le mataupu faavae o le faatuatua lona fa. O a ni tulaga e tutusa ai na e mauaina? Aisea e taua ai nei upumoni?

Mataupu Faavae ma Feagaiga 49:15–17

O le faaipoipoga i le va o le alii ma le tamaitai e taua i le fuafuaga a le Atua.

• Ina ia faailoa atu nei fuaiupu e mafai ona e faamatala atu o le au Sieka [Shakers] o se vaega faalelotu e talitonu e le tatau ona faaipoipo tagata (tagai i le ulutala o le Mataupu Faavae ma Feagaiga 49). Valaaulia lau fanau e saili mea na aoao mai e le Faaola e faatatau i le faaipoipoga i totonu o le Mataupu Faavae ma Feagaiga 49:15–17. O le a le uiga e faapea o le “faaipoipoga ua faauuina e le Atua”? Atonu e mafai ona outou faitauina faatasi parakalafa muamua e tolu o le ‟O Le Aiga: O Se Folafolaga i le Lalolagi.” Ona talanoa lea pe aisea e taua ai le faaipoipoga ma le aiga i le Tama Faalelagi.

Mataupu Faavae ma Feagaiga 50:23–25

“O le mea e mai i le Atua o le malamalama lea.”

• Ina ia folasia atu le Mataupu Faavae ma Feagaiga 50:23–25, talanoa ma lau fanau e uiga i le eseesega i le va o le malamalama ma le pogisa. Aisea tatou te manaomia ai le malamalama? E mafai ona outou faitau faatasi le parakalafa muamua o le ‟Savali i le Malamalama o le Atua” i le Mo le Malosi o le Autalavou: O Se Taiala mo le Faia o Filifiliga (itulau 17) faapea foi le Mataupu Faavae ma Feagaiga 50:23–25. Talanoa e uiga i auala tatou te maua ai le malamalama o le Atua ma auala e mafai ona tatou tuliesea ai le pogisa. E mafai ona usu faatasi ma tamaiti se pese e faatatau i o latou moli faaleagaga, e pei o le “Susulu Pea” (Tusipese a Tamaiti, 96).

Mataupu Faavae ma Feagaiga 50:40–46

O Iesu Keriso o lo’u Leoleo Mamoe Lelei.

• A uma ona faitau faatasi le Mataupu Faavae ma Feagaiga 50:40–46 , e mafai ona e faaali atu le ata o le Faaola lea o loo i le faaiuga o lenei otootoga ma fai atu fesili e pei o nei: E mafai faapefea ona e iloa e alofa le Faaola i Ana mamoe? E faapefea ona pei le Faaola o se leoleo mamoe ia i tatou?

Mo nisi manatu, tagai i le lomiga o lenei masina o le mekasini o le Uo .

Leoleo Mamoe Agavaivai, saunia e Yongsung Kim