O le Fonotaga a le Tolauapiga, saunia e Worthington Whittredge

12–18 Me: “Ia Outou Saili ma le Faamaoni Meaalofa Silisili”

Mataupu Faavae ma Feagaiga 46–48

A o tuua e Parley P. Pratt, Oliva Kaotui, Ziba Peterson, ma Pita Uitimera le Itiiti, ia Katelani ma o atu e faaauau le tala’i atu o le talalelei, sa latou tuua le silia ma le selau o tagata fou liliu mai o e sa i ai le tele o le maelega, ae itiiti le poto masani po o le taitaiga. Sa le’i i ai ni tusitaulima o faatonuga, leai ni fonotaga o aoaoga faaleautaitai, leai ni faasalalauga o konafesi aoao—o le mea moni, sa le’i lava foi ni kopi o le Tusi a Mamona sa iai. O le toatele o nei tagata talitonu fou na tosina mai i le talalelei toefuataiina e ala i le folafolaga o faaaliga ofoofogia a le Agaga, aemaise lava o mea o loo faamatala mai i le Feagaiga Fou (tagai i le, mo se faataitaiga, 1 Korinito 12:1–11). Ae e toatele na faigata ona iloa faaaliga moni a le Agaga. O le vaaia ai o le fenumiai, sa tatalo ai Iosefa Samita mo se fesoasoani. O le tali a le Alii e taua i aso nei, i taimi e masani ona teena pe le amanaia ai e tagata ia mea a le Agaga. Sa ia toe faamautu mai o faaaliga faaleagaga e moni. Sa ia faamanino mai foi po o a i latou: o meaalofa mai se Tama Faalelagi alofa, ‟ua tuuina mai mo le manuia o i latou o e alolofa [ia te Ia] ma tausia [Ana] poloaiga uma, ma ia o lē saili e faia” (Mataupu Faavae ma Feagaiga 46:9).

Manatu mo le Aoaoina i le Aiga ma i le Lotu

Mataupu Faavae ma Feagaiga 46:1–7

E faafeiloai e le Faaola i latou uma o e mananao e tapuai i Lana Ekalesia.

E te manatu e lagona e au uo po o tagata o le tou pitonuu le taliaina i sauniga lotu a le tou uarota? O le a se mea o e faia ina ia avea ai a outou nofoaga o sauniga faale–Ekalesia ia mananao tagata e toe foi mai i ai? Mafaufau loloto pe mafai faapefea ona e faaaogaina le fautuaga a le Alii i le Mataupu Faavae ma Feagaiga 46:1–7 (tagai foi i le 2 Nifae 26:24–28; 3 Nifae 18:22–23).

Atonu foi e te mafaufau i se taimi na e auai ai i sauniga a le Ekalesia—po o se fonotaga a se isi vaega—mo le taimi muamua. O a mea na fai e tagata e fesoasoani ai ia te oe ia lagona le taliaina?

Tagai foi i le Moronae 6:5–9; “’Tis Sweet to Sing the Matchless Love,” Viiga, nu. 177; “Susu Maia” (vitio), Gospel Library.

Faafeiloai Atu i le ComeUntoChrist.org

Faafeiloai atu mai se alalafaga e taumafai tagata e ola e pei ona aoao mai Iesu. O mai ma vaai i mea matou te talitonu ai i le ComeUntoChrist.org.

Mataupu Faavae ma Feagaiga 46:7-33

Ua tuuina mai e le Tama Faalelagi ia te a’u meaalofa faaleagaga ina ia faamanuia ai isi.

Sa talitonu le Au Paia anamua i meaalofa faaleagaga ae sa manaomia se taitaiga e iloa ai ma malamalama ai i lo latou faamoemoega. A o e suesue e uiga i meaalofa a le Agaga i le Mataupu Faavae ma Feagaiga 46:7–33, mafaufau loloto i le faamoemoega “ua tuuina mai ai ia meaalofa” (fuaiupu 8). O le a se mea ua e aoaoina e uiga i le Atua—o lēe na tuuina maia nei meaalofa?

E mafai ona e mafaufau i faataitaiga ua e vaai i ai i tagata o faaaogaina nei meaalofa po o isi meaalofa faaleagaga? Na faapefea ona avea i latou ma ‟manuia … o fanau a le Atua”? (fuaiupu 26). E mafai foi ona e vaai pe mafai ona e faailoa mai ni faataitaiga o meaalofa faaleagaga eseese i tusitusiga paia e pei o nei: 1 Tupu 3:5–15; Tanielu 2:26–30; Galuega 3:1–8; Helamana 5:17–19; Mamona 1:1–5; Eteru 3:1–15; Mataupu Faavae ma Feagaiga 6:10–12; Mose 7:13.

O lau suesuega o meaalofa faaleagaga e ono taitai atu ai oe e mafaufau loloto po o a meaalofa ua tuuina mai e le Atua ia te oe. E mafai faapefea ona e faaaogaina nei meaalofa e faamanuia ai Ana fanau? Afai o i ai sou faamanuiaga faapeteriaka, atonu o loo ta’ua ai meaalofa ua tuuina atu ia te oe. O le faitauina o le sāvali a Elder John C. Pingree Jr.‟Ua ia te A’u Se Galuega mo Oe” e mafai foi ona tatala ai lou mafaufau i meaalofa e te lei mafaufau i ai (Liahona, Nov. 2017, 32–35).

Afai e te manao e aoao e uiga i le auala e atiina a’e ai meaalofa faaleagaga, o le talafaatusa i le amataga o le sāvali a Elder Juan Pablo Villar ‟Faamalolosi o Tatou Maso Faaleagaga” e mafai ona fesoasoani (Liahona, Me 2019, 95). O a ni ‟faamalositino” e mafai ona fesoasoani ia te oe e atiina a’e ai au meaalofa faaleagaga?

Tagai foi i Autu ma Fesili, ‟Agaga Paia,” Gospel Library.

Mataupu Faavae ma Feagaiga 47

E finagalo le Alii i Lana Ekalesia e tausi se talafaasolopito.

O le valaauga o Ioane Uitimera e tausia se talafaasolopito o le Ekalesia sa faaauauina ai se tu masani umi o le tausia o talafaamaumau i le nuu o le Atua. Aisea e te manatu ai o le tausia o se talafaasolopito e matuai taua i le Alii? Mafaufau loloto i lenei mea a o e faitauina le vaega 47 faapea foi ma faatonuga faapena i le 2 Nifae 29:11–12; Mose 6:5; Aperaamo 1:28, 31. O le a se mea e te lagona e finagalo le Alii e te faamaumauina e uiga i lou olaga?

I luga o le FamilySearch, e mafai ona e faamaumauina manatuaga ma aafiaga mai lou olaga—ma olaga o ou tuaa (tagai i le FamilySearch.org).

Tagai i le sāvali a Henry B. Eyring, “Ia Manatua, Ia Manatua Lava,” Liahona, Nov. 2007, 66–69.

Ioane Uitimera

Mataupu Faavae ma Feagaiga 47

E mafai ona taitai a’u e le Agaga Paia a’o faataunuuina lo’u valaauga.

Atonu e mafai ona e fesootai i le lagona o Ioane Uitimera ina ua ia manao i le faamautinoaga pe o lona valaauga na sau mai le Atua. O le a le fetalaiga a le Alii i le Mataupu Faavae ma Feagaiga 47 ia Ioane Uitimera—ma ia te oe—e musuia ai le lototele i le faataunuuina o valaauga Na te tuuina mai?

O le matafaioi a se faiaoga. O le aoao atu e sili atu nai loo le tuuina atu o faamatalaga. E aofia ai le fatuina o se siosiomaga e mafai ai e tagata o le vasega ona aoao ma iloa upumoni mo i latou lava ma fefaasoaai mea na latou aoaoina i le tasi ma le isi (tagai i le Aoao Atu i le Ala a le Faaola,26).

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Ioane Uitimera

• Sauniga Faamanatuga

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 46:2–6

E mafai ona ou fesoasoani i isi ia lagona le talisapaia i le lotu.

• A uma ona faitau faatasi ma lau fanau le Mataupu Faavae ma Feagaiga 46:5 , talanoa pe o le a le mea e finagalo le Faaola i tagata ia latou lagonaina pe a o mai i Lana Ekalesia. Valaaulia lau fanau e vaai faalemafaufau faapea na latou vaai i se tasi i le lotu mo le taimi muamua. Fesoasoani ia i latou e faataitai auala e fesoasoani ai i lea tagata ia lagonaina le talisapaia.

Mataupu Faavae ma Feagaiga 46:7–26

Ua tuuina mai e le Tama Faalelagi ia te a’u ni meaalofa faaleagaga ina ia faamanuiaina ai isi.

• Ina ia fesoasoani i lau fanau e aoao e uiga i meaalofa faaleagaga o loo faamatala mai i le Mataupu Faavae ma Feagaiga 46:13–26, mafaufau i lenei manatu. E mafai ona e tusia meaalofa i luga o fasipepa ma nanā faataamilo solo i le potu. A o mauaina e lau fanau pepa taitasi, fesoasoani ia i latou e saili po o fea o ta’ua ai lena meaalofa i totonu o le vaega 46. Mo meaalofa taitasi, talanoa ma i latou pe faapefea ona faaaoga e faamanuia ai isi (e mafai ona fesoasoani faamatalaga o loo i le “Mataupu 20: Meaalofa a le Agaga,” i le Tala o le Mataupu Faavae ma Feagaiga, 77–80).

  Chapter 20: Gifts of the Spirit: 8•March 1831

• Ta’u atu i lau fanau e uiga i meaalofa e te lagona ua tuuina mai e le Tama Faalelagi ia i latou, ma tuu atu ia i latou e talanoa e uiga i meaalofa latou te mātauina i le tasi ma le isi. E tusa ai ma le Mataupu Faavae ma Feagaiga 46:8–9, 26, aisea e tuuina mai ai e le Tama Faalelagi ia i tatou meaalofa faaleagaga? E mafai faapefea ona tatou faaaogaina a tatou meaalofa e fesoasoani ai i isi?

Mataupu Faavae ma Feagaiga 47:1, 3

E mafai ona ou tusifaamaumauina lo’u talafaasolopito.

• Tuu atu i lau fanau ia iloa le mea na finagalo le Alii e fai e Ioane Uitimera i le Mataupu Faavae ma Feagaiga 47:1, 3. E mafai foi ona e faasoa atu i le tasi ma le isi ni tala e fiafia i ai mai tusitusiga paia. Ta’u i ai ua tatou iloa e uiga i nei tala ona sa tusifaamaumauina e se tasi.

• Mafaufau pe mafai faapefea ona e musuia lau fanau e tusifaamaumau o latou talafaasolopito patino. E mafai ona e faasoa atu nisi o tusiga mai lau apitalaaga patino pe faasoa atu se tala e uiga i se tuaa (tagai i le FamilySearch.org po o le Memories app). Atonu e te tuuina atu nisi o uunaiga mo apitalaaga, e pei o le “O le a se mea na tupu i le vaiaso lenei e te manao i fanau a lau fanau ia iloa e uiga i ai?” po o le “Na faapefea ona e vaaia le aao o le Alii i lou olaga i lenei vaiaso?” E mafai e tamaiti laiti ona tusi ni ata o o latou aafiaga, pe e mafai ona e pu’eina o latou [ata po o leo] a o faamatala a latou tala. O a ni faamanuiaga e oo mai mai le tausia o se “talafaasolopito faifai pea”? (Mataupu Faavae ma Feagaiga 47:1).

Mataupu Faavae ma Feagaiga 48:2–3

E mafai ona ou fesoasoani i isi e ala i le faasoa atu o mea na tuuina mai ia te a’u.

• A o e faitauina faatasi ma lau fanau le Mataupu Faavae ma Feagaiga 48:2–3 , atonu e manaomia ona e faamalamalama atu o tagata na o mai i Ohaio mai Sasae, ma e lei i ai so latou nofoaga e nonofo ai. O le a le mea na poloai le Alii i le Au Paia e fai e fesoasoani ai? Fesoasoani i lau fanau e mafaufau i mea ua tuuina mai e le Atua ia i latou e mafai ona latou faasoa atu i isi. E mafai foi ona outou usuina faatasi ma i latou se pese e pei o le ‟‘Foai,’ O Si Auvai Lea” (Tusipese a Tamaiti, 116).

Mo nisi manatu, tagai i le lomiga o lenei masina o le mekasini o le Uo .

O i latou uma o e mananao e tapuai i le Faaola e talia i sauniga a Lana Au Paia.