28 Aperila–4 Me: ‟O A’u Tulafono e Pulea ai La’u Ekalesia”

Mataupu Faavae ma Feagaiga 41–44

Sa televave le tuputupu a’e o le Ekalesia i le 1830 ma le 1831, aemaise lava i le faateleina o tagata fou i Katelani, Ohaio. O lenei tuputupu a’e sa manaia ma faamalosiau i le Au Paia, ae sa tuuina atu ai foi nisi o luitau. E faapefea ona e tuufaatasia se vaega o tagata talitonu ua vave ona faatuputeleina? E patino lava, o le a lau mea e fai pe a latou aumaia aoaoga faavae ma faiga masani mai o latou faatuatuaga sa iai? Mo se faataitaiga, ina ua taunuu Iosefa Samita i Katelani i le amataga o Fepuari i le 1831, na ia maua ai o tagata fou liliu mai o loo latou faaaogaina lautele meatotino i se taumafaiga faamaoni ina ia faataitai i tagata Kerisiano o le Feagaiga Fou (tagai Galuega 4:32–37). Na faia e le Alii ni faasa’oga taua ma faamaninoga i lenei mataupu ma isi autu. Sa tele na Ia faia lenei mea e ala mai i se faaaliga o loo tusia i le Mataupu Faavae ma Feagaiga 42 lea na Ia ta’ua ‟o a’u tulafono e pulea ai la’u ekalesia” (fuaiupu 59). I lenei faaaliga, ua tatou aoao ai i upumoni ia e taua i le faavaeina o le Ekalesia a le Alii i aso e gata ai. Ma ua tatou aoao e tele atu mea e tatau ona tatou aoaoina: ‟Afai e te ole mai,” na folafola mai ai le Alii, ‟o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama” (Mataupu Faavae ma Feagaiga 42:61).

Tagai foi i le Au Paia, 1:114–19.

Manatu mo le Aoaoina i le Aiga ma i le Lotu

Mataupu Faavae ma Feagaiga 41

“O ia o lē e taliaina laʼu tulafono ma faia, o ia lava lea o loʼu soo.”

E oo atu i le amataga o le 1831, ua amata ona faapotopoto le Au Paia i Ohaio. Sa latou naunau e maua le tulafono na folafola mai e le Atua e faaali mai iina (tagai i le Mataupu Faavae ma Feagaiga 38:32). Ae muamua, na aoao e le Alii Ona soo i le ala e saunia ai e maua Ana tulafono. O a mataupu faavae ua e maua i le Mataupu Faavae ma Feagaiga 41:1–6 lea e mafai ona fesoasoani i le Au Paia ia maua tulafono a le Atua? E mafai faapefea e nei mataupu faavae ona fesoasoani ia te oe ia maua faatonuga mai ia te Ia?

Tagai foi ‟A Bishop unto the Church,‟ i le Revelations in Context, 77–83.

Mataupu Faavae ma Feagaiga 42

Ua tuuina mai e le Alii ia te a’u poloaiga auā e alofa o Ia ia te a’u.

Na manatunatu le Au Paia i le faaaliga i le Mataupu Faavae ma Feagaiga 42:1–72 o se tasi o faaaliga ua sili ona taua na maua e le Perofeta. O se tasi lea o uluai faaaliga na lolomiina. Mo le tele o tausaga, na ta’ua ai e le Au Paia ‟o le tulafono.” E ui e le o aofia ai i le vaega ia poloaiga uma po o tulafono a le Alii, ae e aoga le mafaufau loloto pe aisea na taua ai nei mataupu faavae mo le Ekalesia toefuataiina fou. Aisea e taua ai i latou mo i tatou i aso nei?

Ona o le vaega 42 e fai si umi, atonu e te mafaufau e suesue i ai i ni vaega laiti, e pei o vaega nei. Faailoa mataupu faavae o loo aoaoina i nei mau taitasi, ma mafaufau pe faapefea ona avea nei tulafono o se faailoga o le alofa o le Alii mo Lona nuu.

• Fuaiupu 4–9, 11–17, 56–58

• Fuaiupu 18–19

• Fuaiupu 30–31

• Fuaiupu 40–42

• Fuaiupu 43–52

Aisea e tuuina mai ai e le Atua ia i tatou tulafono ma poloaiga? O a ni auala ua faamanuiaina ai oe i le iloaina ma le mulimuli ai i nei poloaiga?

Mataupu Faavae ma Feagaiga 42:30–42

“Ia e manatua e ua matitiva.”

O se vaega o le tulafono o loo faaalia mai i le vaega 42, na aoaoina ai e le Alii Lana Au Paia i le ala e latou te mafai ai, faapei o e na mulimuli i le Keriso anamua, ua “tuu tele a latou mea uma lava” (Galuega 2:44; 4 Nifae 1:3), ma “sa leai se mativa i totonu ia i latou” (Mose 7:8). O le a se mea ua e aoao mai le Mataupu Faavae ma Feagaiga 42:30–42 e uiga i le ala na ola ai le Au Paia i le tulafono o le faapaiaga? (O le faapaiaina o lona uiga o le faataatia ese o se mea mo se faamoemoega paia.)

E ui e le o ia i tatou ‟mea uma ua tuutele” i aso nei, ae i malumalu e osifeagaiga ai le Au Paia o Aso e Gata Ai e ola i le tulafono o le faapaiaga. E mafai faapefea ona e faapaiaina mea ua tuuina atu e le Atua ia te oe e faamanuia ai tagata e le tagolima? Atonu o le usuina o se pese e pei o le ‟Ona ua Maua Tele” (Viiga, nu. 124) e mafai ona e maua ai ni manatu.

Tagai foi Sharon Eubank, “Ou te Tatalo Ia Ona Faaaogaina i Tatou,” Liahona, Nov. 2021, 53–56; ‟O Le Tulafono,” i le Revelations in Context, 93–95.

O Keriso ma le Taulealea Mauoa, saunia e Heinrich Hofmann

Mataupu Faavae ma Feagaiga 42:61, 65–68; 43:1–16

E tuuina mai e le Atua faaaliga e taiala ai Lana Ekalesia—ma taiala ai a’u.

Mafaufau faalemafaufau o loo oulua talanoa ma se tagata fou o le Ekalesia o sē ua fiafia i le iloa o le Ekalesia o loo taitaiina e ala i faaaliga. E mafai faapefea ona e faaaogaina le Mataupu Faavae ma Feagaiga 43:1–16 e fesoasoani atu ai ia te ia ina ia a’oa’o e uiga i le mamanu a le Alii mo le taitaia o Lana Ekalesia e ala atu i Lana perofeta? E mafai faapefea ona e faaaogaina le Mataupu Faavae ma Feagaiga 42:61, 65–68 e aoao atu ai e uiga i le mauaina o faaaliga faaletagata lava ia?

O a nisi o ‟mea filemu” ma mea fiafia ua e maua mai le Alii e ala mai i Lona Agaga?

Ina ia aoao e uiga i le auala na faalogo ai taitai o le Ekalesia i le siufofoga o le Alii, e mafai ona e matamata i se tasi o vitiō i le tuufaatasiga o le ‟Faalogo ia te Ia” i le Gospel Library. Mafaufau e fatu sau oe lava vitiō e faamatala ai pe na faapefea ona fesootai mai le Alii ia te oe.

Tagai foi Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 93–96; ‟E Ao Ina Faia Mea Uma i le Faatulagaga Tatau,” i le Revelations in Context, 50–53.

Faaaoga lesona faatino. O lesona faatino po o fesoasoani vaaia e mafai ona fesoasoani i tagata o loo e aoaoina ia malamalama atili ai i upumoni o le talalelei ma manatua umi ai i latou. Mo se faataitaiga, e mafai ona e faaaogaina se paso, e tuufaatasi ia vaega taitasi, e aoao atu ai e uiga i le mauaina o ‟faaaliga e faaopoopo i luga o lea faaaliga, lea malamalama e faaopoopo i luga o lea malamalama” (Mataupu Faavae ma Feagaiga 42:61).

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Eteuati Paterika

• Vaega Taua i Katelani

• Faapaiaga ma le Tausimea

• Epikopo

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 41:5

O se soo o se tagata ua mauaina tulafono a le Atua ma usitai i ai.

• Ina ia fesoasoani i lau fanau ia iloa le uiga o le avea ma se soo o Iesu Keriso, e mafai ona e tusia le Mataupu Faavae ma Feagaiga 41:5 i se fasipepa, ma faaavanoa le mea e tatau ona tuu ai le upu soo . Ona latou vaavaai lea i le fuaiupu 5 mo le upu o loo misi. E tusa ai ma lenei fuaiupu, o le a le uiga o le avea ma se soo o Iesu Keriso? O faapefea ona tatou taumafai ia avea ma soo sili atu o Keriso?

Mataupu Faavae ma Feagaiga 42:2

Ou te fiafia pe a ou usitai i le Alii.

• Atonu e fiafia lau fanau e taaalo i se taaloga e manaomia ai ona latou faalogo ma le toto’a ma mulimuli i faatonuga. E mafai ona e faaaogaina lenei taaloga e talanoa ai e uiga i le “faalogo ma faafofoga ma usiusitai” i le Alii (Mataupu Faavae ma Feagaiga 42:2). O a faatonuga ua Ia tuuina mai ia i tatou? E faapefea ona faamanuiaina i tatou e ala i le usiusitai i Ana tulafono ma poloaiga?

• E mafai ona outou faamae’aina ma lau fanau ia le itulau o gaoioiga o lenei vaiaso. E mafai fo’i ona outou usuina se pese e uiga i le usiusitai i tulafono a le Atua, e pei o le “Ou Te Fiaola i le Talalelei” (Tusipese a Tamaiti, 72). Mafaufau e faasoa atu i le tasi ma le isi pe faapefea e le usitai i tulafono a le Atua ona aumaia ia te oe le fiafia.

  

Mataupu Faavae ma Feagaiga 42:38

O loo o’u auauna atu ia Iesu Keriso pe a ou auauna atu i isi.

• A uma ona faitau faatasi le Mataupu Faavae ma Feagaiga 42:38, fesoasoani i lau fanau e mafaufau i auala e mafai ona latou auauna atu ai ia Iesu e ala i le auauna atu i isi. E mafai ona latou maua ni manatu mai le vitio ‟Pass It On” (ChurchofJesusChrist.org). E mafai foi ona latou matamata i ata o le Faaola o fesoasoani i isi, faamaloloina o e mama’i, po o le agalelei i tamaiti (tagai Tusi Ata o le Talalelei, nu. 42, 47).

  Pass It On

  Children around the world have taken President Thomas S. Monson's counsel to find a way to serve others.

  

• E mafai ona e faaali atu i lau fanau se pepa o le Sefuluai ma Isi Taulaga ma talanoa e uiga i le auala e faaaoga ai e tuuina atu ai mea ua tatou maua e faamanuia ai isi (tagai foi ‟Sefuluai ma Foai i luga o le Initoneti”).

Mataupu Faavae ma Feagaiga 43:1–7

Ua na o le perofeta e mafai ona maua faaaliga mo le Ekalesia atoa.

• Fai atu i tamaiti e vaai faalemafaufau i se tagata o loo tu i luga i se sauniga molimau ma ta’u atu i le uarota na ia mauaina se faaaliga mo le Ekalesia (mo se faataitaiga, e le tatau ona tatou toe ’aia ni karoti pe ua tatau ona tatou fufuluina o tatou lima i le susu ae le o le vai). Fai mai a ia e tatau ona tatou faalogo atu i mea na ia fai mai ai nai loo le perofeta. O le a se mea o le a sese ai lena mea? Ona outou suesue faatasi lea i le Mataupu Faavae ma Feagaiga 43:1–7 e saili ai pe faapefea ona tuuuina mai e le Alii poloaiga o Lana Ekalesia.

• E mafai ona e faaali atu se ata o le perofeta soifua, ma valaaulia lau fanau e faasoa mai se mea sa ia aoao mai talu ai nei. Afai latou te manaomia se fesoasoani, faaali se ata vitiō po o se fasi fuaitau mai se sāvali o se konafesi aoao talu ai nei. Aisea e avea ai o se faamanuiaga le i ai o se perofeta soifua i nei aso?

Mo nisi manatu, tagai i le lomiga o lenei masina o le mekasini o le Uo .

Iosefa Samita o loo Talai Atu, saunia e Sam Lawlor