“O Leo o le Toefuataiga: Faapotopotoina i Ohaio,” Sau, Mulimuli Mai ia te A’u—Mo le Aiga ma le Ekalesia: Mataupu Faavae ma Feagaiga 2025 (2025)
“Faapotopotoina i Ohaio,” Sau, Mulimuli Mai ia te A’u—Mo le Aiga ma le Ekalesia: 2025
O Leo o le Toefuataiga
Faapotopotoina i Ohaio
Nu’u i Katelani, saunia e Al Rounds
Phebe Carter
O se tasi o le toatele o le Au Paia na faapotopotoina i Ohaio i le 1830 o Phebe Carter. Na ia auai i le Ekalesia i matūsasae o le Iunaite Setete i le luasefulu ma ona tupu o ona tausaga, e ui e le’i auai ona mātua. Na ia tusia mulimuli ane e uiga i lana faaiuga e malaga atu i Ohaio faatasi ma le Au Paia:
“Sa ofo au uo i lau malaga, sa faapena foi ia te au, ae sa i ai se mea sa i totonu sa uunaia au. O le mafatia o lou tina i lo’u tuua o le aiga sa toetoe lava a le mafai ona ou tatalia; ma ana leai le agaga i totonu ua leva lava ona ou fati. Na ta’u mai e lo’u tina ia te a’u, e sili ia te ia ona vaai mai ua tanu a’u nai lo le alu atu toatasi i le lalolagi e leai se alofa o i ai.
“’[Phebe],’ na ia faapea atu ai, ma le maati, ‘e te toe foi mai pe a e iloa e le moni talitonuga Mamona?’
“Sa ou tali atu, ‘ioe, tina; ou te faia,’ O la’u tali na mama ai lona faafitauli; a e na matou matuai faanoanoa lava i le valavala ai. Ina ua oo mai le taimi e malaga ese ai, ou te le’i faatuatuaina a’u lava e faatofa atu; o lea sa ou tusia ai a’u faatofa ia i latou taitoatasi, ma tuu ai i luga o la’u laulau, ma tamo’e i lalo ma oso i totonu o le taavale toso. Ua ou tuua le aiga pele na ou ola ae ai ina ia sosoo atu lo’u olaga faatasi ma le au paia a le Atua.”
I se tasi o na sāvali faamavae, na tusi ai e Phebe:
“Matua pele--Ua ou i ai i le tu’ua o le taualuga o matua na ou ola mai ai mo si na taimi, … ou te le iloa po o le a le umi—ae o le a le aunoa ma lagona o le faafetai mo le agalelei sa ou maua mai lava o ou pepe meamea se’ia oo mai le taimi nei—a e ua faatonuina ai e le Silisili i le taimi nei nai lo se isi taimi muamua atu. Ia tatou tuuto atu nei mea uma i aao o Le Silisili ma ia faafetai ua faatagaina tatou e ola faatasi mo se taimi umi i lalo o se siosiomaga lelei e pei ona i ai ia i tatou, i le talitonu ai o le a galulue mea uma mo lo tatou lelei pe afai e silisili lo tatou alolofa i le Atua. Ia tatou iloaina e mafai ona tatou tatalo i le Atua e tasi o lē o le a faafofoga i tatalo faamaoni a i latou uma na ia fausia ma tuuina mai ia i tatou le mea ua sili mo i tatou.
“Tina, ou te talitonu o le finagalo o le Atua ia ou alu i sisifo ma na ou iloa ma faamautuina lena mo se taimi umi lava. O lenei la ua matala le ala … ; ou te talitonu o le agaga o le Alii ua faia lea, ua lava lea mo mea uma. Ia aua e te popole mo lau tama; o le Alii o le a faamafanafanaina a’u. Ou te talitonu o le a tausia a’u e le Alii ma aumaia ia te a’u le mea ua sili na lelei. … Ou te alu ona ua valaau lo’u Matai—ua ia faia lou tiute ia faigofie.”