Auiliiliga mai le Sitiiaese Atu le Au Paia i Katelani, saunia e Sam Lawlor

21-27 Aperila: “Afai Tou Te Lē Tasi E Lē a A’u Outou”

Mataupu Faavae ma Feagaiga 37–40

I le uluai Au Paia, sa avea le Ekalesia ma mea sili atu nai lo o se nofoga e faalogologo ai i le aoao atu i le Aso Sapati. O faaaliga na faaaoga ai upu e pei o le mafuaaga, malo, Siona, ma, e masani lava, o le galue. Atonu o se vaega lena o le mafuaaga na tosina mai ai tagata i le Ekalesia toefuataiina. E faapei ona latou fiafia i mataupu faavae, a e toatele foi na manana’o i se mea e paia e mafai ona tuuto i ai o latou olaga. E ui i lea, o le usitaia o le poloaiga a le Alii i le 1830 e faapotopoto i Ohaio sa lei faigofie. Mo le toatele, o lona uiga o le tuua o ni fale toafimalie mo se tuaoi e le masani ai (tagai “Leo o le Toefuataiga: Faapotopotoina i Ohaio”). I aso nei, ua mafai ona tatou vaai manino i mea na mafai ona vaaia e na Au Paia e ala i o latou mata o le faatuatua: Sa i le Alii faamanuiaga sili na faatali mai mo i latou i Ohaio.

O le manaomia ona faapotopoto i Ohaio ua leva ona tuanai, a e o Au Paia i nei aso o loo autasi lava i lena mafuaaga e tasi: ia “aumai i luma Siona” (Mataupu Faavae ma Feagaiga 39:13). Faapei o na Au Paia o popofou, ua valaauliaina i tatou ina ia lafoa’i “mea o le lalolagi” (Mataupu Faavae ma Feagaiga 40:2) ma faatuatuaina le folafolaga a le Alii: “O le a e maua se faamanuiaga e matua tele … e te le’i iloaina lava” (Mataupu Faavae ma Feagaiga 39:10).

Tagai foi Au Paia, 1:109–11.

Manatu mo le Aoaoina i le Aiga ma i le Lotu

Mataupu Faavae ma Feagaiga 37–38

E faapotopotoina tatou e le Atua e faamanuia i tatou.

Sa tatau i tagata o le Ekalesia i Feiete, Niu Ioka, ona faia ni osigataulaga faigata e siitia atu i Ohaio (e silia ma le 250 maila le mamao) i le taumalulu o le 1831. A o e faitau e uiga i le poloaiga a le Alii i le Mataupu Faavae ma Feagaiga 37:3–4, atonu e te mafaufau e uiga i osigataulaga ua poloaiina ai oe e le Alii. Ona, a o e suesueina le Mataupu Faavae ma Feagaiga38:1–33, vaavaai mo upumoni e uiga i le Faaola e avatu ai ia te oe le faatuatua e mulimuli ai i Lana fautuaga. O le a se mea ua e aoao mai i fuaiupu 11–33 e uiga i faamanuiaga o le faapotopotoina o ni soo o Iesu Keriso?

Mataupu Faavae ma Feagaiga 38:22

“Faalogo i lo’u leo ma mulimuli mai ia te a’u.”

E faapefea ona e faia ia avea Iesu Keriso ma au “faitulafono”? E faapefea i le mulimuli i Ana tulafono ona avea ai oe “ma tagata saoloto”?

Tagai foi i le 2 Nifae 2:26–27.

Mataupu Faavae ma Feagaiga 38:30

Afai ua ou saunia, e le manaomia ona ou fefe.

O anafea na e maua ai se aafiaga i le mataupu faavae na faaalia mai e le Alii i le Mataupu Faavae ma Feagaiga 38:30: ‟Afai ua outou saunia o le a outou le matatau”? A o e suesue i le vaega 38, mātau le ala e saunia ai e le Alii Lana Au Paia ina ia mafai ona latou fetaia’i ma le lumanai ma le lototele. E faapefea ona ia finagalo ia te oe e saunia mo luitau ina ia e lē fefe ai?

Tagai i le David A. Bednar, “O le a Tatou Tofotofoina ai i Latou,” Liahona, Nov. 2020, 8–11.

Mataupu Faavae ma Feagaiga 38:24–27

E finagalo le Atua ina “ia tasi” i tatou.

O le Au Paia o e na faapotopoto i Ohaio na o mai mai ni tulaga eseese. E foliga mai e moni foi lena mea i tagata o lau uarota. Ae ua poloaiina e le Alii Lona nuu “ia tasi” (fuaiupu 27). E mafai faapefea ona tatou ausia lenei ituaiga lotogatasi? O a manatu e oo mai i lou mafaufau a o e faitauina le Mataupu Faavae ma Feagaiga 38:24–27? Aisea e manaomia ai ona tatou lotogatasi ina ia avea ai ma nuu o le Atua?

O le faitauina o nei fuaiupu e mafai foi ona musuia ai oe e mafaufau e uiga i au sootaga—mo se faataitaiga, faatasi ma tagata o le aiga, tagata o le uarota, ma tagata o le korama po o le vasega. O le a se mea e ono taofia ai oe mai le lotogatasi ia Keriso? E faapefea ona fesoasoani le Faaola ia te oe ina “ia tasi”? O vitio “A Friend to All” po o le “Love in Our Hearts” (Gospel Library) e mafai ona fesoasoani ia te oe e tali ai nei fesili. E mafai foi ona e maua ni manatu i le sāvali a Elder Dale G. Renlund “O Le Filemu o Keriso e Faaumatia ai le Feitaga’i,” Liahona, Nov. 2021, 83–85.

A Friend to All

Elder Ulisses Soares talks of the need for kindness and acceptance.

Love in Our Hearts

Sister Christina B. Franco discusses the importance of inclusion and respect.

E mafai faapefea ona e fesoasoani i nei vaega o tagata ia sili atu ona lotogatasi? Mo se faataitaiga, mafaufau e auina atu pe tesi atu se faamatalaga agalelei i tagata o lau korama, vasega, po o le aiga. O ai e te lagona le musuia e aapa atu i ai?

O le a se mea e musuia ai oe e uiga i le faataitaiga a le Faaola i le Efeso 2:14, 18–22; 2 Nifae 26:24–28?

Tagai foi Quentin L. Cook, “Loto ua Fili Faatasi i le Amiotonu ma le Lotogatasi,” Liahona, Nov. 2020, 18–21; ‟Ia Fealofani,” Viiga, nu. 195; Autu ma Fesili, ‟Belonging in the Church of Jesus Christ,” Gospel Library.

Mataupu Faavae ma Feagaiga 38:39; 39–40

E finagalo le Tama e tuuina mai ia te a’u oa o le faavavau.

I lou manatu, o le a le eseesega i le va ‟o oa o le lalolagi” ma ‟oa o le faavavau”? (Mataupu Faavae ma Feagaiga 38:39). O a ni aafiaga ua aoaoina ai oe e faataua oa o le faavavau?

Ia manatua lenei mea a o e faitau e uiga ia James Covel i vaega 39–40 (e aofia ai le talaaga faasolopito i ulutala o vaega). Mafaufau pe faapefea ona faatatau lona aafiaga ia te oe. Mo se faataitaiga, mafaufau ia te oe i taimi na “sa’o ai lou loto i luma o le [Atua]” (Mataupu Faavae ma Feagaiga 40:1). Na faapefea ona faamanuiaina oe ona o lou faamaoni? Mafaufau foi po o a ‟mea o le lalolagi” o feagai ma oe. E mafai faapefea ona latou taofia oe mai le mauaina o le afioga a le Atua ‟ma le fiafia”? (Mataupu Faavae ma Feagaiga 39:9; 40:2). O a ni mea ua e maua i nei vaega e musuia ai oe ia tausisia ai pea le usitai i le Atua?

Tagai foi i le Mataio 13:3–23.

Faaaogaina o mau i lou olaga. “O se tasi o auala e mafai ona e fesoasoani ai i tagata aoao ia iloa le taua o tusitusiga paia o le fai atu lea o fesili e pei o le ‘E mafai faapefea e lenei mea ona fesoasoani ia te oe i se mea o loo e oo i ai i le taimi nei?’ ‘Aisea e taua ai lou iloa o lenei mea?’ ‘O le a le eseesega e mafai e lenei mea ona faia i lou olaga?” (Aoao Atu i le Ala a le Faaola, 23). O fesili i lenei gaoioiga e uiga i le Mataupu Faavae ma Feagaiga 39–40 o isi faataitaiga ia o fesili e mafai ona fesoasoani ia i tatou e faaaoga ai nei faaaliga i o tatou olaga.

Mo nisi manatu, tagai i lomiga o lenei masina i mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: James Covel

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 37;38:31–33

E faapotopoto e le Atua i tatou e faamanuia i tatou.

• O le faafanua ma le itulau o gaoioiga i le faaiuga o lenei otootoga e mafai ona fesoasoani i lau fanau ia malamalama ai i mea na poloaiina e le Atua i le Mataupu Faavae ma Feagaiga 37:3. Atonu e mafai ona e fesoasoani ia i latou ia maua nofoaga o loo ta’ua i nei faaaliga. E mafai foi ona e fesoasoani ia i latou e sue se fasifuaitau mai le Mataupu Faavae ma Feagaiga 38:31–33 o loo faamatala mai ai le mafuaaga e finagalo ai le Atua i Lona nuu e faapotopoto faatasi.

Mataupu Faavae ma Feagaiga 38:24–27

E finagalo le Atua ina “ia tasi” i tatou.

• A o e faitauina le Mataupu Faavae ma Feagaiga 38:24–25 ma lau fanau, talanoa e uiga i le manatu taua i lou uso po o le tuafafine e pei o oe lava ia te oe (tagai foi i le Mataio 7:12). Fesoasoani ia i latou e toe fai le mau, sui le “lona uso” i igoa o isi.

• Ina ia aoao lau fanau i le uiga o le ‟ia tasi” (Mataupu Faavae ma Feagaiga 38:27), e mafai ona e fesoasoani ia i latou e tusi se numera 1 telē ma teuteu i igoa ma ata po o ata o tagata taitoatasi o lou aiga po o le vasega. I autafa o le 1, e mafai ona e tusia ai mea o le a e faia ina ia lotogatasi atili ai.

• Mafaufau e faasoa atu se lesona faitino lea e faapupulaina ai le auala e tuufaatasi pe fusia ai ni mea ina ia tasi, e pei o fasi ie e faia ai se ie e tasi po o mea e faia ai le falaoa e tasi. O le a se mea ua aoao mai e nei faataitaiga ia i tatou e uiga i le avea ma nuu e tasi o le Atua?

Mataupu Faavae ma Feagaiga 38:30.

Afai ua ou saunia, e le tatau ona ou fefe.

• A o outou faitau faatasi i le Mataupu Faavae ma Feagaiga 38:30, e mafai e oe ma lau fanau ona talanoa e uiga i aafiaga talu ai nei na manaomia ai ni sauniuniga. Ona mafai lea ona e fesili i lau fanau e uiga i mea e finagalo le Tama Faalelagi tatou te saunia i ai. Faasoa atu i lau fanau se aafiaga na fesoasoani ai le saunia ia te oe e aua le fefe. E mafai foi ona outou matamata faatasi i le vitiō ‟Men’s Hearts Shall Fail Them” (Gospel Library).

Men's Hearts Shall Fail Them

Ua faasoa mai e Elder Russell M. Nelson se tala patino e aumai ai se faamalosiauga i taimi tatou te lagona ai le “vaivai o le loto.”

Mataupu Faavae ma Feagaiga 39:6, 23

Ou te mauaina le meaalofa o le Agaga Paia pe a faamauina aʻu.

• Mafaufau e faaali atu se ata o se tasi o loo faamauina lona papatisoga. Fai atu i lau fanau e faamatala mai le mea o loo tupu i le ata. E mafai foi ona e valaaulia i latou e faasino i le ata i soo se taimi latou te faalogo ai i upu Agaga Paia i le Mataupu Faavae ma Feagaiga 39:6, 23 (po o se pese e pei o le “O Le Agaga Paia,” Tusipese a Tamaiti, 56). Faasoa atu i le tasi ma le isi le auala ua faamanuiaina ai oe e le meaalofa o le Agaga Paia.

Mo nisi manatu, tagai i le lomiga o lenei masina o le mekasini o le Uo .