31 Mati–6 Aperila: “O Le a Faapotopotoina e Iesu Keriso Ona Tagata”

Mataupu Faavae ma Feagaiga 29

E ui lava na faatulagaina le Ekalesia a Iesu Keriso i le 1830, e tele lava upumoni o le talalelei e le’i faaalia mai lava, ma e i ai ni tagata muamua o le Ekalesia sa i ai ni a latou fesili. Sa latou faitauina valoaga o loo i totonu o le Tusi a Mamona e uiga i le faapotopotoina o Isaraelu ma le faatuina o Siona (tagai i le 3 Nifae 21). E faapefea ona tupu lena mea? O faaaliga na faapea Ailama Page na ia mauaina na faatatau i lena mataupu, lea na tupu atili ai le fia iloa o tagata o le Ekalesia (tagai i le Mataupu Faavae ma Feagaiga 28). O isi tagata ua mafaufau e uiga i le Pa’u o Atamu ma Eva ma le oti faaleagaga. Sa talisapaia e le Alii nei fesili i le 1830, ma e na te talisapaia foi a tatou fesili i aso nei. “Soo se mea tou te ole mai ai i le faatuatua,” na Ia ta’u atu ai i le Au Paia, “ma le lotogatasi i le tatalo e tusa ai ma laʼu poloaiga, o le a outou maua” (Mataupu Faavae ma Feagaiga 29:6). O le mea moni, e pei ona faaalia mai i le faaaliga faaleaoaoga faavae i le Mataupu Faavae ma Feagaiga 29, o nisi taimi e tali mai ai e le Alii a tatou fesili e ala i le tuuina mai ia i tatou o le upumoni ma le malamalama e sili atu nai lo mea tatou te ole atu ai.

Manatu mo le Aoaoina i le Aiga ma i le Lotu

Mataupu Faavae ma Feagaiga 29

E i ai se fuafuaga a le Tama Faalelagi mo le faaolataga o Lana fanau.

O loo a’oa’o mai i leMataupu Faavae ma Feagaiga 29 le tele o upumoni e uiga i le fuafuaga a le Atua mo oe. A o e faitau, vaavaai mo upumoni ua e aoao mai e uiga i vaega taitasi nei o Lana fuafuaga:

• Muai olaga (tagai fuaiupu 36–37)

• Foafoaga (tagai fuaiupu 31–33)

• O Le Pa’u o Atamu ma Eva (tagai fuaiupu 40–41)

• Olaga faitino (tagai fuaiupu 39, 42–45)

• O Le Togiola a Iesu Keriso (tagai fuaiupu 1, 42–43, 46–50)

• O Le Toetu (tagai fuaiupu 13, 26)

• O le Faamasinoga Mulimuli (tagai fuaiupu 12–13, 27–30)

O a ni malamalamaaga na e maua? Afai e aoga ia te oe, e mafai ona e tusia i le avanoa ua tuuina atu faatasi ma ata o loo i le faaiuga o lenei otootoga. Pe faapefea ona aafia lou olaga i nei upumoni?

Tagai foi i Autu ma Fesili, ‟Ata o le Faaolataga,” Gospel Library.

Auiliiliga mai le O Mai ia te A’u, saunia e Jenedy Paige

Mataupu Faavae ma Feagaiga 29:1–28

Ua valaaulia a’u e Iesu Keriso e fesoasoani e faapotopoto Ona tagata a o lumanai Lona Afio Mai Faalua.

Ua fetalai Iesu Keriso i le faapotopotoina o Ona tagata “e pei ona ofaofatai e se matuamoa lana toloai i lalo o ona apaau” (Mataupu Faavae ma Feagaiga 29:2). O le a se mea o aoao mai e lenei faatusatusaga ia te oe e uiga ia Iesu Keriso? O a ni manatu po o ni uunaiga faaopoopo e oo mai ia te oe a o e suesue i le ata o se matuamoa ma se toloai i lenei otootoga? Mafaufau pe na faapefea ona e lagonaina le faapotopotoina ma le puipuia o oe e Iesu Keriso.

A o e faitauina le Mataupu Faavae ma Feagaiga 29:1–11, vaavaai mo ni malamalamaaga e uiga i:

• O ai o le a faapotopotoina?

• O le a le uiga o le ‟faapotopoto” ia Keriso.

• Aisea tatou te faapotopoto ai ia te Ia.

Mafaufau loloto pe aisea e te manao ai i isi tagata e faapotopoto ia Iesu Keriso. O le a se mea e te lagona le musuiaina e fai e fesoasoani ai?

E mafai ona e fesili ifo ia te oe lava ia i fesili lava e tasi a o matamata i le vitio “A Witness of God” (Gospel Library) po o le faitauina po o le faalogologo i se viiga e uiga i le faapotopotoina, e pei o le “Isaraelu, Ua Valaau Mai le Atua” (Viiga, nu. 4). O le a sou lagona i le mea o loo taumafai le Alii e aoao atu ia te oe e uiga i Lana galuega o le faapotopotoina?

A Witness of God

Elder Neil L. Andersen describes how all of God's children are pieces of a large puzzle in preparation for the Second Coming of Jesus Christ.

Na saunoa Peresitene Russell M. Nelson: ‟O lenei ua faia le faapotopotoina i atunuu taitasi. Ua folafola mai e le Alii le faatuina o Siona i malo taitasi lea na Ia tuuina atu ai i Lana Au Paia lo latou fananau mai ma le tagatanuu” (‟O Le Faapotopotoina o Isaraelu ua Faataapeapeina,” Liahona, Nov. 2006, 81). E faapefea e le faapotopotoina i lenei auala ona fesoasoani ia i tatou e “saunia ai i mea uma” mo le Afio Mai Faalua o le Faaola? (fuaiupu 8; tagai foi i fuaiupu 14–28).

Tagai foi i le Russell M. Nelson ma Wendy W. Nelson, ‟Faamoemoe o Isaraelu” (faigalotu a le autalavou i le lalolagi atoa, 3 Iuni, 2018), Gospel Library; D. Todd Christofferson, ‟O Le Mataupu o le Auai,” Liahona, Nov. 2022, 53–56; Topics and Questions, ‟Faapotopotoina o Isaraelu,” Gospel Library.

Mataupu Faavae ma Feagaiga 29:31–35

“Ua faaleagaga mea uma ia te au.”

A o e suesueina le Mataupu Faavae ma Feagaiga 29:31–35, fesili ifo ia te oe lava, ‟O le a le uiga o poloaiga uma e faaleagaga?” Atonu e mafai ona e lisiina ni nai poloaiga ma manatunatu i upumoni faaleagaga lea e fesootai ma poloaiga taitasi. O se iloiloga o le Mo Le Malosi o le Autalavou: O se Taiala mo le Faia o Filifiliga e mafai ona fesoasoani—o loo aoao mai ai nisi o upumoni e faavavau i tua atu o le tele o poloaiga a le Atua.

E faapefea e le iloaina ‟o mea uma … e faaleagaga” ona aafia ai le ala e te vaai atu ai i poloaiga a le Atua? Mafaufau e vaavaai mo uiga faaleagaga po o le faamoemoega i isi foi vaega o lou olaga.

Tagai foi i le 2 Nifae 9:39.

Taulai ia Iesu Keriso. ‟O autu uma o le talalelei [o] se avanoa e aoao atu ma aoao ai e uiga ia Iesu Keriso” (Aoao Atu i le Ala a le Faaola, 6). O le a se mea ua e aoaoina e uiga i Ona uiga, Ana matafaioi, ma Lana faataitaiga a o e faitauina le Mataupu Faavae ma Feagaiga 29?

Mataupu Faavae ma Feagaiga 29:36–50

Na togiola tatou e Iesu Keriso mai le Pa’u.

E mafai faapefea ona e faaaogaina le Mataupu Faavae ma Feagaiga 29:36–50 e faamalamalama ai pe aisea tatou te manaomia ai le togiolaina e ala ia Iesu Keriso?

O le Pa’u o Atamu ma Eva na aumaia ai le oti ma le agasala i le lalolagi, ae na saunia ai foi le ala mo le togiolaina ma le olioli e ala ia Keriso. Faatasi ai ma lena manatu i le mafaufau, faitau fuaiupu 39–43 ma mātau upu ma fasifuaitau e aumaia ia te oe le olioli. O le a se mea ua faagaeetia ai oe e uiga i le mea na fai mai ai Atamu ma Eva e uiga i le Pa’u i le Mose 5:10–12?

Tagai foi i le ‟Why We Need a Savior” (vitiō), Gospel Library.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

Mo nisi manatu, tagai i lomiga o lenei masina o le mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• O Le Faapotopotoina o Isaraelu

• Mataupu 12: Mataupu Faavae ma Feagaiga 29

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 29

E i ai se fuafuaga a le Tama Faalelagi mo le faaolataga o Lana fanau.

• Ina ia amata se talanoaga e uiga i le fuafuaga a le Tama Faalelagi mo i tatou, e mafai e outou ma lau fanau ona talanoa e uiga i se taimi na tou faia ai se fuafuaga, e pei o se malaga po o le faataunuuina o se galuega. E mafai foi ona e faʻasoa faʻataʻitaʻiga o fuafuaga, e pei o le kalena ma gaoioiga o tusia ai i luga poʻo faatonuga e faia ai se mea. Aisea e taua ai fuafuaga? Ona mafai lea ona e talanoa e uiga i mea e finagalo le Tama Faalelagi e faataunuu ma pe faapefea ona fesoasoani Lana fuafuaga ia i tatou e faataunuu ai.

• E mafai ona e faaaogaina ata o loo i le faaiuga o lenei otootoga e fesoasoani ai i lau fanau e sue fuaiupu i le Mataupu Faavae ma Feagaiga 29 o loo aoao mai ai e uiga i vaega eseese o le fuafuaga a le Tama Faalelagi. E mafai foi ona e oti ese ia ata ma fai atu i lau fanau e tuu i le faasologa sa’o. Aisea tatou te faafetai ai i le iloa o loo i ai se fuafuaga a le Tama Faalelagi mo i tatou? E faapefea e lea malamalamaaga ona aafia ai o tatou olaga i aso taitasi?

Mataupu Faavae ma Feagaiga 29:1–2, 7–8

E faapotopotoina e Iesu Keriso ona tagata a’o le’i toe afio mai o Ia.

• O le ata o loo i lalo o se matuamoa o loo faapotopotoina lana toloai po o le vitiō ‟Chicks and Hens” (ChurchofJesusChrist.org) e mafai ona fesoasoani i lau fanau e vaai faalemafaufau ai i le talafaatusa i le Mataupu Faavae ma Feagaiga 29:1–2. Ona mafai lea ona outou faitauina faatasi nei fuaiupu ma talanoa le tasi ma le isi e uiga i le ala e puipuia ai e se matuamoa lana toloai ma le ala e talitutusa ai lena mea ma le mea e mafai ona faia e le Faaola mo i tatou.

  Chicks and Hens

  

  Ou Te Faapotopotoina Outou, saunia e Liz Lemon Swindle

• O le a se mea o le a musuia ai lau fanau ina ia mananao ai e fesoasoani i le Faaola e faapotopoto Lona nuu? Atonu latou te fia faalogo i le aafiaga o se tasi na ‟faapotopotoina” ia te Ia e ala i le auai i Lana Ekalesia. Mo se faataitaiga, o ai na faailoaina atu lou aiga i le Ekalesia? Na faapefea ona faamanuiaina i tatou e ala i le taliaina o le valaaulia a le Faaola ina ia faapotopoto atu ia te Ia? E faapefea ona tatou fesoasoani atu i isi ia faapotopoto atu ia te Ia? (Tagai ‟O Se Savali mo Tamaiti mai ia Peresitene Russell M. Nelson” [vitiō], ChurchofJesusChrist.org.)

  Video: A Message for Children from President Russell M. Nelson

  In the 2021 Friend to Friend event, President Russell M. Nelson gave this message to children around the world.

Mataupu Faavae ma Feagaiga 29:11

O le a toe afio mai Iesu Keriso.

• O se ata o le Afio Mai Faalua o le Faaola (e pei o le Tusi Ata o le Talalelei, nu. 66) po o se pese e faatatau i ai (e pei o le “Pe a Ia Toe Afio Mai,” Tusipese a Tamaiti, 82–83) e mafai ona fesoasoani ia te oe ma lau fanau e talanoaina le Mataupu Faavae ma Feagaiga 29:11. Fesoasoani i lau fanau e mātau fuaitau i le mau e fesootai i se mea i le ata po o le pese. Faasoa ma isi pe o le a lou lagona e uiga i le toe afio mai o Iesu Keriso i le lalolagi.

Mo nisi manatu, tagai i le lomiga o lenei masina o le mekasini o le Uo .