7–13 Aperila: ‟Siitia A’e o Oulua Leo … e Folafola Atu La’u Talalelei”

Mataupu Faavae ma Feagaiga 30–36

Na’o le tasi le masina talu na avea Parley P. Pratt ma se tagata o le Ekalesia ae valaauina e alu “i le vao” e talai le talalelei (Mataupu Faavae ma Feagaiga 32:2). E itiiti atu le taimi na avea ai Tomasi B. Marsh ma tagata o le Ekalesia ina ua ta’u atu ia te ia, “Ua o’o mai le itula o lau misiona” (Mataupu Faaavae ma Feagaiga 31:3). O Orson Pratt, Eteuati Paterika, ma le toatele o isi sa faatoa maea lava ona papatiso a e oo mai a latou valaauga faamisiona. Atonu o loo i ai foi se lesona i lenei mamanu mo i tatou i nei aso: afai na lava lou iloa e talia ai le talalelei toefuataiina e ala i le papatisoga, ua lava lou iloa e faasoa atu ai i isi. E moni lava, e tatou te mananao ia faaopoopo lo tatou malamalama o le talalelei, ae e le’i faatuai lava le Atua e valaau i e ua “lē aoaoina” e talai atu Lana talalelei (Mataupu Faavae ma Feagaiga 35:13). O le mea moni, ua Ia valaaulia tatou uma, “Tatala atu o lou fofoga e talai atu la’u talalelei” (Mataupu Faavae ma Feagaiga 30:5). Ma e sili na lelei ona tatou faia lena e lē auala atu i lo tatou lava poto ma le atamai, a e “ala i le mana [o le] Agaga” (Mataupu Faavae ma Feagaiga 35:13).

Tagai foi “O le Faatuatua ma le Pa’u o Thomas Marsh,” “Esera Thayer: Mai sē Fesiligia i sē Talitonu,” “O le Valaauga o Orson Pratt e Auauna Atu,” i le Revelations in Context, 54–69.

Manatu mo le Aoaoina i le Aiga ma i le Lotu

Mataupu Faavae ma Feagaiga 30–36

Ua valaauina a’u e avea ma molimau a Iesu Keriso.

Pe i ai pe leai se valaauga aloaia o se faifeautalai, e mafai ona avea oe o se molimau ia Iesu Keriso ‟i taimi uma, ma i mea uma, ma i nofoaga uma” (Mosaea 18:9). Ao e suesueina le Mataupu Faavae ma Feagaiga 30-36, faamaumau mea na e aoao mai e uiga i ou avanoa e talai atu le talalelei. E mafai ona e faia se lisi o mea e poloai mai ai le Alii ia te oe ma se isi lisi o folafolaga e faia e le Alii a o e faasoa atu le talalelei (mo se faataitaiga, tagai i le Mataupu Faavae ma Feagaiga 30:8; 31:3–5; 32:1, 5; 35:13–15,24). E mafai foi ona e vaavaai mo mataupu faavae e mafai ona fesoasoani ia te oe e faasoa atu ai le talalelei. O le a se mea ua e maua e musuia ai oe e ‟talai atu tala fiafia o le olioli tele”? (Mataupu Faavae ma Feagaiga 31:3).

Na aoao mai Elder Gary E. Stevenson e faapea o le folafolaina atu o le talalelei ‟e mafai ona ausia e ala i mataupu faavae faigofie ma faigofie ona malamalama ua aoaoina ia i tatou taitoatasi mai le olaga faatamaitiiti: alofa, faasoa atu, ma valaaulia” (“Alofa, Faasoa Atu, Valaaulia,” Liahona, Me 2022, 85). Mafaufau e suesue i lana sāvali a o mafaufau e uiga i e tou te faifai mea faatasi, uo, ma aiga. O a ni manatu e oo mai ia te oe e uiga i le auala e mafai ona e faasoa atu ai ia i latou ‟le mea e te fiafia i ai e uiga i le talalelei a Iesu Keriso”? O a ni auala e mafai ona e valaaulia ai i latou e ‟o mai ia ina matamata,” ‟o mai ma auauna atu,” ma ‟o mai ma auai”? A o e usuina pe faalogologo i le “Ou te Alu i Mea e te Finagalo Ou te Alu i ai” (Viiga, nu. 170) po o se viiga e fesootai i ai, e mafai ona e fesili ifo ia te oe lava, “O le a le mea e finagalo le Alii ou te fai atu ai ma avea ai ina ia mafai ai ona faasoa atu Lana talalelei?”

Tagai foi Marcos A. Aidukaitis, “Sii i Luga Lou Loto ma Olioli,” Liahona, Me 2022, 40–43; Autu ma Fesili, “Valaauliaina o Tagata Uma ia Talia le Talalelei a Iesu Keriso,” “Auauna Atu e pei ona Faia e le Faaola,” Gospel Library; “Valaauliaina o Tagata Uma ia O Mai ia Keriso: Faasoaina Atu o le Talalelei” (vitio), Gospel Library.

Inviting All to Come unto Christ: Sharing the Gospel

Ina ua tonu ia Junior, o se alii talavou i se paranesi toaitiiti i Florida, sa lei manao e nao ia i lona talitonuga ia Keriso, sa ia valaaulia se uo. Sa auai mai se tasi o uo, ona sosoo ai lea ma le isi, mal e isi …

Mataupu Faavae ma Feagaiga 31:1–2, 5–6, 9,13

E mafai e le Alii ona fesoasoani ia te a’u i a’u fesootaiga ma tagata o lo’u aiga.

O aiga i le vaitau o le 1830, sa tauivi ma le tele o mataupu o loo feagai ma aiga i nei aso. O a taitaiga ma folafolaga na tuuina mai e le Alii ia Thomas B. Marsh e uiga i lona aiga i le Mataupu Faavae ma Feagaiga 31? (tagai faapitoa i fuaiupu 1–2, 5–6, 9, 13). E mafai faapefea e Ana upu ona fesoasoani ia te oe i au fesootaiga faaleaiga?

Mo nisi faamatalaga e uiga ia Thomas B. Marsh, tagai i le Au Paia, 1:79-80, 119–20.

Mataupu Faavae ma Feagaiga 32–33; 35

E saunia e le Alii a’u mo le galuega e finagalo o Ia ou te faia.

O le suesueina o olaga o tagata o loo talanoaina i le Mataupu Faavae ma Feagaiga 32–33; 35 e mafai ona fesoasoani ia te oe e iloa ai le ala o loo saunia ai oe e le Alii mo Lana galuega. Mo se faataitaiga, e mafai ona e faitau e uiga i le sootaga i le va o Parley P. Pratt ma Sini Rikitone i le ‟Leo o le Toefuataiga: Uluai Tagata Liliu Mai.” Na faapefea ona faamanuiaina fanau a le Atua i lenei sootaga? (tagai i le Mataupu Faavae ma Feagaiga 35).

O se tasi lenei o faataitaiga: Sa tusia e Ezra Thayer e faapea i se taimi ae lei papatiso, na ia maua ai se faaaliga lea “sa sau ai se tamaloa ma aumai ia te a’u se taaiga pepa ma tuu mai ia te a’u, faapea foi ma se pu, ma fai mai ou te feulaina. Sa ou fai atu ia te ia, ou te le’i feulaina lava se pu i lo’u olaga. Sa ia fai mai, e mafai ona e feulaina, tago e faataitai. Sa sau ai se leo sili ona matagofie ou te le’i faalogo muamua lava iai” (“Revelation, October 1830–B, Revelation Book 1,” historical introduction, josephsmithpapers.org). Ina ua maua e Iosefa Samita mulimuli ane se faaaliga mo Ezra Thayer ma Northrop Sweet, o loo faamaumauina o le Mataupu Faavae ma Feagaiga 33, na faamatalaina e Ezra le faaaliga o le lola pepa i lana faaaliga. Na faapefea ona saunia e le Alii ia Ezra mo le misiona na Ia tuuina atu ia te ia i le Mataupu Faavae ma Feagaiga 33:1–13?

O a faamaoniga ua tatou vaaia ai sa i ai le aao o le Alii i olaga o nei ulua’i tagata o le Ekalesia? O ai na tuuina e le Alii i lou olaga e fesoasoani ia te oe e sau ia Keriso? O faapefea ona Ia saunia oe e faamanuia isi e ala i lou faamaoni, alofa, po o le valaaulia?

Tagai foi i le “O Se Misiona i Tagata Sa Lamanā,” i le Revelation in Context, 45–49.

Mataupu Faavae ma Feagaiga 33:12–18

Afai ou te fausia lo’u olaga i luga o le talalelei a le Faaola, o le a ou lē toilalo.

O leMataupu Faavae ma Feagaiga 33 sa faatatau mo Northrop Sweet ma Ezra Thayer, o ni tagata fou faatoa liliu mai. Na tuua e Northrop le Ekalesia ao lei leva ona tuuina mai lenei faaaliga. Sa auauna atu Ezra ma le faamaoni mo se taimi, a e na ia pa’u ese foi mulimuli ane. O le faitau e uiga i ai i lenei vaega e ono uunaia ai oe e mafaufau pe o le a le mausali o loo fausia ai oe ‟i luga o le papa” (fuaiupu 13) o le talalelei. O a upumoni o loo i totonu o nei fuaiupu e mafai ona fesoasoani ia te oe e te tumau faamaoni ai i le Alii?

Tagai foi Helamana 5:12.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Tagata, Nofoaga, Mea e Tutupu

• Sini Rikitone

• Faaliliuga a Iosefa Samita o le Tusi Paia

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 30:1–2

E tatau ona ou taulai atu i mea a le Atua nai lo mea o le lalolagi.

• Atonu e manaia mo lau fanau le taumafai e fai ni galuega se lua i le taimi e tasi, e pei o le taulotoina o upu i se pese e fiafia i ai a o tusia i lalo igoa o tagata uma o o latou aiga. Aisea e faigata ai ona faia ni mea se lua i le taimi e tasi? Ona outou faitau faatasi lea i le Mataupu Faavae ma Feagaiga 30:1–2 . O a nisi “mea o le lalolagi” e mafai ona taitaiesea i tatou mai le manatuaina o Iesu Keriso ma Lana talalelei? E faapefea ona faatumauina lo tatou taula’i atu ia te Ia?

Mataupu Faavae ma Feagaiga 33:2–3, 6–10

E mafai ona ou faasoaina atu le talalelei a Iesu Keriso.

• Ina ia fesoasoani i lau fanau ia malamalama i le Mataupu Faavae ma Feagaiga 33:8–10, e mafai ona e valaaulia i latou e taumafai e fai mai se fuaitau i o latou gutu a’o tapuni a o e mateina pe mate e isi tamaiti mea o loo latou fai mai ai. Faitau fuaiupu 8–10 ma fai atu ia i latou e tatala o latou gutu i taimi taitasi e toe fai ai le fasifuaitau ‟tatala o outou gutu”. Aisea e finagalo ai le Tama Faalelagi ia i tatou e tatala o tatou gutu ma faasoa atu le talalelei i isi? O le a se mea e mafai ona tatou ta’u atu i o tatou aiga ma uo e uiga i le Faaola po o Lana talalelei? E mafai foi ona outou usuina se pese e faatatau i le faasoaina atu o le talalelei, e pei o le “Matou Te Aumaia le Upu Moni i le Lalolagi” (Tusipese a Tamaiti, 66).

• Mafaufau e faasoa atu ni aafiaga na e maua e fesootai atu i mataupu faavae po o folafolaga i le Mataupu Faavae ma Feagaiga 30–34. O le a se mea na e aoaoina pe lagonaina e uiga i lou Faaola ma Lana galuega a o e auauna atu ia te Ia?

E tele avanoa e faasoa atu ai le talalelei.

Molimau atu i faamanuiaga ua folafola mai. Pe a e valaaulia tamaiti e ola i se mataupu faavae, e mafai ona e faasoa atu ia folafolaga ua faia e le Atua ia i latou o e ola ai i lena mataupu faavae. Mo se faataitaiga, e mafai ona e tuuina atu lau molimau i faamanuiaga e tuuina mai e Ia ia i tatou pe a tatala o tatou gutu ma faasoa atu le talalelei.

Mataupu Faavae ma Feagaiga 33:12–13

E mafai ona ou fausia loʻu olaga i luga o le talalelei a Iesu Keriso.

• E mafai ona e aveina lau fanau i fafo e vaai i le faavae o lo latou fale po o le fale o le Ekalesia ma fai atu ia i latou e faamatala mai. Aisea e manaomia ai e se fale se faavae malosi, ma mausali? Faitau faatasi ma i latou le Mataupu Faavae ma Feagaiga 33:12–13, ma faasoa atu i le tasi ma le isi ou lagona e uiga i le mafuaaga e finagalo ai le Alii ia tatou fausia o tatou olaga i luga o Lana talalelei. Aisea ua avea ai le “papa” ma upu lelei e faamatala ai le talalelei? E faapefea ona tatou fausia o tatou olaga i luga o le papa o le talalelei? (tagai foi Mataio 7:24–29).

Mo nisi manatu, tagai i le lomiga o lenei masina o le mekasini o le Uo .

O i le Vao, saunia e Robert T. Barrett