‟O Leo o le Toefuataiga: O Uluai Tagata Liliu Mai,” Sau, Mulimuli Mai ia te A’u—Mo le Aiga ma le Ekalesia: Mataupu Faavae ma Feagaiga 2025 (2025)

“O Uluai Tagata Liliu Mai,” Sau, Mulimuli Mai ia te A’u—Mo le Aiga ma le Ekalesia: 2025

O leo o le Toefuataiga

O Uluai Tagata Liliu Mai

E o’o lava i le taimi a’o le’i faatulagaina le Ekalesia ia Aperila 1830, na folafola mai ai e le Alii, “Ua sinasina le fanua ua saunia e selesele” (Mataupu Faavae ma Feagaiga 4:4). O lenei faaupuga na faamaonia lona moni i nai masina na mulimuli ane ai, i le toatele ai o e saili i le upumoni na taitaiina e ala i le Agaga o le Atua ia maua le Ekalesia toefuataiina a Iesu Keriso.

O le toatele o nei tagata liliu mai muamua, na faameafaigaluegaina i le faataatiaina o le faavae o le Toefuataiga, ma o a latou tala o le liliu mai ua taua mo tatou i aso nei. O le faatuatua na latou faaalia o le faatuatua lava lea e tasi e tatou te manaomia ina ia liua ai i le talalelei a Iesu Keriso.

Abigail Calkins Leonard

A o i ai Apigail Calkins Leonard i le ogatotonu o le tolusefulu ma ona tupu o ona tausaga, sa manao o ia ina ia faamagaloina mai ana agasala. E i ai taimi e na te faitau ai le Tusi Paia, ma e asiasi atu tagata mai ekalesia Kerisiano i lona aiga, a e sa ia le mautonu pe o le a le eseesega o le tasi ekalesia mai le i isi. “I se tasi taeao,” sa ia faapea mai ai, “Sa ou ave la’u Tusi Paia ma ou alu i le togavao, ina ua ou faapa’u i o’u tulivae.” Sa ia tatalo malosi i le Alii. “I le taimi lava lea na faasolo ane ai se faaaliga i luma o o’u mata,” na ia faapea mai, “ma o ituaiga eseese ua gasolo ane le tasi ma le isi, ma o se leo na valaau mai ia te a’u, ua faapea mai: ‘O nei ua fausia mo le mauaina o se mea,’ Ma o tua atu, ua ou vaaia ai se malamalama sili, ma se leo mai luga ua faapea mai: ‘O le a ou faatuina se nu’u o tagata, o e o le a ou fiafia e avea ma a’u ma faamanuiaina.’” I se taimi e le umi mulimuli ane ai, ae faalogo Abigail e uiga i le Tusi a Mamona. E ui lava e le’i ia te ia se kopi, sa ia saili ina ia “iloa le moni o lenei tusi, e ala i le meaalofa ma le mana o le Agaga Paia,” ma sa ia “lagonaina i lea taimi lea i ai o le [Agaga Paia].” Ina ua mafai moni ona ia faitauina le Tusi a Mamona, sa ia “saunia e talia.” O ia ma lona toalua, o Lyman, sa papatisoina i le 1831.

Thomas B. Marsh

A o avea Thomas B. Marsh ma se talavou matua, sa ia suesue i le Tusi Paia ma auai i se ekalesia Kerisiano. A e sa le faamalieina o ia, ma alu ese mai ai lava mai ekalesia uma. “Sa ia te a’u se vaega o le agaga o valoaga,” na ia faapea mai, “ma ou ta’u atu ai i [se taitai lotu] o lo’o o’u talia se ekalesia fou e tulai mai, o le a i ai le moni i lona mama.” E le’i umi mulimuli ane i lea, na maua e Thomas se musumusuga faaleagaga e tuua lona aiga i Boston, Massachusetts, ma malaga i sisifo. I le maea ai o le tolu masina i Niu Ioka i sisifo e aunoa ma le mauaina o le mea sa ia sailia, na ia amata loa ona toe agai mo lona aiga. I le agai ai i le aiga, sa fesiligia e se tamaitai ia Thomas pe na ia faalogo e uiga i se “Tusi Auro na maua e se talavou e igoa ia Iosefa Samita.” I le faaosofia ai e lenei mafaufauga, na amata ai i le taimi lea ona malaga Thomas mo Palamaira ma feiloai ai ma Matini Harisi i le fale lomitusi, a o lomia ai ma maua mai le masini itulau muamua e 16 o le Tusi a Mamona. Na faatagaina Thomas e ave se kopi o itulau na e 16, ma na ia aveina i le fale o lona toalua o Elisapeta. “Sa fiafia lava o ia” i le tusi na ia ta’ua, “ua talitonu ai o le galuega lava a le Atua.” Na mulimuli ane malaga Thomas ma Elisapeta i Niu Ioka faatasi ma le la fanau ma na papatisoina ai. (Mo nisi faamatalaga e uiga ia Thomas B. Marsh, tagai Mataupu Faavae ma Feagaiga 31.)

Parley ma Thankful Pratt

Faapei o Thomas Marsh, ua tali atu foi Parley ma Thankful Pratt i uunaiga faaleagaga e tuua a latou faatoaga faamanuiaina i Ohaio ma le faamoemoe ina ia talai atu le talalelei e pei ona latou malamalama mai ai mai le Tusi Paia. A o faamatala atu e Parley i lona uso e faapea, “O le agaga o nei mea na aumaia ai se aafiaga mamana i lo’u mafaufau i lea taimi na le mafai ai ona ou malolo.” Ina ua latou taunuu i Niu Ioka i sasa’e, na o’o mai ia Parley se musumusuga e nofo mo sina taimi i le eria lea. Ae o Thankful, na latou fai se tonu, o le a faaauau pea e aunoa ma ia. “E ia te a’u se galuega e tatau ona fai i lenei vaega o le atunuu, “Na ta’u atu e Parley ia te ia, “ma o le a le galuega, po le a foi le umi e faatino ai, ou te le iloa, a e o le a ou alu atu pe a maea ona faia.” O iina lea na iloa muamua ai e Parley e uiga i le Tusi a Mamona. “Na ou lagonaina se manao i le tusi e seāseā maua,” na ia faapea mai ai. Na ia talosagaina se kopi ma na ia faitau i ai i le po. I le oo atu i le taeao, na ia iloa e moni le tusi, ua faatauaina e “sili atu nai lo oa uma o le lalolagi.” I totonu o ni nai aso, na papatisoina ai Parley. Ona ia toe foi lea ia Thankful, o lē na faapea foi ona papatisoina. (Mo nisi faamatalaga e uiga ia Parley P. Pratt, tagai Mataupu Faavae ma Feagaiga 32.)

O Parley P. Pratt o loo faitau — OParley P. Pratt o loo faitauina le Tusi a Mamona, saunia e Jeffrey Hein

Sini ma Phebe Rigdon

I lona agai mai ai mai Niu Ioka i le misiona i Misuri, na nonofo ai Parley Pratt ma ona uso galulue i Mentor, Ohaio i le fale o Sini ma Phebe Rikitone—o ni uo ua leva na masani i ai Parley mai ona aso i Ohaio. O Sini o se faifeau Kerisiano ma o Parley sa avea i se tasi taimi ma uso o lana faapotopotoga ma manatu ia te ia o se taitai faaleagaga. Na naunau Parley e ta’u atu i ana uo e uiga i le Tusi a Mamona ma le Toefuataiga o le talalelei a Iesu Keriso. Sa saili Sini lava ia mo se toefuataiga o le Ekalesia moni na ia maua o loo faamatalaina i totonu o le Feagaiga Fou, e ui lava sa ia lemailoa e uiga i le Tusi a Mamona i le taimi muamua. “Ae o le a ou faitauina lau tusi,” na ia ta’u atu i lana uo o Parley, “ma o le a taumafai ia maua, pe o se faaaliga mai le Atua pe leai.” I le maea ai o le lua vaiaso o le suesue ma le tatalo, na laua iloa ai ma Phebe le moni o le tusi. A e na iloa foi e Sini o le auai i le Ekalesia o le a avea o se osigataulaga tele mo lona aiga. O le a mautinoa lava le lē toe i ai o lana galuega o se faifeau, faapea ma lona tulaga taliaina i le lotoifale. A o la talanoaina ma Phebe lea tulaga e ono oo mai, na folafola atu ai e Phebe e faapea, “Ua ou faitauina le tau, ma o lo’u mana’o ia faia le finagalo o le Atua, pe o’o mai ai le ola po le oti.”