14–20 Aperila: “O Aʼu O Lē O Ola, O Aʼu O Lē Na Fasia”

Eseta

3 Aperila, 1836, o le Aso Sa o le Eseta. I le mavae ai ona fesoasoani i le tufatufaina atu o le faamanatuga i le Au Paia i le malumalu fou faatoa faapaiaina o Katelani, na maua e Iosefa Samita ma Oliva Kaotui se nofoaga filemu i tua o le veli ma punonou ai i le tatalo filemu. Ona o lenei aso paia o loo faamanatuina ai e tagata Kerisiano i soo se mea le Toetu o Iesu Keriso, na faaali mai ai le Faaola toetu lava ia i Lona malumalu, ma folafola mai, “o aʼu o lē o ola, o aʼu o lē na fasia” (Mataupu Faavae ma Feagaiga 110:4).

O le a le uiga o le fetalai mai o Iesu Keriso o “ia o lē o ola”? E le faapea o lona uiga ua na ona toetu mai o Ia mai le tuugamau ma faaali atu i Ona soo i Kalilaia. O lona uiga o loo soifua o Ia i le taimi nei. O loo Ia fetalai mai e ala i perofeta i aso nei. O loo Ia taitaia Lana Ekalesia i aso nei. O loo ia faamaloloina agaga faamanualia ma loto ua nutimomoia i aso nei. E mafai la ona tatou faaleoina upu o le molimau malosi a Iosefa Samita: “Ina ua mavae le tele o molimau ua tuuina mai e uiga ia te ia, o le molimau mulimuli lenei … ma te tuuina atu e uiga ia te ia: O loo soifua o ia!” (Mataupu Faavae ma Feagaiga 76:22). E mafai ona tatou faalogo i Lona siufofoga i nei faaaliga, molimauina Lona aao i o tatou olaga, ma lagonaina ‟le olioli ua tuuina mai e lenei fuaiupu: ‘Ou iloa o Ia soifua mai!’” (Viiga, nu. 73).

Manatu mo le Aoaoina i le Aiga ma i le Lotu

O loo soifua Iesu Keriso.

O le toatele o i tatou e lei vaai ia Iesu Keriso e pei ona vaai i ai le perofeta o Iosefa Samita. Ae e mafai ona tatou iloa, e pei ona ia iloa, o loo soifua le Faaola, na te silafia o tatou manuia ma tauiviga, ma o le a Ia fesoasoani mai ia i tatou i taimi e manaomia ai. Mafaufau i lau lava molimau e uiga i le Keriso soifua a o e mafaufau loloto i fesili o loo i lalo ma suesue i punaoa o loo avatu faatasi ai.

• O ai Iesu Keriso? Aisea tatou te tapuai ai ia te Ia? (tagai i le ‟O Le Keriso Soifua: O Le Molimau a le Au Aposetolo”).

• O le a se mea ua aoao mai e le Agaga ia te a’u e uiga i aafiaga o Iosefa Samita ma isi o e na vaai i le Faaola? E faapefea ona faamalosia la’u molimau e a latou molimau? (Tagai i le Mataupu Faavae ma Feagaiga 76:11–14, 20–24; 110:1–10; Iosefa Samita—Talafaasolopito:17).

• O le a se mea ua ou aoaoina e uiga i le misiona ma le paia o le Faaola mai Ana lava upu? (tagai i le Mataupu Faavae ma Feagaiga 29:5; 38:7).

• E mafai faapefea ona fesoasoani le Faaola ia te a’u i le asō? (tagai i le Isaia 53:3–5; Eperu 2:17–18; Mosaea 3:7; Alema 7:11–13; 36:3; Eteru 12:27; Mose 5:10–12).

O le mana e sau mai le taulotoina. Sa faamalamalama mai e Elder Richard G. Scott: ‟E mafai ona oo mai le mana sili mai le taulotoina o mau. O le taulotoina o se mau o le fatuina lea o se faigauo fou. E faapei o le mauaina o se tagata fou e mafai ona fesoasoani i le taimi e manaomia ai se fesoasoani, aumai ai musumusuga ma le mafanafana, ma avea ma sosia o le faaosofia e fai le suiga manaomia” (“O le Mana o Tusitusiga Paia,” Liahona, Nov. 2011, 6). Afai e te maua se mau e uiga i le Faaola e faapitoa le taua ia te oe—atonu o se mau e mafai ona tuuina atu ia te oe le mafanafana i se taimi e manaomia ai—mafaufau e taulotoina.

I le vitiō ‟My Spiritual Goal,” ua filifili ai se tamaitai talavou e tauloto le ‟O Le Keriso Soifua” (Gospel Library). O le a se mea ua faagaeetia ai oe e uiga i lona aafiaga? O le a se mea ua musuia oe e fai e maua ai upumoni i le ‟O Le Keriso Soifua” i lou loto ma lou mafaufau?

Let Your Goals Be Guided by the Spirit

Ashley’s spiritual goal was to grow closer to Christ. So she made a plan, wrote it down, and set a completion date. Setting goals has increased Ashley’s ability to accomplish things she feels inspired to do.

Ina ia aoao atili e uiga i le ala ua faamanuiaina ai i tatou e le Faaola i aso nei, e mafai ona e suesue, faalogologo, pe usu le “Ua Ou Iloa Lo’u Faaola” (Viiga, nu. 73). E mafai ona musuia le vaavaai mo upumoni i lenei viiga o loo aoaoina foi i le Mataupu Faavae ma Feagaiga 6:34; 84:77; 98:18; 138:23.

Tagai foi i Autu ma Fesili, ‟Iesu Keriso,” Gospel Library.

Ona o Iesu Keriso, o le a ou toetu ai.

Na silafia e Iosefa Samita lagona o le faanoanoa i le maliu ai o sē pele, e aofia ai lona tamā ma ona uso e toalua. Na tanu e Iosefa ma Ema le toa ono o le la fanau, o i latou uma e itiiti ifo ma le lua tausaga le matutua. Mai faaaliga na tuuina mai e le Atua, na maua ai e Iosefa ma Ema se vaaiga e faavavau.

Vaavaai mo upumoni e uiga i le oti ma le fuafuaga e faavavau a le Atua i le Mataupu Faavae ma Feagaiga 29:26–27; 42:45–46; 63:49; 88:14–17, 27–31; 93:33–34. E faapefea e nei upumoni ona aafia ai le ala e te vaai atu ai i le oti? E mafai faapefea ona latou fa’aa’afiaina le ala o loo e ola ai?

Tagai foi 1 Korinito 15; Aoaoga a Peresitene o le Ekalesia: Iosefa Samita (2007), 174–76; Easter.ChurchofJesusChrist.org.

O Iesu Keriso na faataunuuina le “togiola atoatoa” mo a’u.

O se tasi ala e taulai ai i le Faaola i le taimi o le Eseta o le suesue lea i faaaliga o loo i le Mataupu Faavae ma Feagaiga o lo’o aoao mai e uiga i Lana taulaga togiola. O ni isi o nei faaaliga e mafai ona maua i le Mataupu Faavae ma Feagaiga 18:10–13; 19:16–19; 45:3–5; 76:69–70. Mafaufau e fai se lisi o upumoni e te maua i nei fuaiupu. Ina ia faalolotoina lau suesuega, e mafai ona e faaopoopo atu i lau lisi e ala i le suesueina o le Luka 22:39–44; 1 Ioane 1:7; 2 Nifae 2:6–9; Mosaea 3:5–13, 17–18; Moronae 10:32–33.

O nisi nei o fesili e mafai ona taiala ai lau suesuega:

• O le a le Togiola a Iesu Keriso?

• Aisea na filifili ai Iesu Keriso e puapuagatia ma maliu mo i tatou?

• O le a le mea e tatau ona ou faia ia maua ai faamanuiaga o Lana Taulaga?

• O a ni o’u lagona e uiga ia Iesu Keriso ina ua uma ona ou faitauina nei fuaiupu?

Tagai foi Taiala i Tusitusiga Paia, ‟Togiola,” Gospel Library; ‟Ua Puapuagatia le Faaola i Ketesemane” (vitiō), Gospel Library.

Ua Puapuagatia le Faaola i Ketesemane

Ua malolo atu Iesu, Peteru, Iakopo ma Ioane i le Faatoaga i Ketesemane. Ua gauai atu Iesu i le finagalo o le Tama ma amata ona tigaina mo agasala ma puapuaga o tagata. Ona faalataina ma pueina ai lea o Ia. Mataio 26:36-57

Mo nisi manatu, tagai i le lomiga o lenei masina i mekasini o le Liahona ma le Mo Le Malosi o le Autalavou .

Fautuaga mo le Aoaoina o Tamaiti

Ona o Iesu Keriso, o le a ou toetu ai.

• Ina ia aoao lau fanau e uiga i le toetu, e mafai ona e amata i le faaali atu ia i latou o ata o le maliu ma le Toetu o le Faaola. Tuu atu i lau fanau e faasoa mai mea latou te iloa e uiga i nei mea na tutupu. E mafai foi ona tou usuina se pese e pei o le ‟Pe Na Toe Soifua Moni Mai ea Iesu?” Tusipese a Tamaiti, 45).

• Mafaufau i se lesona faatino lea e mafai ona fesoasoani i lau fanau ia malamalama i le mea e tupu pe a tatou oti (e tuueseese o tatou agaga ma tino) ma pe a tatou toetutu (toe tuufaatasi o tatou agaga ma tino, ma o le a atoatoa ma ola pea o tatou tino). Mo se faʻataʻitaʻiga, o le a le mea e tupu pe a tatou aveeseina le maʻa mai se moliuila po o le vaega e i ai le mata o se peni? O le a le mea e tupu pe a toe tuufaatasia nei mea? (Tagai i le Alema 11:44–45.)

• Pe o iloa e lau fanau se tasi ua maliu? Tuu atu ia i latou e faasoa mai sina mea itiiti e uiga i nei tagata, ona faitau faatasi lea o le Mataupu Faavae ma Feagaiga 138:17. Talanoa ma le tasi ma le isi e uiga i lagona o le iloa o le a toetutu ē pele ia i tatou ma toe maua ni tino.

• Afai e i ai sau fanau matutua, e mafai ona e valaaulia i latou e vaavaai mo fasifuaitau o loo pu’eina ai le sāvali o le Eseta i fuaitau nei: Mataupu Faavae ma Feagaiga 63:49; 88:14–17, 27; 138:11, 14–17. E mafai foi ona latou faia lea lava mea e tasi i le vitiō ‟Because He Lives” (Gospel Library). E mafai faapefea ona tatou faasoa atu lenei sāvali i isi?

Na vaai le Perofeta o Iosefa Samita ia Iesu Keriso.

• Atonu tou te fiafia ma lau fanau e faitau pe tusa ma le tolu taimi eseese na faaali atu ai Iesu Keriso ia Iosefa Samita ma isi, e pei ona tusia i le Iosefa Samita—Talafaasolopito 1:14–17; Mataupu Faavae ma Feagaiga 76:11–24; 110:1–10. E mafai foi e lau fanau ona tilotilo i ata o nei mea na tutupu i le itulau o gaoioigao lenei vaiaso. O a ni mea ua tatou aoaoina e uiga ia Iesu Keriso mai nei aafiaga taitasi? Aisea ua avea ai o se faamanuiaga le iloa na vaai Iosefa Samita ma isi i le Faaola toetu?

Ona o Iesu Keriso, e mafai ona faamagaloina a’u i a’u agasala.

• O upumoni na aoaoina e Iosefa Samita e uiga i le faamagaloga e ala ia Keriso e mafai ona avatu ai i lau fanau le faamoemoe e mafai ona faamagaloina i latou i a latou mea sese ma agasala. Mafaufau e valaaulia lau fanau e fatu se siata e i ai ulutala faapenei: O mea na faia e le Faaola mo a’u ma le O mea e tatau ona ou faia e maua ai Lana faamagaloga. Fesoasoani i lau fanau e suesue se tasi o fuaitau nei e sue ai se mea e fetaui i lalo o ulutala nei: Mataupu Faavae ma Feagaiga 18:10–13; 19:16–19; 45:3–5; 58:42–43. Faasoa atu i isi lou olioli ma le agaga faafetai mo mea na faia e le Faaola mo i tatou.

• E mafai foi ona tou matamata i le vitio ‟The Shiny Bicycle” ma lau fanau (Gospel Library) ma faasoa mai ni aafiaga ina ua e lagonaina le faamagaloga a le Faaola a o e salamo.

The Shiny Bicycle

Everybody makes mistakes, and even though it's not easy, with the help of Heavenly Father and Jesus Christ we can receive forgiveness for our sins.

Mo nisi manatu, tagai i le lomiga o lenei masina o le mekasini o le Uo .

O Keriso ma Maria i le Tuugamau, saunia e Joseph Brickey