Initipene, Misuri, 1831,, saunia e Al Rounds.

2–8 Iuni: “Auai ma le Naunautai i se Faamoemoega Lelei”

Mataupu Faavae ma Feagaiga 58–59

O le taimi muamua lava na vaai ai le au toeaiina o le Ekalesia i le nofoaga o le aai o Siona—o Initipene, Misuri—sa le o le mea lea na latou faamoemoeina. Sa mafaufau nisi, o le a latou tau atu i se nuu manuia, maelega faapea ma se vaega malolosi o le Au Paia. Nai lo o lena, sa latou tau atu i se nuu maotua sa tau leai ni tagata e nonofo ai, sa le maua i ai le ituaiga olaga sa latou masani ai ma sa nofoia e ni tagata faatupu vevesi nai lo o ni tagata o le Au Paia. O le mea na alia‘e mai ai, sa le’i fetalai mai le Alii ia i latou ia tau lava o le o mai i Siona—sa finagalo o Ia latou te fausia Siona.

Pe a le tutusa o tatou faamoemoega ma le mea moni, e mafai ona tatou manatua le mea na ta’u mai e le Alii i le Au Paia i le 1831: “E lē mafai ona outou vaaia i o outou mata faalenatura, i le taimi nei, le fuafuaga a lo outou Atua … ma le mamalu e mulimuli mai pe a mavae puapuaga e tele” (Mataupu Faavae ma Feagaiga 58:3). Ioe, ua tumu le olaga i puapuaga, e faapena foi i le amioleaga, ae e mafai ona tatou “aumai le amiotonu tele; aua ua i totonu ia te i [tatou] le mana” (fuaiupu 27–28).

Tagai foi i le Au Paia, 1:127–33.

Manatu mo le Aoaoina i le Aiga ma i le Lotu

Mataupu Faavae ma Feagaiga 58: 1–5; 59:23

“A mavae puapuaga e tele ona oo mai ai lea o faamanuiaga.”

Sa faamoemoe le Au Paia e faapea, i le aluga o o latou olaga, o le a faapea ona faatupulaia ia le Itumalo o Siakisone ma avea ma Siona, o se nofoaga o le a mafai ona faapotopoto mai i ai le Au Paia uma. Peitai, o lo latou taimi i le Itumalo o Siakisone sa tumu i puapuaga. I totonu o ni nai tausaga, sa faamalosia i latou e o ese ma ‟faatalitali mo se vaitau itiiti mo le laveaiga o Siona” (Mataupu Faavae ma Feagaiga 105:9).

O le a se mea ua e aoaoina e uiga i puapuaga po o luitau mai afioga a le Alii i le Mataupu Faavae ma Feagaiga 58:1–5? Aisea e te manatu ai e faatoa oo mai nisi o faamanuiaga i le mavae ai o puapuaga? O a ni faamanuiaga ua e mauaina i le mavae ai o puapuaga?

O le a se mea ua e aoaoina mai le Mataupu Faavae ma Feagaiga 59:23 e aumaia ia te oe le faamoemoe?

Mataupu Faavae ma Feagaiga 58:26–29

E mafai ona ou “aumai ai le amiotonu tele” i lo’u “lava loto malie.”

I le avea ai ma se vaega o lau suesuega o nei fuaiupu, e mafai ona e faia se lisi o nisi o mea o loo e ‟auai ma le naunautai” i ai. Pe o ia mea uma o ni “faamoemoega lelei”? Mafaufau loloto i mea e mafai ona e faia e ‟aumai ai le amiotonu tele”—ma mafaufau e faatutu ni sini e fai.

Aisea e te manatu e finagalo ai le Alii ia tatou faia “mea e tele i lo [tatou] lava loto malie”? O le a le taunuuga pe afai e ‟faamalosia oe i mea uma”? O le a se mea ua faaopoopo e le 2 Nifae 2:27 i lou malamalama’aga o lenei mataupu faavae?

Tagai foi i le Dale G. Renlund “Ina Filifili Ia Outou i le Aso Nei,” Liahona, Nov. 2018, 104–6.

Mataupu Faavae ma Feagaiga 58:42–43

E faamagalo a‘u e le Alii pe a ou salamo.

O le folafolaga a le Alii i le Mataupu Faavae ma Feagaiga 58:42 e faamagaloina atoatoa i latou o e salamo o se mea musuia, e ui ina tulai mai ai fo’i ni fesili: O le a le uiga o le salamo? E mafai faapefea ona ou iloa pe ua ou salamo? O le mea e lelei ai, sa faaauau le fetalaiga a le Alii, ‟O le mea lenei e mafai ai ona outou iloa…” (fuaiupu 43).

O nisi nei o fesili faaopoopo e iai i tagata i nisi taimi e uiga i le salamo. O le a se mea o aoao mai e le Agaga ia te oe a o e suesue i punaoa fautuaina o loo tuuina atu i lalo?

E faapefea e le ta’uta’u atu o a’u agasala ona fesoasoani ia te a’u ia salamo? Tagai i le Salamo 32:1–5; Faataoto 28:13; Mosaea 27:34–37; Alema 39:12–13.

O loo o’u taumafai e faagalo a’u agasala, ae o loo faaauau pea ona ou faia mea sese. Pe o aoga pea lo’u salamo? Tagai i le Bradley R. Wilcox, “O Le Agavaa E Le o Le Atoatoa,” Liahona, Nov. 2021, 61–67; “Daily Restoration” (vitiō), Gospel Library.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

E mafai faapefea ona ou mautinoa ua faamagaloina a’u e le Alii? Tagai Tad R. Callister, “O Le Togiola a Iesu Keriso,” Liahona, Me 2019, 85–87, aemaise lava le vaega ua faaautuina “2. Agasala.”

E mafai ona e maua nisi malamalamaaga i “Fesili ma Tali” e uiga i le salamo i le Mo Le Malosi o le Autalavou: O Se Taiala mo le Faia o Filifiliga (itulau 8–9).

Tagai foi i Autu ma Fesili, ‟Salamo,” Gospel Library.

Mataupu Faavae ma Feagaiga 59

O ai Polly Knight?

O Polly Knight ma lana tane o Iosefa Knight Sr., o nisi ia o uluai tagata talitonu i le valaauga faaperofeta o Iosefa Samita. Sa tuuina atu e Polly ma Iosefa le lagolago taua tele i le Perofeta i le galuega o le faaliliuga o le Tusi a Mamona. Sa tuua e le aiga o le au Knight ia Colesville, Niu Ioka, ina ia faapotopoto atu ma le Au Paia i Ohaio, ma mulimuli ane, na poloaiina ai i latou e si’itia atu i le Itumalo o Siakisone, Misuri. A o latou malaga atu, sa amata ona fai ifo le ola maloloina o Polly, ae sa naunau lava o ia ia vaai i Siona a’o le’i maliu. Sa na’o ni nai aso na i ai o ia i Misuri, ae maliu loa (tagai i le Au Paia, 1:127–28, 132–33). O leMataupu Faavae ma Feagaiga 59 sa maua i le aso na maliu ai o ia, ma o le fuaiupu 1 ma le 2 e foliga mai ua faatatau tonu lava ia te ia.

Mataupu Faavae ma Feagaiga 59:4–19

O poloaiga o ni faamanuiaga.

O le a sou manatu o le a le uiga o le ia “faapaleina … i poloaiga”? (fuaiupu 4). Mafaufau pe faapefea ona faamanuiaina oe e le Alii a o e taumafai e usitai i poloaiga taitasi i fuaiupu 5–19.

Faasoa atu mea o loo e aoaoina. I le tele o tulaga, o malamalamaaga faaleagaga e te maua a o e suesue i tusitusiga paia e mafai ona faamalosia ai le faatuatua o lou aiga, uo, ma tagata o le uarota. Faasoa atu ia i latou ou aafiaga, lagona, ma le molimau ia Iesu Keriso.

Mataupu Faavae ma Feagaiga 59:9-19

O le Sapati o le aso o le Alii.

Ina ua uma ona folafola mai e faamanuia le Au Paia i Siona “ma poloaiga e lē itiiti,” sa tuuina mai e le Alii le faamamafa faapitoa i se poloaiga patino e tasi: o le poloai ia faamamalu Lona “aso paia” (Mataupu Faavae ma Feagaiga 59:4, 9). A o e suesue i le Mataupu Faavae ma Feagaiga 59:9–19, mafaufau loloto pe aisea na matuai taua ai le faamamaluina o le Sapati i nei Au Paia a o latou taumafai e fausia Siona. Aisea e taua ai ia te oe?

E mafai foi ona e mafaufau loloto pe o e faaaogaina le aso Sapati i le ala na faamoemoeina ai e le Alii? E faapefea e le tausia o le aso Sapati ia paia ona fesoasoani ia te oe e tumau ai i le “le pisia mai le lalolagi”? (fuaiupu 9). O le a se mea e mafai ona e faia e avatu ai au “tapuaiga i le Silisili Ese”? (fuaiupu 10).

Atonu e te matauina na faaaoga e le Alii upu e pei o le ‟olioli,” ‟fiafia,” ma le ‟faagaeetia” e aoao atu ai e uiga i le aso Sapati. O le a le mea e avea ai le Sapati ma mea fiafia mo oe? E faapefea ona e faamalamalama atu i se tasi le mafuaaga ua e filifili ai e faamamaluina le aso o le Alii?

O le a se mea ua e aoaoina mai le viiga “Si’i Malie Vi’iga Pa’ia” (Viiga, nu. 81) e uiga i faamoemoega ma faamanuiaga o le Sapati?

Tagai foi i le Kenese 2:2–3; Isaia 58:13–14; Russell M. Nelson, ‟O Le Sapati o se Aso Fiafia,” Liahona, Me 2015, 129–32.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Mataupu Faavae ma Feagaiga Punaoa o Talafaasolopito: Iosefa Knight le Matua.

• Initipene, Misuri

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 58:26–28

Ua tuuina mai e le Tama Faalelagi ia te a’u le mana e filifili ai.

• O le faitau faatasi o le Mataupu Faavae ma Feagaiga 58:26–28 e mafai ona tuuina atu ai ia te oe ma lau fanau se avanoa e talanoa ai e uiga i le mana ua tuuina mai e le Tama Faalelagi ia i tatou e filifili ai e fai mea lelei. Atonu e te ta’u atu i le tasi ma le isi e uiga i filifiliga eseese na e faia ma mea na tutupu o ni taunuuga. Atonu e mananao lau fanau e tusi se ata o o latou aafiaga.

• E mafai ona e tusia filifiliga i le tasi itu o se fasi pepa ma taunuuga i le isi itu ma faaaoga lenei pepa e faapupula ai o a tatou filifiliga ma o latou taunuuga e le mavavaeeseina. Atonu e mafai e lau fanau ona lisi ni nai filifiliga ma talanoa e uiga i taunuuga e aumaia e i latou. Ona mafai lea ona outou faitau faatasi le Mataupu Faavae ma Feagaiga 58:27–28 ma talanoa e uiga i filifiliga e “aumai ai le amiotonu tele” po o taunuuga lelei. E faapefea e le Tama Faalelagi ona ‟taui” pe faamanuia i tatou a o tatou taumafai e fai mea lelei? (fuaiupu 28).

Mataupu Faavae ma Feagaiga 59:7, 18–21

“Ia e faafetai atu i le Alii lou Atua i mea uma.”

• Mafaufau e faitau nei fuaiupu a o outou o atu ma lau fanau mo se savaliga pe vaai i ata o le natura, ma matau mea e ‟faafiafia ai mata ma faaolioli ai le loto” (fuaiupu 18). E mafai foi ona e matauina ni mea faapena i se pese e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). Pe e mafai foi ona e valaaulia lau fanau e tusi ni ata o mea latou te faafetai ai ma tuu atu ia i latou e ta’u atu ia te oe e uiga i a latou ata. E mafai faapefea ona faaalia lo tatou agaga faafetai mo nei mea?

Na foafoaina e le Alii le tele o mea matagofie e aumaia ia i tatou le olioli.

Mataupu Faavae ma Feagaiga 59:9–12

O le Sapati o le aso o le Alii.

• O le a se mea e mafai ona tatou faia i le Aso Sa e tapuai ai i le Alii ma maua ai le olioli? Fesoasoani i lau fanau e su’e manatu i le Mataupu Faavae ma Feagaiga 59:9–12 ma le itulau o gaoioigao lenei vaiaso. Atonu e mafai foi ona latou maua ni ata po o ni mea faitino e faatusa i mea tatou te faia i le Sapati (e pei o ata o le faamanatuga i lenei otootoga). E faapefea ona fesoasoani nei mea ia i tatou e lagona ai le latalata atu i le Tama Faalelagi ma Iesu Keriso?

Mo nisi manatu, tagai i le lomiga o lenei masina o le mekasini o le Uo .

Ata na tusia e Marti Major