Itumalo o Tavesi, Misuri

16–22 Iuni: “E Manaomia e le Alii le Loto ma le Mafaufau Malie”

Mataupu Faavae ma Feagaiga 64–66

I le aasa o le vevela ia Aokuso 1831, na malaga ai nisi o le au toeaina e toe foi atu i Katelani mai le fanua o Siona i Misuri. Sa vevela ma vaivai tagata malaga, ma sa vave ona liua feeseeseaiga i ni feupuaiga. Atonu sa foliga mai o le fausiaina o Siona, o se nuu o le alofa, lotogatasi, ma le filemu, o le a umi se taimi e faia ai.

O le mea na lelei ai, o le fausiaina o Siona—i Misuri i le 1831 po o totonu o o tatou loto, aiga, ma uarota i aso nei—e le manaomia ai ona tatou atoatoa. Nai lo o lena, na fetalai mai le Alii, “o outou ua poloaiina ia faamagalo atu.” (Mataupu Faavae ma Feagaiga 64:10). E manaomia e Ia “le loto ma le mafaufau malie” (fuaiupu 34). Ma e manaomia e Ia le onosai ma le maelega, aua o Siona e fausia i luga o le faavae o “mea iti,” e ausia e i latou o e e le “faavaivai i le faia o mea lelei” (fuaiupu 33).

Tagai foi i le Au Paia,, 1:133–34, 136–37.

Manatu mo le Aoaoina i le Aiga ma i le Lotu

Mataupu Faavae ma Feagaiga 64:1–11

“Faamagalo i le tasi.”

Mafaufau i mea nei a o e suesueina le Mataupu Faavae ma Feagaiga 64:1–11:

• Mafaufau i se taimi na faamagalo ai oe e le Alii. O a ni ou lagona?

• Pe o i ai se tasi e manaomia ona e faamagaloina? Aisea e mafai ai ona matuā faigata le faamagalo atu o isi? O le a se mea e fesoasoani ia te oe e faatoilalo ai nei faigata?

• O a upumoni e uiga i le faamagalo atu i le Mataupu Faavae ma Feagaiga 64:1–11 e foliga e taua ia te oe? Aisea e te manatu ua poloaiina ai i tatou e le Alii “ia faamagalo atu i tagata uma”? (fuaiupu 10).

Afai e te tauivi e faamagalo atu, mafaufau e suesue le sāvali a Elder Jeffrey R. Holland “O Le Galuega o le Faaleleiga” (Liahona, Nov. 2018, 77–79) po o le sāvali a Kristin M. Yee “Matagofie e Sui A’i Le Lefulefu: O Le Ala O le Faamagalo Atu” (Liahona, Nov. 2022, 36–38). O le a se mea ua e aoaoina e uiga i le ala e mafai ai e Keriso ona fesoasoani ia te oe e faamagalo atu?

O sootaga faaleaiga e mafai ona maua ai le tele o avanoa e faamagalo atu ai. Mafaufau i tagata o lou aiga. O ai e manaomia ona e faamagaloina? O faapefea ona tatou “faapuapuagatia” (fuaiupu 8) i tatou pe a tatou lē faamagalo atu i isi? E faapefea e le faamagalo atu ona aafia ai ou sootaga faaleaiga?

Tagai foi i Autu ma Fesili, ‟Faamagaloga,” Gospel Library; ‟Forgiveness: My Burden Was Made Light” (vitiō), Gospel Library.

Faamagalo Atu: Na Mama ai La’u Avega

Ina ua maliliu le ava ma nisi o le fanau a se tasi o tama i se faalavelave tau taavale, sa ia maua le faamalologa ma mafai ona faamagalo atu i le avetaavale na sala e ala i le mana o Iesu Keriso.

“E tatau ona outou faamagalo i le tasi” (Mataupu Faavae ma Feagaiga 64:9).

Mataupu Faavae ma Feagaiga 64:31–34

E manaomia mai e le Alii lo’u “loto ma se mafaufau malie.”

Na i ai ea se taimi na e lagonaina ai le “faavaivai” i le “faia o mea lelei” uma o loo e taumafai ia ausia? Vaavaai mo le sāvali a le Alii ia te oe i le Mataupu Faavae ma Feagaiga 64:31–34. O le a le mea ua finagalo le Alii e te faia ina ia aumaia ai Lana “galuega tele”?

Mafaufau i se lesona faatino e faapupula ai le fuaiupu 33—o se mea telē e fausia i ni mea iti, e pei o se ata po o se fale piliki. O a ‟mea iti” e mafai ona e faia i aso uma e ‟faataatia ai le faavae” o le galuega tele a le Atua? O a nisi o faataitaiga o le “galuega tele” ua tuuina mai e le Alii ia te oe?

Mataupu Faavae ma Feagaiga 64:31–34

“O le loto ma se mafaufau malie”

Sa faamalamalama mai e Elder Donald L. Hallstrom le uiga o le fuaitau “le loto ma se mafaufau malie’:

“O le loto o se faatusa o le alofa ma le tuuto. Tatou te faia osigataulaga ma tauave avega mo i latou tatou te alolofa i ai e le mafai lava ona tatou onosaia mo soo se isi lava mafuaaga. Afai e leai se alofa, e le aoga lo tatou tuuto. …

“O le i ai ‘o se mafaufau malie’ o lona uiga o le tuuina atu o la tatou taumafaiga sili ma mafaufauga aupito lelei ma le sailia o le poto o le Atua. E ta’u mai ai o la tatou suesuega aupito tuuto i le olaga e tatau ona [taulai] i mea e faavavau le natura. O lona uiga e tatau ona i ai se sootaga e matuai mausali lava i le va o le faalogo i le afioga a le Atua ma le usitai i ai” (“O Le Loto ma le Mafaufau Malie,” Ensign, Iuni 2011, 31–32).

Mataupu Faavae ma Feagaiga 64:41–43

O Siona o le a avea “o se tagavai i le nuu.”

O se tagavai o “se fu‘a po o se anavatau e faapotopoto ai tagata i se lotogatasi i se faamoemoe po o se faasinomaga” (Taiala i Tusitusiga Paia, “Tagavai,” Gospel Library). Ua faapefea ona avea Siona—po o le Ekalesia a le Alii—o se tagavai ia te oe? Mafaufau i isi faataitaiga nei o mea e sisi i luga, e pei o se tagavai, e faamanuia ai tagata: Numera 21:6–9; Mataio 5:14–16; Alema 46:11–20. Vaavaai mo nisi auala o loo faamatala mai ai e le Alii ia Siona i le Mataupu Faavae ma Feagaiga 64:41–43.

Tagai foi i le “Siona e le Nu’u Lelei,” Viiga, nu. 22.

Mataupu Faavae ma Feagaiga 65

Ua saunia e le malo o le Atua i le fogaeleele le lalolagi mo le toe foi mai o le Faaola.

Ua tuuina mai e leMataupu Faavae ma Feagaiga 65 se faamatalaga musuia o le misiona a le Ekalesia a le Alii i aso e gata ai. Mafaufau e suesue le vaega lenei, ma vaavaai mo tali i fesili e pei o nei: O le a le mea e finagalo le Alii i Lona malo e faataunuu i le lalolagi? O le a se mea e finagalo o Ia ia ou faia e fesoasoani ai?

Tagai foi i le ‟Prepare Today for the Second Coming” (vitiō), ChurchofJesusChrist.org.

Prepare Today for the Second Coming

(Joseph Smith—Matthew 1:46–54; Matthew 24:42–51) An excerpt from “Preparation for the Second Coming,” Ensign or Liahona, May 2004, 8–9.

Mataupu Faavae ma Feagaiga 66

E silafia e le Alii manatu o lo’u loto.

I se taimi e le’i leva talu ona auai i le Ekalesia, sa talosaga atu ai Viliamu E. McLellin ia Iosefa Samita e faaali mai le finagalo o le Alii mo ia. Sa le’i iloa e Iosefa, ae sa i ai ni fesili patino se lima a Viliamu lea sa ia faamoemoe o le a tali mai e le Alii e ala i Lana Perofeta. Tatou te le iloa po o a fesili a Viliamu, ae ua tatou iloa, o le faaaliga lea na faatatau atu ia te ia, lea ua avea nei ma Mataupu Faavae ma Feagaiga 66, na taliina “uma ai ma le faamalieina atoatoa” ia fesili taitasi a Viliamu” (“William McLellin’s Five Questions,” i le Revelations in Context,, 138).

A o e faitau i le vaega e 66, mafaufau i mea na silafia e le Alii e uiga ia Viliamu McLellin ma atugaluga ma faamoemoega o lona loto. E faapefea ona faaalia atu e le Alii ia te oe Na te silafia oe? A o i ai sou faamanuiaga faapeteriaka, mafaufau e suesue i ai. A o e faia, o le a se mea e fesoasoani le Agaga Paia ia e malamalama ai e uiga i le finagalo o le Atua mo oe?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Faatoaga a Isaako ma Lusi Morley

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 64:7–10

E finagalo Iesu Keriso ia ou faamagalo i tagata uma.

Manatua: A o e aoaoina lau fanau e uiga i le poloaiga a le Alii ‟ia faamagalo atu i tagata uma,” atonu e te manao e faamanino atu o le faamagalo atu e le faapea o le faatagaina lea o tagata e faatiga ia i tatou. Faamalosiau ia i latou e ta’u atu i se tagata matua faatuatuaina pe afai e faatiga se tasi ia i latou pe pa’i atu ia i latou ma le lē talafeagai.

• A uma ona faitau faatasi ma lau fanau le Mataupu Faavae ma Feagaiga 64:10 , talanoa ma i latou po o le a le uiga o le faamagalo atu i se tasi. E mafai ona e faasoa atu ni nai faataitaiga faigofie. Atonu e mafai ona latou faatino nei faataitaiga e faataitai ai le faamagalo atu.

• E mafai ona e fai atu i lau fanau e fuafua pe faapefea ona latou aoao atu se tasi—e pei o se tei laitiiti—e uiga i le faamagalo atu i isi. Fesoasoani ia i latou e su’e fuaitau i le Mataupu Faavae ma Feagaiga 64:7–10 e mafai ona latou faaaogaina a o latou aoao atu.

• Usu se pese e faatatau i le faamagaloga, e pei o le “Fesoasoani Mai Ia Te A‘u Tama Pele” (Tusipese a Tamaiti,, 52). O le a se mea o aoao mai e lenei pese ia i tatou e uiga i le faamagalo atu o isi?

Mataupu Faavae ma Feagaiga 64:33

O le ‟galuega tele” a le Atua ua fausia i ‟mea iti.”

• E mafai ona e faaali atu i lau fanau ni mea e fausia mai i ni vaega laiti, e pei o se paso po o se solovae. Ona outou faitau faatasi lea o le Mataupu Faavae ma Feagaiga 64:33. O le a le ‟galuega tele” a le Atua? O a “mea iti” e mafai ona tatou faia o le a fesoasoani?

Mataupu Faavae ma Feagaiga 64:34

E mafai ona ou mulimuli ia Iesu ma lo’u loto ma lo’u mafaufau.

• A o e faitau atu i lau fanau mai le Mataupu Faavae ma Feagaiga 64:34, e mafai ona e faasino atu i lou fatu ma lou ulu a o e faitauina le “loto” ma le “mafaufau,” ma valaaulia tamaiti e fai faatasi ma oe. E mafai faapefea ona tatou tuuina atu o tatou loto (manaoga) ma mafaufau (mafaufauga) i le Faaola?

Faamamafa atu le faataitaiga a Iesu Keriso. Mafaufau pe mafai faapefea ona e faamamafaina le faataitaiga a le Faaola pe a e suesue pe aoao atu. Mo se faataitaiga, pe a aoao atu e uiga i le Mataupu Faavae ma Feagaiga 64:34, e mafai ona e talanoa ma lau fanau e uiga i le ala na tuu atu ai e le Faaola Lona loto (manaoga) ma le mafaufau (mafaufauga) i Lona Tama oi le Lagi. (Tagai i le Aoao Atu i le Ala a le Faaola, 6.)

Mataupu Faavae ma Feagaiga 66

E silafia a’u e le Alii ma e alofa ia te a’u.

• Fesoasoani i lau fanau ia malamalama o Viliamu E. McLellin e lima ana fesili sa iai mo le Alii. Na maua e Iosefa Samita tali i nei fesili i se faaaliga e ui na te lei iloa po o a fesili a Viliamu. Ta’u atu i lau fanau e uiga i se taimi na faaali atu ai e le Alii ia te oe le mea na Ia finagalo e te faia, ma talanoa e uiga i faamanuiaga na oo mai i le mulimuli i Lana taitaiga. Ona mafai lea ona outou faitau faatasi le Mataupu Faavae ma Feagaiga 66:4 ma valaaulia lau fanau e saili ni avanoa e malamalama ai i mea e finagalo le Alii latou te faia.

  

  Auiliiliga mai le O Le Afio Mai Faalua, saunia e Kevin Keele

Mataupu Faavae ma Feagaiga 65

E mafai ona ou fesoasoani e tapena le lalolagi e talia Iesu Keriso.

• A o tilotilo lau fanau i se ata o le Afio Mai Faalua o le Faaola, fai atu ia i latou e faamatala mai mea latou te vaai i ai po o mea ua latou iloa e uiga i lenei mea na tupu. E mafai foi ona e tuu atu i lau fanau upu ma fasifuaitau e uiga i le Afio Mai Faalua e su’e i le Mataupu Faavae ma Feagaiga 65. O a mea o aoao mai e nei upu ma fasifuaitau ia i tatou? E mafai faapefea ona tatou saunia mo le toe afio mai o le Faaola?

Mo nisi manatu, tagai i le lomiga o lenei masina o le mekasini o le Uo .

Faamagaloina, saunia e Greg Olsen