Lokasa Elili uta Bozongisi ya Bonganganzambe ya Melekisedeke, by Liz Lemon Swindle

Sanza ya Nsambo 28–Sanza ya Mwambe 3: “Nguya ya Bonzambe”

Malongi mpe Mayokani 84

Uta bonganganzambe ezongisamaki na 1829, Basantu ba mikolo mya Nsuka bapambolami na nguya wana ya bule. Babatisamaki, bakulisamaki nkotisa, mpe babiangemaki kosalela Nzambe na likoki ya bonganganzambe, mingi lokola tosalaka lelo. Kasi koyingela na nguya ya bonganganzambe ezali eloko se moko te lokola kososola yango mobimba, mpe Nzambe azalaki na mingi oyo Alingaki Basantu na Ye basosola—mingimingi na boyei ya bozongisi ya makuli ya tempelo. Emoniseli ya 1832 oyo etali bonganganzambe, sikawa Malongi mpe Mayokani 84, efungoli limoni ya Basantu mpo na oyo bonganganzambe yango ezali mpenza. Mpe ekoki kosala lolenge moko mpo na biso lelo. Nsima ya nyonso, ezali na ebele ya koyekola oyo etali nguya ya bonzambe oyo esimbi “fungola ya boyebi ya Nzambe,” oyo emonisaka “nguya ya bonzambe,” mpe oyo elengelaka biso “tomona elongi ya Nzambe, kutu Tata, mpe kozala na bomoi” (milongo 19–22).

Makanisi mpo na koteya na Ndako mpe na Eklezia

Malongi mpe Mayokani 84:17–32

Nazali na nzela ya koyingela na nguya ya bonganganzambe ya Nzambe mpe mapamboli.

Ntango okanisi na ntina ya liloba bonganganzambe, nini eyelaka yo na makanisi? Lolenge nini nguya ya bonganganzambe ya Nzambe esimbi bomoi na yo?

Nsima ya komanyolaka mituna oyo, okoki koyekola Malongi mpe Mayokani 84:17–32, 17–28, kolukaka nini Nkolo alingi yo oyeba oyo etali nguya ya bonganganzambe na Ye. Tala lolenge nini okoki kosalela milongo oyo mpo na kolimbola bonganganzambe mpe bantina na yango epayi ya moto moko.

Eloko moko okomona ezali ete na nzela ya makuli ya bonganganzambe “nguya ya bonzambe ezali komonana.” (tala milongo 19–21). Ntango mosusu okoki kosala molongo ya makuli ya bonganganzambe oyo okotaki na (milongo na Bxuku Monene ya Malako, 18.1, 18.2, ekoki kosalisa). Lolenge nini makuli yango—mpe mayokani ekangami na yango—ememaki nguya ya Nzambe na bomoi na bino? Lolenge nini bomoi na yo ekozala na bozangi yango?

Mokambi Russell M. Nelson ateyaki, “Mwasi mpe mobali nyonso oyo asalaka mayokani na Nzambe mpe abatelaka mayokani oyo, mpe oyo akotaka na bolongobani na makuli ya bonganganzambe, azali na bokoti ya mbala moko na nguya ya Nzambe.”(“Spiritual Treasures [Bomengo ya Molimo],” Liahona, Sanza ya zomi na moko 2019, 77). Kanisa kotanga maloba ya Mokambi Nelson, talaka lolenge nini okoki “kotia nguya ya Mobikisi na kati ya bomoi [na yo].”

Tala lisusu Malongi mpe Mayokani 25:10, 13, 15; 121:34–37, 41–46; Topics and Questions, “Priesthood [Bonganganzambe],” “Joseph Smith’s Teachings about Priesthood, Temples, and Women [Mateya ya Joseph Smith oyo etali Bonganganzambe, Batempelo, mpe Basi],” Gospel Library; General Handbook [Buku Monene ya Malako], 3.6, Gospel Library.

Malongi mpe Mayokani 84:19–20;

Bonganganzambe ezuami elongo na ndai mpe liyokani.

Ndai mpe liyokani ya bonganganzambe (tala Malongi mpe Mayokani 84:31–44) esalamaka na bokeseni mpo na bana mibali ya Tata ya Lola oyo bakulisami na mosala moko ya bonganganzambe, kasi ebele ya mapamboli elakama na milongo yango ebongisami mpo na bana nyonso ya Nzambe. Bilako yango ezali nini, mpe nini Nzambe asengi biso tosala mpo na koyamba yango?

Mpaka Paul B. Pieper ateyaki: “ezali esengo koyeba ete na ndai mpe liyokani ya bonganganzambe [tala Malongi mpe Mayokani 84:31–42], Nkolo asaleli maloba kozwa mpe koyamba. Asaleli te liloba kokulisa.. Ezali na kati ya tempelo nde mibali mpe basi—banso elongo—bazwaka mpe bayambaka mapamboli mpe nguya ya nyonso mibale ya Bonganganzambe ya Alona mpe ya Melekisedeke” (“Revealed Realities of Mortality [Kobimisa Polele Babosolo ya Bokufi],” Ensign, Sanza ya yambo. 2016, 21).

Ntango ozali koyekola Malongi mpe Mayokani 84:31–44, manyola nini ekoki kolinga koloba “kozwa” mpe “koyamba bonganganzambe. Lolenge nini yango ekeseni na kozalaka ya kobulisama na mosala ya bonganganzambe? Eloko nini lisusu Nkolo abengi yo ozwa na milongo oyo? Lolenge nini osalelaka yango?

Omoni nini oyo efuli yo ozala sembo koleka na koyambaka Mobikisi, Tata na Ye, Basali na Ye, mpe nguya ya bonganganzambe na Ye?

Tala lisusu Malongi mpe Mayokani 121:36–46.

Malongi mpe Mayokani 84:43–61

Kobikaka na nzela ya liloba ya Nzambe ememaka pole mpe bosolo kati na bomoi na ngai.

Bosolo nini ozwi kati na Malongi mpe Mayokani 84:43–61 oyo esalisi yo ososola mpo na nini osengeli koyekola mpenza liloba ya Nzambe? Koma bokeseni katikati ya pole mpe molili na kati ya milongo oyo; lolenge nini “molende na yo ya kotia bokebi na maloba ya bomoi ya seko” ememi pole, bosolo, mpe “Molimo ya Yesu Klisto” na bomoi na yo? (milongo 43, 45).

Tala lisusu 2 Nefi 32:3.

Kokanisa mabongisi ya nsango malamu na biloko emesana. Okoki kokanisa kokokana oyo ekoki kolimbola babosolo na milongo 43–44? Mpo na ndakisa, lolenge nini ezali kolandaka bitape ya kolamba lokola kobikaka “na nzela ya liloba nyonso … ya Nzambe”?

“Pesa boyoki makasi maloba ya bomoi ya seko.”

Malongi mpe Mayokani 84:62–91

Nkolo akozala elongo na ngai ntango nazali kati ya mosala na Ye.

Ntango ozali kotanga milongo oyo, okoki komona ndeenge Nkolo alobaki Akosunga basali na Ye. Lolenge nini bilaka yango etiami na mosala oyo Ye asengi yo osala? Ndakisa, lolenge nini bilaka kati na molongo 88 ekokisamaki na bomoi na yo?

Malongi mpe Mayokani 84:106–110

Moto nyonso akoki kosangana na mosala ya Nzambe.

Nini toyekoli uta na milongo oyo etali lolenge nini Nkolo akokisaka mosala na Ye? Toli mpe mapamboli nini ozwi? Okoki lisusu kokanisa na oyo etali lolenge nini yo “olendisamaki na bopete nyonso” mpo ete osalaki elongo na moto moko oyo azalaki “makasi na Molimo,” kosangisaka bato kati na libota na yo.

Mpo na makanisi mingi koleka, tala nsango ya sanza oyo na bamagazini ya Liahona mpe Mpo na Bokasi ya Bilenge .

Makanisi mpo na Koteya Bana

Malongi mpe Mayokani 84:4–5

Makuli ya tempelo ezali kosalisa ngai namilengela mpo na kobika elongo na Tata ya Lola lisusu.

• Mpo na kosalisa bana na bino bamilengela na lombango mpo na kokende na tempelo, bokoki kokela lisano ya bilili uta na bilili ya tempelo. Na nsima ya eteni moko na moko, bokoki kokoma eloko moko tosalaka na tempelo, lokola kobatisama mpo na bakoko, kokangisama na mabota, mpe kosalaka mayokani elongo Nzambe. Botanga Malongi mpe Mayokani 84:4–5 na bana na bino mpe bosenga bango bayoka nini Nkolo atindaki Basantu batonga. Ntango bino na bana na bino bozali kosala lisano ya bilili elongo , kabola elongo na moko na mosusu biloko mosusu tokoki kosala mpo na komilengela mpo na kokota na tempelo.

Malongi mpe Mayokani 84:19–22;

Nakoki koyamba nguya ya Tata ya Lola na nzela ya makuli ya bonganganzambe.

• Mpo na kosalisa bana na bino basosola makuli ezali nini, konisa kotala bililingi ya makuli ya bonganganzambe ebele elongo na bango, lokola Gospel Art Book, nos. 103–8, to ya poso oyo activity page [lokasa ya molulu]. Bosenga bango balimbola maye mazali kosalama na elilingi moko na moko. Bokoki kotanga nsima elongo na bango Malongi mpe Mayokani 84:19–22. Nini Tata na Lola alingi biso toyamba na makuli yango? Boyebisa bana na bino lolenge nini oyokaki nguya ya Nzambe mpo na makuli oyambaki mpe mayokani osalaki. (botala lisusu “Priesthood Power, Authority, and Keys [ Nguya ya Bonganganzambe, Likoki, mpe Bafungola]” na appendix A to appendix B.)

Malongi mpe Mayokani 84:77

Nazali moninga ya Yesu ntango nazali kolanda Ye.

• Nsima ya kotangaka Malongi mpe Mayokani 84:77 elongo, botuna bana na bino oyo etali nini elakisi kozala moninga. Bokoki kolobela na oyo etali baninga malamu oyo ozuaki. Lolenge nini Yesu alakisi biso ete Ye alingi biso tozala baninga na Ye? Lolenge nini tokoki kolakisa ete biso mpe tolingi yango? Nzembo lokola “I’m Trying to Be like Jesu [Nazali Komeka Kozala lokola Yesu]” (Children’s Songbook78–79) ekoki kosalisa na lisolo yango.

Malongi mpe Mayokani 84:88.

Tata ya Lola asungaka basali na Ye.

• Bana na bino bakoki kosepela koyoka oyo etali lolenge nini bamisionele basalisaki bino, libota na bino, to bankoko na bino mpo na koyamba nsango malamu. Nsima bokoki kotanga na oyo etali elaka ekesena Nkolo asalaki na bamisionele na Malongi mpe Mayojani 84:88. Ntango mosusu bana na bino bakoki kokanisa misala moko oyo etamboli elongo na milongo yango. Bokanisa kokabola oyo etali ngonga moko ntango bozalaki kosalela Nkolo mpe ete Azalaki elongo na bino, lokola elobelami na molongo 88. Bokoki lisusu kosalisa bana na bino bakanisa ndenge nini bango bakoki kozala bamisionele sikawa. Botatola ete Tata ya Lola asungaka biso mpo na koyeba nini koloba ntango tosololi elongo na basusu na oyo etali Yesu Klisto.

Mpo na makanisi mingi, tala nsango ya sanza oyo na magazini ya Moninga .

Tempelo ya Roma na Italie