Tuha’a nō The Restoration of the Melchizedek Priesthood [Te Fa’aho’i-fa’ahou-ra’a-hia mai te Autahu’ara’a a Melehizedeka], nā Liz Lemon Swindle

28 nō Tiurai–3 nō ’Ātete : « Te mana nō te huru Atua »

Te Ha’api’ira’a Tumu ’e te mau Fafaura’a 84

Mai te taime ’a fa’aho’ihia mai ai te autahu’ara’a i te matahiti 1829, ’ua ha’amaita’ihia te feiā mo’a mātamua nā roto i te mana mo’a o te Fatu. ’Ua bāpetizohia rātou, ha’amauhia, ’e ’ua pi’ihia ’ia tāvini nā roto i te mana autahu’ara’a, mai ia tātou i teie mahana. Terā rā, te fāna’ora’a i te mana autahu’ara’a e ’ere ïa hō’ē ā huru i te māramarama-hope-ra’a i te reira, ’e tē vai atu ra te mau mea tā te Atua i hina’aro ’ia ’ite tāna feiā mo’a—i ni’a iho ā rā i te fa’aho’ira’a mai o te mau ’ōro’a o te hiero. Nā te heheura’a nō te matahiti 1832 i ni’a i te autahu’ara’a, tei parauhia i teienei Te Ha’api’ira’a Tumu ʼe te mau Fafaura’a 84, i fa’a’ite mai i te feiā mo’a e aha mau te autahu’ara’a. ’E e nehenehe ato’a te reira e tupu i ni’a ia tātou i teie mahana. Inaha ho’i, e rave rahi mea e tītauhia ia tātou e ha’api’i i ni’a i te mana hanahana e mau nei « te tāviri nō te ’ite i te Atua », ’o te ha’apāpū nei i « te mana nō te huru Atua », ’e ’o tē fa’aineine ia tātou « ’ia hi’o i te mata o te Atua, ’oia o te Metua, ’e ’a ora noa ai » (mau ’īrava 19–22).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 84:17-32

E roa’a iā’u te mana o te autahu’ara’a ’e te mau ha’amaita’ira’a a te Atua.

’Ia feruri ana’e ’outou i te ta’o ra autahu’ara’a,e aha te mana’o e puta mai i roto i tō ’outou ferurira’a ? Nāhea te mana autahu’ara’a a te Atua i te ha’amaita’i i tō ’oe orara’a ?

I muri mai i te ferurira’a i teie mau uira’a, ’a tuatāpapa i Te Ha’api’ira’a Tumu ʼe te mau Fafaura’a 84:17–32,e ’a feruri i te mea tā te Atua e hina’aro ’ia ’ite ’outou i ni’a i tōna mana autahu’ara’a. ’A feruri nāhea ’outou e fa’a’ohipa i teie mau ’īrava nō te fa’ata’a i te autahu’ara’a ’e tāna mau ’ōpuara’a i te vetahi ta’ata.

Hō’ē mea tā ’outou e ’ite, ’oia ho’i, nā roto i te mau ’ōro’a o te autahu’ara’a « te mana nō te huru Atua e fa’a’itehia mai » (hi’o i te mau ’īrava 19–21). Pēnei a’e e nehenehe ’outou e tāpura i te mau ’ōro’a o te autahu’ara’a tā ’outou i ’āmui atu (e nehenehe te mau tāpura i roto i te Buka arata’i rahi, 18.1, 18.2, e tauturu mai). Nāhea teie mau ’ōro’a—’e teie mau fafaura’a i tū’ati ai—tei fa’atae mai i te mana o te Atua i roto i tō ’outou orara’a ? E aha te huru o tō ’outou orara’a ’āhani ’aita te reira ?

’Ua ha’api’i te peresideni Russell M. Nelson ia tātou, « te mau vahine ato’a ’e te mau tāne ato’a te rave i te mau fafaura’a ’e te Atua, ma te ha’apa’o i te reira ’e ma te ’āmui ti’amā i roto i te mau ’ōro’a o te autahu’ara’a, e fāri’i ’āfaro rātou i te mana o te Atua » (« Te mau tao’a pae vārua », Liahona, Novema 2019, 77). ’A feruri i te tuatāpapa i te parau poro’i a te peresideni Nelson, ma te imi i te mau rāve’a e nehenehe ai ’outou e « huti mai i te mana o te Fa’aora i roto i tō ’outou orara’a. »

Hi’o ato’a Te Ha’api’ira’a Tumu ’e te mau Fafaura’a 25:10, 13, 15 ; 121:34–37, 41–46 ; Topics and Questions, « Priesthood [Te autahu’ara’a] », « Joseph Smith’s Teachings about Priesthood, Temples, and Women [Te mau ha’api’ira’a a Iosepha Semita nō ni’a i te autahu’ara’a, te mau hiero ’e te mau vahine] », Vaira’a buka ’evanelia ; Buka arata’i rahi, 3.6, Vaira’a buka ’evanelia.

Te Ha’api’ira’a Tumu ’e te mau Fafaura’a 84:31-44

E roa’a te autahu’ara’a nā roto i te euhera’a ’e te fafaura’a.

E fa’a’ohipara’a ta’a ’ē te euhera’a ’e te fafaura’a o te autahu’ara’a (hi’o Te Ha’api’ira’a Tumu ’e te mau Fafaura’a 84:31–44) nō te mau tamaiti a te Metua i te ao ra tei fa’atōro’ahia i roto i te ti’ara’a ’ōfitiē nō te autahu’ara’a, teie rā, e rave rahi ha’amaita’ira’a i fafauhia i roto i teie mau ’īrava e roa’a īa i te mau tamari’i pā’āto’a a te Atua. E aha teie mau fafaura’a, ’e e aha tā te Atua e ani mai nei ia tātou ’ia rave nō te fāri’i i te reira ?

’Ua ha’api’i ’o Elder Paul B. Pieper : « E mea fa’ahiahia i te mea ē, i roto i te tapura’a ’e te fafaura’a o te autahu’ara’a [hi’o Te Ha’api’ira’a Tumu ʼe te mau Fafaura’a 84:31–42], ’ua fa’a’ohipa te Fatu i te mau ta’o ra noa’a ’e fāri’i. ’Aita ’oia i fa’a’ohipa i te ta’o fa’atōro’a. Tei roto i te hiero te mau tāne ’e te mau vahine e noa’a ai, ’e e fāri’i—ma te ’āmui—i te mau ha’amaita’ira’a ’e te mana nō te autahu’ara’a a Aarona ’e a Melehizedeka » (« Revealed Realities of Mortality », Ensign, Tēnuare 2016, 21).

’A tuatāpapa ai ’outou i Te Ha’api’ira’a Tumu ’e te mau Fafaura’a 84:31–44, ’a feruri e aha te aura’a te parau « noa’a » ’e « fāri’i » i te autahu’ara’a. E aha te ta’a-’ē-ra’a ’e te fa’atōro’ara’a i te tahi tōro’a o te autahu’ara’a ? E aha atu ā tā te Fatu e ani nei ia ’outou ’ia fāri’i i roto i teie mau ’īrava ? E nahea orua i te rave ?

E aha tā ’outou e ’ite nei ’o tē fa’auru ia ’outou ’ia ha’apa’o maita’i roa atu ’outou i roto i te fāri’ira’a i te Fa’aora, tōna Metua, tāna mau tāvini, ’e tōna mana autahu’ara’a ?

Hi’o ato’a Te Ha’api’ira’a Tumu ’e te mau Fafaura’a 121:36–46.

Te Ha’api’ira’a Tumu ʼe te mau Fafaura’a 84:43-61

Nā roto i te orara’a i te parau a te Atua e hōpoi mai te reira i te māramarama ’e te parau mau i roto i tō’u orara’a.

E aha te parau mau tei noa’a mai ia ’outou i roto i Te Ha’api’ira’a Tumu ʼe te mau Fafaura’a 84:43–61 tei tauturu ia ’outou ’ia māramarama nō te aha i tītauhia ai ia ’outou ’ia tai’o tāmau noa i te parau a te Atua ? ’A hi’o na i te ta’a-’ē-ra’a i rotopū i te māramarama ’e te pōiri i roto i teie mau ’īrava ; ’ua nāhea tō ’outou « ha’apa’o māite i te mau parau nō te ora mure ’ore » i te ’āfa’ira’a mai i te māramarama, te parau mau ’e « te Vārua o Iesu Mesia » i roto i tō ’outou orara’a ? (mau ’īrava 43, 45).

’A hi’o ato’a 2 Nephi 32:3.

Fa’aau i te mau parau tumu o te ’evanelia i te mau mea mātauhia. E ti’a ānei ia ’outou ’ia feruri i te tahi fa’ahōho’ara’a ’o tē fa’ahōho’a i te mau parau mau i roto i te mau ’īrava 43–44 ? ’Ei hi’ora’a, nō te aha e nehenehe ai e fa’aau i te pe’era’a i te mau ta’ahira’a ato’a o te hō’ē tāpura fa’aineine mā’a, i te orara’a « nā roto i te mau parau ato’a […] o te Atua » ?

« ’Ia ha’apa’o māite i te mau parau nō te ora mure ’ore. »

Te Ha’api’ira’a Tumu ’e te mau Fafaura’a 84:62–91

E parahi noa te Fatu iā’u nei ’ia rave ana’e au i tāna ’ohipa.

’Ia tai’o ana’e ’outou i teie mau ’īrava, e nehenehe ’outou e hiro’a i te mau rāve’a tā te Fatu i parau ē, e pāturu ’oia i tāna mau tāvini. Nāhea teie mau parau fafau e tano ai i te ’ohipa tāna i ani mai ia ’outou ’ia rave ? ’Ei hi’ora’a, nāhea te mau fafaura’a i roto i te ’īrava 88 i te tupura’a i roto i tō ’outou orara’a ?

Te Ha’api’ira’a Tumu ’e te mau Fafaura’a 84:106–110

E nehenehe te mau ta’ata ato’a e tauturu i te ’ohipa a te Atua.

E aha tā ’outou i ’apo mai roto mai i teie mau ’īrava e mea nahea te Fatu i te fa’atupura’a i tāna ’ohipa ? E aha te mau ha’api’ira’a ’e te mau ha’amaita’ira’a tei ’itehia e ’outou ? E nehenehe ato’a ’outou e feruri e ’ua nāhea ’outou i te « ha’amaita’ihia i roto i te marū rahi » nō te mea ’ua tāvini ’outou i te ta’ata « pūai i te Vārua », tae noa atu i te mau ta’ata i roto i tō ’outou ’utuāfare.

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 84:4–5

E tauturu te mau ’ōro’a hiero iā’u nō te fa’aineine ia’u i te ora fa’ahou i pīha’i iho i te Metua i te ao ra.

• Nō te tauturu i tā ’outou mau tamari’i ’ia hi’o ātea nō te haere atu i te hiero, e nehenehe ’outou e hāmani i te tahi hōho’a piriapu nō te hiero. I muri i te tua tāta’itahi, e nehenehe ’outou e pāpa’i i te tahi mea tā tātou e rave i roto i te hiero, mai, ia bāpetizohia nō te mau tupuna, ’ia tā’atihia i tō tātou ’utuāfare, ’e te ravera’a i te mau fafaura’a e te Atua. ’A tai’o ’e te mau tamari’i i Te Ha’api’ira’a Tumu ’e te mau Fafaura’a 84:4–5 e ’a ani ia rātou ’ia fa’aro’o e aha tā te Fatu i fa’aue i te feiā mo’a ’ia patu. ’A tu’u ’āmui ai ’outou ’e tā ’outou mau tamari’i i te piriapu, ’a fa’a’ite te tahi i te tahi i te mau mea tā tātou e nehenehe e rave nō te fa’aineine nō te tomo i roto i te hiero.

Te Ha’api’ira’a Tumu ’e te mau Fafaura’a 84:19–22

E nehenehe tā’u e fāri’i i te mana o te Metua i te ao ra nā roto i te mau ’ōro’a o te autahu’ara’a.

• Nō te tauturu i tā ’outou mau tamari’i ’ia māramarama e aha te hō’ē ’ōro’a, e nehenehe e hi’o i te mau hōho’a o te mau ’ōro’a o te autahu’ara’a e rave rahi e o rātou, mai te Buka hōho’a o te ’evanelia, nūmera 103–8, ’e aore rā te ’api fa’a’ana’anataera’a nō teie hepetoma. ’E ani i te mau tamari’i ’ia fa’ata’a mai e aha te mea e tupu ra i roto i te hōho’a tāta’itahi. I muri iho e nehenehe ’outou e tai’o ’āmui i Te Ha’api’ira’a Tumu ’e te mau Fafaura’a 84:19–22. Nō te aha tō tātou Metua i te ao ra e hinaʼaro nei ʼia tātou ’ia fa’ari’i i teie mau ’ōro’a ? ’A parau i tā ’outou mau tamari’i e mea nāhea tō ’outou nīorara’a i te mana o te Atua nō te mau ’ōro’a tā ’outou i fāri’i ’e te mau fafaura’a tā ’outou i rave. (Hi’o ato’a « Te mana o te autahu’ara’a, te mana ’e te mau tāviri » i roto i te parau hi’u A ’e ’aore rā parau hi’u B.)

Te Ha’api’ira’a Tumu ’e te mau Fafaura’a 84:77

E hoa vau nō Iesu ’ia pe’e ana’e au iāna.

• I muri a’e i te tai’o-’āmui-ra’a i Te Ha’api’ira’a Tumu ’e te mau Fafaura’a 84:77 ’a ani i tā ’outou mau tamari’i e aha te aura’a ’ia riro ’ei hoa. E nehenehe ’outou e paraparau i ni’a i tō ’outou mau hoa maitata’i. Nāhea Iesu i te fa’a’ite mai ia tātou ē, tē hina’aro nei ’oia ia tātou ’ia riro ’ei hoa nōna ? Nāhea tātou e fa’a’ite ai ē, tē hina’aro ato’a nei tātou i te reira ? E hōro’a mai te tahi hīmene mai ia « Jésus Christ est mon modèle » (Chants pour les enfants, 40–41) i te tahi mau mana’o tauturu.

Te Ha’api’ira’a Tumu ’e te mau Fafaura’a 84:88

E tauturu te Metua i te ao ra i tāna mau misiōnare.

• E au paha tā ’outou mau tamari’i ’ia fa’aro’o e mea nāhea te mau misiōnare i te tauturura’a ia ’outou, tō ’outou ’utuāfare, ’e ’aore rā tō ’outou mau tupuna ’ia fāri’i i te ’evanelia. I muri iho e nehenehe ’outou e tai’o i ni’a i te tahi fafaura’a ta’a ’ē tā te Fatu i rave i te mau misiōnare i roto i Te Ha’api’ira’a Tumu ’e te mau Fafaura’a 84:88. Pēnei a’e e nehenehe tā ’outou mau tamari’i e feruri i te mau ’ohipa te au i teie ’īrava. ’A parau i ni’a i te tahi taime a tāvini ai ’oe i te Fatu ’e ’ua nīoa ’oe ē, tei pīha’i iho ’oia ia ’oe, mai tei fa’ata’ahia i roto i te ’īrava 88. E tauturu i tā ’outou mau tamari’i ’ia feruri i te mau rāve’a e nehenehe ai rātou e riro ’ei misiōnare i teienei. ’A fa’a’ite pāpū ē, e tauturu te Metua i te ao ra ia tātou ’ia ’ite e aha te parau ’ia paraparau ana’e tātou ’ia vetahi ’ē i ni’a i te ’evanelia.

Nō te tahi atu ā mana’o, ’a hi’o i te ve’a Hoa nō teie ’āva’e.

Hiero nō Roma (’Ītāria)