E fa’atupuhia te ha’api’ira’a a te mau peropheta i roto i teie piha.

11–17 nō ’Ātete : « ’A fa’ati’a i te hō’ē fare […] ’ei fare ho’i nō te Atua »

Te Ha’api’ira’a Tumu ’e te mau Fafaura’a 88

I terā ’e terā taime, e hōro’a mai te Fatu ia tātou i te hō’ē hi’ora’a nō « tōna ra hanahana ’e tōna ra mana » ’ōti’a ’ore (Te Ha’api’ira’a Tumu ’e te mau Fafaura’a 88:47) nā roto mai i te mau heheura’a māere. Te Ha’api’ira’a Tumu ’e te mau Fafaura’a 88 ’o taua ïa huru heheura’a ra—hō’ē heheura’a nō ni’a i te māramarama ’e te hanahana ’e te mau bāsileia ’o tē nehenehe e fa’ariro ’ei mea ha’iha’i i tō tātou mau ha’ape’ape’ara’a i te tino nei ’ia fa’aauhia. Noa atu e’ita tātou e hāro’aro’a i te tā’āto’ara’a, e nehenehe ri’i rā tātou e ’ite mai, e mea rahi atu ā i roto i te tau mure ’ore ’o tā tātou i ’ore ā i ’ite a’e nei. ’Oia ïa, e’ita te Fatu e fa’a’ite mai i teie mau parau mau rarahi nō te fa’ari’ari’a ia tātou, ’aore rā nō te ’ite tātou iho i tō tātou ha’iha’i. Teie rā, ’ua fafau mai ’oia ē, « e tae mai te mahana e ’ite ai ’outou i te Atua mau » (’īrava 49 ; tu’uhia te pāpa’i ’opa). Nō teie tumu hanahana paha te Fatu i fa’aue ai i tāna feiā mo’a i Kirtland ’ia fa’atupu i te fare ha’api’ira’a a te mau peropheta. « ’A fa’anahonaho na ia ’outou iho », ’ua parau ’oia. « ’A fa’aineine i te mau mea ato’a e maita’i ai ’outou ; ’e ’a fa’ati’a i te hō’ē fare, […] ’ei fare ho’i nō te Atua » (’īrava 119). Hau atu nā te mau vāhi ato’a, i roto ana’e i te fare mo’a o te Atua—’e i roto i tō tātou fare—’oia e nehenehe ai e fa’ateitei i tō tātou hi’ora’a i ’ō atu i te ao tāhuti nei, « e ’īriti mai ’oia i te pāruru o tōna mata ia [tātou], » ’e e fa’aineine ia tātou ’ia « fa’aea i roto i te hanahana tiretiera » (mau ’īrava 68, 22).

Hi’o Te Feiā Mo’a, 1:164–66.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 88

Tē pūpū nei Iesu Mesia i te hau iā’u.

Te tahi tau mahana noa i muri a’e i te fa’aarara’a « e tae atu ai te tama’i i ni’a i te mau nūna’a atoa » (Te Ha’api’ira’a Tumu ’e te mau Fafaura’a 87:2), ’ua hōro’a te Fatu i te hō’ē heheura’a ’o tā Iosepha Semita i pi’i te « rau’ere ’ōlive », ’o te hō’ē ïa tāpa’o tumu nō te hau (Te Ha’api’ira’a Tumu ’e te mau Fafaura’a 88, upo’o tufa’a ; hi’o ato’a Genese 8:11). I te roara’a o tā ’outou tuatāpapara’a i te tufa’a 88 i teie hepetoma, ’a ’imi mai i te mau parau poro’i nō te hau ’o tā te Fatu i a’o mai ia ’outou.

Te Ha’api’ira’a Tumu ’e te mau Fafaura’a 88:6–67

E tae mai te māramarama ’e te ture nā roto mai ia Iesu Mesia.

Te mau ta’o māramarama ’e ture, ’ua fa’ahitihia e rave rahi taime i roto i te tufa’a 88. ’A tāpa’o ’aore rā ’a pāpa’i i te mau ’īrava i reira ’outou e ’ite mai ai i teie mau ta’o i roto i te mau ’īrava 6–67, ’e ’a pāpa’i i te mea tā ’outou i ha’api’i mai nō ni’a i te māramarama ’e te ture—’e nō ni’a ia Iesu Mesia. E aha te mea tei fa’auruhia ia ’outou ’ia rave nō te fa’ari’i i te māramarama ’e ’ia ora i te « ture a te Mesia » ? (’īrava 21).

Hi’o ato’a Isaia 60:19 ; Ioane 1:1–9 ; 3 Nephi 15:9 ; Timothy J. Dyches, « Tē ’ati atu nei te māramarama i te māramarama », Liahona, Mē 2021, 112–15 ; Sharon Eubank, « Te Mesia : Te māramarama e ’ana’ana i roto i te pōiri », Liahona, Mē 2019, 73–76.

Tei roto i te mau pāpa’ira’a mo’a te ture a te Mesia.

Te Ha’api’ira’a Tumu ’e te mau Fafaura’a 88:62–64

« ’A ha’afātata mai iā’u nei ».

E aha te mau ’itera’a tei fa’a’ite ia ’outou ē, e parau mau te mau fafaura’a e vai ra i roto i teie mau ’īrava ? E aha tā ’outou ta’ahira’a i muri iho nō te « ha’afātata atu » i te Mesia ? ’A feruri i te tu’u mai i te hīmene « ’Ei pīha’i iho vau i tō’u Fatu » (Te mau hīmene, N°51) ’ei tuha’a nō tā ’outou tuatāpapara’a ’e ha’amorira’a.

Te Ha’api’ira’a Tumu ’e te mau Fafaura’a 88:67–76

E nehenehe au e riro mai ’ei mea mā nā roto i te tāra’ehara a Iesu Mesia.

Tē fa’auera’a a te Fatu ’ia « ha’amo’a ia ’outou iho » e ’itehia e piti taime i roto i te tufa’a 88 (mau ’īrava 68, 74). I tō ’outou mana’o e aha te aura’a teie parau ? E nehenehe ’outou e hi’o fa’ahou i te tahi mau tuha’a parau i raro a’e te « Ha’amo’ara’a » i roto i te Arata’i nō te mau pāpa’ira’a mo’a (Vaira’a buka ’evanelia). Nāhea tātou i te ha’amo’ahia ? ’A vaiiho i teie uira’a ’ia arata’i i tā ’outou tuatāpapara’a i Te Ha’api’ira’a Tumu ’e te mau Fafaura’a 88:67–76, ’e ’a pāpa’i i te mau ’ite pae vārua ato’a e noa’a mai ia ’outou.

Te Ha’api’ira’a Tumu ’e te mau Fafaura’a 88:77–80, 118–26

« ’A ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o ».

’Ua parau te Fatu i te feiā mo’a ’ia fa’ati’a i te hō’ē « fare ha’api’ira’a a te mau peropheta » i Kirtland (Te Ha’api’ira’a Tumu ’e te mau Fafaura’a 88:137). Te rahira’a o te mau arata’ira’a i roto te tufa’a 88, ’ua ha’api’i ia rātou nāhea ’ia rave i te reira. E nehenehe ato’a teie arata’ira’a e tauturu ia ’outou « ’ia fa’ati’a i te hō’ē fare […] ’ei fare nō te ha’api’ira’a » (’īrava 119) i roto i tō ’outou iho orara’a. ’Oia ïa, e nehenehe ’outou e hi’o i te mau ’īrava 77–80 ’e 118–26 ’ei fa’anahora’a tumu nō te « fa’a’āpī i tō ’outou fare [’aore rā tō ’outou orara’a] ’ei pū nō te ha’api’ira’a mai i te ’evanelia » ’e « ’ei vāhi mo’a nō te fa’aro’o » (Russell M. Nelson, « Rirora’a ’ei feiā mo’a hi’ora’a maita’i », Liahona, Novema 2018, 113). E mea au paha ’ia pāpa’i ’outou i te huru o tō ’outou iho « fa’a’āpīra’a », mai te mau pereota nō roto mai i teie mau ’īrava tā ’outou e mana’o ra e ti’a ia ’outou ’ia fa’a’ohipa.

E riro ato’a te reira i te tauturu ’ia hi’o i teie mau uira’a : Nō te aha e mea faufa’a roa nō te Fatu te ha’api’ira’a mai ’e te ha’api’ira’a ? E aha tāna e hina’aro ’ia tuatāpapa vau ? Nāhea ’oia i te hina’aro iā’u ’ia ’apo mai i te ha’api’ira’a ? ’A ’imi mai i te mau pāhonora’a nō teie mau uira’a i roto i te mau ’īrava 77–80 ’e i roto « Nā te parau mau ’oe e fa’ati’amā » (Nō te pūai o te feiā ’āpī : E arata’i nō te rave i te mau mā’itira’a, 30–33).

I tō ’outou mana’o e aha te aura’a ’ia ha’api’i mai « nā roto i te ha’api’i ’e nā roto ato’a i te fa’aro’o » ? (’īrava 118). E aha te mau mana’o tā ’outou e rave mai i roto i te parau poro’i a Elder Mathias Held « Te ’imira’a i te ’ite nā roto i te Vārua » ? (Liahona, Mē 2019, 31–33).

Hi’o ato’a Topics and Questions, « Seeking Truth and Avoiding Deception », Gospel Library ; « A School and an Endowment », i roto Revelations in Context, 174–82.

Nō te tahi atu mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 88:23

E hōro’a te Metua i te ao ra i te mau ō maitata’i.

• E nehenehe ’outou e ha’amata i te hō’ē ’āparaura’a i ni’a Te Ha’api’ira’a Tumu ’e te mau Fafaura’a 88:33 ma te anira’a i tā ’outou mau tamari’i ’ia paraparau mai nō ni’a i te mau ō tā rātou i fa’ari’i—terā tā rātou i fa’ari’i ma te ’oa’oa ’e te tahi atu ’aita rātou i fa’ari’ihia. Penei a’e e nehenehe rātou e ha’uti ta’ata ora mai ’ia fa’ari’ira’a ana’e i te hō’ē ō ma te ’oa’oa. I muri iho e paraparau ’outou nō te mau ō tā tō tātou Metua i te ao ra i hōro’a mai (mai te ō o te Vārua Maita’i). Nāhea tātou i te fa’ari’i i teie mau ō ma te ’oa’oa ?

Te Ha’api’ira’a Tumu ’e te mau Fafaura’a 88:63

Mai te peu e ’imi au i te Fa’aora, e ’itehia mai ’oia iā’u.

• Tē vai ra i roto Te Ha’api’ira’a Tumu ’e te mau Fafaura’a 88:63 te mau ta’o ’ohipa ’o tē nehenehe e fa’auru mai i te mau ’ohipa ri’i ’ārearea, nō te fa’aitoito i tā ’outou mau tamari’i ’ia ’imi ’ia vai mai te Fatu i roto i tō rātou orara’a. ’Ei hi’ora’a, e ti’a ānei ia ’outou ’e tā ’outou mau tamari’i ’ia feruri i te hō’ē ha’uti nō te ’āparau i te pereota « ’imi māite noa mai iā’u nei ’e e ’itehia vau ia ’outou na » (tu’uhia te reta fa’ahuru-’ē-hia) ’aore rā « ’a pātōtō mai, ’e e ’īritihia atu ïa ia ’outou na » ?

E hina’aro te mau tamari’i i te raura’a. « E ’apo maita’i a’e te rahira’a o te mau tamari’i ’ia fa’a’ohipa-ana’e-hia te raura’a o te mau ’itetino. ’A ’imi mai i te mau rāve’a nō te tauturu i te mau tamari’i ’ia fa’a’ohipa i tō rātou mau ’itetino i te pae nō te mata, te tari’a ’e te fāfāra’a ’a ha’api’i mai ai rātou. I roto i te tahi mau tupura’a, e nehenehe ato’a ’outou e ’ite mai i te mau rāvea nō te fa’aō mai i tō rātou mau ’itetino nō te hau’a ’e te auavaha ! » (Ha’api’ira’a mai tā te Fa’aora, 32).

• Nō te ha’apāpū i te anira’a a te Fa’aora ’ia « ha’afātata mai iā’u », e ani atu i te hō’ē tamari’i ’ia tāpe’a i te hō’ē hōho’a nō Iesu (mai te hōho’a i te hope’a o teie arata’ira’a) i te hō’ē pae o te piha, ’a ti’a ai te tahi atu mau tamari’i i te tahi atu pae. ’A feruri ai tā ’outou mau tamari’i i te mau mea tā rātou e nehenehe e rave nō te ha’afātata atu i te Fa’aora, e nehenehe rātou e fa’anu’u te hō’ē ta’ahira’a i mua i te hōho’a, ’e te tamari’i e tāpe’a ra i te hōho’a e fa’anu’u te hō’ē ta’ahira’a i mua i te tahi atu mau tamari’i. ’A paraparau i tā ’outou mau tamari’i e mea nāhea ’outou i te ha’afātatara’a atu i te Fa’aora ’e te huru ’a ha’afātatara’a mai ai ’oia ia ’outou. E nehenehe ato’a ’outou e hīmene ’e rātou i te hō’ē hīmene nō ni’a i teie tumu parau, mai te hīmene « ’Ite au te here » (Buka hīmene nā te mau tamari’i, 42-43).

Te Ha’api’ira’a Tumu ’e te mau Fafaura’a 88:77–80, 118

Tē hinaʼaro nei te Metua i te ao ra ’ia ha’api’i mai au.

• E ui i tā ’outou mau tamari’i ’ia fa’ati’a mai ia ’outou i te mea tā rātou i ha’api’i mai i te fare ha’api’ira’a ’aore rā i te Paraimere. E nehenehe ato’a ’outou e fa’a’ite atu i te tahi mau mea tā ’outou i ha’api’i mai. I muri iho ’a fa’a’ite atu i tā ’outou mau tamari’i i te mau ta’o e aha, nō te aha ’e nāhea. ’A tauturu ia rātou ’ia ’imi Te Ha’api’ira’a Tumu ’e te mau Fafaura’a 88:77–79 nō te ’ite mai e aha tā te Fatu e hina’aro ’ia ha’api’i mai tātou. I muri iho ’a hi’o ’āmui i te ’īrava 80 nō te ’ite mai nō te aha ’oia e hina’aro ai ’ia ha’api’i mai tātou ’e i roto i te ’īrava 118 nō te ’ite mai nāhea e ti’a ai ia tātou ’ia ha’api’i mai.

« ’A ’imi ho’i i te ’ite […] nā roto i te ha’api’i ’e nā roto ato’a i te fa’aro’o ».

Te Ha’api’ira’a Tumu ’e te mau Fafaura’a 88:119

E nehenehe tō tātou fare e riro ’ei mea mo’a mai te hiero.

• ’A tai’o ai ’outou Te Ha’api’ira’a Tumu ’e te mau Fafaura’a 88:119 i tā ’outou mau tamari’i, e nehenehe rātou e hāmani i te hō’ē tira o te hiero i tō rātou rima, i te mau taime ato’a e fa’aro’o rātou i te ta’o « fare. » ’A fa’ata’a ē ’ua hina’aro te Metua i te ao ra ’ia patu Iosepha Semita ’e te feiā mo’a i te hō’ē hiero, ’aore rā i te hō’ē « fare nō te Atua ».

• E ani atu i tā ’outou mau tamari’i ’ia mā’iti e hitu ta’o e fa’a’ite ra i tō rātou fare. I muri iho, ’a tauturu ia rātou ’ia ’imi i roto Te Ha’api’ira’a Tumu ’e te mau Fafaura’a 88:119, e hitu ta’o tā te Fatu i fa’a’ohipa nō te fa’ata’a i tōna fare. Nāhea tātou i te fa’ariro i tō tātou fare ’ei « fare nō te Atua » ?

Nō te tahi atu mana’o, ’a hi’o i te ve’a Hoa nō teie ’āva’e.

Be Not Afraid [’Eiaha e mata’u], nā Michael Malm