Tuha’a nō I See the Son of Man [Tē ’ite nei au i te Tamaiti o te ta’ata], nā Walter Rane

25–31 nō ’Ātete : « ’Ia fa’ari’i i tōna ’īra’a »

Te Ha’api’ira’a Tumu ’e te mau Fafaura’a 93

’Ua ha’api’i Iosepha Semita : « ’Ia pa’uma ana’e ’outou i ni’a i te hō’ē ’ē’a, e ti’a ïa ia ’outou ’ia ha’amata mai raro atu, ’e ’ia pa’uma atu te tahi ta’ahira’a i muri i te tahi ta’ahira’a, ē tae roa atu ’ua tāpae ’outou i ni’a ; ’e mea nā reira ato’a te mau parau tumu nō te ’evanelia—e ti’a ia ’outou ’ia ha’amata i te ta’ahira’a mātāmua, ’e ’ia tāmau noa ē tae roa atu ’ua ha’api’i mai ’outou i te mau parau tumu ato’a nō te fa’ateiteira’a » (Te mau Ha’api’ira’a a te mau Peresideni o te ’Ēkālesia : Iosepha Semita [2007], 306).

I te tahi taime e au ra teie ’ē’a o te fa’ateiteira’a e mea teitei roa, ’ua fānauhia rā tātou nō te ta’uma i ni’a roa atu ma te tauturura’a tāmau a te Fa’aora. Noa atu te mau tā’oti’ara’a ’o tā tātou e ’ite nei i roto ia tātou iho, tē ’ite nei tō tātou Metua i te ao ra ’e tāna Tamaiti i roto ia tātou te hō’ē mea marumana, te hō’ē mea hanahana. Mai ia Iesu Mesia « i te Metua ra vau i te mātāmua » nō reira « tei te Metua ato’a ra ho’i ’outou » (Te Ha’api’ira’a Tumu ’e te mau Fafaura’a 93:21, 23). Mai iāna « haere noa mai rā te maita’i i muri a’e i te maita’i, ē tae noa atu i te taime ’oia i fa’ari’i ai i te ’īra’a », nā reira ato’a « e fa’ari’i ’outou i te maita’i i muri a’e i te maita’i ». (mau ’īrava 13, 20). Tē ha’api’i nei te ’evanelia tei fa’aho’ihia mai nō te nātura mau o te Atua, e nō reira tē ha’api’i ato’a nei te reira nō tō ’outou nātura mau ’e tō ’outou fa’ata’ara’a mau. E tamari’i mau ’outou nā te Atua ma te fāito pūai nō « fāri’i i tōna ’īra’a i te tau i ha’apa’ohia » (’īrava 19).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 93

Mai ia Iesu Mesia, e nehenehe au e fa’ahanahanahia ’e e fa’ari’i i te « ’īra’a » o te Atua.

’Ua ha’api’i te peropheta Iosepha Semita, « mai te mea e’ita te ta’ata e ta’a i te huru o te Atua, e’ita ïa rātou e ta’a maita’i i tō rātou iho huru » (Te mau ha’api’ira’a : Iosepha Semita, 40). ’A ha’api’i mai ai ’outou nō ni’a te Fa’aora nā roto i te tuatāpapara’a Te Ha’api’ira’a Tumu ’e te mau Fafaura’a 93, ’a ’imi ato’a mai i te mea tā ’outou e ha’api’i mai nō ni’a ia ’outou iho. ’Ei hi’ora’a, e aha tā ’outou i ha’api’i mai nō ni’a iāna nā roto mai te mau ’īrava 3, 12-13, 21, ’e 26 ? E aha te hō’ē ā mau parau mau tā ’outou i ’ite mai nō ni’a ia ’outou iho nā roto mai te mau ’īrava 20, 23, ’e 28–29 ? (hi’o ato’a 1 Ioane 3:2 ; 3 Nephi 27:27). E nehenehe te mau uira’a i muri nei e tauturu ia ’outou ’ia māramarama ’e ’ia fa’a’ohipa i te mau parau mau i roto i teie tufa’a :

• I tō ’outou mana’o e aha te aura’a ’ia fa’ari’i « i te maita’i [aroha] i muri a’e i te maita’i [aroha] » ’e ’ia haere noa mai « i te maita’i [aroha] i muri a’e i te maita’i [aroha] » ? (mau ’īrava 12–13). Mai te peu e tauturu te reira, e nehenehe ’outou e tai’o « Maita’i [aroha] » i roto te Arata’i nō te mau pāpa’ira’a mo’a (Vaira’a buka ’evanelia).

• E aha tā ’outou i ’ite mai i roto i teie heheura’a, e nāhea te Atua i te tauturu ia ’outou ’ia tupu i te rahi ’e ’ia ha’api’i mai ? Nāhea te ’itera’a i te reira i te fa’atupu mai i tō ’outou huru i ni’a ia vetahi ’ē—’e ia ’outou iho ?

• E aha tā ’outou i ha’api’i mai nō ni’a e « nāhea ’ia ha’amori, ’e […] e aha tā ’outou e ha’amori » ? (’īrava 19 ; hi’o ato’a i te Arata’i nō te mau pāpa’ira’a mo’a, « Ha’amori », Vaira’a buka ’evanelia).

Te Ha’api’ira’a Tumu ’e te mau Fafaura’a 93:1–39

Te hanahana o te Atua ra ’o te māramarama ïa ’e te parau mau.

E ’ite mai paha ’outou ē, e mea pinepine te mau ta’o mai te hanahana, māramarama, ’e te parau mau i te hiti mai i roto i teie heheura’a. ’A tuatāpapa ta’a ’ē ai ’outou i te mau ’īrava 20–39, ’a tāpura i te mau parau mau tā ’outou i ’apo mai nō teie mau atamanava. Te hāmanira’a i te hō’ē tāpura mai teie te huru e nehenehe e tauturu :

’Īrava	E aha tā’u i ’apo mai	Mau uira’a e feruri
’Īrava 24	E aha tā’u i ’apo mai	Mau uira’a e feruri E rave rahi rāmāra’a i roto i te ao nei. Nāhea vau e ’ite ai i te parau mau ? (hi’o ato’a Iakoba 4:13).
’Īrava 28	E aha tā’u i ’apo mai	Mau uira’a e feruri
’Īrava 36	E aha tā’u i ’apo mai E ta’ata māramarama ’e te parau mau te Atua.	Mau uira’a e feruri
’Īrava 37	E aha tā’u i ’apo mai	Mau uira’a e feruri ’O vai tā’u i mātau e au ra e nehenehe e pāto’i i te mau fa’aurura’a ’ino ? Nō te aha e ti’a roa ia rātou ’ia nā reira ?
’Īrava	E aha tā’u i ’apo mai	Mau uira’a e feruri
’Īrava	E aha tā’u i ’apo mai	Mau uira’a e feruri
’Īrava Hi’o ato’a : Te Ha’api’ira’a Tumu ’e te mau Fafaura’a 50:24	E aha tā’u i ’apo mai	Mau uira’a e feruri

E aha tā ’outou i ’ite mai i roto i teie mau ’īrava ’o tē fa’auru nei ia ’outou ’ia ’imi rahi atu ā i te māramarama ’e te parau mau ? Nō te aha te māramarama ’e te parau mau e riro ai ’ei ti’ara’a maita’i nō Iesu Mesia ? (hi’o Ioane 8:12 ; 14:6). Nāhea teie mau parau mau i te fa’auru i tō ’outou orara’a ?

E nehenehe ato’a ’outou e tāpa’o i te mau parau fafau nō ni’a i tō ’outou fa’ata’ara’a mure ’ore i roto te mau ’īrava 20, 22, 28, 33–35. E aha te tū’atira’a i rotopū i teie mau parau fafau ’e te fa’ari’ira’a i te māramarama ?

’A feruri i te mā’imi mai « Haere nā roto i te māramarama o te Atua » (Nō te pūai o te feiā ’āpī : E arata’i nō te rave i te mau mā’itira’a, 18–21) nō te ’ite mai i te mea tā ’outou e nehenehe e rave nō te fa’ari’i i te māramarama ’e e nāhea te Fatu e parau fafau mai i te ha’amaita’i ia ’outou. E hōro’a mai te mau video « Light and Truth, tuha’a 1 » ’e « tuha’a 2 » (Vaira’a buka ’evanelia) i te mau mana’o hau atu.

Hi’o ato’a « Ha’api’i iā’u ’ia ’ite i te maita’i », Te mau hīmene, N°189 ; Topics and Questions, « Holy Ghost », Vaira’a buka ’evanelia.

Light and Truth, Part 1

(D&C 88:6-13) This video examines God's attributes of light and truth as explained in section 88 of the Doctrine and Covenants.

Light and Truth, Part 2

(D&C 93:28,36-40) This video examines God's attributes of light and truth as explained in section 88 of the Doctrine and Covenants.

« Te hanahana o te Atua ra, ’o te […] māramarama ’e te parau mau ».

Te Ha’api’ira’a Tumu ’e te mau Fafaura’a 93:40–50

« ’Ia fa’a’āfaro ia ’oe i tō ’oe iho ’utuāfare e ti’a ai ».

Te fa’auera’a « ’ia fa’a’āfaro… i tō ’oe iho ’utuāfare e ti’a ai » (’īrava 43) e ’ere nō ni’a i te fa’anahora’a i te mau ’āfata ’e te mau pa’epa’e, nō ni’a rā i te ha’api’ira’a—’e te ha’api’ira’a mai—« i te māramarama ’e te parau mau » (’īrava 42). ’A feruri nāhea ’outou i te tāmata i te pe’e i teie parau a’o. E aha te mau tāmatara’a tā ’outou e fa’aruru nei ? E aha te mau parau mau i roto Te Ha’api’ira’a Tumu ’e te mau Fafaura’a 93 e nehenehe e tauturu ?

E aha te mau mana’o tā ’outou e tātara mai nā roto mai i teie mau ha’api’ira’a a Elder David A. Bednar ?

« I roto i tā’u piha tōro’a tē vai ra hō’ē hōho’a pēni nehenehe nō te hō’ē fa’a’apu tītona. Te hōho’a pēni ’o te hō’ē ïa pōta’a o te mau tu’ura’a i te purūmu peni a te ta’ata—’e ’ia hi’ohia hō’ē pōta’a pēni, ’aita roa atu ïa tōna e fa’aaura’a, e ’ere atoa i te mea nehenehe. Mai te mea e tāpiri ri’i ’outou i pīha’i iho i te hōho’a, tā ’outou noa e ’ite ’o te mau pōta’a pēni ïa, te mea re’are’a, te ’auro ’e te ravarava, ’aita e tū’atira’a te tahi ’e te tahi. Terā rā, mai te mea e fa’aātea ri’i marū noa ’outou i te hōho’a, e ’ite ’outou i te hō’ēra’a o te mau tu’ura’a i te purūmu pēni nō te hōro’a mai i te hō’ē hōho’a nehenehe o te fa’a’apu tītona. E ’ohipa ’āmui te mau tu’ura’a i te purūmu pēni tāta’ihō’ē nō te hōro’a mai i te hō’ē hōho’a pēni nehenehe ’e te au ’ia hi’ohia e te mata.

« ’Ua riro te pure ’utuāfare tāta’itahi, te taime tuatāpapara’a i te pāpa’ira’a mo’a tāta’itahi a te ’utuāfare, ’e te pō ’utuāfare tāta’itahi mai te hō’ē tu’ura’a i te purūmu pēni i ni’a i te hōho’a o tō tātou vāerua. ’Aita hō’ē o te tupura’a ’ohipa e riro ’ei mea fa’ahiahia roa ’aore rā e mea ha’amana’o-maoro-hia. Terā rā, mai te mau pōta’a pēni re’are’a, te ’auro ’e te ravarava e ’āmuihia ’e e hōro’a mai i te hō’ē hōho’a fa’ahiahia roa, ’oia ato’a tō tātou tāmau-noa-ra’a i te rave-fa’aoti-ra’a i te mau mea ha’iha’i, e nehenehe e arata’i atu i te mau hōpe’ara’a pae vārua faufa’a rahi mau. ‘Nō reira, ’eiaha e fiu i te ravera’a i te ’ohipa maita’i, nō te mea tē ha’amau nei ’outou i te niu nō te hō’ē ’ohipa faufa’a rahi roa. ’E nā roto i te mau mea iti e tupu mai ai tei rahi roa ra’ [Te Ha’api’ira’a Tumu ’e te mau Fafaura’a 64:33]. Te au-maita’i-ra’a ’o te parau tumu faufa’a rahi ïa ’a ha’amau ai tātou i te niu nō te hō’ē ’ohipa rahi i roto i tō tātou iho orara’a ’e ’ia vai itoito atu ā ’e ’ia ha’apa’o maita’i a’e tātou i tō tātou ’utuāfare » (« ’Ia itoito ’e ’ia ha’apa’o maita’i atu ā i roto i te ’utuāfare », Liahona, Novema 2009, 19–20).

Hi’o ato’a Henry B. Eyring, « Hō’ē fare i reira te Vārua o te Fatu e pārahi ai », Liahona, Mē 2019, 22–25.

’Ua fa’aue te Fatu i te mau metua ’ia « ha’api’i i tā rātou mau tamari’i i roto i te māramarama ’e te parau mau ».

Nō te tahi atu mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 93:2–21

’O Iesu Mesia te māramarama ’e te ora o te ao nei.

• ’A feruri i te fa’a’ite atu i te hō’ē hōho’a o te Fa’aora ’e e ui i tā ’outou mau tamari’i, nō te aha e mea faufa’a ’ia ha’api’i mai ’e ’ia pe’e ia Iesu Mesia. I muri iho e tai’o ’āmui ’outou Te Ha’api’ira’a Tumu ’e te mau Fafaura’a 93:19 nō te ’ite mai i te hō’ē tumu faufa’a rahi mau.

• E hina’aro paha ’outou e mā’iti e rave rahi parau mau nō ni’a i te Mesia i roto te tufa’a 93 ’o tē fa’auru nei ia ’outou ’e ’o tē tauturu i tā ’outou mau tamari’i ’ia ’ite mai ’e ’ia māramarama i te reira (hi’o ato’a « Pene 33 : Te hō’ē heheura’a nō ni’a ia Iesu Mesia », i roto Te mau ’ā’amu o te Parau Ha’api’ira’a ’e te mau Parau Fafau, 126–27, ’aore rā, te video e tano i roto te Vaira’a buka ’evanelia). Nō te parau mau tāta’itahi tā ’outou i mā’iti, e hōro’a i tā ’outou mau tamari’i i te hō’ē ta’o ’aore rā hō’ē pereota nō te fa’aro’o, ’a tai’o ’āmui ai ’outou i te ’īrava. ’Ei hi’ora’a, Iesu Mesia :

  • ’Ua rave i te mau ’ohipa a te Metua (’īrava 5).

  • Te māramarama o te ao nei (’īrava 9).

  • Te ta’ata tei poiete i te ao nei (’īrava 10).

  • ’Ua fa’ari’i i te mana ato’a i te ao ra ’e i te fenua nei (’īrava 17).

  • Tei pīha’i iho i te Atua i te ha’amatara’a (’īrava 21).

  Chapter 33: A Revelation about Jesus Christ: May 1833

Tuha’a nō Light of the World [Tūrama i te ao], nā Howard Lyon

Te Ha’api’ira’a Tumu ’e te mau Fafaura’a 93:23, 29, 38

’Ua ora na vau i pīha’i iho i te Metua i te ao ra hou vau ’a haere mai ai i te fenua nei.

• ’Ua ha’apāpū mai te Fa’aora e toru taime i roto te tufa’a 93 ē, i ora na tātou ’e te Atua « i te ha’amatara’a » (mau ’īrava 23, 29, 38). Nō te tauturu i tā ’outou mau tamari’i ’ia ’ite mai i te reira, e ani ia rātou ’ia tai’o Te Ha’api’ira’a Tumu ’e te mau Fafaura’a 93:23, 29, 38 ’e ’ia ’imi mai i te hō’ē parau mau nō ni’a ia rātou iho ’o tei fa’ahiti-fa’ahou-hia i roto i teie mau ’īrava. Nō te aha te Metua i te ao ra e hinaʼaro ai ʼia ’ite tātou i teie parau mau ? E nehenehe ato’a ’outou e ui i tā ’outou mau tamari’i, e aha tā rātou i ’ite nō ni’a i tō tātou orara’a ’e te Metua i te ao ra hou tātou ’a fānauhia mai ai. Nō te tauturu ia rātou ’ia ha’api’i rahi mai, ’a tai’o ’e ’o rātou hō’ē ’aore rā hau atu o te mau tuha’a pāpa’ira’a mo’a i muri nei : Ieremia 1:5 ; Te Ha’api’ira’a Tumu ’e te mau Fafaura’a 138:53–56 ; Mose 3:5 ; Aberahama 3:22–26.

• E nehenehe ato’a ’outou e hīmene ’āmui « E tamari’i au nā te Atua » ’aore rā « I Lived in Heaven » (Buka hīmene nā te tamari’i, 2, 4) ’e ’ia ’āparau i te mau parau mau tā tātou i ’apo mai nā roto mai i teie mau hīmene nō ni’a i tā tātou ’ōpuara’a e haere mai i te fenua nei.

Te Ha’api’ira’a Tumu ’e te mau Fafaura’a 93:24–39

E fa’ari’i au i te māramarama ’e te parau mau ’a ha’apa’o ai au i te parau a te Atua.

• Nō te tauturu i tā ’outou mau tamari’i ’ia fa’a’ohipa i te mau parau mau nō te ha’apa’ora’a i roto Te Ha’api’ira’a Tumu ’e te mau Fafaura’a 93, ’a pāpa’i i te tahi mau fa’ahorora’a o te pāpa’ira’a mo’a nō roto mai i teie tuha’a i ni’a i te mau ’api parau. I ni’a i te mau ’api parau ta’a ’ē, ’a pāpa’i i te mau parau mau tā teie mau ’īrava tāta’itahi e ha’api’i nei. E nehenehe tā ’outou mau tamari’i e ’ohipa ’āmui nō te tai’o i te mau ’īrava ’e ’ia fa’atū’ati i te mau parau mau i te mau ’īrava. Teie te tahi mau hi’ora’a :

  • ’Īrava 24 : Te parau mau ’o te ’itera’a ïa i te mau mea pāpū mau i muta’a ra, i teienei ’e ananahi.

  • ’Īrava 28 : E nehenehe au e fa’ari’i i te māramarama ’e te parau mau ’ia ha’apa’o ai au i te mau fa’auera’a.

  • ’Īrava 37 : ’Ia roa’a ana’e iā’u te māramarama ’e te parau mau, e nehenehe au e pāto’i i te ’ino.

  • ’Īrava 39 : E mo’e te māramarama ’e te parau mau iā’u ’ia ha’apa’o ’ore ana’e au.

  E hina’aro paha ’outou e fa’a’ite i te mau hi’ora’a o te mau parau mau ’o tā ’outou i ’ite ’a ha’apa’o ai ’outou i te mau fa’auera’a a te Fatu.

’A fa’atano i ni’a i te matahiti o te mau tamari’i. ’Ua ’ite ’outou i te mau hina’aro ’e te ’aravihi o tā ’outou mau tamari’i ; ’eiaha e taiā i te fa’atano i te mau mana’o o te ’ohipara’a e tano i tō rātou mau hina’aro. ’Ei hi’ora’a, i roto i teie ’ohipara’a, mai te mea tē ha’api’i ra ’outou i te mau tamari’i na’ina’i, e mea maita’i paha ’ia rōtahi i ni’a i te hō’ē parau mau ’ōhie i roto i te tufa’a 93.

Nō te tahi atu mau mana’o, ’a hi’o i te ve’a Hoa nō teie ’āva’e.

Light and Truth [Māramarama ’e parau mau], nā Simon Dewey