Kirtland Temple [Hi’o nō Kirtland], nā Al Rounds

1–7 nō Tetepa : « Nō te fa’aorara’a i tō Ziona »

Te Ha’api’ira’a Tumu ’e te mau Fafaura’a 94–97

I tahito ra, ’ua fa’aue te Fatu ia Mose ’ia patu i te hō’ē tētene « ’ia au i te hōho’a i fa’a’itehia [iāna] i ni’a i te mou’a » (Hebera 8:5 ; hi’o ato’a Exodo 25:8–9). E ti’a i te tētene ’ia riro ’ei pū nō te pūhapara’a o ’Īserā’ela i roto i te medebara (hi’o Nūmera 2:1–2).

I te matahiti 1833, ’ua fa’aue te Fatu ia Iosepha Semita ’ia patu i te mau hiero « ’eiaha mai te au i tā tō te ao nei » terā rā « mai te au i tā’u e fa’a’ite atu » (Te Ha’api’ira’a Tumu ’e te mau Fafaura’a 95:13–14 ; hi’o ato’a 97:10). Mai te tētene i roto i te mēdēbara, ’ua mana’ohia e riro te hiero ’ei tuha’a tumu i Kirtland (hi’o Te Ha’api’ira’a Tumu ’e te mau Fafaura’a 94:1).

I teie mahana, e ’itehia te mau hiero nā te mau vāhi ato’a o te ao nei. Noa atu ’aita te reira e vai ra i te pū o tō tātou mau ’oire, e arata’i rātou ia tātou i te Mesia ra, ’o te ti’a ’ia riro ’ei pū nō tō tātou orara’a. Noa atu e mea ta’a ’ē te huru o te hiero tāta’itahi, i roto e ha’api’i mai tātou i te hō’ē ā hōho’a hanahana—te fa’anahora’a tiretiera nō te fa’aho’i ia tātou i mua i te aro o te Atua. E nati te mau ’ōro’a ’e te mau fafaura’a mo’a ia tātou i te Mesia ’e e ha’apūai i tō tātou mau ’utuāfare « ’eiaha mai te au i tā tō te ao nei », mai te au rā i te hōho’a tā te Atua e fa’a’ite nei ia tātou.

Hi’o Te feiā mo’a, 1:169–70 ; « A House for Our God », i roto Revelations in Context, 165–73.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 94 ; 97:10–17

E nehenehe au e « ha’amo’a-tā’āto’a-hia i te Fatu ».

I roto Te Ha’api’ira’a Tumu ’e te mau Fafaura’a 94, tē hōro’a nei te Fatu i te mau arata’ira’a nō ni’a i te patura’a i te mau fare fa’aterera’a i Kirtland—hō’ē piha tōro’a ’e hō’ē fare nene’ira’a. E aha tā ’outou e fa’ahiahia nei nō ni’a i te mea tā te Fatu i parau nō ni’a i teie mau fare i roto Te Ha’api’ira’a Tumu ’e te mau Fafaura’a 94:2–12 ? Nāhea te reira i te fa’aau i te mea tāna e parau nei nō ni’a i te hiero i roto i te 97:10–17 ?

E aha te aura’a nō ’outou te parau ’ia « ha’amo’a-tā’āto’a-hia i te Fatu » ?

Te Ha’api’ira’a Tumu ’e te mau Fafaura’a 95

E papa’i te Fatu i te feiā tāna e here nei.

I te fa’ari’ira’ahia te heheura’a i roto te tufa’a 95, fātata e pae ’āva’e tei tere mai te taime ’a fa’aue ai te Fatu i te feiā mo’a ’ia patu i te hō’ē fare o te Atua (hi’o Te Ha’api’ira’a Tumu ’e te mau Fafaura’a 88:117–19)—’e ’aita ā rātou i ha’amata atu ra. ’A hi’o na nāhea te Fatu i te fa’ahapa-’ū’ana-ra’a ia rātou i roto i teie heheura’a. E nehenehe ato’a ’outou e hāmani i te hō’ē tāpura nō te mau parau tumu, ’o tā ’outou i ’ite mai nō te hōro’a i te hō’ē fa’ahapa-’ū’ana-ra’a fa’auruhia. E aha tā ’outou i ha’api’i mai nō ni’a i te Fatu i te huru ’a fa’ahapa ’ū’ana ai ’oia i tōna feiā mo’a ?

Hi’o ato’a Te Ha’api’ira’a Tumu ’e te mau Fafaura’a 121:43–44 ; D. Todd Christofferson, « ’O tā’u e here ra, ’o tā’u ïa e a’o ’e e papa’i ho’i », Liahona, Mē 2011, 97–100.

God Loves His Children

Elder Wakolo testifies of God’s love and describes how He shows that love to His children.

Te Ha’api’ira’a Tumu ’e te mau Fafaura’a 95:8, 11–17 ; 97:10–17

Te hiero ’o te fare ïa o te Fatu.

I muri a’e i tō rātou papa’ira’ahia nō te ’orera’a i patu i te fare o te Fatu i Kirtland, ’ua mā’iti te feiā fa’atere o te ’Ēkālesia i te hō’ē vāhi i roto i te hō’ē ’āua tītona i reira rātou e patu ai i te reira. ’Ua horo ’oi’oi atu Hyrum Smith, te taea’e o te peropheta, e ti’i mai i te hō’ē tipi fefe nō te ha’amata i te ha’amararira’a i te ’āua tītona. « Tē fa’aineine nei mātou i te patu i te hō’ē fare nō te Fatu », ’ua parau ’oia, « ’e ’ua fa’aoti au ’ia riro ’ei ta’ata mātāmua i ni’a i te ’ohipa » (i roto Te mau Ha’api’ira’a a te mau Peresideni o te ’Ēkālesia : Iosepha Semita [2007], 312). I tō ’outou mana’o, nō te aha Hyrum i hina’aro rahi ai e patu i te hiero ? ’A feruri i te reira ’a tai’o ai ’outou Te Ha’api’ira’a Tumu ’e te mau Fafaura’a 95:8, 11–17 ; 97:10–17.

I tō tātou nei ’anotau, « tē fa’a’oi’oi nei [te Fatu] i te terera’a o te patura’a i te mau hiero » (Russell M. Nelson, « Fa’atumu i ni’a i te hiero », Liahona, Novema 2022, 121). Mai te peu e ui mai te hō’ē ta’ata ia ’outou, nō te aha te ’Ēkālesia a Iesu Mesia e patu ai e rave rahi hiero, e aha tā ’outou e pāhono atu ? ’A ’imi mai te mau pāhonora’a tano i roto :

• Te mau parau poro’i a Russell M. Nelson i te fa’aarara’a i te mau hiero ’āpī (mai te « I teienei te taime ». Liahona, Mē 2022, 126).

• « Why Latter-day Saints Build Temples [Nō te aha te feiā mo’a i te mau mahana hope’a nei e patu ai i te mau hiero] » (temples.ChurchofJesusChrist.org).

• Te video « Temples » (Vaira’a buka ’evanelia).

What Is a Temple?

The difference between chapels, where Latter-day Saints meet for regular Sunday worship, and temples is also explained.

E nehenehe ’outou e fa’aau i te mau tauto’ora’a a te feiā mo’a nō te patu i te hiero nō Kirtland, i tā ’outou mau tauto’ora’a nō te fa’aineine ia ’outou nō te mau ’itera’a fa’ahiahia e te Fatu i roto i te hiero. Nāhea ’outou i te fa’a’ite i te hō’ē ā nino’a mana’o rū mai tā Hyrum Smith i putapū nō ni’a i te fare mo’a o te Fatu ? ’Ei hi’ora’a, e aha tā ’outou e nehenehe e rave ’o te ’aifāito i te tāmāra’a i te ’āua, mai tei ravehia e Hyrum ? I tō ’outou mana’o, e aha te mau fa’atusiara’a tā te Fatu e hina’aro ’ia rave ’outou ? (hi’o Te Ha’api’ira’a Tumu ’e te mau Fafaura’a 97:12).

Hi’o ato’a « Tē ’ana’ana mai nei te hiero nō Ziona », Te mau hīmene, N°174 ; Topics and Questions, « Temples », Vaira’a buka ’evanelia.

Hyrum Smith i te ha’amararira’a i te fenua nō te hiero i Kirtland.

Te Ha’api’ira’a Tumu ’e te mau Fafaura’a 97:8–9

« ’Ua fāri’ihia ïa rātou e au nei ».

’A feruri na i te hō’e taime ’a fa’ari’ihia ai ’outou—’aore rā ’aita—i roto i te hō’ē pupu. E aha te tū’atira’a ’aore rā te ta’a-’ē-ra’a i roto i te mea tā Te Ha’api’ira’a Tumu ’e te mau Fafaura’a 97:8–9 e ha’api’i nei nō ni’a i te aura’a ’ia fa’ari’ihia e te Fatu ? I tō ’outou mana’o, e aha tā te Fatu e tāmata nei i te ha’api’i ia ’outou ’e te fa’ahōho’ara’a o te ’īrava 9 ?

Hi’o ato’a Erich W. Kopischke, « ’Ia fa’ari’ihia mai e te Fatu », Liahona, Mē 2013, 104–6.

Ha’amau i te hō’ē arutaimareva pae vārua nō te ’apora’a mai ’e te ha’api’ira’a. « Nā te Vārua Maita’i », ’ua parau fafau Iesu, « e ha’api’i ia ’outou i te mau mea ato’a » (Ioane 14:26). Nō reira, ’a ha’api’i mai ai ’outou ana’e ’aore rā ’e vetahi ’ē, ’a fa’ariro i te tītau-manihini-ra’a i te Vārua ’ei ’ohipa mātāmua roa. Te pehe mo’a, te pure ’e te ’ohipa ’āmuira’a here e nehenehe te tā’āto’ara’a e tauturu i te fa’atupu i te hō’ē vāhi hau ’e te pae vārua, i reira te Vārua Maita’i e nehenehe ai e ha’api’i ia ’outou i te parau mau.

Te Ha’api’ira’a Tumu ’e te mau Fafaura’a 97:18–28

Ziona ’o « tei mā te ’ā’au ».

Nō te feiā mo’a i te mau matahiti 1830, e vāhi o Ziona. I roto i te heheura’a i roto te tufa’a 97, ’ua fa’arahi te Fatu i te tātarara’a nō te fa’a’ite i te hō’ē nūna’a—« tei mā te ’ā’au » (’īrava 21). ’A tai’o ai ’outou te mau ’īrava 18–28, e nehenehe ’outou e mono i teie tātarara’a ’a tai’o ai ’outou i te ta’o Ziona. E aha te aura’a nō ’outou ’ia mā te ’ā’au ?

Hi’o ato’a Mose 7:18.

Nō te tahi atu mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 95:8 ; 97:10–17

Te hiero ’o te fare ïa o te Fatu.

• Nō te tahi atu ha’amāramaramara’a rahi nō ni’a te mau tufa’a 95 ’e 97, e nehenehe ’outou e fa’a’ite i tā ’outou mau tamari’i « Te hiero nō Kirtland » i roto Te mau ’ā’amu o te Parau Ha’api’ira’a ’e te mau Parau Fafau (Vaira’a buka ’evanelia ; hi’o ato’a Te feiā mo’a, 1:210). E ’oa’oa tā ’outou mau tamari’i ’ia fa’ahua i te tauturura’a ’ia patu i te hiero nō Kirtland (tāpūpū i te rā’au, pātiti i te naero, pēni i te mau papa’i ’e te tahi atu ā). E nehenehe ato’a ’outou e fa’a’ite ia rātou i te hō’ē hōho’a nō te hiero nō Kirtland, mai teie i roto i teie arata’i, ’a tai’o ai ’outou Te Ha’api’ira’a Tumu ’e te mau Fafaura’a 95:8 nō te ha’api’i i tā ’outou mau tamari’i nō te aha te Fatu e hina’aro ai ’ia patu tātou i te mau hiero.

The Kirtland Temple

• I muri iho i te tai’o-’āmui-ra’a Te Ha’api’ira’a Tumu ’e te mau Fafaura’a 97:15–16, e nehenehe ’outou ’e tā ’outou mau tamari’i e fa’ata’a mai nō te aha e mea ta’a ’ē te hiero nō ’outou. E nehenehe ato’a ’outou e hīmene ’āmui i te hō’ē hīmene nō te tauturu i te mau tamari’i ’ia putapū i te fa’atura nō te fare o te Fatu, mai te « ’Ia hi’o vau te hiero » (Buka Hīmene nā te mau tamari’i, 99). Nō te aha e vāhi mo’a te hiero ?

Te Ha’api’ira’a Tumu ’e te mau Fafaura’a 97:1–2, 8–9, 21

Ziona ’o « tei mā te ’ā’au. »

• Nō te tauturu i tā ’outou mau tamari’i ’ia hāro’aro’a e aha te aura’a o te parau mā i roto Te Ha’api’ira’a Tumu ’e te mau Fafaura’a 97:21, e hi’o ’āmui ’outou i te hō’ē hāpaina pape mā ’e e tu’u atu i te hō’ē mea i roto i te pape nō te ha’avi’ivi’i i te reira (mai te hu’arepo ’aore rā te pēpa). Nō te aha e mea faufa’a roa ’ia vai mā noa te pape ? I muri iho, ’ia tai’o mai tā ’outou mau tamari’i i te ’īrava 21 ’e e fa’atoro i tō rātou manimani rima i ni’a i te ta’o mā. E aha te aura’a ’ia vai mā tō tātou ’ā’au ? Nā te mau ’īrava 1–2 ’e 8–9 e hōro’a mai i te tahi mau mana’o. Nāhea te Fa’aora i te tauturu mai ’ia vai mā tō tātou ’ā’au ?

Tē hina’aro nei te Metua i te ao ra ’ia vai mā tō’u ’ā’au.

Te Ha’api’ira’a Tumu ’e te mau Fafaura’a 97:8–9

E ha’amaita’i te Fatu i te mau ta’ata e ha’apa’o i te mau fafaura’a ’e ’ōna.

• ’Ua ’ite ānei tā ’outou mau tamari’i e aha te mau fafaura’a tā tātou e rave ’e te Fatu, ’ia bāpetizo-ana’e-hia tātou ’aore rā i roto i te hiero ? E nehenehe ’outou e hi’o fa’ahou i teie mau fafaura’a ’e o rātou ma te tai’ora’a te Mosia 18:9–10, 13 ’aore rā Te Buka arata’i rahi, 27.2. ’A fa’a’ite i te tahi ’e te tahi nāhea ’outou i te tūtavara’a ’ia « ha’apa’o i [tā ’outou] mau fafaura’a nā roto i te tusia » (Te Ha’api’ira’a Tumu ’e te mau Fafaura’a 97:8).

• E nehenehe ’outou e ani i tā ’outou mau tamari’i ’ia pāpa’i hōho’a i te mea tā Te Ha’api’ira’a Tumu ’e te mau Fafaura’a 97:9 e fa’a’ite nei. ’A fa’a’ite mai ai rātou i tā rātou mau hōho’a pāpa’i, ’a fa’ata’a e mea nāhea tō te Fatu ha’amaita’ira’a ia ’outou nō te ha’apa’ora’a i tā ’outou mau fafaura’a. Nāhea te reira mau ha’amaita’ira’a e tū’ati ai mai te hō’ē « tumu rā’au hotu rahi roa ra ’o tei tanuhia […] i pīha’i iho i te pape tahe ateate ra » ?

Nō te tahi atu mau mana’o, ’a hi’o te ve’a Hoa nō teie ’āva’e.

Building the Kirtland Temple [Patu i te hiero nō Kirtland], nā Walter Rane