C. C. A. Christensen (1831–1912), Zion’s Camp, c. 1878, hōho’a pēni i ni’a i te vavai, 196 x 287 tenetimētera. Fare manaha anoihi nō te fare ha’api’ira’a tuatoru Brigham Young, e ō nā te mau mo’otua a C.C.A. Christensen, 1970.

15–21 nō Tetepa : « I muri a’e i te mau ’ati rahi e rave rahi […] e tae mai ai te ha’amaita’ira’a »

Te Ha’api’ira’a Tumu ’e te mau Fafaura’a 102–105

’Ua ’oto rahi te feiā mo’a nō Kirtland i te fa’aro’ora’a ē, ’ua tīahihia tō rātou mau taea’e ’e mau tuahine i rāpae i tō rātou fare i vaefenu nō Jackson, i Missouri. ’Ua riro paha tei reira ’ei fa’aitoitora’a rahi ’a parau ai te Fatu ē « te fa’aorara’a ia Ziona » e « tae mai nā roto i te mana e ti’a ai » (Te Ha’api’ira’a Tumu ’e te mau Fafaura’a 103:15). Ma teie parau fafau i roto i te ’ā’au, ’ua hau i te 200 tāne ’e fātata e 25 vahine ’e te tamari’i tei tāpa’o ia rātou i roto i te mea tā rātou i pi’i te pūhapa o ’Īserā’ela, tei pi’ihia i muri iho i te i’oa te pūhapa o Ziona. Tāna misiōni, ’oia ho’i te haerera’a atu i Missouri ’e ’ia fa’aora ia Ziona.

Nō te mau melo o te pūhapa, te fa’aorara’a ia Ziona te aura’a ’ia fa’aho’i i te feiā mo’a i ni’a i tō rātou fenua. Terā rā hou rātou ’a tae atu ai i te vaefenua Jackson, ’ua parau te Fatu ia Iosepha Semita ’ia fa’a’ore i te pūhapa o Ziona. ’Ua ta’a ’ore ’e ’ua riri te tahi mau melo o te pūhapa ; e au ra ’ua manuia ’ore te tere ’e ’aita te mau parau fafau a te Fatu i tupu. Teie rā vetahi o rātou, ’ua hi’o ta’a ’ē i te reira. Noa atu ’aita i fa’aho’ihia i te feiā mo’a tei tīahihi’a tō rātou fenua ’e tō rātou fare, ’ua hōpoi mai rā te ’ohipa i tupu nō rātou i te hō’ē fāito « fa’aorara’a » o Ziona, ’e ’ua « tae mai nā roto i te mana ». ’Ua fa’a’ite pāpū te mau melo ha’apa’o maita’i nō te pūhapa o Ziona, e rave rahi ho’i o rātou tei riro mai ’ei feiā fa’atere nō te ’Ēkālesia i muri iho ē, ’ua fa’ahōhonu teie ’ohipa i tupu i tō rātou fa’aro’o i te mana o te Atua, i te pi’ira’a hanahana o Iosepha Semita, ’e nō Ziona—’eiaha nō Ziona ana’e ’ei vāhi, ’o Ziona ato’a rā ’ei ta’ata nō te Atua. Ma te ’ore e uiui haere i te faufa’a mau o teie ’ohipa manuia ’ore ’ia hi’ohia, ’ua ’apo mai rātou ē, te ’ohipa mau e rave maori rā, ’o te pe’era’a ïa i te Fa’aora, noa atu ē ’aita tātou e hāro’aro’a nei i te mau mea ato’a. Mai te reira ïa Ziona i te fa’aorara’ahia i te hope’a.

Hi’o Te feiā mo’a, 1:194–206 ; « The Acceptable Offering of Zion’s Camp », i roto Revelations in Context, 213–18.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 102:12–23

E aha te fā nō te mau ’āpo’ora’a nō te ti’ara’a melo ?

Tei roto te tufa’a 102 te mau minuti nō te ’āpo’ora’a i Kirtland, Ohio, i reira te ’āpo’ora’a teitei mātāmua o te ’Ēkālesia i te fa’anahora’ahia. I roto te mau ’īrava 12–23, tē fa’a’ite nei te Fatu i te terera’a ’ohipa tā te mau ’āpo’ora’a teitei e pe’e ’ia rave ana’e rātou i te mau ’āpo’ora’a nō te ti’ara’a melo nō te feiā tei rave i te ’ōfatira’a ture teimaha.

’Ua ha’api’i te peresideni M. Russell Ballard : « I te tahi taime e ui mai te mau melo nō te aha te ’Ēkālesia e fa’atupu ai i te mau ’āpo’ora’a fa’atītī’aifarora’a [ti’ara’a melo]. E toru tumu : nō te fa’aora i te vārua o te ta’ata ’ōfati ture, nō te pāruru i te ta’ata hara ’ore, ’e nō te fa’aherehere i te vi’ivi’i ’ore, te parauti’a ’e te ro’o maita’i o te ’Ēkālesia » (« A Chance to Start Over: Church Disciplinary Councils and the Restoration of Blessings, » Ensign, Tetepa 1990, 15).

Hi’o ato’a Topics and Questions, « Membership Councils », Vaira’a buka ’evanelia.

Te Ha’api’ira’a Tumu ’e te mau Fafaura’a 103:1–12, 36 ; 105:1–19

E nehenehe Ziona e patuhia i ni’a noa i te mau parau tumu o te parauti’a.

Nō te aha te feiā mo’a i ’ere ai i tō rātou fenua tei parauhia i Missouri ? Tē vai ra paha e rave rahi tumu—hō’ē noa a’e tumu tā te Fatu i parau, ’oia ho’i, « te mau hara a tō’u mau ta’ata ». ’Āhiri ē ’aita te reira, e « fa’aorahia paha » o Ziona (Te Ha’api’ira’a Tumu ’e te mau Fafaura’a 105:2). ’A tai’o ai ’outou Te Ha’api’ira’a Tumu ’e te mau Fafaura’a 103:1–12, 36 ; 105:1–19, e ’ite mai ’outou i te tahi mau mea tei fa’ataupupū i te ha’amaura’a o Ziona i Missouri ’e vetahi mau mea ’o tei tauturu i te reira. E aha tā ’outou i ha’api’i mai ’o tē nehenehe e ha’amau ia Ziona i roto i tō ’outou ’ā’au, tō ’outou fare, ’e tō ’outou orara’a huira’atira ?

Te Ha’api’ira’a Tumu ’e te mau Fafaura’a 103:12–13, 36 ; 105:1–6, 9–19

E tae mai te mau ha’amaita’ira’a i muri mai i te mau tāmatara’a o te fa’aro’o.

E rave rahi haere’a, ’ua riro te ’āmuira’a atu i roto i te pūhapa o Ziona ’ei tāmatara’a nō te fa’aro’o. E rāterera’a roa, e mea ve’ave’a, te mā’a ’e te pape i te tahi taime e mea varavara. ’E i muri a’e i te mau mea ato’a tā rātou i fa’a’oroma’i, ’aita roa a’e te pūhapa o Ziona i manuia i te fa’aho’i i te feiā mo’a i tō rātou fenua. ’A feruri na ē ’ua hōro’ahia ia ’outou te rāve’a e pāpa’i i te hō’ē rata i te hō’ē melo nō te pūhapa o Ziona tei fa’a’āueue i tōna fa’aro’o i te Fatu nā roto i te ’ohipa i tupu nōna. E aha tā ’outou e nehenehe e parau nō te fa’aitoito i teie ta’ata ? E aha te mau parau mau tā ’outou e ’ite mai i roto Te Ha’api’ira’a Tumu ’e te mau Fafaura’a 103:5–7, 12–13, 36 ; 105:1–6, 9–19 ’o tē nehenehe e tauturu ?

I muri iho e nehenehe ’outou e feruri i te hō’ē hi’ora’a nō teie tau nō te hō’ē tāmatara’a mai teie tō te pūhapa o Ziona—mai te hō’ē misiōnare e ’ohipa itoito nei, ’aita rā e ta’ata e tomo mai i roto i te ’Ēkālesia maoti tāna mau tauto’ora’a. ’Ia au i tā ’outou i tuatāpapa, nāhea ’outou i te tauturu i teie misiōnare ’ia hi’o i tāna misiōni ’ei manuiara’a tāmau noa ?

Nāhea tō te Fatu ha’amaita’ira’a ia ’outou « i muri a’e i te mau ’ati rahi e rave rahi » ? (Te Ha’api’ira’a Tumu ’e te mau Fafaura’a 103:12).

Hi’o ato’a 1 Nephi 11:16–17 ; Alama 7:11–12 ; Te Ha’api’ira’a Tumu ’e te mau Fafaura’a 6:33–36 ; 84:88 ; 101:35–36 ; David A. Bednar, « On the Lord’s Side: Lessons from Zion’s Camp », Ensign, Tiurai 2017, 26–35, ’aore rā Liahona, Tiurai 2017, 14–23 ; Topics and Questions, « Endure to the End », Vaira’a buka ’evanelia ; « ’Auē te Pa’ari », Te mau hīmene, N°41.

Fa’aineine nā roto i te tuatāpapara’a i te ’ā’amu heiparau o te mau heheura’a. E tauturu te hāro’aro’ara’a i te heiparau o te mau heheura’a i roto Te Ha’api’ira’a Tumu ’e te mau Fafaura’a ia ’outou, ’ia māramarama ’e ’ia fa’a’ohipa i te mau parau tumu tā te reira e ha’api’i nei. Tē hōro’a nei te Mai, pe’e mai i te mau hono o te rahira’a o teie mau mātēria. Nō Te Ha’api’ira’a Tumu ’e te mau Fafaura’a 102–5, hi’o Te feiā mo’a, 1:194–206 ; « The Acceptable Offering of Zion’s Camp, » i roto Revelations in Context, 213–18 ; ’e « Mau reo nō te fa’aho’i-fa’ahou-ra’a mai : Te pūhapa o Ziona ».

E pūhapa te pūhapa o ’Īserā’ela nā te pae o te mau ’ānāvai nō Fishing River.

E aha te fā o te mau tāmatara’a ?

’A feruri i te parau a’o a Elder Orson F. Whitney nō ni’a i te fā o te mau tāmatara’a : « ’Aita e māuiui tā tātou e memae nei, ’aita e tāmatara’a tā tātou e fa’aruru nei e mea mau’a. E maita’i te reira nō tō tātou ha’api’ira’a mai, e fa’ananeara’a i te mau huru maita’i mai te fa’a’oroma’i, te fa’aro’o, te itoito ’e te ha’eha’a. Te mau mea ato’a tā tātou e mamae nei ’e te mau mea ato’a tā tātou e fa’aruru nei, mai te mea iho ā rā e fa’a’oroma’i māite tātou, e patu te reira i tō tātou huru ta’ata, e tāmā i tō tātou ’ā’au, e fa’arahi i tō tātou vaerua, ’e e fa’ariro ia tātou ’ei mea marū a’e, ’e te ’aroha a’e, ’ei mea ti’amā a’e ’ia pi’ihia ’ei tamari’i nā te Atua […] ’e te reira mea nā roto i te ’oto ’e te mamae, te ’ohipa ’e te ’ati, e noa’a ai ia tātou te ha’api’ira’a ē ’ua haere mai tātou i’ō nei nō te fa’ari’i, ’e ’o te fa’ariro hau atu ia tātou mai tō tātou Metua tāne ’e Metua vahine i te ao ra » (i roto i te Spencer W. Kimball, Faith Precedes the Miracle [1972], 98).

Te Ha’api’ira’a Tumu ’e te mau Fafaura’a 104:11–18, 78–83

’Ua fa’ariro te Fatu iā’u ’ei « ta’ata ti’a’au i ni’a i te mau ha’amaita’ira’a tāhuti nei ».

Ta’a ’ē noa atu te mau tāmatara’a i Missouri, i te matahiti 1834, ’ua fa’aruru ato’a te ’Ēkālesia i te mau fifi i te pae moni, ’oia ho’i te mau tārahu rahi ’e te mau ha’amāu’ara’a rahi. I roto te tufa’a 104, ’ua hōro’a te Fatu i te parau a’o nō ni’a i te huru orara’a o te ’Ēkālesia i te pae moni. Nāhea ’outou i te fa’a’ohipa i te mau parau tumu i roto te mau ’īrava 11–18 ’e te 78–83 nō tā ’outou iho mau fa’aotira’a i te pae moni ?

Hi’o ato’a « Treasure in Heaven: The John Tanner Story » ’e « The Labor of His Hands » (videos), Vaira’a buka ’evanelia.

Treasure in Heaven: The John Tanner Story

John Tanner freely gave all he had, giving us an example of generosity and consecration in serving the Lord.

The Labor of His Hands

Church members around the world volunteer both time and money to serve others-- members and nonmembers alike--as Christ would serve.

Nō te tahi atu mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 103:9

E nehenehe au e riro « ’ei māramarama nō te ao nei » ma te pe’era’a ia Iesu.

• E ani manihini atu i tā ’outou mau tamari’i ’ia tāpe’a i te mau hōho’a nō te hō’ē ’amapura mōrī, te hō’ē mōrī hinu, ’aore rā te tahi atu puna māramarama, ’a tai’o ai ’outou Te Ha’api’ira’a Tumu ’e te mau Fafaura’a 103:9. Nāhea tātou e nehenehe ai e riro mai te hō’ē māramarama nō vetahi ’ē, ’ia pe’e ana’e tātou ia Iesu Mesia ? Hi’o ato’a « Mōrī arata’i » (Buka hīmene nā te mau tamari’i, 38).

E nehenehe au e riro mai te hō’ē māramarama nō vetahi ’ē ’ia pe’e ana’e au ia Iesu Mesia.

Te Ha’api’ira’a Tumu ʼe te mau Fafaura’a 104:13–18

Tē hina’aro nei te Fatu ’ia ’ōpere i tā’u nō te feiā nava’i ’ore.

• ’A hōro’a i tā ’outou mau tamari’i te tahi ma’a minuti nō te hāmani i te hō’ē tāpura nō te mau ha’amaita’ira’a tā te Atua i hōro’a nō rātou (mai te mā’a, te ’ahu, te mau tārēni, te fa’aro’o ’e te hō’ē ’utuāfare). E fa’aitoito ia rātou ’ia tāpura hau atu i tā rātou e nehenehe. I muri iho e nehenehe ’outou e tai’o ’āmui Te Ha’api’ira’a Tumu ’e te mau Fafaura’a 104:13–18, ma te ’imi mai i te mau pāhonora’a i te mau uira’a mai teie te huru : ’O vai te fatu mau o te mau mea ato’a ? E aha tāna e hina’aro nei ’ia rave tātou i teie mau mea ? E nehenehe ’outou ’e tā ’outou mau tamari’i e fa’a’ite mai i te mau ’itera’a i reira te hō’ē ta’ata i te hōro’ara’a mai i te hō’ē mea tā ’outou i hina’aro (hi’o ato’a « The Coat » [video], Vaira’a buka ’evanelia).

  The Coat

  The Coat is a children’s story that depicts a young boy giving selflessly to another child in need.

Te Ha’api’ira’a Tumu ’e te mau Fafaura’a 104:42

E ha’amaita’i mai te Fatu iā’u ’a ha’apa’o ai au i tāna mau fa’auera’a.

• E rave rahi taime i roto te tufa’a 104 ’ua parau fafau mai te Fatu « e rave rahi mau ha’amaita’ira’a » i te feiā e ha’apa’o maita’i i tāna mau fa’auera’a. Nō te tauturu i te mau tamari’i ’ia māramarama e aha te aura’a te « raura’a », e nehenehe ’outou e pāpa’i hōho’a i te hō’ē ha’amenemenera’a ’e e ani i tā ’outou mau tamari’i ’ia tauturu ia ’outou ’ia fa’arahi i te rahira’a menemene—pāpa’i e piti, i muri iho e maha, i muri iho e va’u, i muri iho e ’ahuru ma ono, ’e nā reira noa. I te mau taime ato’a e tu’u atu ’outou i te mau ha’amenemenera’a, ’a tauturu i te mau tamari’i ’ia feruri i te hō’ē ha’amaita’ira’a tā te Metua i te ao ra i hōro’a mai ia rātou.

Te Ha’api’ira’a Tumu ’e te mau Fafaura’a 105:38–40

E nehenehe au e riro ’ei ta’ata fa’atupu hau.

• Nō te tauturu i tā ’outou mau tamari’i ia ha’api’i mai i te ’ā’amu nō te pūhapa o Ziona, e nehenehe ’outou e fa’a’ite i te « Pene 36 : Te pūhapa o Ziona » (i roto Te mau ’ā’amu o te Parau Ha’api’ira’a ’e te mau Parau Fafau, 135–39, ’aore rā, te video e tano i roto i te Vaira’a buka ’evanelia). ’A fa’aea i te mau taime ato’a nō te paraparau nō ni’a i te mau ha’api’ira’a tā tātou e nehenehe e ha’api’i mai nā roto mai i te pūhapa o Ziona—’ei hi’ora’a, tē hina’aro nei te Fatu ’ia vai hau noa tātou ’e ’ia ’ohipa ’āmui ’eiaha rā ’ia ’aimārō ’e ’ia ’aro atu (hi’o ato’a Russell M. Nelson, « Te feiā fa’atupu hau e hina’arohia », Liahona, Mē 2023, 98–101).

  Chapter 36: Zion’s Camp: February–June 1834

• E nehenehe ato’a ’outou e tai’o Te Ha’api’ira’a Tumu ’e te mau Fafaura’a 105:38-40 ’e e ani i te mau tamari’i ’ia ti’a i ni’a ’ia fa’aro’o ana’e rātou i te ta’o « hau ». ’A fa’ata’a ē, ’ua hina’aro te Fatu i te feiā mo’a ’ia fa’atupu i te hau ’e te mau ta’ata ’ī’ino. ’A tauturu tā ’outou mau tamari’i ’ia feruri i te mau mea tā rātou e nehenehe e rave nō te riro ’ei feiā fa’atupu hau, ’e ’a ani ia rātou ’ia ha’uti ta’ata ora i te tahi mau tupura’a.

Nō te tahi atu mau mana’o, ’a hi’o te ve’a Hoa nō teie ’āva’e.

Zion’s Camp (Zion’s Camp at Fishing River), nā Judith A. Mehr