« Mau reo nō te fa’aho’i-fa’ahou-ra’a mai : Te pūhapa o Ziona », Mai, pe’e mai—nō te ’utuāfare ’e te fare purera’a : Te Ha’api’ira’a Tumu ’e te mau Fafaura’a 2025 (2025)

« Te pūhapa o Ziona », Mai, pe’e mai—nō te ’utuāfare ’e te fare purera’a : 2025

Mau reo nō te fa’aho’i-fa’ahou-ra’a mai

Te pūhapa o Ziona

Nō te mea ’aita te pūhapa o Ziona i fa’aho’ihia i te feiā mo’a nō tō rātou mau fenua i te vaefenua nō Jackson, e rave rahi ta’ata tei mana’o ’ua māu’a noa tā rātou tauto’ora’a. Teie rā, e rave rahi ta’ata tei ’āmui mai i te pūhapa o Ziona tei ho’i mai i ni’a i te ’ohipa i tupu nō rātou ’e ’ua ’ite e mea nāhea te Fatu i te fa’atupura’a i te hō’ē ’ōpuara’a teitei a’e i roto i tō rātou orara’a ’e i roto i tōna bāsileia. Teie te tahi o tō rātou mau ’itera’a pāpū.

Iosepha Semita

Hau i te 40 matahiti i muri mai i te pūhapa o Ziona, Joseph Young, tei riro mai ’ei melo nō te pūhapa, ’ua fa’ati’a ē ’ua parau Iosepha Semita i te mea i muri nei :

« E te mau taea’e, tē vai nei vetahi o ’outou tei riri iā’u nō te mea ’aita ’outou i ’aro i Missouri ; tē parau atu nei rā vau ia ’outou, ’aita te Atua e hina’aro ’ia ’aro ’outou. E’ita tāna e nehenehe e fa’anaho i tōna bāsileia ’e hō’ē ’ahuru ma piti tāne nō te ’īriti i te ’ūputa o te ’evanelia i te mau fenua o te ao nei, ’e e hitu ’ahuru tāne i raro a’e i tā rātou fa’aterera’a nō te pe’e atu ia rātou, maori rā ’ia rave mai ’oia ia rātou mai roto mai i te hō’ē pupu tāne ’o tei pūpū i tō rātou ora, ’e ’o tei rave i te tusia rahi mau mai ia Aberahama.

« I teienei, tē vai ra tā te Fatu tānā ’Ahuru ma Piti ’e tānā Hitu ’Ahuru, ’e te tahi atu mau pupu Hitu ’Ahuru ’o te pi’ihia, ’o tei rave i te tusia, ’e ’o rātou ’o tei ’ore i rave i tā rātou tusia ’e tā rātou pūpūra’a i teienei, e rave i te reira i muri iho ».

Brigham Young

« I tō mātou tāpaera’a i Missouri, ’ua paraparau te Fatu i tāna tāvini ia Iosepha ’e ’ua parau iāna : ‘’Ua fa’ari’i au i tā ’outou ō’, ’e ’ua fāna’o mātou i te ha’amaita’ira’a ’ia ho’i fa’ahou mai. I tō’u ho’ira’a mai, e rave rahi hoa tō’u tei ui mai iā’u e aha te faufa’a i te pi’ira’a i te mau tāne nā roto mai i tā rātou ’ohipa nō te haere atu i Missouri ’e e ho’i mai ai, e au ra ’aita hō’ē ’ohipa i ravehia. Nā ’o mai nei rātou : ‘’O vai tei ’āpī nō te reira ?’. ‘Mai te peu nā te Fatu i fa’aue ’ia rave i te reira, e aha ïa tāna fā nō te ravera’a i te reira ?’ … ’Ua nā ’ō atu vau i teie mau taea’e ē ’ua ’āpī maita’i au—’ua ’āpī ’e te mau ’āpī rahi—’oia mau, ’ua ’ī ’e ’ua mani’i roa mai i te ’ite ’o tā’u i fa’ari’i i te rāterera’a ’e te peropheta ».

Wilford Woodruff

« Tei roto vau i te pūhapa o Ziona ’e te peropheta a te Atua. ’Ua ’ite au i te mau aura’a o te Atua ’e ’ōna. ’Ua ’ite au i te mana o te Atua i ni’a iāna. ’Ua ’ite au e peropheta ’oia. Te mea tei fa’a’itehia iāna e te mana o te Atua i roto i taua misiōni ra, ’ua riro ’ei mea faufa’a rahi roa nō’u ’e nō te mau ta’ata ato’a tei fa’ari’i i tāna mau arata’ira’a ».

« I te taime ’a pi’ihia ai te mau melo nō te pūhapa o Ziona, e rave rahi o mātou tei ’ore i ’ite noa a’e i te hōho’a mata o te tahi ’e te tahi ; e feiā ’e’ē mātou te tahi ’e te tahi ’e e rave rahi tei ’ore roa i ’ite a’ena i te peropheta. ’Ua ha’apurarahia mātou nā rāpae, mai te tō papa’ā i tīti’ahia i roto i te hō’ē tīti’a, nā roto i te mau fenua ato’a. E feiā ’āpī tamāroa mātou ’e ’ua pi’ihia mātou i taua taime ra ’ia haere atu ’e ’ia fa’aora ia Ziona, ’e te mea tā mātou e rave, e ti’a ia mātou ’ia rave ma te fa’aro’o. ’Ua putuputu ’āmui mātou nō te mau tuha’a fenua ato’a i Kirtland ’e ’ua haere atu mātou nō te fa’aora ia Ziona, ma te fa’atupura’a i te fa’auera’a a te Atua nō mātou. ’Ua fa’ari’i te Atua i tā mātou mau ’ohipa mai tāna i fa’ari’i i te mau ’ohipa a Aberahama. E rave rahi ’ohipa tā mātou i rave, noa atu ’ua ui pinepine mai te mau ta’ata tāiva ’e te mau ta’ata ti’aturi ’ore i te uira’a ‘e aha tā ’outou i rave ?’ ’Ua noa’a ia mātou te hō’ē ’itera’a ’o tē ’ore roa e noa’a ia mātou nā roto i te tahi ’ē atu rāve’a. ’Ua fana’o mātou i te ha’amata’ira’a ’ia hi’o i te hōho’a mata o te peropheta, ’e ’ua fana’o mātou i te ha’amaita’ira’a ’ia rātere nā muri iāna e 1 600 kilometera i te ātea, ’e te ’itera’a i te mau ’ohipa a te vārua o te Atua iāna ra, ’e te mau heheura’a a Iesu Mesia iāna ra ’e te tupura’a o taua mau heheura’a ra. ’E ’ua ha’aputuputu mai ’oia fātata e piti hānere peresibutero ’ati a’e te fenua i taua tau rā ’e ’ua tono ia mātou nā te ao ato’a nō te poro i te ’evanelia a Iesu Mesia. ’Āhani ’aita vau i haere atu i te pūhapa o Ziona, ’aita vau i’ō nei i teie mahana [i Roto Miti, e tāvini ra i roto i te pupu nō te Tino ’Ahuru ma Piti] […] Nō te haerera’a, ’ua tūra’ihia mātou i roto i te ’ō vine nō te poro i te ’evanelia, ’e ’ua fa’ari’i te Fatu i tā mātou mau ’ohipa. ’E i roto i tā mātou mau ’ohipa ato’a ’e te hāmani-’ino-ra’a, ma tō mātou orara’a e ha’amata’u-pinepine-hia, ’ua tītauhia ia mātou ’ia ’ohipa ’e ’ia ora ma te fa’aro’o ».

« Te ’itera’a ’o tā [mātou] i fa’ari’i ma te rāterera’a nā roto i te pūhapa o Ziona, ’ua hau atu ïa i te faufa’a o te ’auro ».